جيسي .. كُراعو فيها (هبهان) وشوية (قُرنفل) !!
بالعربي الكسيح
محمد الطيب الأمين
جيسي .. كُراعو فيها (هبهان) وشوية (قُرنفل) !!
* قد تنسى تأكل من (الفول والبيض) إذا كانت (المائدة) تعج ب(الكبدة والمحشي والشية والكباب) .
* بتحس إنو (الفول) ده ما وقتو ولا ده محلو.
* بتحس بيهو كلمة شاذة .
* زي (قناة الهلال) كده .
* قناة الهلال شايلة إسم (الهلال) وهي (ما الهلال) .
* في (المائدة العامرة بالطيبات) لو شلت من كل (صنف) لقمة واحدة ح تشبع.
* لقمة من (المحشي) ولقمة من (القِيمة) ولقمة من (سلطة الأسود) ولقمة من (الكبدة) ولقمة من (الكباب) ولقمتين من (اللحمة المُحمرة) ولقمة من (السمك) ولقمة من (الفراخ) .
* ح تشبع بدون ما تكرر الصنف.
* بل في (أصناف) ح تنساها أو بتحس إنك لو قربت عليها بضيع زمنك ساي .
* كلما (تعددت الأصناف) كلما (شبعت سريعاً) .
* نظر ساي ح تشبع .
* الشبع بالنظر وارد في المناسبات الفاخرة.
* وبما أن ذلك كذلك فأن كشف الهلال (السنة دي) فيهو من (الطيبات) ما يجعلك تنسى بعض (الأصناف).
* السنة دي (نظر ساكت ح نشبع) .
* وقبل كل شئ نقول (بسم الله ماشاء الله) .
* تسجيلات أكثر من ممتازة وقد تم إنجازها مبكراً في (سابقة) ربما لم تحدث في تاريخ النادي القريب .
* كونو الهلال يخلص تسجيلاتو قبل بداية التسجيلات .. دي ما حصلت قبل كده .
* كونو الهلال يدخل المرحلة التانية من الإعداد (المباريات الودية) ولسه فترة التسجيلات ما إنتهت .. دي ما حصلت قبل كده .
* نقول ماشاء الله والحمد لله.
* شغل يفتح النفس .
* زحمة بتاعت نجوم .
* زحمة بتاعت (أصناف) .
* ما تعرف تأكل شنو ولا تخلي شنو .
* تقول (نزار حامد) فجأة تتذكر (عبد الرؤوف) .
* تقول (بشة الصغير) فجأة تتذكر (بوغبا) .
* تقول (مجاهد فاروق) فجأة تتذكر (صلاح عادل) .
* تقول (فييني) تلقى نفسك نسيت الأخ غير الشقيق (أبو عشرين) الشهير ب(لون الدم) .
* تقول (مؤيد عابدين) فجأة تتذكر (واتارا) .
* وكل (الأصناف) دي كوم ، والضلع (كوم) تاني .
* جيسي وما أدراك ما جيسي.
* لما أتذكر الهلال سجل جيسي تجدني أبتسم حتى في (بيت البكا) .
* والله صحي .
* تابعت جيسي من خلال ثلاث مباريات إفريقية.
* وقررت مثل غيري أن أمارس ضغط شبه يومي منادياً بضرورة تسجيله .
* والحمد لله أن كل جماهير الهلال طالبت بتسجيله .
* وجاءت الاستجابة العاجلة من لجنة التطبيع.
* لو لم تُسجل لجنة التطبيع غير جيسي لرجح ذلك كفة الهلال في التسجيلات .
* جيسي لما (تفكُو) بالسوداني بيعادل ليهو زي حوالي (١٣) أمير كمال و(١٢) سيف تيري .
* لم ألح من قبل على تسجيل لاعب مثل (جيسي) ومن قبله (عبد الرؤوف) .
* والحمد لله (الإتنين) الآن في تشكيلة الهلال .
* واراهن منذ الآن أن جيسي سيعيد جماهير الهلال إلي المدرجات .
* جيسي موهبة إفريقية من طينة (اوكوشا) و(موبوتو) و(مهند الطاهر) .
* كورتو فيها (لون وطعم وريحة) .
* لما يلعب (الباص) في المستطيل الأخضر أنت في المدرجات بتشم ريحة (الباص) .
* بتشم ريحة أقرب لريحة (القرنفل) و(المسك) و(الهبهان) .
* باص زي (شاي البت البتريدك) .
* مش زي باصات صلاح نمر .
* صلاح نمر لما يفك الباص لا بتعرفو باص ولا بتعرفو أمر قبض ولا بتعرفو عِقاب .
* صلاح نمر بيلعب ليك باص زي (حادث الأمجاد) .
* المهم .
* جيسي بإذن الله سيكون (كرفتة على عنق الهلال) .
* وزي ما قلنا من قبل : جيسي (بيلعب الكورة زي الما قاصد) .
* بتحس بيهو (ما قاصد) وهذا من (عظيم الموهبة) .
* الله يحفظو ويحميهو ويغطي عليهو يارب .
* احفظوا العمود ده وانتظروا جيسي مع انطلاقة الدوري .
* نجدد الشكر لرئيس لجنة التطبيع السوباط ولنائبه الطاهر يونس والفاضل التوم ولكل أعضاء اللجنة .
* ما قصرتوا والله .
* تسجيلات (على الورق) أكثر من ممتازة فقط نرجو وننتظر التوفيق الذي هو من عند الله .
* ونركب صافنات ونجيبة (عركية) واصلو الزول بيموت والذكرى تفضل حية.
* ملحوظة : (بعد جلسة مع الذات قررت وبكامل قواي العقلية والمهنية تغيير إسم عمودي بالعربي الكسيح لاسم آخر سأعلن عنه وعن الأسباب لاحقاً) .
* تغيير الإسم فقط .
* و..و..
* شامي لي ريحة (قُرنفل قُرنفل والله أعلم) .
شر البلية ما يضجك … أقرأ وأضحك
السؤال الأول :- استخرج من المذكورين أدناه نجم واحد هههههه
قال ( زحمة بتاعت نجوم .تقول (نزار حامد) فجأة تتذكر (عبد الرؤوف) .
* تقول (بشة الصغير) فجأة تتذكر (بوغبا) .
* تقول (مجاهد فاروق) فجأة تتذكر (صلاح عادل) .)
(وصحي الما عندو التش بخلعو عبدالرؤوف)
السؤال الثاني :- ضع دائرة على رقم الاجابة الصحيحة لماذا لم يقدم الهلال عقديه مع العجب والرشيد للجنة اللاعبين المحترفينللمطالبة بهما :-
1- الهلال لا يملك عقود مع اللاعبين والموضوع كلو كذب وتخدير للجماهير لتنسى قصة السماني
2- الهلال يخاف من العقوبات لعدم سلكه الطرق القانونية في التسجيل يعني عدم خبرة وعدم موضوع
3- العجب والرشيد طالبا بفسخ العقود وقالو ما دايرين نلعب في الهلال
4-كل ما ذكر صحيح
السؤال الأخير :- قال الكاتب الكبير أوي (تابعت جيسي من خلال ثلاث مباريات إفريقية وقررت مثل غيري أن أمارس ضغط شبه يومي منادياً بضرورة تسجيله ).
التعليق : لا يااااخ أنت منو يا ربي عشان تقيم
1- مورينيو
2- غوارديولا
3- زيدان
4- مزمل أبوالقاسم
هههههههاي
فعلا شر البلية مايضحك ياخالد. امشي اقرا كلام ابو شيبة عشان تعرف عندهم ولا ما عندهم عقودات. الهلال سوف يستخرج العقودات عند اللزوم وبمزاجه. غايتو الورطة الدخلكم فيها الكاهن اليخماو مااظنكم تطلعوا منها بسهولة واليخماو وقع في شر اعماله. غايتو عفيت من ود الطيب شغلو زي نار القصب وخايف يوم يكتل ليهو تمهيدابي.
سلم نادي المريخ رسميا خطابات اللاعبين محمد الرشيد ورمضان عجب لفسخ عقديهما من الهلال وذلك بعد ان ابديا الرغبة في الاستمرار مع نادي المريخ ويجدر ذكره ان اللاعبين عاشا اوضاعا صعبة اثرت على اداءهما في مباراة المنتخب امام غانا وهو ما انعكس سلبا على مستواهما وتسبب في انهيار الوسط تماما وهو ما ادي مدرب المنتخب لسحب اللاعبين من الملعب
منقووول
اها رايك شنو في الكلام الفوق ده. اذا مافي عقودات عاوزين يفسخوا شنو. ؟؟؟؟