اللون (الازرق) حتى في الانتخابات الامريكية تغلب على اللون (الاحمر)

صابنها

اللون (الازرق) حتى في الانتخابات الامريكية تغلب على اللون (الاحمر)

·      لاحظ الناس في تغطية الاخبار للانتخابات الامريكية في  الصراع الدائر بين الحزب الديمقراطي (جو بادين) والحزب الجمهوري (دونالد ترامب) ان هناك تنفاسا وسباقا بين اللون الازرق واللون الاحمر ، وقد جرى تسمية الولايات التى تتبع تاريخيا للحزب الديمقراطي بالولايات (الزرقاء) بينما تصبغ الولايات التابعة للحزب الجمهوري باللون الاحمر.

·      كلنا نعرف وندرك ان اللون (الازرق) انتصر على اللون (الاحمر) وتغلب عليه في الانتخابات الامريكية.

·      عشان ما تعملوها ساكت في كمال شداد.

·      مزمل الايامات دي فك سوداكال ومسك في شداد.

·      عينكم في (السوباط) وتطعنوا في (شداد).

·      ما بحلكم.

·      اركزوا بس.

·      السوباط دا لو استمر سنة في الهلال مزمل ابوالقاسم ذاتو بنجيبو (الاسياد) يشتغل مع الرشيد علي عمر.

·      جريدة الصدى الايامات دي زي صيوان البكا.

·      حتى تكون الصورة واضحة وقبل ان ندخل في الموضوع وبحسب تقارير ومراجع عن استعمال اللون الازرق واللون الاحمر في الانتخابات علينا ان نقف في تلك النقاط التى اخترتها لكم من تقارير ومقالات طويلة  يمكن توضح للناس الصورة.

·      (يشير موقع “Vox” الأمريكي إلى أن متابعة الانتخابات الرئاسية قبل دخول التلفزيون الملون للبيوت الأمريكية في بداية الستينيات، كانت عن طريق تحديد نسبة كل مرشح في الولاية واستعراضها بشكل منفصل، مما كان يتسبب في إرباك بعض المتابعين للنتائج. لكن مع دخول التلفزيونات الملونة إلى البيوت الأمريكية، تم تغيير آلية عرض نتائج الانتخابات، حيث تم استخدام الخرائط الانتخابية الملونة لأول مرة في 1972 من قبل الشبكات الإخبارية الأبرز في الولايات المتحدة؛ وهم ABC وCBS وNBC. وصممت CBS أول خريطة لانتخابات الرئاسة الأمريكية باستخدام اللونين الأحمر والأزرق، واستخدمت اللون الأزرق للجمهوريين والأحمر للديمقراطيين، وألهمت تلك الخطوة الشبكات الإخبارية الأخرى باستخدام هذين اللونين في جميع الخرائط الانتخابية).

·      اللون الأزرق في البدء كان يشير للجمهوريين والأحمر للديمقراطيين.

·      غايتو يا المريخاب تعبتوا معانا بنوصلها معاكم حدها.

·      الليلة معاكم للصباح.

·      عشان ما تقعدوا تغالطوا.

·      تغالطوا زي الشرارة في القندول.

·      تاريخيا تقول التقارير (في انتخابات عام 2000، تم اعتماد عبارات “الولايات الزرقاء” كناية عن الديمقراطيين و”الولايات الحمراء” كناية عن الجمهوريين، واعتمدت الشبكات بشكل مكثف على الخرائط الانتخابية باللونين الأحمر والأزرق لشرح السباق المحتد بين المرشحين في ذلك الوقت، بين آل جور الديمقراطي وجورج بوش الابن الجمهوري).

·      نحن اصلو ما عندنا حاجة ساكت.

·      نحن أي حاجة عندنا بي نظام.

·      ما بنقطع ليكم حاجة من رأسنا.

·      انتوا مفتكرين الموضوع سائب ساكت كدا.

·      وتقول المراجع التاريخية : (في عام 1908، استخدم ملحق لصحيفة واشنطن بوست اللون الأحمر للولايات ذات الميول الجمهورية، والأزرق للولايات ذات الميول الديمقراطية، والأصفر للولايات المشكوك فيها).

·      اللون الاصفر من يومو ما لون ثبات.

·      نحن طبعا عندنا برضو اللون الابيض لون السلام والنقاء والسماح.

·      طبعا اللون الازرق هو لون السمو والرفعة ولون السماء ويستعمل دائما للصفاء النفسي والذهني عكس اللون الاحمر لون الدم والحروبات والكوارث.

·      انتوا قايلين مزمل ابوالقاسم (الغلاط) دا جابو من فراغ.

·      ديل اسم النادي حقهم اختلفوا فيه.

·      عكس الهلال الذي ظهر مع هلال رجب في عام 1930 وكان اول فريق كرة في الكرة الارضية يحمل اسم الهلال.

·      تقول التقارير العالمية (تقليديا ترتبط الرموز الحمراء بالاتجاهات اليسارية، وتختار الحركات اليمينية اللون الأزرق غالبا كلون مناقض، وحتى منتصف ثمانينيات القرن الماضي ارتبط اللون الأحمر بالديمقراطيين، وارتبط الجمهوريون باللون الأزرق).

·      الديمقراطيون في امريكا يصنفوا من اهل اليسار …مع ذلك اختاروا اللون (الازرق) ولهذا جاء في التقارير (يجادل بعض الجمهوريين بضرورة ربط الحزب باللون الأزرق، كما هي الحال في أغلب أحزاب الوسط التي تميل لليمين، خاصة في الدول الأوروبية. ويرجع البعض أصل ربط الحزب الجمهوري باللون الأحمر إلى حقبة الحرب الأهلية في ستينيات القرن 19، حين ارتبط اللون الأحمر بالشمال الفدرالي الاتحادي، في حين استخدم اللون الأزرق للإشارة إلى مناطق الجنوبيين الانفصاليين).

·      في بريطانيا ، يستخدم المحافظون اللون الأزرق ويستعمل العمال اللون الأحمر.

·      اظن بعد كدا الكلام بقى واضح.

·      ما عاوز زول يطلع يشبح لي عيونو متل (جدول تلاتة).

·      أنا اول مرة اعرف جدول تلاتة قاعد يشبح عيونو.

·      لهذا السبب ما كنت بحفظ هذا الجدول.

·      يبدو ان هذا العصر هو عصر اللون الازرق – الموضوع جاء من فوق.

·      الدكتور كمال شداد ما عندو ذنب.

·      الازرق في امريكا له الغلبة وله السيطرة.

·      الشيء العجيب ان ترامب في الولايات المتحدة الامريكية وبعد الخسارة امام جو بادين عمل نفس عمائل المريخ هنا.

·      ترامب قال عاوز يمشي المحكمة.

·      وقال الانتخابات ما نزيهة.

·      قعد يجلبق ويكب في  الجرسة.

·      نفس الشيء.

·      نفس حركات مزمل ومعاوية الجاك وهيثم كابو.

·      تتخيلوا لمن اللون (الازرق) يفوز بالدخول للبيت (الابيض) ممكن يحصل شنو؟

·      ابيض وازرق.

·      قولوا انتوا.

·      والله أنا فترت من الكلام.

·      فترت من الشرح.

·      قدر ما قلت ليكم ما عاوزين تستوعبوا.

·      ناس المريخ اعدادهم لسه فيه مشكلة.

·      ما قادرين يوفروا حق تذاكر عودة المدرب من تونس.

·      استاد المريخ ارضيته الآن لو زرعت فيها (بصل) ما بقوم.

·      التش عاوزين يعيدوا تسجيلها عن طريق النفرة.

·      ليه هو (حيطة).

·      وإلّا فصل وقع في مدرسة اساس ؟ عشان تعيدوا تسجيله بالنفرة.

·      الشافكم في (الوسيط) الموسم القادم ما كضب.

·      عجب والرشيد لسه مصيرهم معلق.

·      وتمارين المريخ فى ام درمان ما بدأت …والهلال على وشك السفر الى القاهرة.

·      فيني كومبي (بنزيما) كرته وصل.

·      وجيسي لاست كرته وصل.

·      والليلة او بكرة بالكتير محمد اوتارا كرته بكون وصل – دا لو ما وصل امس.

·      وعزام.

·      والغربال.

·      الله يتم لينا كل الخطوات بنجاح تام.

·      اللون الازرق ينتصر.

·      اللون الازرق يكتسح.

·      اللون الازرق يتقدم.

·      اللون الازرق في الصدارة دائما.

·      قالوا ليك مريخابي مشى للدكتور يشكي من المصران والمعدة والعيون والضهر وشفع الحلة.

·      المريخابي قايلها (كورونا).

·      الدكتور قال ليه انت عندك (ارنق) في الركبة.

·      وارن قدا للناس الما عارفين هو محمد احمد ارنق اللاعب المنتقل من هلال الساحل الى الهلال.

·      عشان ما تقعدوا تتغالطوا لينا.

·      المريخابي قال ليه بالله الموضوع وصل الركب.

·      ارنق في الركبة – هو الموضوع دا خطير شديد يا دكتور؟

·      دي شبكة شنو الوقعنا فيها دي.

·      مريخابي قالوا ليه ابوعشرين مشى الهلال…قال ليهم والله الموسم الجديد ما عارف اشجع منو؟

·      مريخ الفاشر ولّا مريخ ام درمان؟

·      والله لو ركزتوا على (مريخ الفاشر) احسن ليكم من جهجة ناس رمضان عجب ديل.

·      ابقوا على مريخ الفاشر.

·      اعصروا على مريخ الفاشر – عشان ما تحرقوا اعصابكم ساكت.

·      على الاقل ترتاحوا من (المغصة) دي.

·      مالكم ومال التلتلة.

·      …………

متاريس

·      نحمد الله ونشكر فضله استاد (عالمي) للهلال.

·      وقناة زرقاء في منتهى الروعة والجمال.

·      وصحافة هلالية محترمة.

·      في المرحلة القادمة اعلام الهلال يجب ان يتوحد.

·      اصبحنا نملك فريق ما بيسأل في الريال.

·      وعندنا جهاز فني مكتمل من كل الجنسيات.

·      هذا الفريق اذا وجد الاستقرار والدعم المالي الكافي يمكن ان يحقق كل البطولات التى يشارك فيها.

·      لجنة التطبيع يجب التمديد لها منذ الآن.

·      عشان الاوضاع تستقر.

·      والامور تمشي على ما يرام.

·      يجب ان تثبت الاوضاع جيدا في الهلال قبل ان يأتي مجلس منتخب.

·      لجنة التطبيع لو اكتفت بهذا ما في زول عاوز منهم شيء تاني.

·      فعلوا ما لم تفعله المجالس السابقة كلها في التسجيلات والجهاز الفني والإعداد والنظام الذي اصبح في الهلال.

·      لكن المشكلة من يقدر على توفير تكلفة تسير الهلال اذا رحل مجلس السوباط.

·      لذلك يجب التمديد لمجلس السوباط.

·      لا اعتقد ان هناك مجلس يستطيع ان يوفر مرتبات الجهاز الفني والمحترفين واللاعبين غير مجلس السوباط.

·      غايتو الهلال بقى عندو (اطراف) لو قعدت تشاهد الهلال في التلفزيون لو ما ربط الحزام ما تقعد.

·      اطراف طيارات بس.

·      قولوا ما شاءالله.

·      ربنا يحفظ الهلال ويغطي عليه.

·      نجيلة استاد الهلال اصبحت روعة.

·      النجيلة رجعت تاني وبقت خضراء ، بعد ان فقدت لونها.

·      ولسه العمل جاري في الاستاد.

·      في مباراة المنتخب السوداني مع المنتخب الغاني في ام درمان سوف يذهلكم استاد الهلال.

·      الجوهرة الزرقاء بقت تجرح.

·      تشرق.

·      عزام في الهلال يمكن قيده تحت السن.

·      المحافظة على الشيخ اذا تمت اعارته تتمثل في التوقيع معه لعقد ممتد كما يجب اعارته لفريق يقدر ان يطوّر موهبته ومستواه ويشركه بصورة مستمرة.

·      اسكندر ايضا من اللاعبين الذين يجب اعارتهم بدلا من الاستغناء عنه.

·      التفكير في الاستغناء عن أي لاعب تم تسجيله قرار غير سليم.

·      الهلال يحتاج لكل العناصر التى قام بتسجيلها في هذه الفترة.

·      ………

·      ترس اخير : أي مريخابي تطقو (كهربة) هذه الايامات … ما يمشي الدكتور ..دي ما كهربة .. دي تسجيلات الهلال.