* هل تعلم اخي ان راتب مدرب الحراس عندنا يساوي ضعف راتب المدرب العام ?
* وهل تعلم اخي انو الاتنين ماقاعدين يشيلو مرتبات ?
* وهل تعلم انو التش ومحمد آدم وبكري عندهم متأخرات من مبلغ التسجيل لي اسي ماهبب ليهم زول ?
* وهل تعلم اخي انو الاذن الذي منح لباسكال لمغادرة البلاد عشان زوجتو زومتها ضايقي
* ماكان سببو زومة زوجتو الضايقي بقدر ما كان ترضية لتذمره من متأخرات راوتبه التي بلغت سته شهور بالتمام والكمال ???
* وهل تعلم اخي ان ما يقال عن المدرب العام ومدرب الحراس يسري علي بقية اعضاء الجهاز الفني ???
* وهل تدري اخي ان الجميع جهاز فني ولاعبين بعملوا في هذه الظروف احتراما للكيان وللجمهاير التي لاتعرف ماذا يدور خلف الكواليس
* ايها الناس
* هل قبول البرمجه الضاغطة للدرجة دي برضو عشان انقطع الاتصال بسوداكال
* ولا مافي زول فاكر للحته دي ?
* ده صميم عمل المجلس
* لانو قبول مثل هكذا برمجه لفريق الجاهزين فيهو سبعطاشر ببقي مشكلة كبيرة يمكن ان تودي لانهيار بناء موسم كامل
* ايها الناس
* بالطريقة دي الامور مابتمش
* اخير السليقه من المرقه المصنعه
* وهل تعلم اخي انو بهذه الطريقه سنخسر الكثير و وقتها لن ينفع الندم
* السيد آدم عليه ان لا يربط مصير المريخ بامور لا تخص المريخ
* اذا كان هذا هو الحال في عهده في اول شهرين
* الجابرنا شنو علي قبوله بكل هناته رئيسا للمريخ !!!
* ايها الناس
* لما تحصل رواتب الجهاز الفني والحوافز وحقوق اللاعبين واموال الاجانب
* تبقي دخلت اللحم الحي
* هو وينو اللحم البتحمل قدر ده ???
* ايها الناس
*في رمضان الصيام بدخل العضم في العشرة الاواخر
* اول عشرة في الشحم
* تاني عشرة في اللحم
* تالت عشرة في العضم
* وماشفنا لينا صيام ببدأ عشرتو الاولي بالعضم
* المهم
* علي اعضاء مجلسنا ان يبحثوا عن طريقة للتواصل والاتصال مع السيد الرئيس لوضع النقاط في الحروف
* يايتحمل مسؤوليتو كاااااش جرجير اخدر
* يا بنقبل عذرو ونتمني له التوفيق في مرحلة اخري
* وفي الحاله دي علي بقية المجلس اختيار واحد من حلين
* يا يدقوا جيوبهم و يقولوا نحن لها
* بعد داك يجيبوها من اموالهم
* من حر مالهم
* يستقطبوها
* ينزلوها من السما
* ده ماشغلنا
* ده شغلهم هم براهم
* نحنا شغلنا نناصرهم ونساعدهم اذا فعلوا ذلك
* اما الخيار التاني فهو
* يدقوا صدورهم و يقولوا سجمنا صرف قدر ده نحنا ماناسو
* ايها الناس
* ان تنصروا الله ينصركم
* اها
* نجي لي شمارات والي الخرتوم
* سؤال يا والينا
* الباعوض الحايم فينا
* تبع البيئة ولاتبع الصحه ولا اتحادي ولا مواطن لدينا
* من حقو يعيش وسطينا
* والجقور يا والينا
* ما الاكلت الكبري
* الجقور الاستوطنت فينا
* في الحله بقت اكتر منينا
* واسمن من ناس نفيسه وناس امينه
* الجابتها المخازن البخزنوا فيها البضائع وسطينا
* في وسط السكن اللواري داخلات ومارقات يا والينا
* وفي نص الحله واقفات لينا
* المخالفات المخازن في المناطق السكنية يا والينا
* ولا المخالفات سك ستات الشاي و حملات المحليه البتصادر من ست اللقيمات باقي دقيق الفينا???
سلك كهربا
ننساك كيف والكلب قال البشوف اللواري شاحنات مارقات من العرضه بالليل يقول ياربي انا وييييين !!!!
والي لقاء
سلك
* لانو قبول مثل هكذا برمجه ….
يازول انت حكايتك شنو مع هكذا دي ؟؟؟
مليون مرة قلنا ليك دا خطأ لغوي منتشر في اوساط المذيعين الزلمات , ياخي انت زلمة ؟؟