و(أما إذا خفت موازينه) يأكل نارو طوالي

بالعربي الكسيح
محمد الطيب الأمين
و(أما إذا خفت موازينه) يأكل نارو طوالي

* واحدة من سيئات حكومة الإنقاذ التي هي في الأصل كثيرة السيئات، من سيئاتها إنها أدخلت للشعب السوداني (مكيفات) جديدة بخلاف (الشاي والقهوة والشيشة والسجائر والتمباك).
* الكيف عند السودانيين لا يخرج من (قهوة، شاي، سجائر، شيشة، تمباك) .
* لما مواعيد (كيفك) تجي وما (تتكيف) ممكن يرميك (الصداع).
* يقول ليك عندي : (صداع غريب، شكلو من القهوة).
* أو من الشاي.
* الحكومة (الله لا سامحها) وقبل ما تسقط أدخلت (البمبان) مكيف جديد بجانب الشاي والقهوة والشيشة.
* بمبان تقيل.
* الناس دي كلها تعودت على البمبان.
* البمبان بقى مزاج وكيف.
* أربعة أشهر تعودنا على البمبان والبمبان تعود علينا.
* لو طلعت مظاهرة بتلقى البمبان قدامك ولو قاعد في بيتك أو مكتبك أو حتى في المستشفى بيصلك البمبان .
* لا أظن أن هنالك سوداني مقيم في أرض الوطن لم يتعرض للبمبان .
* البمبان الفكوهو الجماعة ديل بيكون ريحتو وشطتو وصلت حتى تشاد وأديس وجنوب السودان .
* بقى للناس (كيف) و(عادة) .
* عشان كده بعد يوم (11-4) في ناس كتااار بيكون الصداع عذبهم عذاب .
* صداع بمبان .
* قريفة للبمبان .
* حقو والله ومن باب الذكرى الأسبوعية، كل يوم خميس ناس المجلس العسكري يفكوا لينا بمبان في الجو .
* ساكت كده .
* بمبان بمناسبة الذكرى الأسبوعية وكده.
* ويا حبذا لو بقى معاهو (لستك محروق في نص الظلط) .
* بالمناسبة وحتى لا ننسى، نافع علي نافع قال عن المظاهرات : (تلاتة شُفع حرقوا لستكين) .
* الآن نحن نسأل نافع علي نافع وهو جوه (كوبر) : اللساتك دي كانت (أنبوبة ولا تُيوبلس) ؟
* المهم .
* معركة الهلال أمام النجم الساحلي غداً هي ثورة من نوع آخر .
* الشعب السوداني يعيش حالة من الانتصارات والأفراح الكبيرة ولذلك لابد أن يكون للهلال دور كبير في دعم هذه الانتصارات .
* والهلال تاريخياً له أدوار وطنية مشرفة وناصعة البياض.
* دعم الهلال الثورة بمشاركة جماهيره العظيمة في المظاهرات قبل وبعد السقوط، وقد قابلنا أعداد كبيرة من الجماهير الهلالية التي ألفناها في المدرجات .
* دعم الهلال للثورة كان عظيماً من القاعدة الجماهيرية التي شاركت وكان لها إسهام واضح حتى في ابتكار الشعارات وأغنيات الثورة .
* لا نريد أن (نخصص) لأن الثورة كانت ثورة شعب شارك فيها كل الشعب بمختلف ألوانه، رغم أن جماهير المريخ احتجت لاحقاً على قرار اعتقال جمال الوالي .
* جمال الوالي سيقف أمام القضاء فإذا كان فاسداً فإن العاطفة لا قيمة لها ..
* كل فاسد يتعاقب وكل زول أكل مال الشعب يتعاقب .
* لا كبير على القانون، ولا مجال للعاطفة .
* حتى إستاد المريخ إذا ثبت أن تشييده تم من مال الشعب يجب مصادرته .
* الإستاد ذاتو لو قام من مال الشعب طوالي يتم الحجز عليه .
* خليك من إستاد المريخ، الجوهرة الزرقاء ذاتا لو الحكومة دفعت فيها قروش سنقبل المحاسبة .
* الكاردينال قال الحكومة ما أدتو قروش، ولو المجلس العسكري أثبت إنو الحكومة أدتو يبقى ما عندنا مشكلة في المحاسبة .
* الآن الجماهير في القيادة وساحات الاعتصام وكل الثوار وأهل السودان ينتظرون الفرح القادم من القاهرة غداً بإذن الله .
* ونأمل أن يكون الهلال على قدر الرهان.
* كنا نتمنى أن تكون هذه المعركة بالجوهرة الزرقاء وفي نص النهار .
* كنا دايرنها نهارية في أم درمان الساعة الثالثة ظهراً، أي بعد ساعتين من مواعيد الثورة (الواحدة ظهراً) .
* ولكن قبلنا بترحيل المباراة لأن هذا يعتبر (مهر) يقدمه الهلال للوطن .
* الهلال دفع (مهر الثورة) وهو يلعب غداً خارج الديار .
* ونتمنى أن يحقق الهلال الفرح الأكبر لهذا الشعب ويبعد النجم من المنافسة .
* والمباراة قطعاً لن تكون سهلة، كما أن فوز النجم باللقب العربي سيكون هو الدافع الأكبر بالنسبة له غداً .
* أندية شمال أفريقيا عندما تحقق إنجازات تنفتح الشهية عندهم لمزيد من الإنجازات .
* ولذلك من الخطأ أن نظن بأن فوز النجم بالكأس العربي سيجعله يتراخى أو يتهاون أمام الهلال .
* بالعكس والله .
* النجم يريد أن يجمع بين التاج العربي والتاج الأفريقي في عام واحد .
* والهلال يريد أن يكون صاحب أول انتصارات في العهد الجديد .
* نريد أن ننتقل بالوطن من مربع الانكسارات والهزائم والدموع إلى رحاب الأفراح والبهجة والسرور .
* والهلال قادر على لعب هذا الدور .
* كل نجم من نجوم الهلال عليه أن يتخيَّل أنه يلعب أمام القيادة .
* تخيلوا إنكم تلعبون أمام العدو .
* ثم أن .. الثوار في القيادة وعبر الشاشات الكبيرة سيتابعون مباراة الهلال على الهواء مباشرة .
* بنات وأولاد وآباء وأمهات وأطفال سيتابعون المباراة من أمام القيادة وهذا سيكون بمثابة دافع أكبر، بل هو الدافع الأهم بالنسبة لنجوم الهلال .
* نسأل الله التوفيق لكبير السودان .
* ونركب صافنات ونجيبه (ثورجية) وأصلو الزول بيموت والذكرى تفضل حية .
* و..و..
* ويا أخوانا الشاااااي بيجاي شاي ما عادي بي موية صحة ومعاهو كيكة .