وللهلال فرحتان .. فرحة يوم السبت وفرحة يوم الأحد!!

بالعربي الكسيح

محمد الطيب الأمين

وللهلال فرحتان .. فرحة يوم السبت وفرحة يوم الأحد!!

* في أشهر تصريح له قال رئيس دولة جنوب السودان سلفاكير أن قلبه لا يقوى على (قتل حمامة) .
* أراد سلفاكير بذلك التصريح أن ينفى عن نفسه تُهم القتل الذي حدث بجنوب السودان في وقت سابق .
* مقربون من سلفا أكدوا بالفعل أن الرجل (رقيق جداً) ويكره أن يرى (الدم) حتى ولو كان ذلك دم (كلب) .
* هذه الرقة مطلوبة وهذه المشاعر الإنسانية لابد منها .
* تعريف (الإنسانية) بحدها الأدنى هي أن لا (تذبح) الخروف ب(سكين ميتة) .
* رغم أنه (ميت ميت) ولكن لا يجوز ذبحة بسكين ميتة منعاً للتعذيب .
* كما يستحسن أن لا تذبح الخروف الأول في حضور الخروف الثاني .
* وإذا كان ذلك فيما يتعلق بالحيوان غير الناطق فمن المهم أن تكون المشاعر أعلى عندما تتعلق الأمور بالحيوان الناطق.
* ولأن (هذا هو هذا) فإن المريخ الآن يذبح لاعبيه بسكين ميتة جداً .
* قبل (٤٨) ساعة من مباراة القمة وزع المريخ صور اللاعبين الذين تم التعاقد معهم للموسم الجديد .
* جمعة وكردمان وسيف ووجدي .
* يعني زي لما تذبح ليك خروف قدام اخوهو الخروف التاني .
* نحن احترمنا في مجلس الهلال الإحترافية العالية التي يدير بها الهلال الآن.
* لم يصرح مجلس الهلال ولم يعلن عن أي صفقة بخلاف صفقة جيسي .
* وهذه إحترافية وتقدير كبير من هذا المجلس .
* تسجيل المريخ لجمعة جينارو هو ضغط على أبو عشرين .
* وتسجيل كردمان ضغط على محمد الرشيد .
* وتسجيل وجدي ضغط على رمضان عجب .
* ولكن في النهاية (الأصل ما ببقى صورة) .
* لا جمعة ببقى أبو عشرين ولا كردمان ببقى حمو .
* ولا سبعة زي وجدي ممكن يبقوا رمضان عجب .
* غايتو شخصيا أنا لو كنت لاعباً بالمريخ (لا سامح الله) لما لعبت مباراة القمة بعد هذه العقودات التي وقعها المريخ مع هؤلاء اللاعبين في هذا التوقيت الحساس .
* ومن هسه أي لاعب داير يقعد في المريخ من الأفضل أن يهرب من مباراة القمة.
* إدارة المريخ ناوية نية بطالة .
* وبالذات نمر وأمير كمال وعماد الصيني وضياء الدين والسماني وباقي الجماعة.
* اللاعبين السجلهم سوداكال ديل ما أفضل منكم .
* وده بصراحة استخفاف بيكم .
* اوع تقول لي الهلال برضو سجل .
* هل شفت السوباط متصور مع لاعب وقع للهلال ؟
* هل شفت الطاهر يونس متصور مع لاعب وقع على العقد ؟
* يبقى ما تتكلم ساي .
* لو سجلنا برضو الحاجات دي سرية.
* وأي لاعب نحن ح نسجل تم ترشيحه من قبل نجوم الهلال .
* نجوم الهلال هم القالوا جيبوا لينا فلان وفلان وفلان .
* تلاتة (فلانات) وفلان الرابع داك ما أظن نلقى ليهو خانة .
* نحن لو دايرين سوداكال ذاتو بنسجلو.
* لكن بفهم ما كيري ساكت .
* واصلاً سوداكال هلالابي زيو وزي التش واحد .
* نحن تسجيلاتنا بتبدأ بعد القمة .
* لو شلنا الكأس يوم السبت بنفرح ولو ما شلنا الكأس برضو يوم الأحد بنفرح .
* للهلال فرحتان .. فرحة يوم السبت وفرحة يوم الأحد .
* واسمعوا كلامي ده كويس لو شلتوا الكأس برضو بنمسخو ليكم .
* المهم .
* على الطريقة العالمية قدم مجلس الهلال المدرب الكبير زوران من خلال مؤتمر صحفي كبير .
* مجلس الهلال يقوم بعمل كبير ومقدر .
* يتمتع المجلس بقيادات وشباب على مستوى عالي من الفهم والترتيب .
* كل شئ في الهلال مرتب ويتفق مع قيمة وقامة الهلال العظيم .
* زوران خطوة مهمة في الإتجاه الصحيح وبإذن الله على يده يصنع الهلال الحدث في أفريقيا خلال العام القادم .
* زوران وجيسي و(أ ، ر ، م) سينقلون الهلال نقلة كبيرة إن شاء الله .
* وأجمل ما في الموضوع إنو عقد المدرب لسنتين.
* زمان الكاردينال بتعاقد مع المدرب لشهرين.
* وياريتو لو كان بيتم الشهرين .
* شال كافالي بعد ٤٢ يوماً .
* شال السنغالي انداي بعد ٥٥ يوماً .
* شال بلاتشي بعد ٥٩ يوماً .
* ما بخلي المدرب يتم شهرين .
* الآن الحمد لله زوران سيجد اجواء مثالية لصناعة فريق مهاب .
* لا في زول بيتدخل في شغلو ولا في زول بيقول ليهو ما تلعب فلان .
* مدرب يعني مدرب .
* ونصيحتي الأخيرة للاعبين المريخ .. أحسن تزوغوا من مباراة القمة .
* ودي نصيحة لوجه الله .
* ونركب صافنات ونجيبة (صربية) واصلو الزول بيموت والذكرى تفضل حية .
* و..و..
* وأنا في شخصك بحترم ….. (لجنة التطبيع) .