لو قام بيهو (لغم) برضو دايرنو !!
بالعربي الكسيح
محمد الطيب الأمين
لو قام بيهو (لغم) برضو دايرنو !!
* سجل سوق (الكِرين للعربيات) بمدينة بحري قبل سنوات بعيدة قصة ألطف وأغرب عملية بيع .
* وكان (بطل) القصة فتاة (بت عز) .
* دخلت الفتاة (الكِرين) واختارت عربة (كامري) شبه جديدة .
* كان برفقتها شاب (يفهم في العربيات) .
* الشاب (فتش العربية) ومنحها الضوء الأخضر لإكمال البيعة .
* طلبت الفتاة أن تخرج بالعربة قبل أن تمضي العقد .
* ركبت وجمبها الشاب (لفت) ولما جات راجعة احتاجت (تضرب بُوري) فكانت المفاجأة.
* البُوري ضعيف وصوته غريب .
* البت حلفت ستين يمين ما دايرة العربية .
* مالك ؟
* قالت البُوري ما شغال كويس .
* قدر ما شالوها وختوها ابت.
* قالوا ليها قبل ما تكملي اجراءات البيع ح تلقينا صلحنا البُوري ولو دايرة بُوري طيارة بنربطو ليك .
* رفضت وقالت إنو (بطنها طمت) من العربية .
* وقالت ليهم : لو اديتوني ليها مجان ما عايزها .
* يا بت الناس ما في بيعة (بطرشق) عشان بُوري .
* قالت : لا .
* وانتو براكم عارفين طبعا البنات لما الواحدة (بطنها تطم) .
* المهم .
* تذكرت قصة هذه (الحنكوشة) وأنا أتابع أمس فرحة إعداد مقدرة من جماهير المريخ بخبر إصابة النجم ياسر مزمل .
* الجماعة فرحانين عشان ياسر مزمل طلع مصاب .
* فرحانين وما عارفين إنو (ما في بُوري بطرشق ليهو بيعة) .
* عشان تعرفهم تمهيداب كيف .
* مبسوط مالك يا زول ؟
* يقول ليك : مبسوط عشان ياسر مزمل مصاب .
* وانت بتستفيد شنو يا (اللخو) ولو ياسر مصاب ؟
* يقول ليك : لا بس عجبني للهلال .
* طيب أنت محمد عبد الرحمن ده لما سجلتو مش كان مصاب ؟
* كان مصاب ولا ما كان مصاب ؟
* الغربال مشى قعد في تونس وقطر والإمارات ومصر ولا ما مشى ؟
* اتعالج ولا ما اتعالج ؟
* خليك من الغربال .
* البرير سجل نصر الدين الشغيل مصاب .
* انت (كتمهيدابي داقي سستم) رأيك شنو في الشغيل ؟
* الشغيل ده بتعرفو كويس .
* صلاح إدريس سجل حمودة بشير مصاب .
* نجح ولا ما نجح ؟
* وين المشكلة ؟
* لو ياسر مزمل مصاب .. المشكلة وين ؟
* خليتو صفات ومواصفات ياسر كلها ومسكتو في (البُوري) .
* قوم على حيلك .
* قوم يا عاطل .
* (ياسر مصاب) ولا (سيف تيري نصيح) .
* الفحوصات الطبية أكدت غياب ياسر مزمل عن الملاعب لفترة (٤٥) يوماً .
* التقرير الطبي اداهو (٤٥) يوم ، ومننا نحن (٦٠) يوم زيادة .
* نوديهو مصر يتعالج ، وبعد يتعالج يمشي ماليزيا فترة نقاهة وبعد داك يجي .
* اصلو ما مستعجلين .
* ياسر عمرو (٢٢) سنة .
* نديهو سنة يتعالج فيها وبعد داك يجي.
* وتاني لو لا قدر الله أتعرض لإصابة برضو بنديهو سنة .
* ما في أي مشكلة .
* ياسر ده لو قام بيهو (لغم) نحن دايرنو.
* بتعرف (اللغم) ؟
* برضو دايرنو.
* الكشف فيهو (٢٩) لاعب يلعبوا هم لحدي ما ياسر مزمل يجي راجع .
* لكن السؤال : هل رمضان عجب برجع ليك ؟
* هل محمد الرشيد برجع ليك ؟
* هل أبو عشرين الشهير ب(لون الدم) برجع ليك ؟
* والله العظيم لعند الآن كلما أتذكر تغريدة أبو عشرين بضحك بالصوت العالي .
* ولمن فاتهم موضوع التغريدة إليكم التفاصيل :
* الأخ غير الشقيق أبو عشرين مشى وقع عقد مع الهلال وقبض القروش كاش .
* إشترى ليهو عربية على الزيرو وجا راجع البيت .
* اخد ليهو دش وشغل المُكيف ورقد في السرير .
* دخل الفيسبوك وكتب : (أنت يا الدم لونك أحمر) .
* التمهيداب شالوا التغريدة وبقوا لافين بيها من قروب لقروب .
* مالكم ؟
* قالوا أبو عشرين ده كتب كده معناها بحب المريخ شديد .
* هاك الحب ده .
* وأكتر حاجة (اثرتني) هي تعليق (التش) على تغريدة أبو عشرين حيث كتب : (وهو في لونو غيرو) .
* التش ده شكلو مُفتح زي أبو عشرين .
* عموما .. أنت كهلالابي سيد بلد لازم تعرف إنو المريخاب جاهم شلل أطفال لما الهلال سجل ياسر مزمل .
* والله صحي .
* لازم تعرف إنو المريخ الشهير ب(الإصيفر) بخاف خوف الموت من ياسر مزمل .
* عشان كده قالوا ياسر قاطع رباط صليبي .
* ما يقطع لو قطع.
* أول لاعب يقطع رباط صليبي ؟
* ولا أحسب ليك اللاعبين القطعوا رباط صليبي قبل كده ؟
* طيب جيب ورق وقلم وسجل .
* مجاهد محمد أحمد قطع رباط .
* عمر بخيت قطع .
* حمودة ، الشغيل ، علاء الدين يوسف ، بوي ، نزار حامد ، فارس ، أمير كمال ، محمد عبد الرحمن ، ضياء الدين ، عمار الدمازين ومحمد الرشيد وقلق .
* ديل كلهم قطعوا رباط صليبي .
* شفت واحد فيهم مات ؟
* كلهم قطعوا رباط .
* لكن أبو عشرين الشهير ب(لون الدم) ما قطع رباط .
* ومع ذلك نقول إصابة ياسر مزمل هي (تمزق في الاربطة) .
* وقع ليك ؟
* نقول للحبيب ياسر عاجل الشفاء وبراحتك يا باشا .
* و….
* ملحوظة : (بعد جلسة مع الذات قررت وبكامل قواي العقلية والمهنية تغيير اسم عمودي هذا لاسم آخر سأعلن عنه لاحقاً) .
* تغيير الإسم فقط .
* و..و..
* ومصابك سميرك .
اها ان شاء الله اسم العمود شايل حتسموه شنو ،، الصفر الدولي ؟ صفر القرن ؟ اطفال الحجارة ؟ هههه قال الغربال مصاب ياخ قوم لف وشوف ليك سماية لي عمودك ده ،، بس بصراحة كان مفروض تكون مكان رئيس الهلال الشطب حمودة ومجاهد وقال الغربال مصاب لما عجز يدفع ال 2 مليار هههههه ياسر شنو عليك الله انتو مشتهين ليكم فرحة ونطيطة وزمبريطة ياخ بكل بساطة عمودك الجاري جمب ده الرد عليهو باربعة حروف : ت م ب ش ،
هههههاااااااي العربي المسيخ البرنيطة مالها داير تغيرها ولا احسن الخوذة؟ ..قبل كدا كنت أقسمت كل صباح ترفع القبعة عفوا القلنسوة كل صباح على ركبة جيسون وانه ما مصاب وفرحانين بيهو شديد…ورجل الصفوة القوي شرح لكم بأن جيسون مصاب والنتيجة كانت شنو؟ واليوم خليك مع ترماي الارباب وركبكم معاهو ٤ مواسير قلفنايز لا ساماتا الله يكفينا شر الشماته والساماتا ههههه واتزملي واتزملي وانسيني يوم ما تسألي..انا قلبي قلبي بالزعيم مبتلي وما تنسي يا ام قلبا خلي…مع صادق الأمنيات ل تيري اوري وبوغبا والطيب مدثر وحسين شندي ومجاهد فاروق…هههه مسعول من الخير اا العربي المسيخ دحين الهلال دا معمولو عمل يقوم يسجل نص دستة من دكة النمور الساكنة فوق الخشة دا حالتو عبدالمهيمن عارف البير وغطاها لكن لا يمكن يعقب على قول الارباب الضكر واتزملي.
الوصيفاب الزناطير اديهم فى راسهم عشان يعرفوا حاجة . اقترح تسمى العمود شنكار والشنكار ادأة يستعملها النجار لمعرفة المسافة بين الابواب حتى يأتى الباب مستقيما
الليلة الدلاقين هائجين في جميع اعمدة كتاب الهلال. ردم تقيل ينم عن احقاد دفينة. وده كلو من مضاعفات مخدر اليخماو صاحب السر المقدس لدي بني دلقون. الله يكفينا شرور الدلاقين وكاهنهم ابو الاحقاد.
اسلوب الردم واحد مهما تعددت الاسماء ممايدل علي ان الكاتب واحد وهو ذلك المدمن لمخدر اليخماو.
هه ههه هههههههااااي زناطير ووصيفاب؟ انت راكب من ياتو حتة؟ حبيبنا ديل الرشاشات ولا انت صفوة وتشابه عليك البقر ؟
يا اخواننا انا صراحة بعذر المريخاب الايام دي. تلقى الواحد بحاول يستهزأ بالهلال ويوهم نفسه بإنو كل شىء في المريخ تمام التمام لكن الحقيقة غير كدة تماما. المريخ يواجه الان مشاكل بالكوم وصدمة السوباط والحراك الرهيب اللي حصل في الهلال واللي قابله في المريخ تخبط شديد كلها خلت ناس قريعتي راحت يهضربوا ليل ونهار. معذورين.
زناطير دي اول من اطلقها الجزائريين علي الدلاقين ولكن كعادتهم يسرقون الالقاب الجميلة لسيد البلد ويرمونه بداائهم ثم ينسلوا.
وعادت ريما لكتابتها القديمة … عمودك ده ما يصلح تسميه أي اسم تاني يعني حتسميهو أيه مثلا فاسمو ذيو بالضبط تفصيل عربي كسيح كلو هضربات وهترشات حقد مشجع مغلوب وممغوص شفاك الله
يااستاذ محمد الطيب اقترح عليك تسمية عمودك ب ( دلاقين التمهيدي ) ده اقتراح وكل واحد حر في اقتراحاته