صحيفة كورة سودانية الإلكترونية

هزيمة الهلال محلياً بقت زي يوم 31 في فبراير

38

طال السفر

محمد عبدالماجد

• ناس الحلة وقت يكون عندهم زول مهم ، بيبقى محور حديثهم ونقاشاتهم وموضوعهم الرئيسي.
• زي أزمة الوقود.
• لو في زول مهم في حلة ما – ما عاوزين نسمي الحلة.
• وما عاوزين نحددها.
• لو افترضنا ان الزول المهم دا فرضا كدا اسمو (الكنجبر)، بتلقى أي زول في الحلة بتكلم ليكم عن (الكنجبر).
• الما عندو موضوع ، وقت يلاقيك الصباح في الحلة بيقول ليك : الليلة ما شفت (الكنجبر).
• مناسبة (الكنجبر) دا بشرحها ليكم بعد ما أكمل ليكم حكايتو.
• اصبروا بس.
• الموضوع عندو علاقة بمباراة الامس بين الهلال والاهلي مروي.
• ناس الحلة كان أي واحد طلع منهم برة البلد او جاء الخرطوم ، كان أي جواب بيرسله بيسأل من (الكنجبر).
• الكنجبر أساسي.
• اها (الكنجبر) كيف؟.
• وأخبار الكنجبر.
• ان شاءالله (الكنجبر) بي خير.
• وسلموا لي على (الكنجبر).
• وتحياتي للكنجبر.
• ملحوظة ثابتة وراسخة في أي جواب.
• ما في جواب بيصل البلد ما بيسأل من (الكنجبر).
• وصحة الكنجبر.
• واحوال الكنجبر.
• طبعا (جوابات) زمان فيها ثوابت اصلو ما بتتغير.
• فيها حاجات ثابتة.
• التحية والسلام.
• الموضوع.
• ورسل لينا مصاريف.
• وفي الختام التحايا لي ناس البلد واحد واحد.
• ما بخلوا ليهم زول.
• نفر نفر.
• الجواب كان وسيلة الاخبار الوحيدة المتاحة.
• العرس.
• والخطبوها.
• والماتت.
• والسافر برة البلد.
• والعمل ليه صالون جديد.
• والاشترى ليه عربية.
• الاخبار كلها بنقلها ليك الجواب بالتفاصيل المملة بما في ذلك (بقرة) جابر ود الرحيطة.
• جابر ود الرحيطة كان عندو (بقرة) موضوع الحلة.
• الكنجبر الذي حدثتكم عنو دا – بيشبه لي شيبوب.
• أي مباراة للهلال بقى فيها (شيبوب) موضوع اساسي.
• شيبوب عمل.
• شيبوب لعب.
• شيبوب سجل.
• وشفت شيبوب.
• والزول دا لعاب.
• والزول دا صعب.
• وكمان عندو (شخصية) القائد في الملعب.
• امس وقت شيبوب سجل في مرمى الاهلي مروي ، احتفل بهدفه مع الجميع.
• الروح الطيبة بين اللاعبين ظاهرة.
• احتفل مع بشة الصغير ومع صهيب الثعلب.
• واحتفل مع ابوعاقلة والطاهر سادومبا.
• واحتفل برة مع شلش.
• والملعب كله في مروي احتفل معه.
• واضح ان شيبوب لاعب محبوب في الهلال وعنده شخصيته المستقلة.
• لاعب جاء من المريخ ، وانصهر بهذا الشكل التام في الهلال.
• بقى يكاتل.
• ويقالع.
• ويعمل أي شيء من اجل الهلال.
• يوزعها.
• ويقسمها.
• ويسجل في الاقوان.
• تاني في شنو؟.
• ما خليت لينا شيء يا شيبوب.
• نرجع لموضوع الحلة وحكاية الكنجبر.
• الحكاية لسه ما كملت.
• الحكاية فيها باقى.
• فيها تفاصيل تانية.
• في الحلة برضو بعيدا عن الشخصيات وقت يكون في حاجة او حدث او مشروع مهم في الحلة كلهم بكونوا مشغولين بيه.
• الموضوع برضو بيبقى المحور الأساسي في أي جواب يصل البلد.
• مثلا لو كان في (صهريج) جديد في الحلة.
• الصهريج بيبقى القضية الاساسية.
• ركبنا الصهريج.
• الصهريج اشتغل.
• وتبرعات.
• ولجان.
• وجمعية خيرية.
• واي جواب يصل البلد بيسألو من (الصهريج).
• ولو في بابور كهربة جديدة ركبوها في الحلة للكهربة ، البابور بيقى حديث الحلة.
• اشتغل.
• وقطع.
• وجبنا الجاز.
• وعاوز ليه (سير).
• ناس الحلة أي حاجة عندهم جديدة بيعملوها موضوع.
• الترابط بين الناس كبير.
• والحاجات البتربط بين الناس في الحلة كتيرة.
• القضايا العامة ممكن تكون قضية خاصة لي زول في الحلة.
• ما عندهم فواصل.
• ناس المدينة انشغلوا في رقبتهم.
• ما في حاجة عامة بتهم ليها زول.
• أي زول بيفكر في رقبتو.
• هسع نحن في الهلال الرابط عندنا بقى (شيبوب).
• وللامانة شيبوب قاعد يعمل في حاجات جديدة.
• نحن ما شفناها قبل كدا.
• شيبوب بيلعب بي مزاج.
• لاعب كورة بتحس معاه بالاختلاف.
• بتحس بالفرق.
• والاحترافية.
• في الهلال أهم شيء اللاعب يكون عنده شخصية.
• الهلال أي لاعب جابو من المريخ ، جابو عشان عندو شخصية.
• لاعب عندو شخصية ما بقعد في المريخ.
• عينو في الهلال البخليه يقعد في المريخ شنو؟.
• الحكاية دي كانت واضحة عند باكمبا.
• شخصية مختلفة.
• وحمودة بشير.
• وعلاءالدين يوسف شخصية 4 ضلف.
• والشغيل مولع نار.
• والآن واضحة شخصية (شيبوب).
• عندو شكل واسلوب براهو.
• الهلال ما بجيب ليه زول ساكت من المريخ.
• شيبوب أمس سجل بطريقة (وردية)…يعني على طريقة محمد وردي.
• ثبت واتقدم ولعب في المرمى.
• وشيبوب امس لعب ليه تمريرة لاطهر الطاهر بطريقة (عثمانية)…يعني على طريقة عثمان حسين.
• أطهر الطاهر سجل ليه هدف ما كان عندو خيار غير التسجيل بعد التمريرة التى وصلته من شيبوب.
• لف وتعال.
• او أرجع لي تاني.
• دفاع أهلي مروي ما في تمريرة زي دي قابلته في الدوري الممتاز.
• انتوا عارفين تمريرة شيبوب لاطهر الطاهر كانت سبب في هدف جيوفاني الثالث.
• الدفاع اللخبطة التى حدثت له من تمريرة شيبوب لاطهر الطاهر لغاية هدف جيوفاني ما طلعت منهم.
• تمريرة تخلع.
• غايتو الهلال بشكله الحالي دا وقت تحدث ليه اضافات التسجيلات تاني ما في زول بيلحقو.
• عاوزين الكاردينال يكمل في تسجيلات المحليين.
• ما تنوموا على كدا.
• لا بد من التكملة في تسجيلات المحليين.
• الناس ديل وقت يدخل عليهم فارس..بيبقوا (صواعق).
• ولو تم اضافة سيف تيري ليهم ، تاني ما في زول بيثبتهم.
• الحكاية بتبقى صعبة.
• ومستحيلة.
• بالمناسبة الانتصارات المحلية والعروض التى يقدمها الهلال هذه الايام ، لا تعني ان الهلال اصبح بدر التمام.
• لسه الهلال عاوز شغل.
• الهلال بنافس في أندية في مستوى الأهلي القاهري والترجي ومازيمبي.
• ما عاوزين القياس يكون على الشرطة والأهلي مروي والأهلي شندي وهلال الابيض.
• ما عاوزين القياس يكون على المريخ.
• المريخ مجلس ما عندو.
• عاوزين طموحات الناس وقياساتها تكون اكبر من كدا.
• عاوزين فريق يهز الارض.
• وعشان الصورة تكتمل.
• لا بد من اضافات أخرى في تسجيلات 4 يونيو.
• سيف تيري بيشبه الهلال.
• الزول دا مع ناس شيبوب والثعلب وجوفياني وبشة الكبير وبشة الصغير ح يعمل عمائل.
• وناس هارونا وسيرجو حاجة ما تخلص.
• وسط فيه الشغيل وابوعاقلة وشيبوب ونزار حامد وبشة 2 وصهيب الثعلب تاني عاوز شنو؟.
• دفاع فيه اوتارا وكولا وسيرجو ..بيبقى قيامة رابطة.
• كملوا في التسجيلات القادمة.
• والكاردينال لا بد من ان يكمل.
• ما يشوف العروض دي وينوم في العسل.
• المستويات التى يقدمها الهلال الآن نتاج التنافس الذي أحدثته الاضافات الاخيرة.
• أي خط في الهلال يجب ان تكون المنافسة فيه قوية.
• أي خانة عاوزين فيها (كتال) عديل كدا.
• التنافس هو الذي يولد الابداع.
• التنافس هو الذي ينتج الانتصارات والبطولات.
• ما يقال عن اللاعبين يقال عن الجهاز الفني أيضا.
• يعني ما تشوفوا الانتصارات والعروض الاخيرة دي وتقولوا الهلال لا يحتاج لجهاز فني جديد.
• مع الجهاز الحالي لا بد من مدير فني اسم في القارة الافريقية.
• اذا كنا عاوزين نحقق بطولات خارجية، كملوا في المشوار.
• كملوا التسجيلات.
• وكملوا الجهاز الفني.
• …………
• ملحوظة : وامشوا على كدا.

هوامش

• هزيمة الهلال محلياً بقت زي يوم 31 فبراير.
• تشوفوا يوم 31 في فبراير – ان شاءالله ما تشوفوا هزيمة للهلال محليا.
• ولا افريقياً.
• متوكل كولا امس قدم مباراة كبيرة.
• وكان من نجوم المباراة.
• كولا مستقبل مدافع لا يشق له غبار.
• اصبروا على اللاعب وادعموه.
• الخامة الموجودة عند متوكل كولا ، لا توجد عند مدافع آخر.
• أطهر الطاهر بعد انتقادات شديدة عليه ، واعتراضات واستهجان وحرب ، ها هو يقدم في أرقى المستويات.
• لاعب صغير في السن ويمتلك مواصافات خاصة وله خبرات كبيرة كيف يفرط فيه الهلال.
• تراجع مستوى اطهر الطاهر كان بسبب الضغوط والانتقادات التي كان يتعرض لها.
• الهلال بفضل الله وصل الى 53 مباراة بدون خسارة.
• اللهم احفظها نعمة من الزوال.
• للمحافظة على هذا السجل لا بد من الاجادة اكتر.
• لا بد من اضافات أخرى.
• المحافظة على الانجاز أصعب من صناعة الانجاز.
• افتقدنا السموأل ميرغني رغم تألق اطهر الطاهر.
• السموأل لاعب ما فيه أي كلمة.
• كابو أيضاً تطور كثيرا.
• جمعة اصبح حارس الهلال الأساسي وهذا يستوجب منه ان يكون أكثر حرصاً وحذرا.
• الحارس الاول في الهلال ننتظر منه قفزة أكبر.
• جمعة عليه مراجعة حساباته في العكسيات.
• مهاجم الأهلي مروي مصعب سجل في الهلال هدف يفترض ان لا يسجل في الهلال.
• ما عاوزين اخطاء.
• جيوفاني في تقدم مستمر.
• من مباراة لأخرى.
• فريق الأهلي مروي قدم كورة جيدة ، ولعب بدون ضغوط وشكّل خطورة على الهلال مع الثلاثية.
• نتيجة أم درمان تكررت في مروي.
• وجد الهلال في مروي مساندة كبيرة من جماهيره في مروي.
• والعداد شغال.
• والله يديمها نعمة.
• كملوا في التسجيلات.
• بنكرر تاني.
• الهلال عاوز اضافات.
• وعاوز مدير فني مع الجهاز الفني الموجود حالياً.
• محمد الطيب لو كان موجود الايامات دي كان عملها لينا كلها (الوسيط التقني).
• الخيل تجقلب والشكر للوسيط الفني.
• انظروا لمباراة كوبر القادمة بمسؤولية اكبر.
• ما في مباراة ساهلة.
• وما عاوزين استهتار.
• الهلال بحقق في ارقام قياسية ويجب المحافظة عليها.
• برشلونة خسرت أمام نادي في مؤخرة الترتيب بعد سلسلة من المباريات القياسية التى لم تخسر فيها برشلونة.
• ما عاوزين أي استهتار.
• ما عاوزين غرور.
• عاوزين جدية أكبر.
• ومسؤولية أعظم.
• وامشوا لي قدام.
• وما تعاينوا ورا.
• وابقوا على سفر.
• ……….
• عاجل: أهداف الهلال في مروي جاءت على انغام الدليب.

 

 

 

 

حمل تطبيق كورة سودانية لتصفح أسرع وأسهل 

لزوارنا من السودان متجر موبايل1

http://www.1mobile.com/net.koorasudan.app-2451076.html

2,456حملوh التطبيق               

لزوارنا من جميع انحاء العالم من متجر قوقل

https://play.google.com/store/apps/details?id=net.koorasudan.app 

17756 حملو التطبيق

على متجر apkpure

https://apkpure.com/ar/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9/net.koorasudan.app

على متجر facequizz

http://www.facequizz.com/android/apk/1995361/

على متجر mobogenie

https://www.mobogenie.com/download-net.koorasudan.app-3573651.html

على متجر apk-dl

http://apk-dl.com/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9

على متجر apkname

https://apkname.com/ar/net.koorasudan.app

 

 

 

قد يعجبك أيضا
اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد