بالعربي الكسيح
محمد الطيب الأمين
مبرووووووك الولد !!
* في الغالب يتمنى كل عريس أن يكون (باكورة إنتاجه الأول ولد) ..
* يقول ليك إن شاء الله (تبكر بالولد) ..
* حتى (المرأة) تتمني أن يكون البكر (ولد) ..
* ولكن في النهاية الولادة قسمة ، كان ولد وكان بت كلاهما هدية غالية من ربنا الكريم
* وفي كرة القدم الفوز (ولد) والتعادل (بت) والخسارة (سلف) ..
* وبما أن ذلك كذلك فإن (باكورة) إنتاج الهلال في الموسم الجديد كانت (ولد) ..
* الهلال جاب (ولد) تلاتة نقاط من الفاشر ..
* وهي نقاط مهمة على اعتبار أن المباراة هي الأولي بالنسبة للفريق في الموسم ..
* صحيح إن العرض لم يكن جيدا ولكن في مثل هذه المباريات وفي مثل هذه الملاعب يبقي المضمون هو الأهم ..
* وقد أحسن الزعفوري وهو يريح عناصر المنتخب الوطني الذين يعانون من الإرهاق ..
* المباراة رغم إنها دورية ولكنها تدخل في إطار التحضير للصدام الإفريقي ..
* وعموما نقول : (مبروووك الولد) ..
* لا نقول فاز المريخ علي الاتحاد الجزائري بالاربعة ولكن نقول خسر الاتحاد أمام المريخ ..
* والنتيجة الكبيرة التى تحققت لا تشبه المريخ الذي خسر قمة شيخ زايد وخسر قبلها بأيام بطولة الممتاز رغم أن الفيفا خصمت من الهلال نصف دستة من النقاط ..
* نحن بنعرف المريخ وبنعرف الاتحاد الجزائري وكلاهما ما بستاهل ..
* البعض قال إن المباراة (ما طبيعية) ..
* ونحن نقول أن مباراة الجزائر ستكون طبيعية بإذن الله ويومها (الفيهو طيب بنشم) ..
* عندما يعود اللاعب من إصابة كبيرة فإن مشاركته في المباريات يجب أن تراعي (جودة أرضية الملعب وطبيعية عناصر الخصم وأهمية اللقاء) ..
* ولعل هذا ما جعل السنغالي لامين (المستقيل) يحتفظ بالنجم نزار حامد ولا يشركه في عدد من المباريات التي جرت بالولايات ..
* ولذلك أعتقد إن إشراك عمار الدمازين في ملعب النقعة فيه ظلم لعمار العائد من إصابة كبيرة ..
* عمار يمكن أن يتم تجهيزه في مباريات تلعب علي (أرضيات) يتوفر فيها الحد الأدنى من الصلاحية ..
* وما ينطبق علي عمار ينطبق علي بشة ودراج ..
* نتمنى أن تكون الإصابة التي تعرض لها الدمازين بالأمس طفيفة حتى يواصل وهو العائد حديثا ..
* المهم ..
* أغلب الظن أن جماهير المريخ عندما (فلقت) النعسان بحجر كبير في المباراة الأخيرة ، قصدت الجماهير أن (تصحي) النعسان بذلك الحجر ..
* الموضوع ما عندو علاقة بسوء السلوك ..
* الناس ديل دقوا النعسان عشان ما ينوم ..
* جمهور المريخ إكتشف إنو النعسان لما أصاب مرمى فريقه في قمة أبوظبي كان (نايم) ..
* الجماهير خافت النعسان ينوم أمام الجزائري ..
* من حقها تخاف ..
* لكن كمان الزول ما بصحوهو بحجر ..
* من الله خلقني ما شفت لي زول بيصحي ليهو زول بحجر ..
* الغريبة النعسان بعد ما صحوهو أقصد بعد ما ضربوهو جاب ليهو قون ..
* جاب قون بعد (الفلقة) ..
* حاجة تكسف..
* النعسان دقو بحجر ومحمد جعفر قريش دقو (بونية) ..
* الدق في المريخ بقي حاجة عادية ..
* وغايتو جنس غايتو ..
* أشرك الهلال في مباراة الأمس أثنين أجانب وواحد مجنس ..
* لو احتاج الهلال بالأمس للمهاجم ادريسا لم إستطاع اشراكه بسبب قانون شداد الأعرج ..
* شداد علامة وهرم كبير ولكنه بالغ في حكاية عدد الأجانب ..
* كان الأفضل أن يقفل شداد (البلف) من عنده ويحدد للأندية تسجيل إثنين أجانب فهذا سيكون قرارا وجيها لحد ما ..
* عموما عشان كورتنا تطور لازم نترك العناد والمعاكسات ..
* طبعا أجانب الهلال مستغربين الأيام دي ..
* أجانب الهلال مندهشين ..
* كل عشرة أيام الهلال بيرفع ليهو كأس ..
* الأجانب ديل في ظرف (20) رفعوا كاسين ..
* كأس زايد وكأس النخبة البايت ..
* قالوا ديارا قال لنزار حامد (البلد دي ما فيها غير الهلال ولا شنو) ؟
* استغرب ..
* عموما الهلال فتح شهيته بكاسين هذا العام ونتمنى أن يكون العام القادم هو عام الكأس الكبير ..
* بمناسبة الكبير ..
* اجتهد جمهور الهلال اجتهادا ذكيا وهو يثبت أن هدف مهاجم الوحدات الأردني في شبكة المريخ أسرع من هدف محمد عبد الرحمن في شبكة الجزائري ..
* جمهور الهلال المعلم عرض صورة الشاشة الخاصة بمباراة الوحدات وصورة الشاشة الخاصة بمباراة الجزائري وبالفعل هدف الوحدات الأردني الشهير بملك (السبعات) أسرع من هدف المريخ الشهير بالمدفور ..
* في النهاية نرجع ونقول : المريخ أول نادي في الدنيا يخسر بسبب (البرد) ..
* والله صحي ..
* ما في نادي قبل كده خسر بسبب البرد غير المريخ ..
* خش (قوقل) هسه ما ح تلقي نادي خسر بسبب البرد خلاف المريخ ..
* وغايتو الله يكفينا شر (المصدي) اللمعتو الأيام ..
* ونركب صافنات ونجيبة (دارفورية) واصلو الزول بيموت والذكرى تفضل حية ..
* و..و..
* وصتني ووصيتها وقالت لي …. (ما تنسى كشف المنشطات) ..
