ياشفوت كيف الشعور في مباراة العبور
تغريدة واتساب
بقلم : معاذ ابومؤيد
ياشفوت كيف الشعور
في مباراة العبور
الشفوت رفعوا التمام
وخلص الكلام
ما باقي غير التوفيق من خالق الانام
كل الامور سارت كما نود
وشكرا للشفوت فردا فردا
الاشتغلوا في الخفاء وناس الدعم اللوجستي يوم شكركم مايجي…
طوعتوا المستحيل ودرستونا معني التلاحم والتناغم والروح الوحدة…
**************************
تمر ساعات وكمان لحظات
ونشوف المارد ونحنا في المدرجات
لكن دي شوفة نصاح
دي شوفة الحب المباح
دي شوفة وبعديها تشجيع باندياح
صياح في صياح
حلقومي وحلقومك ديل هم الذاد في الميعاد
ما عايزين متخازل ولاعايزين متفرج ساكت
والله لو شفوت الاستاد عملوا حركة عساكر الخارج وادوا ضهرهم للملعب وقعدنا نشجع كلنا ونغني وننطرب …
وزول واحد يدينا النتيجة عشان الحماس يذيد !!
ياخي دا يوم المنى…
*************************
ما عايزين وصية ياشفووت
تذكرتك هي دعم خزينة الزعيم تشوفها قدامك اتشرطت
والتيفو تخليه مكانو وتنفذ كلام المشرفين..
واللبس الموحد عندو موجهين برضو عايزين الانصات
عايزين اللوحة تكتمل بيكم
المباراة خلصت خلي كل شي في مكانو رجاء لا امرا ……
**************************
رسائل سريعة
الرسالة الاولى!!
لمجلس الإدارة الشفوت ديل دعموكم ياريت تنستروا معاهم وتركزوا علي اسعادهم…
الرساله الثانية!!
ناس الاستثمار كملوا مجهودكم وطلعوا لاعبين اتنين بالشعار الجديد واحد اجنبي وواحد وطني صوروهم وانشروها في القروبات لتشجيع باقي الشركات للرعاية..
الرسالة الثالثة!!
لبعض الأخوة من القوات النظامية واعضاء مجلس الإدارة والمشاهير وناس العلاقات شباك التذاكر معبركم لدخول الاستاد
خليكم غدوة للباقين نترجاكم..
الرسالة الأخيرة!!
للشفوت من مراقبي البوابات خليكم باردين وماعايزين اي خلافات وسهلوا دخول الجميع للمدرجات…
*************************
ما عايزين لينا كرسي فاضي
ولا عايزين لينا زول في الخرطوم يقول مشغول ومافاضي
القلعة الحمراء لينا تنادي
لبي النداء ياشفت الشفوت ياشادي
الألتراس متوحدين ومعلمين
نغني معاهم ياحلوين
كل هتاف يعني وصولنا لدوري المجموعات مسألة وقت
الشفقة للهدف ماحبابة
وشفقتك ممكن تخلي اللاعب كبكابة!!
لو واحد غلط نهتف ليه مش نهتف عليه
ماعايزين مجهودنا يضيع
دفعنا المال من اجل الكيان
ماقصرنا ووفرنا للإدارة الأمان
نتم جميلنا ونشجع بأجمل الألحان
**************************
ختاما
دعواتكم للزعيم
وما التوفيق الا من عند الله
**************************
ونحن علي المدرج هدفنا واحد بس نشجع
في شباب سبقونا بالتشجيع وانجزوا مهمات كتيرة وضحوا بوقتهم ومالهم من اجل جمال المدرج خليك جميل زيهم ونفذ كل الوصايا العشرة عشان تكتمل اللوحة!!
عايزين نتيجة في الميدان
ونتيجة في المدرجات
يعني اللوحتين يعملو لينا معرض عديل….
دي كلها حتكون تاريخ للاجيال
النتيجة وجمال المدرج ….
شفووووووووووت الي المدرج معتدل مااااااااااارش
هال هال مج مج
**************************
تست اخير
يامخرجنا لو سمحت في ناس تعبت علي جمال المدرج أهمية المدرج من أهمية المباراة فهمتنا وسمعتنا !!!
انتقل للملعب قبل زمن كافي
عندنا لوحة ذي باصات تشافي..
**************************
يارب نصرك للمريخ فوق كل ارض وتحت كل سماء
اللهم يارب البيت المعمور والسقف المرفوع والبحر المسجور يا من تجير بين البحور بحولك وقوتك،اللهم يا فالق الاصباح جاعل الملائكة رسولا أنعم علينا بكرمك وجودك وفضلك وحقق الرجاء واجزل العطاء، وافرح صدورنا وانصر مريخنا اللهم كن لاشاوس المريخ مؤيداً ونصيرا بمنك وجودك وفضلك يا رحمن يا رحيم
**************************