جيسي اللاعب الذي جعل (فكتوريا) تميل طربا

صابنها

محمد عبد الماجد

جيسي اللاعب الذي جعل (فكتوريا) تميل طربا

• وردي في الغربة مثل (الدرب) البودي على البيت – فيه تفاصيل كل الحكايات والذكريات.
• في دروب (اسماء في حياتنا).
• درب البيت.
• ودرب المدرسة.
• ودرب الحلة.
• والدرب البتسافر بيه.
• ودرب الرجعة.
• لك ان تعتبر ان المعني بـ (الدرب) هنا (الشارع) كما جاء في السياق السابق، او (الجلكوز).
• ما فارقة.
• نحن ما في حاجة فارقة معانا.
• زمان اغنيات وردي كانت بتدينا قدرة على (التنطيط)…والفرحة والمرقة في الشارع.
• بي مناسبة.
• او بدون مناسبة.
• زي كتاب الجغرافيا.
• بالمناسبة (كتاب الجغرافيا) ما عندو علاقة بالموضوع.
• دي عدم المناسبة ذاتها.
• في دروب او شوارع فيها ملامح (الصبا) – والشفع العملوا الدرب سوساق.
• هي وينها الغربة؟
• عشان تشبكنا وردي.
• وفكتوريا.
• ويا حليل ام درمان.
• غربة عمر (5) يوم – متل النوم في حافلة المواصلات – تنوم ، تصحى تلقى محطتك فاتت.
• تقوم مخلوع .. تنسى (الباقي) مع الكمساري (وهو المطلوب)…تبقى عليك (باقى) وفوات محطة.
• التضاريس هي العناوين التى يمكن ان تكشف بها خبايا المكان.
• الامكنة ذاتها عبارة عن ذاكرة للإحداث والحكايات.
• هي حافظة للتفاصيل بشكل غريب.
• في كمبالا – الاشجار داكنة اللون – خضرتها تميل الى السواد ، غير ان ابداعها عبارة عن (لوحة تشكيلية).
• حركة الدراجات البخارية في شوارع كمبالا مثل (غليان) الموية في قدرة الفول.
• من أي حتة يطلع ليك (موتر).
• بين موتر وموتر ..موتر انت ما شايفو.
• الموترات في يوغندا – تستعمل (طرحة) – وسيلة مواصلات رائجة ورابحة ..وقادرة على التغلب على زحام كمبالا الكبير.
• طبعا كمبالا زحمة …الزحمة ما عندنا برانا – شوارعها نازل.. طالع ..هي عبارة عن روابي بين منخفضات.
• حي فوق.
• وحي تحت.
• هذه التاريض اعطتها شكل جمالي بديع.
• في كمبالا لا توجد صفوف (خبز) – الخبز كما تشتيه الانفس ..يقدمونه لك بمية شكل.
• مشينا المطعم السوداني …تتخيلوا جابوا لينا (رغيف)..قلنا ليهم انتوا ما سودانيين.
• نحن بقى عندنا عقدة من (الرغيف).
• لا توجد اكثر من سيارة او اثنين في طلمبة الوقود …حسدناهم في (بنزينهم).
• صورت لي طلمبة فاضية.
• والطلبمات في السودان لا تكون فاضية إلّا اذا كانت قاطعة.
• لكن مع ذلك اليسر ، الحصول على شريحة تلفون في يوغندا – اصعب من استخراج الجواز في السودان.
• تقيف في الصف ..وتصوّر الجواز ثم تتصور انت بلحمك ودمك برفقة الشريحة على ان تلوح بها لتكون واضحة ثم تنتظر بعض الوقت للدخول للشبكة.
• عندما تدخل الشريحة الشبكة …تطلع انت منها من ضيق الانتظار والاجراءات.
• قد تكون تلك الاجراءات نتاج الترتيبات الامنية اللازمة – معظم الدول الافريقية القريبة من السودان اثيوبيا وتشاد ويوغندا ، حذرها (الامني) عظيم.
• الوضع الاجتماعي هناك مبني على حسبة (امنية).
• بفتش لي في مدخل …اخش ليكم به على (جيسي) محترف الهلال الجديد.
• فتشت يوغندا دي شارع …شارع ..ما لقيت غير بحيرة (فكتوريا).
• طبعا الايامات دي ح اكرهكم بحيرة (فكتوريا).
• وما بعيد اجيبها ليكم (كبسولات).
• اصلو مع الاوضاع الاقتصادية دي أي حاجة بقت (كبسولات).
• ومع الكورونا السلام بقى (كبسولات).
• ما عاوز اسبق الاحداث …لكن امس اول مرة اشاهد فيها (جبسي) عيانا بيانا – من ارض الملعب.
• امس كان التمرين (الكروي) الاول للهلال في يوغندا.
• اداء الهلال – ما شاءالله.
• ما في كلمة.
• لو ما تصورت ما تتكلم.
• ما عارف الدخل الصور هسع شنو؟
• في حماس وغيرة وقوة في تمارين الهلال – المدرب الصربي روزان (ثعلب) تدريب ..غرس في لاعبي الهلال روح قتالية ومنحهم حيوية …كانت مفقودة في تمارين الهلال.
• ناس بوجبا ديل قلبوا أي شيء.
• بشه الصغير بقى حاجة تانية.
• يدافر ويقلع ..ويجري ..وينزل ويطلع.
• الصربي البرتغالي روزان صاحب شخصية قوية ونفاذة وقادرة على التأثير على كل من حوله.
• ما عاوز اتكلم عن التمرين بصورة عامة – عاوز ادخل في التفاصيل طوالي.
• مرات التفاصيل اهم من الموضوع الرئيسي.
• غايتو الهلال جاب ليه لاعب لن يجعل احدا يجلس في كرسي في استاد الهلال.
• الناس كلها سوف تكون واقفة.
• لاعب مع مهاراته العالية وفنياته وامتاعه ، (نحلة) في الميدان ..وبيلعب من لمسة.
• ما بعقده.
• التش لو جاء الهلال بقعد احتياطي …حتى لو كان نجم الموسم.
• جيسي لاعب غني بالتفاصيل الصغيرة.
• بفصل ليك الكورة مقطع ..مقطع.
• بالتأكيد لا اريد ان احكم على اللاعب من تمرين واحد – وان شاهدت اللاعب في مباريات سابقة مع فريقه السابق تؤهلنا لهذا الحكم.
• جيسي لو ما بخاف الكضب ..خلي بحيرة (فكتوريا) تميل طربا.
• قبيل انا قلت ليكم شنو؟
• قلت ليكم (فكتوريا) دي انا تاني ما بخليها.
• بجيب ليكم خبرها.
• بحيرة (فكتوريا) تعبت معاي.
• يوم السبت ان شاءالله جمهور الهلال على موعد مع لاعب (عجيب)..بنقطها ليكم ..وبقنع ليك الهلالاب.
• طبعا الهلالاب ما بقتنعوا بالساهل.
• أي حاجة عندهم فيها (مراقة).
• والله انا غايتو تابعت تمارين الهلال …من بعيد ومن قريب …ولغاية الآن ما بقدر اضع ليكم تشكيلة للهلال.
• البيلعب منو ما عارف.
• في لاعب تاني في تمري الهلال عامل (جوطة) و (حركة) شديدة …وهو اللاعب استفين زوي.
• عبدالمهيمن الامين متحمس شديد للاعب مجاهد فاروق ..قال لي اللاعب دا فنان ..ومهاري ومقاتل ..وبجيب أي قون.
• الزول دا أي حاجة ممكن يعملها في الكورة.
• عبدالمهمين نظرتو ما ساهلة …نظرتو زي (شهادة التخصص في الجراحة).
• في لاعب اخر …ضمن وجوده في التشكيلة …والله الزول دا كورونا ما طلعه.
• اكيد بتكونوا عرفتوا اني بتحدث عن صلاح عادل.
• والله …الهلال ما شاء الله.
• الله يحفظ الهلال.
• وان شاءالله البداية من يوغندا تكون بداية خير على الهلال …حتى ينطلق الهلال بعيدا.
• البدايات مهمة.
• والطموحات والآمال كبيرة.
• والكورة مجنونة.
• وفكتوريا عاوزة تكون شاهدة على انطلاقة الهلال الافريقية.
• الهلال تاني ما بقيف.
• بس عاوز انبه الجهاز الفني للهلال …ان يحذر من التدخلات العنيفة في التمارين ..عشان روح التنافس جعلت تمارين الهلال مولعة نار.
• المدرب الصربي طبعا افتقد مؤيد عابدين …هو كان من المندهشين به.
• وصدقوني هذا المدرب بعد ما يشوف سليم برشاوي ايضا سوف يندهش به.
• محمد عبدالرحمن (محترف) حقيقي …لاعب شايف شغلو …وعارف هو بعمل في شنو؟
• الحراس الثلاثة …جمال سالم وابوعشرين وابوجا ..خضعوا لتمارين شاقة بجد.
• مدرب الحراس السباعي …اخضعهم لتمارين …قطعت انفاسهم.
• الهلال كله تمام.
• أي حاجة مية المية.
• ابقوا فرحانين.
• وان شاءالله البلد بخير.
• وكورونا تنتهي.
• والصفوف تنتهي.
• وترجع أي حاجة تمام.
• ……………
متاريس
• الليلة الخميس.
• وبكرة الجمعة.
• والمباراة السبت ان شاءالله.
• فكتوريا ح تفهم شيء.
• يوغندا طبعا بحكم البحيرة عندهم (سمك) جميل …السمك البتاكلو فيه من النيل الابيض …جدوده من فكتوريا.
• بينا عشرة وسمك.
• اكتر حاجة اسعدتني في مدرب الهلال مع روحه الجميلة شخصيته القوية.
• ما في زول بفرفر.
• أي زول في حتتو.
• الكهربة في كمبالا …بتقطع وتجي.
• ما براكم.
• مع زحام كمبالا الشديدة ..إلّا ان العاصمة اليوغندية عاصمة (هادية).
• في منتهي الهدوء.
• في حاجات كتيرة بتشبه حاجاتنا.
• رغم هطول الامطار المتسمر إلّا اننا نضمن جمهور الهلال …الامطار في كمبالا تهطل ما بين الساعة 12 منتصف الليل وحتى الساعة الثانية.
• العصر ما في مطر.
• ………
• ترس اخير : في ناس زعلانة من جيسي …عشان لعاب شديد.