صحيفة كورة سودانية الإلكترونية

هدى عربي .. نادوا لي حسن يا البنيات!!

170

بالعربي الكسيح

محمد الطيب الأمين 

هدى عربي .. نادوا لي حسن يا البنيات!!

* بينما (أنا قاعد في صمة خشمي) إتصل علي واحد من الأخوان .

* وبعد تفكير وتدبير وجدت أن الحوار الذي دار بيني وبينه في الإتصال الهاتفي ينفع جدا أن يكون عمودا.

* محمد كيفك ؟

* بخير وعافية والله .

* يا محمد سمعت بموقف هدى عربي ؟

* لا والله ، أنا سمعت بموقف جاكسون وشروني لكن هدى عربي عملت ليها موقف وين ؟

* الزول ده لما قال لي (سمعت بموقف هدى عربي) بصراحة أنا قلت احتمال ناس الحرية والتغيير غيروا أسماء مواقف المواصلات كجزء من خطة لمعالجة الأزمة.

* ياخ أنا جادي معاك ؟

* يا ود الحلال هدى عربي موقفها شنو قول ؟

* هدى انسحبت من أغاني وأغاني!

* لما قال لي هدى انسحبت من أغاني وأغاني قلت ليهو أنت قاصد هدى عربي ولا حنان النيل ؟

* لا هدى عربي يا محمد .. حنان النيل اعتزلت زمان .

* طيب هدى ولا سميرة دنيا ؟

* لا هدى يا محمد .

* انسحبت لشنو؟

* قالت عشان لجنة إزالة التمكين شالت حسن فضل المولى من قناة النيل الأزرق .

* يعني انسحبت زعلانة ؟

* أي.

* زعلانة من لجنة إزالة التمكين الثورية  ولا زعلان عشان شالو حسن ؟

*زعلانة عشان شالو حسن .

* وخلت البرنامج ؟

* أي خلتو.

* طيب دي بسيطة ياخ .

* قال لي كيف بسيطة ؟

* قلت ليهو رجعوا ليها حسن بس .

* نطلع مسيرة نحرق (لستك لستكين) نطالب بحل لجنة إزالة التمكين الثورية  .

* ونرجع حسن لهدى،  أو نرجع هدى لحسن .

* يعني يبقوا علينا (كورونا وعدم رغيف وانسحاب هدى عربي) ؟

* معقولة دي ؟

* معقولة نصوم رمضان بدون رغيف وبدون هدى عربي ؟

* مستحيل .

* نحن ممكن نصوم بدون سحور لكن ما بنقدر نصوم بدون هدى عربي .

* (هزت الكتف) عندنا أهم من (العدسية) .

* (الرشاقة وشعر الرأس المطلوق) عندنا أهم من (الحلو مر) .

* (الضحكات المسيخة وكسير التلج) عندنا أهم من (العصيدة) .

* (ثياب الربط) البتتزحلق (عن قصد وبدون قصد) عندنا أهم من (البلح) .

* كيف نصوم وهدى عربي ما في ؟

* عليك الله ده ما وهم يا جماعة ؟

* نحن في شنو وده بيقول لي هدى عربي عملت موقف ؟

* المهم .. أنا وصاحبي واصلنا الحوار .

* قلت ليهو : موقف هدى عربي العملتو ده كان بخليها كبيرة  لو انسحبت من البرنامج أيام الثورة مش أيام إزالة التمكين.

* قال لي هدي عربي جات مقر الإعتصام يا أستاذ لكن .

* قلت ليهو : جات بعد مقر  الإعتصام بقى برنامج ترفيهي الناس بتجيهو شايلة الكيك والفشار والليدو ولا جات قبل سقوط البشير لما البنات برجعن البمبان والأولاد بيموتوا في الظلط؟

* عمك سكت ما جاوب.

* قلت ليهو : معليش نحن ما عندنا حق نصنف الناس وما عندنا شغلة بالناس الجات مقر الإعتصام وشايلة كيك في النهاية الثورة للجميع .

* لكن هدى لو عندها موقف كان تسجلو أيام الثورة ، كان ترفض المشاركة في أغاني وأغاني لما أمهات الشهداء بطلن يتفرجن علي التلفزيون،  لما البلد بتنزف،  لما الجثث رموها في النيل .

* قال لي : هي قالت اتعاطفت مع حسن لانو بالنسبة ليها مرشد حتى على الصعيد الاسري .

* مرشد ؟ قال : أي.

* دي حركات بنات يا أخوي.

* هدى عربي أهون واضعف من أنها تضحي ببرنامج أغاني وأغاني.

* واتحداك لو هدى تقدر تنسحب .

* أتحداك والله .

* والله مش لو شالوا حسن ، لو شالوا السر قدور ذاتو هدى ما ح تنسحب .

* حركات بنات ما أكتر  .

* نظام يا حسن أنا انسحبت معاك،  وبكرة لو جاها تلفون من (خفير القناة) تقول ليك أنا رجعت تقديرا للوساطات.

* وساطات ب(الحاء) .

* هدى اصلا فجأة كده جاتنا (كبيرة كده) في أغاني وأغاني وبالواسطة .

* لا سمعنا بيها في نجوم الغد ولا أصوات وأنامل ولا حتى الدورة المدرسية .

* ظهرت (كبيرة كده وقالوا لينا دي فنانة صاعدة) .

* صاعدة بعد العمر ده ؟

* المهم .

* أنا دايرك تعرف حاجة واحدة إنو هدى عربي ما ح تنسحب من البرنامج إلا في حالة واحدة بس وهي (البرنامج يقيف) .

* ده سوق يا مولانا .

* دايرها تهز ليك كتفها وين يعني ؟

* طيب في كلام إنو هدى كانت بتغني في مناسبات الرئيس المخلوع وزوجته المخلوعة ؟

* قالوا أي .

* يعني هسه محمد ناجي الأصم لو طلب هدى عربي لمناسبة ممكن هدى تعتذر تعاطفا مع وداد بابكر ؟

* لو عمر الدقير قال لهدى عربي تعالى غني لي في عرس ولدي ، ممكن هدى ترفض تعاطفا مع ذلك الصحفي (قريب الرئيس) ؟

* الزولة دي جيبوا ليها حسن يا جماعة.

* الرسول فيكم كان ما جبتوا ليها حسن .

* والله أنا الزعلني في الموضوع ده كلو إنو الزول ده لما إتصل علي أنا كنت في صف الرغيف وشلت التلفون ومشيت تحت ضل الحيطة ولما خلصت الكلام وجيت راجع الصف الجماعة نكروني حطب .

* قلت ليهم يا جماعة أنا كنت واقف وراء الزول ده .. قالوا لي لا أنت جيت هسه وداير تشق الصف .

* في عمك من وراء قال لي : يا زول بطل حركات الكيزان دي ، قلت ليهو : والله أنا ما كوز لكن متعاطف مع حسن .

* وغايتو جنس غايتو .

* قال انسحبت قال.

* جعجعة وكلام فارغ .

* ويا أستاذة : تصدقي كان باقي لي (٧٧) نفر بس واحصل شباك الفرن ؟

* و..و..

* والبنريدو تايه ويا حليلو……… (البيرشدنا وبيوجهنا) .

قد يعجبك أيضا
اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد