يالجنة التدمير باقي ليكم كم يوم وحتقضوها معانا كيف فكة حديد ولافكة رصيد
تغريدة واتساب
بقلم : معاذ ابومؤيد
يالجنة التدمير باقي ليكم كم يوم
وحتقضوها معانا كيف
فكة حديد ولافكة رصيد
جمعتكم مباركة وربنا يتقبل منكم صالح الاعمال
تبقي من زمن التسجيلات سبعة ايام ،،،
وتبقت من فترتكم اربعة عشر يوما
نقضيها كيف معاكم
انتو تدللو ونحن نقول حاضر
امرونا ياحلوين نجيكم نحن بالاحضان !!
مش قاعديت تلولو فينا ومممسكننا الغشاشه !!
مدرج كامل شغالين معاه بسياسة بتين تمغرب عشان اليوم يكمل ؟؟
وباكر نشوف لينا شتلة جديدة نفكها ليهم ويوم آخر يمشي !!
مش ياها سياستكم؟؟
وياهو فهمكم!!
غشوهم واشغلوهم ديل ماصفوة !!
مش ياهو شعاركم !!
عزبتونا وكرهتونا
كتلتو حيلكم واتمسكنتو واتمكنتو !!
واتمكنتو دي تحتها مليون خط
بالله المدرج دا ماهاميكم للدرجة دي!!!
مددتو فترتكم عشان شنو والمستفيد منو؟؟
قلناها زمان وحنعيدها ليكم تاني
رجعونا مكان استلمتونا،،
شرحتوا المريخ بسكين ومشرط ميت
والمشكلة انو اربعة فقط من يديرون الكلام !!
رجعونا مكان استلمتونا،،،،
••••••••••••••••••••••••••
استاذنا الفاتح جبرة بقول اخبار خط هيثرو شنو!!
ونحن حنقول اخبار شكوى شيبوب شنو البي طرف الفيفا
خدعتونا ببريق الكلام
وخليتونا ضحكة قدام الانام!!
شيبوب فات من غير شروط
والوك منتظر يلعب شوط!!!
اشتغلتونا ورسمتو لينا خارطة الطريق الشلعت الفريق!!
استفدتو شنو؟؟
انتو قايلنها حتمر مرور الكرام
دعواتنا ستسبقنا لخالق البشرية
كل لحظة الم مرت علي كل شفت في المدرج معاها دعوة من اخوة الشفت التاني،،،
انتو مفتكرين انو المريخ كرة قدم لينا وخلاص
المريخ دا بيت لكل المريخاب
نايم وقايم وماكل معانا حتى في الوجبات،،،
المريخ حياة وروح للجميع
لكنكم نزعتم الروح من جسدنا
افتكرتوها صراعات ادارية واثبات ذات!!
ونسيتو او تناسيتو الم جمهور المدرجات،،
••••••••••••••••••••••••••
عندنا كم سؤال ليكم قبل الرحيل
لماذا قبلتم التكليف؟
لماذا اصريتم علي التمديد؟
لماذا رفضتم مساعدات الوالي في بعض الملفات؟
لماذا اخرتم الانتخابات وحددتم التاريخ دا بالذات؟
لماذا اربعة اشخاص فيكم يديرون الملفات؟
لماذا تغيب الحقائق وكثرة الظهور في الجرايد؟
من المسوؤل عن ملف الوك وشيبوب؟؟
كم خلفتم وراكم ديون وتركة ثقيلة من المال ومن جاب كريم ولوك ايمال؟؟
لماذا اصدرتم الصحيفة ؟؟
محتاجين اجابات لكل الملفات
واخر اخبار المرتبات؟؟
الكورة في ملعبكم لو تعرفون اصلا معني الكورة وادارتها !!!
••••••••••••••••••••••••••
مسك الختام
ثم ماذا بعد
ماهو الشي الذي لم تكشفوه لنا
ادونا مفاجاءتكم مرة واحدة عشان الالم يكون خفيف علينا
كل شي متوقع من حضراتكم…
••••••••••••••••••••••••••
ونحن علي المدرج ندعم ونشجع ونتفرج
الشعار دا ماحرك فيكم اي شي
واستغليتوه اسواء استغلال!!
لكن سيظل شعارنا حتى ننهض بالكيان ونبعد الكيمان!!
مدرجنا اتالم لالمنا وانتو ماشاء الله برود انجليز!!
طابق شاخور يئن منكم وانتو مبسوطين!!
ضيعتم اهم ثروة لنادي المريخ
ثروة الجماهير!!!!!!
لكم الله ياشفوت المدرجات
وصيتنا لكل الشفوت اي خبر او شتلة القصد من وراها الذمن يفوووووت ويعطي اللجنة يوم عشان يكونوا جالسين علي صدورنا !!
اي عااااااجل معناه انقضاء يوم والانتظار لليوم التالي
انشاء الله فهمتوها!!!
عرفنا القروبات قامت بعلاج الاصابات
وحاليا جايبين لاعبين للتسجيلات!!
انتو قاعدين لشنو بالله!!
••••••••••••••••••••••••••
همسة اخيرة
المفروض نكون شغالين تعبئة للمباراة الافريقية
لكن خليتو حياتنا نكدية
خليتونا بين السماء والارض
اي نتيجة ايجابية تتحقق في المغرب ماعندكم بيها علاقة لامن قريب ولابعيد
صراعاتكم طالت الجميع ابتداء من اللاعبين وختمتوها بالجماهير!!
املنا في الله والحظ وخبرة اللاعبين ،،
من سنة الجمهور مايفوت حتي التمارين؟؟
والان ماعارفين بتين لاعبين!!
كنا ننتظر الابداع،،،
والان منتظرين انقضاء الساعات!!!
بدل نسأل عن دوري المجموعات
بقينا نسأل عن تاريخ الشتات!!
دعواتنا تسبق الفريق للمغرب
ودعواتنا حتكون عليكم مع صلاة المغرب ،،
••••••••••••••••••••••••••
خارج النص
وداعا فيصل العجب افرحتنا كثيرا شكرا لعطاءك وانشاء الله موفق في حياتك ،،،
المريخ كان حياة وقاسم مشترك معاك ياكابتن موفق ونهديك الدعوات،،،،،،،
الاخوة في التسيير
المريخ حياة لينا عايشين معاه صباح ومساء
المريخ جاري في دم الشفوت
المريخ لايستاهل منكم هذا الجحود!!
القصة ماقصة مال
القصة قصة عشق وتضحيات في قلوب الرجال،،،،
المريخ يضيع وفي عهدكم اصبح حمل وديع!!!!
المريخ نادي كبير ياناس ،،،،
••••••••••••••••••••••••••
وصيتنا لقائدي المركبات
ماتركز في الرسالة الجاية
ركز في المراية
اتصالك مهم لكن حياتك اهم
••••••••••••••••••••••••••
