اسمه (الامريكي) سجلوه في (القدس) بعد (التطبيع)

صابنها

محمد عبد الماجد

اسمه (الامريكي) سجلوه في (القدس) بعد (التطبيع)

· حكاية ناس المريخ والتى اصحبت في كل 48 ساعة تظهر ليهم مشكلة جديدة بتذكرني بـ (ترتر ود كجم) والذي حكوا عنه ان شرطة المرور قد اوقفته بسبب مخالفة عدم ربط حزام الامان عندما كان سائقا لسياراته.

· بوليس الحركة عندما كان بحرر لـ (ترتر ود كجم) في مخالفة عدم ربط الحزام…. قال ليه (ترتر ود كجم) أنا اصلا وقت يكون ما عندي (رخصة) ما بربط الحزام.

· زول ما عندو رخصة يربط الحزام في شنو؟

· بوليس الحركة قال ليه : ما عندك رخصة!!! تعال لي جاي.

· (ترتر ود كجم) قال ليه الرخصة اعمل بيها شنو والعربية ما فيها (فرامل).

· بوليس الحركة قال ليه كمان ما فيها (فرامل).

· البوليس كفكف اكمام بدلته وعيونه بقت زي (القرع).

· ترتر ود كجم قال ليه والفرامل ادوسها كيف اذا انا كنت (سكران).

· بوليس الحركة قرب منه اكتر وبدأ يشم في الرائحة وقال ليه وكمان سكران!!.

· البوليس عاوز يستفرغ من الرائحة.

· ترتر ود كجم قال ليه أنا لمن اسكر لازم اشرب سجارة (بنقو)…عشان اسوق بي مزااااج.

· بوليس الحركة قال ليه وكمان مسطول.

· عيونه التى قلت لكم سابقا انها اصبحت متل (القرع) – بعد الكلام دا بقت زي (البامية المفروكة).

· هذه الطرفة قرأتها بسياق اخر عند الاستاذ الفاتح جبرا قبل سنوات ، وهي تنفع لحال المريخ الآن.

· كل ما يطلعوا من مشكلة..يدخلوا من مشكلة.

· ما عارف ليه شاعر بان المريخ دي ايامه في الممتاز بقت محدودة.

· الناس ديل بي وضعهم دا (الدرجة الثالثة) ما بعيدة منهم.

· قالوا ليهم عندكم مشكلة في تسجيل بخيت خميس.

· قالوا بخيت خميس ما مشكلة.

· بنحلها.

· بنسمكرها ليه.

· ظهر ليهم محمد الرشيد.

· قالوا بنعالجها.

· بنشوف لينا طريقة.

· قبل ما يحلوا مشكلة محمد الرشيد ظهرت ليهم مشكلة رمضان عجب.

· دي صعبة.

· دي ما بتصلح.

· قنعوا من رمضان عجب ..ظهرت ليهم مشكلة عمار طيفور (الامريكي).

· يعني كشف المريخ السنة دي ناقص (4) خانات.

· والله العظيم في شواقين لو الحافلة او الهايس ناقصة (نفر) ما يتحركوا شبر.

· حتى لو قعدوا للصباح.

· انتوا عاوزين تلعبوا بي كشفكم الناقص دا كيف؟

· الاتحاد الافريقي رفع كشف الاندية الى (40) لاعبا بسبب كورونا.

· والاتحاد السوداني قام برفع كشوفات الاندية الى (30) لاعبا.

· العالم كله فيه زيادات في كشوفات اللاعبين.

· إلّا المريخ كشفه في هذه الظروف ومع الكورونا ناقص (4) خانات.

· عرفها ابوعشرين.

· عفرام عليك يا ابوعشرين.

· بخيت ورمضان عجب ومحمد الرشيد تاني سنة ما بدقوها.

· إلّا يشتغلوا (ترزية).

· او يمشوا يعملوا ليهم مشروع بتاع دواجن.

· كورة قريبة نهي.

· نهي كورة.

· يعملوا ليكم شنو؟

· إلّا يقولوها ليكم كدا بالهندي.

· غشوهم ناس المريخ.

· ضغطوا عليهم.

· لذلك معاقبة المريخ مهمة.

· المريخاب عملوا من اجل حرمان الهلال من الثلاثي والهلال ليس في حاجة لهم – المريخ حرم نفسه من لاعبيه وفقد خاناتهم في كشوفات الفريق.

· خانات فاضية.

· كشف المريخ الآن فيه 26 لاعبا.

· طبنجة طبعا مشكلة جاهزة.

· زول عمره 30 سنة بيلعب تحت سن العشرين.

· انتوا بتلعبوا على منو؟

· وبعد دا بهاجموا في الدكتور كمال شداد.

· شداد يبقى ليكم (عمر)؟

· شداد يبقى ليكم (جنسية)؟

· شداد يعمل ليكم شنو؟

· شداد يتقطع.

· والله بعد كدا شداد ما فاضل ليه إلّا يفتح ليكم فصول لمحو امية التسجيلات.

· تنططوا في عيونكم متل (سواق اللوري) وقت يدخل الحلة.

· خلوا الدكتور كمال شداد … ناس الهلال لو وصلوا هذه العقود الى الفيفا وتلاعب المريخ في بيانات اللاعبين ح شوفوا بحصل ليكم شنو؟

· الدرجة التالتة طوالي مع (القدس).

· كدا قولوا سجلتوا رمضان عجب ومحمد الرشيد وبخيت خميس بهذه البيانات هل سوف تخرجوا لهم جوازات جديدة.

· جوازاتهم القديمة ح تمشي وين؟

· والله دي (جريمة) اكبر من جريمة (سرقة البنك الدولي).

· ورطوا روحكم.

· انتوا القاعد يفكر ليكم منو؟

· القاعد يخطط ليكم منو؟

· معقولة تعملوا كدا في المريخ.

· نحن المريخ دا لو ادونا ليه ما بنعمل فيه كدا.

· الحمدلله الهلال انجز تسجيلاته واكمل كل ملفاته بشكل قانوني.

· وبرة عندنا ياسر مزمل والدالي جاهزين في التسجيلات القادمة.

· شوفوا ناس الصدي براهم بقولوا في شنو:

· (فجّر معتصم عبد السلام نائب رئيس لجنة شؤون اللاعبين غير الهواة مفاجأة من العيار الثقيل. وقال معتصم في تصريحاتٍ لصحيفة الصدى الرياضية الصادرة امس ”الأربعاء”، إنّ الهلال لم يرفع ثلاثي المريخ رمضان عجب، محمد الرشيد، بخيت خميس في كشفه، ولم يتعاقد مع ياسر مزمل والدالي لاعب أهلي عطبرة كما تردّد. وأبان معتصم أنّ كشف الهلال الذي تسلّمته اللجنة يضم”30″ لاعبًا فقط، وأنّ الخماسي الذي يضم ثلاثي المريخ إضافة إلى ياسر مزمل والدالي لا وجود لهم في كشف الهلال. وأشار إلى أنّ لجنة شؤون اللاعبين غير الهواة نفذّت عملها بعدالةٍ ولم تنحاز لأيّ طرفٍ ولم تقدّم أيّ مساعدة للهلال أو تقم بعملية”سمكرة” لمساعدة الأزرق في التخلّص من الكشف الزائد كما تردّد).

· شفتوا الشغل.

· يعني ثلاثي المريخ (خانات) ما كلفونا.

· خاناتهم برة.

· الى ان تحل مشكلتهم يرجعوا الى ناديهم الهلال الذي تعاقد معهم بشكل رسمي وقانوني.

· بخيت خميس…ما بستاهل الجوطة دي.

· بنشطبوا.

· ما فارق كتير.

· لا في الهلال.

· ولا حتى في المريخ.

· رمضان عجب ومحمد الرشيد يستاهلوا.

· يستاهلوا البحصل ليهم دا.

· ح نطلعهم اعارة.

· درس عجيب من الهلال للمريخ.

· بالله نديكم درس في اولادكم.

· ديل عرفناهم.

· بخيت خميس.

· ورمضان عجب.

· ومحمد الرشيد.

· الامريكي عمار طيفور في شنو؟

· وكمان عمار طيفور.

· زول بيلعب في الدرجة الرابعة او في اكاديمية ساكت ..يعمل فيكم كدا.

· المريخ السنة دي لا سوداني ولا امريكي.

· لاعب حر.

· وعندو جنسية سودانية.

· وبيلعب في المنتخب الوطني.

· وما قدروا يسجلوه.

· وعاملين لينا فيها منقطنها.

· انت يا مزمل درس اللاعبين الهواة ما كنتوا حاضرو.

· الظاهر مزمل كان غائب اليوم داك.

· اليوم داك شنو؟

· الظاهر كدا مزمل السنة كلها كان غائب.

· دك السنة بحالها.

· جماعتكم عاوزين يعملوا فيها حرفاء.. جابوا عمار طيفور من الدرجة الرابعة من ايطاليا وقالوا يسجلوه في السودان في الدرجة الثالثة.

· الدرجة الثالثة في السودان بتساوي الدرجة الرابعة في السودان.

· وعشان يكملوا الحرفنة قالوا يسجلوه في الدرجة الثالثة (هاوي).

· اللفة الطويلة دي عشان شنو؟

· الموضوع ما مستاهل.

· غايتو رمرم دا فعلا رمرم.

· أي حاجة يدخل فيها بيبوظها.

· تذكروا صور رمرم مع شيبوب.

· اها هسع قالوا رمرم دخل في موضوع طيفور.

· عشان كدا الموضوع باظ.

· الشيء الغريب عمر طيفور لقبوا (الامريكي)…جابوه عشان يتسجل في (القدس) احد اندية الدرجة الثالثة في ام درمان بعد (التطبيع) مع اسرائيل.

· وعاوزين الموضوع بعد (التطبيع) يمشي عادي.

· انتوا البعمل فيكم كدا.

· والله المرة دي مفروض ناس الهلال يكرموا د. مزمل ابوالقاسم.

· اصلو ما قصر مع الهلال.

· رمضان عجب ومحمد الرشيد وبخيت خميس طاروا من المريخ.

· ولحقهم عمار طيفور.

· وسبقهم ابوعشرين.

· زول جايبنو من بيتو غالبكم تسجلوه.

· …………….

متاريس

· أنا هسع خايف على سيف الدمازين.

· يمكن برضو تطلع فيه مشكلة.

· بكري المدينة مرق منها.

· لكن بكري برضو مسكين.

· قاعد سنة بدون كورة.

· لا نادي.

· ولا منتخب.

· غايتو البيمشي من الهلال دا بجهجه جنس جهجه.

· الامريكي دخل الهلال طرف في الحوار – وكانت دي النتيجة.

· رمضان عجب بفكر يعمل ليه مصنع تلج.

· ومحمد الرشيد يمكن يعمل ليه بقالة.

· القعدة ما تطول عليكم يا شباب.

· في تمارين ملاعب خماسية في شارع الستين.

· …………..

· ترس اخير : رمضان عجب ومحمد الرشيد وبخيت خميس الهلال فرض عليهم (العزل الصحي)…الثلاثي طبق (خليك في البيت) عمليا…هيع عفارم عليكم يا ناس لجنة التطبيع.