من يتحدثون عن مجزرة في الهلال فريقهم حتى الآن تعاقد مع (13) لاعبا

صابنها

محمد عبد الماجد

من يتحدثون عن مجزرة في الهلال فريقهم حتى الآن تعاقد مع (13) لاعبا

· يتحدث اهل المريخ عن قوة فريقهم وعن امتلاكهم عناصر ممتازة وعن تحقيق الممتاز ثلاث مرات تواليا ، مع ذلك وحتى وقتنا هذا تعاقد المريخ مع (13) لاعبا هم جمعة جينارو واحمد عبدالعظيم (حراس مرمي) وكرنقو ومازن محمدين وبخيت خميس (باكات) ومصعب كردمان ووجدي عوض (في الوسط) وفي الهجوم تم التعاقد مع سيف الدمازين ومحمد عباس كنان اضافة لعودة بكرى المدينة الى جانب محترف من بوركينا فاسو ويند بنجا وعمرو علاء المصري…امس اعلن ان المريخ وصل لاتفاق مع لاعب الامل احمد موسى تمبش.

· ديل طبعا ما في زول سمع بيهم إلّا في تسجيلات المريخ.

· والله ديل نحن (متفرجين) في الهلال عندنا فيهم رأي.

· وينتظر ان يضيف المريخ (4) عناصر على الاقل في الايام القادمة ليترفع عدد اللاعبين الذين تعاقد معهم المريخ الى (16) لاعبا…الهلال في كل الاحول لن يتجاوز الرقم (18) في تعاقداته هذا الموسم.

· المريخ تعاقد حتى الآن مع (13) لاعبا …ومستكثرين على الهلال التعاقد مع (17) لاعبا.

· المريخ ينتظر (مشاطيب) الهلال ويمكن بالميت كدا ان يضيف منهم ثلاثة عناصر.

· ممكن نشوف محمد دراج وعمار الدمازين ومحمد موسى اذا صرف عنه الهلال النظر في المريخ.

· من سجل من الهلال شلش ومحمود ام بدة ممكن يسجل من طرف من الهلال…اي (مشطوب) من الهلال خانته محفوظة في المريخ.

· مع ذلك فان المريخ لا ينظرون الى فريقهم ويتحدثون فقط عن المجزرة التى سوف تحدث في الهلال وعن المشاطيب ، وكأن فريقهم الذي سوف يفعل نفس الشيء يشجعونه بالوكالة.

· شوفوا فريقكم – الهلال عارف بيعمل في شنو؟

· الهلال استفاد من خانات المحترفين التى كانت خالية في الفترة الماضية (عماد محسن وكاديو) واستفاد من مغادرة اطهر الطاهر الى جانب (5) خانات اضافية في الكشف.

· من بعد فان كل القادمين للهلال قادمون له من فرق كبيرة مثل الوداد المغربي وماتمبا الكنغولي وبطل زمبابوي والمريخ وهلال الابيض والأهلي شندي.

· بوجبا الهلال ممكن يلعب في الارسنال الانجليزي وليس الارسنال شندي.

· أي لاعب قادم للهلال ممكن تخلي ليه خانة بعين قوية في برشلونة ذاتها.

· فقط اتمني ان لا يطول الشطب ولا الاعارة اللاعب نزار حامد وفلتة الشباب الموهبة الشيخ محمد.

· اوصيكم بالشيخ محمد يا بشة الكبير …انت ادري بموهبة هذا اللاعب.

· تاني لو عملتوا أي حاجة ما عندنا معاكم مشكلة.

· إلّا نزار حامد والشيخ محمد.

· الحاجة المتأكد منها ان المريخاب في هذه الايام بيكونوا فقدوا الكاردينال ..بكونوا قالوا (يا حليل الكاردينال).

· نحن كنا مكتلين في التسجيلات.

· لو الكاردينال حتى يومنا هذا رئيسا للهلال كنا بنكون قاعدين الآن نفاوض في (سيف الدمازين) عشان نصل معه الى اتفاق ونسجلوا في اخر يوم في التسجيلات.

· قبل (السيستم) ما يقفل بي لحظات.

· على مدى تاريخ الهلال كان الهلال هو الافضل فنيا ومهاريا وجماهيريا وإعلاميا من المريخ ، حتى لو انتصر المريخ وفاز بإحدى البطولات.

· في الفترة الاخيرة اصبح المريخ يتفوق على الهلال (فنيا) وتقدم عليه على المستوى المهاري – حدث ذلك لأن الهلال في عهد الكاردينال اهمل (التسجيلات) ولم يهتم بضم المواهب.

· اعتمد الكاردينال على فريق الشباب ، ولم نجن حتى وقتنا هذا لاعبا من فريق الشباب يلعب بصورة اساسية – اذا تحدثنا عن ابوجا او موفق صديق او بشه الصغير او حتى صهيب الثعلب لن نجد فيهم لاعبا واحدا اثبت وجوده وأصبح اساسيا في تشكيلة الهلال ، رغم تميز هذه العناصر على المستوى المهاري والفردي.

· لاعب الشباب لا يعطيك إلّا بعد خمس سنوات ، لا تنتظر منه شيئا قبل تلك الفترة ، وهذا ما جعل الهلال يفشل على مدى ثلاث سنوات من تحقيق لقب الممتاز – لقب الاهلة المحبب.

· مع هذا لا نستطيع ان ننكر جهد الكاردينال فقد صرف في الهلال صرف من لا يخشى الفقر ، وهو حتما سوف يعود يوما ما الى رئاسة الهلال مرة اخرى من منطلق عشقه الكبير للأزرق السماوي – نتمنى ان يكون الكاردينال استفاد من هذه الدروس وعرف سر اللعبة.

· مجلس السوباط في 3 اشهر فعل في التسجيلات ما لم تفعله مجالس ادارات اخرى مكثت في الهلال سنوات طويلة.

· الكاردينال كان يقول انه لم يجد في القارة الافريقية ولا في العالم كله لاعب ممتاز يمكن ان يسجله الهلال.

· فتشنا القارة دي كلها ما لقينا لينا لاعب.

· وفي النهاية كان الكاردينال يجيب ليه لاعب في اخر يوم في التسجيلات يدفع فيه اموال طائلة ويجبر الهلال بعد ذلك على تسديد استحقاقاته بعد ان يتم انهاء التعاقد معه بعد مباراة واحدة او بعد شهر من تسجيله.

· دا بالنسبة للكاردينال ندخل على سوداكال.

· سوداكال لغاية الآن لم يسجل ليه لاعب في المريخ من (اللحم الحي) ..كلهم تم تسجيلهم بعد انتهاء فترة تعاقدهم مع انديتهم بما في ذلك المحترفين الذين اعلن عنهم نادي المريخ التعاقد معهم.

· كلهم حابوهم بنصف القيمة.

· المشكلة بعد الكلام دا وعدم التعب في أي لاعب يتعاقد معه المريخ ، سوداكال شغال (صور) في التسجيلات.

· يبدو ان سوداكال يفهم (السيستم) على انه (صور) مع اللاعبين.

· قالوا ليك المريخاب في القروبات قالوا لادم سوداكال اعمل ليك حاجة في المريخ غير (الصور).

· قام ادم سوداكال اصدر ليه (بيان) هاجم فيه لاعب الهلال ابوعشرين وهدد بسحب اللاعبين من معسكر المنتخب الوطني.

· احسن كان تخلوه على (الصور).

· الزول د اتاني قولوا ليه ما تتكلم – ما تعمل حاجة (اتصور) ساكت.

· السوباط دا سجل ليه للهلال 17 لاعبا – ما شفناه في (صورة) واحدة مع لاعب.

· السوباط دافع ليه مليون دولار في المحترف الكنغولي فيني وما اتصور معاه.

· جهاز فني (عالمي) للهلال مدرب صربي على برتغالي ومدرب عام بوسني ومدرب احمال ومدرب حراس ودكتور علاج طبيعي من تونس كلفوا الهلال الالف الدولارات – وبرضو ما شفنا لينا صورة للسوباط.

· انت يا سوداكال كرنقو الذي سجله المريخ سنة 2011م عاوز تصوّر معاه.

· الزول دا رائحة ليه (كاميرا).

· تقول عريس.

· انت شالوا منك ابوعشرين وتتصور قدر الصور دي.

· سوداكال وضع صورته على مدخل استاد المريخ – دي شاخور (الاب الروحي للمريخ) ما عملها.

· سوداكال أي لاعب عاوز يسجلو في المريخ بيسأل اول حاجة ان كان مفكوك او لا؟

· مفكوك بمشي عليه – ما مفكوك ما زولو.

· رغم ان افضل لاعب في المريخ ابوعشرين كان (مفكوك) وادم سوداكال ما قدر يعيد قيده في المريخ.

· فشلوا في اعادة توقيع المفكوكين في المريخ العاصمي جروا على المفكوكين في مريخ الفاشر.

· يا ها قدرتكم.

· ما عندكم اقدر من كدا.

· بس عليكم الله كلموا ادم سوداكال قولوا ليه الموضوع دا ما محتاج للصور دي كلها.

· كمان بخيت خميس عاوز ليه صورة!!

· طيب انتوا كان سجلتو بوجبا (والي الدين خضر) تعملوا شنو؟

· تختوا صورته في بطاقاتكم الشخصية.

· تشيلوه مع الجواز.

· عليكم الله بالمرة كدا قولوا لي ادم سوداكال فريق (قريعتي راحت) عندهم لاعب مفكوك اسمو (الكلح ود فاطمة) – اللاعب دا احسن زول يقعد ليك في كنبة الاحتياطي.

· يقعد 90 دقيقة لا بتكلم ولا بفرفر…ووقت المدرب يقول ليه قوم سخن …الاستاد كلو بقول ليه اقعد يقعد نصك.

· ادم سوداكال من حبو للصور اتصور مع جمعة جينارو …ونحن جمعة دا وقت جابوه لينا قبل 12 سنة ما في زول اتصور معاه.

· انتوا بعد العمر دا كلو عاوزين تصوروا مع جمعة وكرنقو وسيف الدمازين.

· والله نحن بعد ان تم تسجيل بوجبا وياسر مزمل مع ابوعشرين ووضاح مفرض نمشي نلعب في الدوري الاسباني.

· ما مفروض نلعب ليكم هنا.

· نحن كنا على ثقة بتسجيلات (نار) في الهلال – لكن والله ناس الطاهر يونس فاجأونا بي استفين زوي وادم الدالي…ديل نحن ذاتو ما كانوا في حساباتنا.

· الهلال بقوا عندو اطراف ما بطلعوا من منطقة جزاء الفريق الخصم.

· الدالي دا القون بجيبو من السوق.

· وكان لي استفين زوي …اللاعب الذي يلعب قصاده بطلع بعد المباراة فاقد الذاكرة.

· يمكن تفقدك (اضانيك) عديل كدا قدامو…ونحن طبعنا كعب ..البفقد ليه (شاحن موبايل) ما بخلي الحلة تنوم.

· ما بخلي ليه لحاف او مرتبة ما برفعها.

· مؤيد عبادين لاعب مهاري وبتاع تفاصيل وبدخل بين البصلة وقشرتها.

· ما شاءالله.

· اللهم احفظ الهلال.

· والله أنا لو ماسك الهلال مع الشفوت ديل بوجبا وابوعشرين وياسر مزمل وارنق ومنير ود نوباوي ووضاح …ولا بكضب وامشي بالفريق دا على الاستاد.

· لو ماسك الاولاد ديل بمشي بيهم قاعة الصداقة ونادي الضباط…بنافس بيهم فرقة عقد الجلاد والسمندل وحفلات محمد الامين.

· بشتغل بيهم حفلات.

· الناس ديل مع عبدالرؤوف وابوعاقلة ح يكونوا كيف؟

· يمين تاني مباريات الهلال تدخلها وانت شايل (كيس) الرغيف.

· تطلع من الاستاد بي رغيفك.

· الصفوف التى سوف تكون في استاد الهلال وفي مبارياته في الطلمبات والمخابز ما ح تكون في.

· الطيب عبدالرزاق قالوا ليك (المهاجم) بسلمو ليك في (علبة ساردين).

· وارنق قالوا مفاجأة التسجيلات.

· وكان لي منير ود نوباوي …قالوا اسبوع والتاني في الهلال ممكن يمشي يلعب في الدوري الايطالي.

· ما بقعد اكتر من كدا.

· والي الدين بوجبا في وسط الهلال ح يرجع لينا الزمن الذهبي لوسط الهلال …اللبن ذاتو يمكن الرطل يرجع ويبقى بي 4 جنيه.

· ابوعشرين ناس الدعم السريع ما قدروا عليه ..ح يقدروا عليه ناس سيف الدمازين وسيف تيري.

· هجوم المريخ كلو بقى (سيوف) من عشر.

· الله يتم الخطوات ويكللها بالنجاح.

· لسه.

· الكنغولي فيني والزمبابوي جيسي والعاجي اوتارا…ناس الاهلي المصري في خطر.

· تاني ناس رضوان جيد وغربال ما عندهم طريقة.

· لو لارش رجع تاني ..مع هذه الاسماء ما بعمل الحبة.

· الحمدلله.

· والشكر له اولا واخيرا.

· ………….

متاريس

· نزار حامد لا.

· والله نزار حامد مع بوجبا وابوعاقلة وعبدالرؤوف ح يكون قيامة رابطة.

· الشيخ محمد موهبة يجب الاحتفاظ بيها.

· الاعارة بالنسبة للشيخ ما عاوزنها.

· الهلال سجل حارسين ممكن يتستغني عن حارسين.

· بخيت خميس ما عاوزنو.

· بس ملف بخيت خميس ممكن ينزل المريخ للدرجة الثانية.

· خاصة ان بخيت خميس وقع في المريخ بمعلومات وبيانات مختلفة عن التى وقع بيها في الهلال.

· يعني الموضوع فيه (تزوير).

· اعلام المريخ قنع من رمضان عجب ومحمد الرشيد قالوا ياسر مزمل وبوجبا عندهم رباط صليبي.

· انتوا ما بتخافوا الله.

· انتوا ما بتخجلوا.

· هذا العنوان يا د. مزمل ابوالقاسم غير (مهني) وغير (اخلاقي) كمان – هي وصلت عندكم لهذا الحد.

· ضربة ابوعشرين (قوية)…خلتكم تطلعوا من الشبكة.

· والله السوباط دا يقعد في الهلال للتسجيلات القادمة مع الطاهر يونس وعبدالمهمين الامين والفاضل التوم ونزار عوض – ناس المريخ ديل (شاحن موبايل) ما يلموا فيه.

· في انتظار (القنبلة).

· وختامها (قنبلة).

· …………..

· ترس اخير / ناس برشلونة بفتشوا عن تلفون السوباط.