يايوم بكرة ماتسرع ..!

سوبر هاتريك

طارق محمد عبد الله

يايوم بكرة ماتسرع ..!

& بكرة القريبة دي ساعة الحقيقة عندما يحل الاشانتي ضيفا على الهلال بمقبرة الخصوم الداخل إليها مصدوم والخارج منها مهزوم مهزوم ياولدي لا تحزن (والمقبرة )طبعا اسم الدلع حقها الجوهرة الزرقاء والشاهد انو الفات ده كلو كوم ومباراة الحسم كوم تاني خالص خالص فإذا عبر زوران بكتيبته لدور المجموعات بالسلامة خير وبركة الخواجة ابو عيون خضراء حينها في السليم اما اذا حدث غير ذلك الشر بره وبعيد الرماد كال حماد وحينها يمكن لأقرب مشجع هلالابي ان يطلقها مدوية ملء الحلق يازوران ياود ام زوران قشة ما تعتر ليك …!
& وجراء النتائج غير المتوقعة لسيد البلد وزعيمها الاصلي في بطولة الدوري الممتاز فإن مباراة الغد تكتسب أهمية بالحجم العائلي الكبير جدا اما التأهل والعبور وحينها سيعم الحبور البلاد ويسعد اذا لم يكن كل فالاغلبية الغالبة من سكان البلاد وانا مقتنع بشدة بأن ٨٥% من سكان السودان واكثر هلالاب والنسبة الباقية ظلمت نفسها بالانتماء لغير الحبور يعني زي ديل الواحد يعمل ليهم شنو يعني ؟؟
& وعلى حد تعبير الأشقاء بشمال الوادي بكرة المويه تكضب الغطاس في مباراة الحسم والتأهل باذن الواحد الاحد نعم كل المعطيات والشواهد تصب في مصلحة ابو الهل اولا الأزرق فاز خارج الديار وهذه مزية كبيرة طبعا والامر الثاني فإن جغرافية المكان يفترض أن تكون دافع إضافي وبتكامل الدوافع باذن الله يادور المجموعات امانه ما جاك هلال واذا قدر لكتيبة زوران ان تعبر وان يكتسب أفرادها المزيد من التناغم والانسجام سيكون لنا كلمة مسموعة باذن الله في المجموعات والهلال قدها وقدود انه الهلال لا كذب أنه جوهرة الطرب قاهر الأفارقة وجالد العرب ولو في مريخابي عندو اعتراض يشرب من الترعة ولا كمان من البحر هسه الجاب المريخاب هنا شنو ؟؟؟ انا عارف …!!
& والشيء المطمئن ان الأزرق وفي كل المعارك الكبيرة كان كبيرا كان أميرا وعلى قدر الآمال والطموح العالي لذلك نقولها للاشانتي من الليلة أرجي الراجيك هلالنا متأهب ومستنيك لتكرار فوزه باذن الواحد الاحد ورفاق الشغيل ونزار وأبو عاقلة قدها وقدود ومافعلوه خارج الحدود سيكرروه وفارس ام درمان قادر على اسعاد السودان وصدقوني هلال البطولة الإفريقية غير غير ..
اهداف سريعة ..اهداف سريعة
& عندما يكذب الطفل الصغير يتم تقويمه بعدة طرق تربوية منها الحديث ومنها القديم .
& وعندما يكذب الشاب يمكن اللحاق بالخصلة القبيحة والتخلص منها حتى وان تضاعف الجهد مائة مرة .
& وعندما يكذب العجوز سواء امرأة او رجل وهو على بعد خطوتين والقبر فإن الكارثة أكبر بطبيعة الحال لطفك يااااارب .
& كل الامنيات للابن الصغير هلال الأبيض بالتعويض والتأهل.
& وليت الأمل يفعلها ويعيد الأمور إلى نصابها الصحيح .
& اما المريخ انا مندهش من الخوف الهستيري بالرغم من أنه متقدم في الذهاب بثلاثية نظيفة …!
& الهلال الرقم الصحيح بالكرة السودانية وغيره الكسور والبواقي .
& ازرق وابيض لون الفل هلال القمة حبيب الكل .
& هلال قيافه وفايت الناس مسافه .
& واخيرا احمد الله كثيرا انني حي ازرق .