بوغبا وياسر مزمل عودة عصافير الخريف و(شاي المغرب)

صابنها

محمد عبد الماجد

بوغبا وياسر مزمل عودة عصافير الخريف و(شاي المغرب)

· في اللحظات دي افضل من يعبر عنك (اغنيات) محمد وردي ، تنزل (بالطير المهاجر) وترجع بي (عصافير الخريف).

· شكرا صلاح ادريس نحن نعرف انك (هلالابي) اكتر من أي زول.

· شكرا هشام السوباط – فات الكبار والقدرو…ناس المريخ فقدوا الثقة في طابق شاخور بعد ان اصبح ابوعشرين في الهلال.

· شكرا يونس الطاهر ادار الحكاية بكل هدوء – من غير قومة نفس.

· شكرا الفاضل التوم زول بيشبه الهلال.

· شكرا اسماعيل عثمان المتحرك الهلالي – شكرا السر احمد عمر خبرة السنين.

· شكرا رامي كمال ، عضوية منقحة .. شكرا عبدالله العاقب في حضرة القانون …شكرا الامين عبدالمنعم ترتيب وتنظيم ، شكرا نزار عوض مالك اجتهاد ومثابرة.

· شكرا لكل اعضاء لجنة التطبيع.

· شكرا كمال شداد الذي احسن اختيار هذه اللجنة.

· شكرا عبدالمهمين الامين …نحن كنا فاقدنك.

· أي حاجة ما شاءالله في الهلال ماشه زي الساعة.

· المدرب وطاقمه الفني وصلوا.

· التسجيلات من يوم توشك على الانتهاء.

· ما في حاجة ناقصة.

· لمن يكون عندك (عطر) عاجبك وغالي عليك …بتختو في الدولاب الجن الاحمر ما بعرفو.

· وقت تكون طالع مشوار ما مهم بتطلع (الفتيل) تعاين ليه وترجعو في مكانو.

· بتكتفي بذلك.

· ما عارف – شاعر بنفس الاحساس بعد انتقال ياسر مزمل ووالي الدين خضر بوغبا للهلال.

· الموضوع دا زي العطر النادر – العطر الغالي …طبعا الغلاء ما شرط يكون في السعر فقط.

· في حاحات غالية في جوانب تانية.

· ما في لاعب اتمنيتو للهلال قدر (بوغبا) ..وياسر مزمل طبعا ما في مهاجم متلو في البلد.

· (شوف عيني الصقر بجناحو كفت الفرة)…الكلام دا بتشوفوه في الواقع.

· بتشوفوه في الميدان.

· هسع لو لاقينا الاهلي المصري بي ناسنا ديل ..رضوان جيد كان وقف قدامنا.

· الف رضوان جيد ما كانوا عملوا حاجة.

· ياسر مزمل – بمثل محمد عبدالرحمن علي بكري المدينة قبل (10) سنوات.

· اقوان ياسر مزل بسجلها (مظرفة).

· بدخلها في (ظرف) وبرسلها القون.

· يمين تاني مباريات الهلال تدخلها والشمس في سماها تلقى الهلال غالب خمسة.

· شفوت ديل بيحسموها من (التسخينة).

· ما بنتظروا كتير.

· ولا بتلفتوا.

· الله شاف ناس بلة جابر وموسى الزومة – قطع شك (شلة الباكات) الجدد في المريخ تعبو معانا.

· مسجلين ليهم (7) باكات تقول عندهم حملة تطعيم.

· تقول عندهم بكاء.

· المريخ رجّع كرنقو.

· ورجّع بخيت خميس.

· يعني بقت على موسى الزومة وبلة جابر.

· بلة جابر كان اضمن ليكم من الكلام دا.

· دي (تلتلة) ساكت.

· بتعرفوا (تلتلة) البرد.

· اها البتعملوا فيه دا …احسن منو تلتلة البرد.

· ناس بيبو وطبنجة وكومر ووليد الليبي وكركتيلا وبخيت خميس ومرفعين ومازن محمدين وجمعة جينارو ومحمد عبدالعظيم ومنجد النيل…دفار بتاع باكات.

· الحكاية شنو؟

· فريقكم من الباكات الكتيرة بقى زي (بيت البكا).

· البتهبشو كله بتلقاه (باك).

· باك وبشكي!!

· اكرم الهادي سليم عرفها.

· قال ما عاوز …بختم حياته الكروية في حتة تانية.

· احسن ليه من (البهدلة) دي.

· دي تلتلة في نهاية العمر.

· بوغبا دا للناس الما عارفين بدخل المباراة بي (مناديل ورق) – الكورة عندو ساهلة وما معقدة.

· بي كل بساطة.

· زي (الدو) في اخر اللعب.

· خمسين اكيدة.

· ولا بفوتها.

· وكان لي ياسر مزمل ..باكات المريخ ديل كلهم احسن ليهم الخدمة الالزامية من (طابور) ياسر مزمل.

· مزمل ابوالقاسم ما عارف يعمل شنو؟

· مرة يقول (السيستم) ومرة (كاس).

· غلبتو القعدة.

· اها ناس السوباط ديل جابوا (مزمل) ذاتو ..تاني في شنو؟ امكسوا في ابوشيبة ومعاوية الجاك قوي.

· مزمل (اتسستم).

· دخل السيستم.

· غايتو ناس السوباط ديل لو قعدوا شهرين تاني بنشوفوا (ميسي) حايم في شوارع الموردة.

· بكهام ممكن يجي يمسك ليه قدرة فول في شارع الاربعين.

· ومورينهو بعمل ليه عربية باسطة في بانت.

· ناس الطاهر يونس ديل ما عندهم حاجة صعبة.

· ما في حاجة عندهم مستحيل.

· بوغبا وياسر مويس رجعونا للزمن الجميل.

· زمن بتقعد تحلق تحت الشجرة.

· زمن شاي المغرب.

· ومعاه (رغيفة).

· الرغيف كان هملة.

· وشاي اللبن بالكباية الكبيرة.

· والغداء بعدو (بطيخة).

· والعشاء فطير بي لبن.

· كنا لا بنعرف لينا صف ولا بنقيف لينا في طابونة.

· زمان والي الدين محمد عبدالله القون عندو (غسيل ومكوة).

· والله مرة محسن سيد دا في الموردة رجع ليه كورة قصيرة ، لحقها الوالي – محسن سيد لغاية الآن ما قادر يتلفت ورا.

· اتعقد من الحتة دي.

· الهلال دا كان فيه محترف اسمه يوهانس …التمارين بتاعة الهلال الناس كانت بتصلها بي بكاسي اللبن.

· الاعمي شايل المكسر.

· منصور بشير تنقا بعكس ليك الكورة بي شوربتها.

· الشوربة برة الصينية.

· يعني برة خط 6.

· انتوا إلّا يقولوا ليكم الموضوع عديل كدا.

· الهلال ح يرجع تاني للزمن الجميل.

· زمن حفلات صديق احمد في حدائق الصداقة.

· والله صديق احمد دا كان فيه صوت زي الجوافة باللبن.

· صوت يشبّع.

· الزمن السمح.

· ايام المواصلات فاضية ..لمن تمشي تجيب ليك (رغيف) تلقى بتاع الطابونة نايم ..تصحيه عشان يبيع ليك رغيف.

· ما في زول بهببو.

· ولمن تدخل بالعربية لطلمبة البنزين عشان تكب بنزين لو قلت لبتاع الطلمبة (فولها) بتاع الطلمبة يقعد يعاين ليك من فوق لي تحت.

· ويحفظ ارقام اللوحة.

· الزمين الجميل برجع.

· اصلو ما في حاجة بعيدة.

· ناس بوغبا وياسر مزمل ديل بيرجعوا الزمن دا.

· الدنيا اتلخبطت.

· وحصلت حاجات غلط كتيرة.

· زمان ما في شهر فيه (30) يوم…الشهر من الاسبوع التاني بتلقاه اتخارج.

· عصر الجمعة كان طويل – بدخل في يوم السبت.

· غداء الجمعة كان على اقل الفروض بكون فيه 4 اعمام.

· زمان وقت تمشي ليك عرس …العريس بكون ظاهر…هسع العريس تلقاه واقف في صف الرغيف مع الناس.

· ولا بتفرزو.

· الدنيا اتغيرت.

· التومة بنت كلح كان عندها برج حمام – الحلة دي كلها بتأكل منو…هسع التومة بنت كلح ذاتها بتاكل من (موية الفول).

· اتغيرنا.

· نسينا حكاية انك تشيل ليك (عضم) من ملاح الغدا ، تقعد تكد فيه لمن العشاء يدخل.

· عصرك كلو تعديه في (العضم) دا.

· تجر كُم الجلابية فوق وقدر ما تبقى حريف تلقى في نقطة من ملاح (الخدره) وقعت في الجلابية.

· نسينا (شاي المغرب) ، ومروق (العنقريب) من عصر بدري في الحوش الكبير .. تقعد تنتظر (شاي المغرب) متل كرت (الخمسين).

· هسع الواحد بقى يرجع البيت لو ما قال كلمة السر ما بدخل – اهلو ذاتهم بكونوا نسوا شكلو وبقوا ما بعرفوه.

· زمان مشينا لينا حفلة.

· قلنا نعمل فيها تقيلين…والتقلة صنعة ، خاصة وقت تكون لابس ليك جلابية جديدة.

· الاغنية الاولى رفضنا نقوم.

· الاغنية الثانية رفضنا نقوم.

· وقت جاءت الاغنية الثالثة ، لقينا نفسنا مع (الكورس)..ما بتفرزنا منهم.

· غلبنا نقعد.

· هسع ناس بوغبا وياسر مويس …خلونا نيقيف مع الكورس.

· بالمناسبة أي فردة كورس بكون شنبو (مركب غلط) ، وبكون لابس ليه قميص (مربعات) وبعاين عكس اتجاه الفنان.

· المعني ما شغال بيه… وعندو شخصيته المستقلة.

· ………….

متاريس

· وسط الهلال ما فيه لاعب يساري غير سليم برشاوي المصاب ..نتمنى اضافة لاعب يساري في وسط الهلال.

· لا يوجد في الساحة افضل من الساحر عزام عادل.

· كملوها لينا بي عزام عادل وخلاص.

· ما عاوزين تاني أي شيء.

· عزيزي الهلالابي اكبر نصر تحققه لهلالك هو ان تكتسب عضويته.

· قوة الهلال في اكتساب العضوية.

· كن شريكا في الهلال وعندك رأي بدلا من ان تكون متفرجا.

· شجّع هلالك وانت تملك بطاقة الانتماء له.

· ما اعظم الانتماء للهلال.

· فترة اكتساب العضوية وتجديدها لا بد ان تكون فترة طويلة.

· التمديد لمجلس السوباط يجب ان يكون من الآن.

· لا يعقل ان يدفع مجلس ادارة او لجنة تطبيع كل هذه المليارات ويقدم ملايين الدولارات للهلال وفترته تبقى لها اقل من 60 يوما.

· من اجل استقرار الهلال ومن اجل المواصلة في ذلك العمل الضخم ..مددوا للجنة التطبيع منذ الآن.

· من الذي يستطيع ان يسدد كل هذه الاموال والمرتبات.

· من يملك ان يوفر فقط المرتبات للجهاز الفني للهلال.

· لأول مرة في تاريخ الهلال نشاهد عمل مرتب بهذا الشكل.

· تسجيلات الهلال سوف تكتمل بصورة تامة ان شاءالله في اول 48 ساعة من انطلاق فترة التسجيلات.

· ملف المحترفين بدأ التحرك فيه مبكرا وأنجزت بعض ملفاته قبل ان تبدأ التسجيلات.

· جهاز فني (مكتمل) يصل الى البلاد قبل انطلاق فترة الاعداد وبداية النشاط الرياضي.

· معسكر يرتب له بصورة علمية.

· أي حاجة تمام في الهلال.

· المريخ لا يعرف قيمة ابوعشرين.

· ابوعشرين حارس عالمي ..يتميز في العسكيات بصورة لا مثيل لها.

· استمرار جمال سالم في الهلال مهم.

· خاصة ان المريخ ينتظر استغناء الهلال عن جمال سالم.

· المريخ مهدد بفقدان نصف تسجيلاته بسبب الاشكاليات القانونية التى وقع فيها – رمضان عجب ومحمد الرشيد ومصعب كردمان وبخيت خميس. كل هؤلاء لم يستفيد منهم المريخ ما لم يتم اللجوء الى حلول اخرى بسبب تعاقداتهم الاخرى.

· المريخ في وضع لا يحسد عليه.

· اها دي نهاية (الصور).

· ……….

· ترس اخير : خلي البودي قارد المع محمد الرشيد يلعب ليكم.