*يا الشايل هم غيرك*

*نبض الصفوة*

*امير عوض*

شهرين.. و اللغلغة مستمرة.

شهرين شنو.. تسعة شهور يلغلغوا.

إعلام الهلال نسي فريقه و تحول غزله لعلي أسد و المجلس المحلول.

تركوا ناديهم.. و همومهم.. و صفرهم الثابت.. و بات كل همهم تثبيت مجلس الفشل.

و عوك عوك.. المسمار جاء من ود أبوك.

طيران مبكر من الأدوار الأولي.

لا فلاح أفريقي.. و لا في كأس الوطن.

ود أبوك كشف نمر الورق.. و الأجمل إنو اللعب الباص إسمو (سخانة)!!

سخانة أكتر من كده كيف؟

من الدقيقة (١١) و جماعتنا في (الطراوة).

لا نفعت القناة.. و لا اللغلغة اليومية شفعت.

نقترح نقض الهدف لأنو جاء من طرف تالت.

ود أبوك ده شرعيتو في كأس السودان تابعة للمفوضية و اللا الإتحاد؟

كدي جيبوا اللجنة القانونية؟

إتصلوا بمنظمات (حروق) الإنسان.

قولوا ليهم الباص ده لعبوا سخانة!!

كلموهم إنكم مشغولين بالمريخ و ود أبوك نشلكم.

صدقوني الفيفا حتتدخل.

الفيفا دي حبيبة شداد من زمن قصص الحبوبات بتاعت بلاتر قال لي.

هو بالله بلاتر ده في زول بحكي قصص عنو؟!

بلاتر الطلع فاسد ده واللا واحد تاني؟

المفروض البعرفو ينكرو.. موش يفرح بأنو كان معاهو و قال ليهو.

نرجع للمسمار.

قصدي نرجع لسنار.

ود أبوك ده شكلو من المتابعين لكأس العالم.

عارف أنو أسبانيا و ألمانيا طاروا.

موسم طيران الكبار.

كبار السن و كبار النتائج.

أب مسمار عارف نفسو تابع لي وين!

طار من دور الستاشر و كأس العالم في دور الستاشر.

أهي كلها كاسات.. و نشربها علي الريق.

الدنيا (سخانة) الناس عطشانة.. و الحل عند ود أبوك.

حليل التيم الخرافي.. و الرئيس الخرافي.

حليل المحترفين و النجوم المحليين.

في سنار لم ينجح أحد.

في الوقت الوقعت فيهو (الراكوبة) كان أب زرد متقدم بخماسية.

خماسية مسيخة جنس مساخة.

هدفين للعقرب و هاتريك للغربال!!

ديل أولادكم لو ناسين.

شكراً للعراب.. فمن لا يشكر الناس لا يشكر الله.

شكراً علي الدرر.

و لا عزاء لجماعة (لغلغ).

*نبضات متفرقة*

جمهور المريخ يرفض كل خطوات الوفاق مع الفشلة.

من قادوا المريخ لتجميد التسجيلات لا مكان لهم في مجالس المريخ.

من تصدروا صدر الصحف الزرقاء لا مكان لهم في إدارة النادي لتحقيق التدمير.

لا للوفاق.. و مجلس المريخ الشرعي هو لجنة التسيير فقط.

لا للوفاق الذي يضمن للفشلة مقاعد لا يستحقونها.

المريخ الكبير لا يتأثر بكل هذه الضغوطات و الظروف و يعود بإنتصار خماسي جميل.

الغريب هو أن يرتضي البعض العمل تحت رئاسة من وصفوه بالهلالابي.

التشبث بالمناصب جعل البعض يبلع ألسنته و ينكر ما قاله.

لجنة تقصي الحقائق أفادت بأن المجلس رفض إستقالة قريش في إجتماع ٢٦/٥.

بالرجوع للموقع الرسمي لم نجد في مخرجات ذلك الإجتماع ما يفيد برفض الإستقالة!!

اللجنة المكلفة بتقصي الشرعية (فقط) تغولت في الشأن المريخي و قامت بتحديد مواعيد الإنتخابات!!

ما دخل اللجنة بإنتخابات المريخ و موعد إنعقادها و موعد عقد جمعية النظام الأساسي؟

أيظن أعضاء اللجنة أن شداد أعلنهم أوصياء علي المريخ؟

لجنة تقصي الشرعية رفضت التعامل مع قانون 2017 و الذي يعتمد الإستقالة خلال أربعة و عشرين ساعة و تعاملت مع الإستقالات بقانون 2008.

لماذا أغفلت اللجنة القانون الجديد و أضفت الشرعية علي المجلس المنهار؟!

أيمكن أن يصل تطويع القوانين لدرجة الحكم بقانون قديم مع وجود قانون جديد و واضح؟!

كما ذكرنا سابقاً فقرارات اللجنة لا تعنينا من الأساس.

أغلب محاضر الإجتماعات بعد ذهاب قريش لم تجد من يديرها من الضباط الأربعة.

إدارة مادبو للإجتماع عبر الإسكاي بي هي نكتة ٢٠١٨.

*نبضة أخيرة*

لا وفاق مع الفشلة المتشبثين.