*الحياة في البلد دي مستحيلة
*مامعقولة عديل كدة
*كلو زول يقطع سعر من راسو
*اتنين كيلو ونص ضان بمليون جنية
*الكيلو باربعمائة الف جنية
*شخصيا مابحب الكضب
*لذا مابقول جنيه للالف جنيه
*ده كلام كيزان ساكت
*لما الكيزان خجلوا من تدهور قيمة الجنيه بسبب سياساتهم الاقتصادية الرعناء
*وبسبب عيون غالبيتهم الطايرة
*اطلقوا بدعة وصف الجنيه علي الالف جنيه
*لكن برضك ما استغنوا عن سيرة الجنية
*فكانوا يستعملونها عند الطلب لتجميل وجوههم التي تلونت بمليون لون
*فمثلا يجيك كوز من عينة ناس رب رب رب ديك
*ويقول ليك الحكومة اتبرعت لدعم الطلاب بستة مليار جنيه
*هنا برجع للجنيه القديم
*الحكومة ما دافعة عاد
*واول ماتجي حتت جبايات الحكومة
*يقول ليك الربط كلو سته مليون جنيه
*وهي نفسها السته مليار الفوق
*بس الفرق تتمسك الحكومة بالجنيه القديم لما تكون دافعه
*وتطلق الجنيه ابو الف علي جباياتها
*غايتو جنس غايتو
*المهم
*ولعت الاسعار وبقت نار
*كيلو الطماطم ميتين وخمسين الف جنيه
*واولاد هدية لما مسكوا البلد دي الميتين وخمسين الف جنيه كانت بتشتري مشروع الجزيرة كلو
*لكن تقول شنو
*رطل اللبن عشرين الف جنيه
*لبن الطير ظنيتو
*ده بحلبو ولا بنقط برا!!!!
*لو داير تعمل حلة محشي لازم تجيب صلصة وزيت ولحمة مفرومة وطماطم(ووب علي) واسود وفلفليه وكوسة صغاااره بتاعت محشي وبقدونس وكروم وورق العنب(لو مالقيت شوف اغنية القلع) ورز وبهارات
*يعني داير ليك قرض من بنك الاسرة عشان تعمل ليك حلة محشي في اليومين دي في ظل الاسعار دي
*ساندوتش الهوت دوق العلمونا ليهو اولاد حاجة هدية وصل خمسة وتسعين الف
*اريت لو ماعلمتونا ليهو يا عمر
*البيتزا الصغيرة مية خمسة وتسعين الف
*علمتونا ليها قبال تعلمونا السرقة لييييه؟؟؟
*وفوضي الاسعار خلت كل مكان سعرو برا
*باكو البنسون آند هدجيز يختلف سعره من مكان لمكان داخل نفس المكان
*في امدرمان ستمائة الف
*في سوق الديم اربعمائة الف
*يعني تاني الداير يولع يمشي الديم
*شخصيا من بدري بحب الديم وناس الديم واحي الديامة الناس الفي الدنيا شامة
*واحي الحبش
*الاحياء منهم والاموات لوقفتهم القوية مع ثورتنا
*ثورتنا الحاورت الدفاع كلو والقون فاضي ومادايره تشوت
*جهجهتنا جنس جهجهة
*المهم الباكو في سوق الديم باربعمائة الف بس
*يعني المزاج في الديم ياعمك مابكلفك
*شخصيا انا من زماااااان
*البيت الجامع
*الجامع الديم
*المهم
*فوضي الاسعار والاستغلال البشع اثبات لانو الثورة لسة ولسة لسة مدورة
*لم تصل لاهدافها بعد
*ثورة ماغيرت سلوكنا
*مابتضوي لينا
*فرخة مشوية تلتمية وتمنين الف؟؟؟؟
*بتقول باع ولا بتحلب؟؟؟
*مشوية في صندل؟؟؟
*لاتوجد جهة تدخلت لايقاف مد الاسعار الجنوني
*ولا حماية المستهلك زاتها
*واظنها ماشايفه زول بستهلك
*عشان كده ما لاقية زول تحميهو
*حبيبي
*اخي الحبيب المواطن الفضل
*تستطيع ان تحمي نفسك بنفسك
*حارب ارتفاع الاسعار بمقاطعة الشراء تحت شعار الغالي متروك
*وطبعا هي الاشياء كلها غالية وكلها متروكة
*ولكن نستطيع اشعال حرب مقاطعة الشراء و اعلانالعصيان الشرائي
*اللحمة بتبوظ عليهم
*والطماطم ام سماد دي بتعفن في امها
*واللبن بقطع
*وسيعود للاسعار رشدها
*تعالوا نقاطع
*اصلوا نحنا كان قاطعنا جعانين
*وكان ماقاطعنا برضك جعانين
*ولكن امتلكوا قراركم وماتبقوا جعارين
*تعالوا نثور علي السعر ونردد
*هوي يا السعر ارجع ورا
*ثورتنا دي مابتقدرا
*شارعنا ده فوقو الشرا
*ود المرا يرجع ورا
*ايها الناس
*كردنة جا؟؟؟
*مشكلة
*ايها الناس
*ان تنصروا الله ينصركم
*اها
*نجي لي شمارات والي الخرتوم
*والينا
*ماعندكم ضابط يضبط الاسعار لينا
*معقولة!!!!
سلك كهربا
ننساك كيف والكلب قال ضابط ايقاع؟؟؟؟
والي لقاء
سلك
