بيت البكا

صابنها

محمد عبد الماجد

بيت البكا

· البدخل على قروبات المريخ هذه الايام ..بلقى ان كل القروبات مستوفية لكل اركان بيوت البكا.

· مزمل ابوالقاسم جرب كل (انواع) التخدير …كل المسكنات …ما مشت فيهم.

· التخدير بقى ما بنفع معاهم.

· ابوشيبة ما بثبت.

· الفاضلابي الموضوع صعب عليه شديد.

· كترتوا (البنج) يا مزمل …الناس ديل (بنجكم) دا بقى ما بعمل ليهم حاجة.

· أي قروب (احمر) بقى عبارة عن (بيت بكا).

· هو الزول دا مالو؟

· كواريك.

· وثكليب.

· الناس ديل عملوا ليهم (كشف) عديل كدا.

· اكتر من كدا شنو؟

· بكا بي كشفو.

· عملوا ليهم (كشف) لإعادة قيد التش.

· عاوزين تلموا ليكم 250 مليار جنيه عن طريق (النفرة).

· يوم داك قاعدين في امان الله كدا جانا شافع جاري زي (الدو) في اخر اللعب ..قال لينا (تنبح ود الشفيع) جاء واقع كاتم صوت.

· فجأة كدا بس.

· مشينا عليه.

· لقينا ليك (تنبح ود الشفيع) ممدد في الواطة متل (طاسات) العمود بعد الغداء.

· يهضرب متل بابور الجاز.

· قلنا ليه يا زول في شنو؟

· مالك؟

· اثبت.

· اركز.

· ما صاح كدا.

· مالك في شنو؟ …عشان تعمل في روحك كدا.

· قال لينا ما في حاجة …لكن شاعر بي روحي زي الشارب لي موية نار.

· نار بتغلي في جوفي.

· قلنا ليه يا زول قول باسم الله ..ما حصلت كدا.

· ما في حاجة بتستهال عشان تعمل في نفسك كدا.

· يا زول قوم …دا احساس عادي بعد تسجيل ابوعشرين في الهلال.

· الزول وقت جبنا ليه سيرة ابوعشرين كان عاوز يروح فيها.

· قال لينا اخير لي شراب (موية النار) من ان اشوف ابوعشرين في الهلال.

· خلوني انا عاوز اموت.

· أنا عاوز اطق.

· أنا ما بقعد.

· أنا ما بعيش تاني.

· هو الزول دا مالو؟

· مريخابي دخل على زوجته في البيت اضنينو في نخرينه زي (البستلة) ..قال ليها اسمعي يا مرا هواي …تاني ما اسمعك تقولوا لي ماشي لي اهلي او بنت خالتي عندها سماية…وتوبك (الازرق) داك الما عندك غيرو – والله لو شفتك لابساهو بوديك بيت ابوك.

· واوعك تقيفي قدامى.

· او تتكلمي معاي وقت ارجع من الشغل.

· تاني ما عاوز اسمع أي كلمة.

· هو الزول دا مالو؟

· الراجل قال ليها تاني ما تعملي لينا (بامية مفروكة) ولا قرع او فاصوليا او سلطة اسود او عدس او كمونية …لو جبت لي الغداء بدون سلطة بقطع رقبتك.

· أنا استحملتك كتير.

· أنا تاني ما بستحمل اكتر من كدا.

· الراجل قدامو كباية شاي ..شاتها برة الصينية.

· هو الزول دا مالو؟

· المريخابي دخل على اولاده في غرفتهم قفل ليهم التلفزيون وقال ليهم تاني ما القي لي واحد فيكم قاعد ليه في تلفزيون او مشغل قناة ام بي سي 3.

· وتاني البتأخر فيكم ما يدخل البيت دا بعد اذان المغرب.

· ما عاوز اسمع أي كلمة.

· هو الزول دا مالو؟

· الراجل مسك اضان ولدو الكبير وقال ليه تاني اوعك تقيف في رأسي الصباح وتقول لي عاوز حق المواصلات ..عامل رأسك الكبير دا – متل (المسطبة).

· زولكم قال لي اولاده تاني ما في زول يجيب لي في البيت دا سيرة (الهلال).

· ولا بالغلط.

· ما عاوز أي كلمة.

· ولا كلمة.

· هلال كادوقلي ما تجيبوا لي سيرتو في البيت دا.

· هو الزول دا مالو؟

· المريخابي ضرب لي صاحبو تلفون قال ليه اسمع تاني ما تضرب لي …والقروش العاوزها مني – ما برجعها ليك …اعلي ما في خيلك اركبو.

· كرهتنا.

· عذبتنا.

· جننتنا.

· هو الزول دا مالو؟

· صاحبكم طلع من الفيس وطلع من الواتساب …وفتح التلفون قلب الشريحة.

· قال ما عاوز يتكلم مع أي زول.

· خلاص كفاية.

· قال ما عاوز يعرف أي حاجة.

· خلوني بس.

· هو الزول دا مالو؟

· انا شفت (الكورونا) – لكن البعمل فيه الزول دا اكعب من الكورونا.

· عندنا مريخابي في الحلة …بقينا في المغارب بنزلو من رأس البيت.

· بقول ما بنزل.

· وعندنا واحد قطع شعرو.

· وفي واحد تاني كل يوم بيجي يشيل ليه صندوق بندول من بتاع الدكان.

· ليهم حق المريخاب يصلوا لهذه الحالة.

· لو قلت ليكم جهاز الهلال الفني فيه (5) جنسيات …ح تختوا ايدكم في رأسكم وتقولوا : هو الزول دا مالو؟

· تتخيلوا المدير الفني للهلال صربي برتغالي.

· والله دي الكاردينال لو قعد 50 سنة ما يعملها.

· المدرب العام في الهلال بوسني.

· بوسني عديل كدا.

· والله عدنان داع ندو صلعة في (علماء) ما في.

· صلعة جديدة تجرح.

· مدرب من البوسنة ….دي اول مرة نسمع بيها.

· دي المريخاب ما بستوعبوها لينا.

· هو زول دا مالو؟

· مدرب الاحمال تونسي.

· مدرب الحراسي تونسي.

· اختصاصي العلاج الطبيعي تونسي.

· محلل الاداء سوداني.

· في الهلال حارس مرمى سوداني الجنسية يوغندي الاصل.

· وفي الهلال طرف يمين كنغولي الاصل ..سوداني الجنسية.

· وعندنا مهاجم كنغولي.

· ومدافع عاجي.

· ولاعب وسط زمبابوي.

· في الزمن الصعب دا بقى عندنا خمسة محترفين …رجعنا لي ايام زمان …ايام الدنيا كانت بخيرها.

· عليكم الله (الجنسيات) دي ما بتجنن.

· هو الزول دا مالو؟

· تتخيلوا تسجيلات الهلال انتهت.

· والحكاية ما وقفت على كدا.

· اعداد الهلال ذاتو انطلق.

· دي قبل كدا ما حصلت.

· هو الزول دا مالو؟

· تتخيلوا الغائبون من تمرين الهلال امس الاول (8) لاعبين بسبب مشاركتهم مع منتخبات بلادهم.

· اضافة الى ادم الدالي وياسر مزمل.

· يعني العدد وقت يكتمل تاني ام درمان دي وقت الهلال يكون عنده تمرين ما بتدخلها إلّا بجواز.

· امس الاول شفت بوغبا في تمرين الهلال.

· قلت والله بعد كدا قناة الهلال دي مفروض يشفروها.

· مجاهد فاروق.

· وصلاح عادل.

· ولاست جيسي.

· الهلال بقى عندو وسط …لو لعبنا بدون دفاع وبدون هجوم بنغلب بيه.

· الكلام دا من غير محمد الرشيد.

· عيد مقدم ومنير ود نوباوي وياسر مويس ..ديل العاوز يثبتم ليكم منو؟

· الكلام دا غير الكنغولي فيني كومبي.

· هو الزول دا مالو؟

· اطراف الهلال يمين وشمال استفين زوي ومؤيد عابدين وادم الدالي.

· اطراف تتجيب لفة الرأس.

· نحن رأسنا لفة.

· المريخاب كيف؟

· هو الزول دا مالو؟

· في حراسة المرمي ابوعشرين.

· وهناك جمال سالم.

· وكديابا.

· هو الزول دا مالو؟

· تتخيلوا الهلال بعد كل هذه الاسماء – بعد القيامة الرابطة دي عاوزين يجيبوا عزام عادل ود البيه ولسه بفاوضوا في محمد عبدالرحمن الغربال.

· عليكم الله الكلام دا هسع ما بقطع القلب.

· هو الزول دا مالو؟

· كمان عزام عادل (ود البيه) دا حكاية تانية.

· بتعرفوا (خياطة اليد).

· خياطة اليد دي اسألو منها عزام ود البيه.

· السنة دي شبعنا تسجيلات.

· ما عاوزين أي حاجة بعد عزام عادل.

· قفلوا على كدا.

· والواحد بعد الكلام دا بقى نفسو بس في هلال مريخ.

· جهاز الهلال الفني يضم (5) جنسيات مختلفة…ومدرب المريخ التونسي خشارم قال ما بقعد.

· قال ما لقى حق التذاكر عشان يرجع تونس.

· خشارم قال كان بيصل لمعسكر المريخ بالركشة.

· وقال حافز الفوز بالدوري الممتاز كان عبارة عن 20 الف جنيه.

· تستاهلوا.

· عجبنا ليكم يا رمضان عجب.

· تعالوا شوفوا الهلال.

· جهاز فني عالمي.

· لبس جديد – كل شهر في الهلال هناك زي جديد.

· حاجة تشرح الصدر.

· قطاع رياضي على اعلي مستوى.

· مدير كورة ..يحسدنا عليه ريال مدريد.

· ومعسكر في القاهرة.

· المدير الفني قال حتى (الكور) عندنا فيها ازمة – خشارم قال بتمرنوا فقط بـ (15) كورة …وقديمة كمان.

· يا جماعة بي حالتكم دي الموسم القادم بنشوفكم في الدوري الوسيط.

· هو الزول دا مالو؟

متاريس

· نرجو من مجلس الهلال والقطاع الرياضي اتباع اجراءات مشددة لحماية اللاعبين والجهاز الفني ودائرة الكرة من الكورونا.

· أي اصابة لأية لاعب يمكن ان تدخل الهلال في حيص بيص وتدخل الهلال في الحظر الصحي.

· يجب ان يدخل كل لاعبي الهلال في معسكر مقفول ولا يسمح لهم بالمخالطة او الخروج حفاظا عليهم من الاصابة بفيروس كورونا.

· ربنا يحفظ الهلال.

· اتباع الفحوصات الدورية ومنع الاختلاط يمكن ان يقى الهلال من الكثير من المخاطر.

· طبقوا الاغلاق التام لمعسكر الهلال.

· ما في لاعب يطلع.

· الله يحفظ البلاد كلها ان شاءالله.

· الحبيب نصر الدين الفاضلابي لخص الحكاية كلها في (هو الزول دا مالو)؟

· نحن ذاتو ما فاهمين حاجة يا الفاضلابي.

· دفاع الهلال فيه وضاح واتارا.

· والله تاني (رسالة) ما بتفوت.

· مسكول ما في.

· عزام عادل مع عبدالرؤوف وبوجبا …قيامة رابطة.

· كل الخبراء ..كل الناس قالوا ان صلاح عادل هو افضل محور في السودان.

· سمعت كثيرون قالوا ان نجم التسجيلات الحقيقي هو صلاح عادل.

· مجاهد فاروق …حوامة ومهارة وروح ونشاط وقوة.

· سليم برشاوي العائد …ٍسوف يكمل قوة الهلال الهجومية في الوسط.

· والله نحن ذاتو رأسنا بقى يلف.

· هو الزول دا مالو؟

· تشكيلة الهلال تاني إلّا يختوها بالقرعة.

· الله يكون في عون الجهاز الفني.

· أي لاعب اتسجل في الهلال يستحق ان يكون اساسي.

· واي لاعب بقى في كشف الهلال يستحق ان يكون اساسي.

· سوف نعود لنكتب عن الفدائي عمار الدمازين ويونس الطيب ودراج وكل الذين غادروا كشوفات الهلال.

· نتمنى لهم التوفيق في مسيرتهم القادمة.

· هو الزول دا مالو؟

· هلال زي دا …اجري جري عشان تكسب عضويته.

· عزيزي الهلالابي ادعم فريقك باكتساب عضويتك.

· احمى هلالك بعضويتك.

· عضويتك.

· عضويتك.

· عضويتك.

· …………..

· ترس اخير : الناس ديل ح يرفعوا الفراش متين؟