* حركات (كيزان) ..
* مثل العلامات التجارية والماركات العالمية ، نجد ان هنالك حركات مسجلة باسم الكيزان ..
* يقول ليك : دي حركات كيزان ..
* ولعل من أبرز حركات الكيزان التي حفظها الشعب هي أن (تسبح بالنهار وتضبح بالليل) ..
* قدام الناس تعمل فيها (زول الله) وبالليل (زول الشيطان) ..
* لعب باسم الدين وتجارة بالإسلام ..
* وأكثر الكيزان تجدهم يتمتعون بكل صفات ومواصفات (الثعبان) ..
* الثعبان ناااااعم الملمس ولكنه غدار فهو (ود خال العقرب) وكلاهما له علاقة بالكيزان ..
* وأظن أن أزهري محمد علي اتوفق توفيق كبير وهو يصف أحد الكيزان في قصيدة صادقة قال في احدى أبياتها :(ناعم والكلام طاعم ينوم في الجرح منحل ويقوم زي الحبن في محل) ..
* في كوز بيكون ناعم وكلامو طاعم ولكن (عمايلو) تخرب البلد ..
* الكوز لما يقول ليك كلام بيكون قاصد كلام تاني ..
* بيضربك في حتة ما في البال ..
* الكوز ممكن يعزمك عشاء ويعمل ليك حفلة وتاني يوم يمشي معاك المطار يودعك ، وبعد سنوات ح يكتشف أهلك إنو الكوز العمل ليك العشاء هو ذاتو الذي (أسقط بك الطائرة عن قصد) ..
* يكتلك ويجي يمشي يحضر التشييع ويجيب لاولادك سكر ودقيق ويتكفل بكل نفقات (الفراش) ، بل يطلب من (بت المرحوم) أن تحضر الي المكتب فيمنحها وظيفة وعربية ..
* حركات كيزان ..
* كضب ونفاق وظلم وسخف ..
* شفت الحركات دي كيف ؟
* الآن يبدو أن الكاردينال يريد أن يتعامل مع الهلال على طريقتك (حركات الكيزان) ..
* والله صحي ..
* الكاردينال في الأصل هو ليس صادقا وليس نبيلا ..
* شخصية الكاردينال تعتمد بشكل كبير على الكذب ..
* صحيح عمل الجوهرة ولكنه استفاد من الهلال أضعاف ما استفاد منه الهلال ..
* تكفل الكاردينال قبل أيام بطائرة خاصة نقلت الهلال الي كادوقلي وهذا عمل طيب بحساب أن الكاردينال مستقيل ..
* زول مستقيل يتبرع بطائرة خاصة ، كلام جميييييل جعل الجمهور يصفق ويصفر ..
* أمبارح الهلال سافر القضارف وقالوا (بص الهلال خسران) ..
* خسران ب(الفاء) ..
* بص الهلال أربع سنين ما خسر ما يخسر إلا هسه ؟
* طيب ما مشكلة نقول البص خسران قضاء وقدر ..
* الهلال أمبارح نزل مدني لانو قالوا الفنادق في القضارف غالية ..
* عليك الله شوف الغباء ده ..
* غايتو الزول البيفكر للكاردينال ده زول غبي شديد ياخ ..
* غبي للحد البعيد ..
* كل فرق الدوري الممتاز بتمشي تنزل في فنادق القضارف يوم ما سمعنا قالوا الفنادق غالية ..
* الفنادق غالية لشنو ؟
* لشنو يعني تحديدا فنادق القضارف غالية ؟
* ده غباء وهبل ..
* الكاردينال عمل حركة طيارة كادوقلي عشان لما يجي يعمل حركة القضارف الناس ما يشكوا فيهو ..
* الحركة الامبارح دي عشان الجمهور يقول حليل الكاردينال وعشان الاعلام يضغط علي المجلس العسكري عشان الكاردينال يلقى ضمانات ويعود يحكم الهلال ..
* حركات كيزان وكده ..
* نحن رسالتنا بنوجهها لسعادة الفريق حميدتي ..
* يا سعادتك الكاردينال ده حولو كثير من الكلام وهذا لا يهمنا ..
* البيهمنا إنو يكتب استقالتو ويتخارج ..
* سنقدم لسعادة الفريق حميدتي الحوارات التي ذكر فيها الكاردينال أن الجوهرة والبص هدية لشعب الهلال ..
* اتخارج امشي ..
* وسوق معاك هذا المجلس الهين والمتواضع ..
* الهلال أكبر من حركات الكيزان يا كاردينال ..
* يعني عايز تورينا إنو الهلال بعدك ما بمشي لقدامك ؟
* حركات الكيزان دي ما بتنجح معانا ..
* براك قدمت استقالتك ..
* ما في زول جبرك علي الاستقالة ..
* كونك تستقيل بعد ذهاب البشير المخلوع مباشرة تبقي دي مشكلتك ..
* نحن ما عندنا ذنب في القصة دي ..
* حتي لو عندك علاقة بشقيق الرئيس المخلوع نحن ما عندنا ذنب ..
* بس حركات البص خسران دي ما بتنفع معانا ..
* البص بقى حق الهلال ..
* والجوهرة حقت الهلال ..
* كتر خيرك ولحدي هنا كفاية ..
* الهلال قبل ما تجي كان في ..
* والهلال بعد تمشي ح يكون في..
* حتي لو فنادق القضارف غالية ما مشكلة بننزل في استراحة الجيش ..
* لو ننزل في لكوندا ما مشكلة ..
* ما في زول بيلوي يد الهلال يا كاردينال ..
* داير تشتغل معارضة اشتغل براحتك ..
* بس اكتب الاستقالة ..
* حركات الكيزان دي ما في ليها داعي ..
* الشعب بقي واعي جدا ..
* والزول البيفكر ليك ده يا الكاردينال من الأفضل إنك تغيرو لانو ده زول غبي جدا ..
* حكاية إنو تصنع الأزمة وتجي تحلها عشان تبقي بطل ، دي حركة بيش ..
* الحركات دي الناس عاشتها مع جمال الوالي 14 سنة ..
* الحركات دي عشناها مع الكيزان 30 سنة ..
* المجلس العسكري من حقه ان يشك في الكاردينال وقروش الكاردينال ..
* والكاردينال من حقه ان يدافع عن نفسه ويبرئ نفسه ..
* ولكن لابد ان يكون ذلك بعيدا عن الهلال ..
* و..و..
* ونواصل ..
