المريخ لاعب في القاهرة ورمضان عجب (محنن) في أم درمان!
قزاز ورذاذ
محمد الطيب الأمين
المريخ لاعب في القاهرة ورمضان عجب (محنن) في أم درمان!
* زمان أيام المدرسة كان التلميذ صاحب (الخط الجميل) بيحظى بحب (المعلمات) .
* المعلمات كانن بحبن الولد الخطو سمح.
* وبيضربو بيهو المثل.
* يقول ليك : (فلان ود فلانة خطو جميل بصورة ما تتخيليها).
* أما نحن فكنا من آخر اهتمامات المعلمات.
* المعلمة تعاين في (كراسك) تقول ليك انت بتكتب بكرعينك ولا شنو؟
* تقول ليك أنا لو نايمة وكتبت (خطي بيطلع احسن من ده).
* الحاجة دي كانت بتزعلنا جداً.
* بنزعل لما زول يقول لينا : (أنا لو نايم بكتب أحسن منك).
* وبما أن ذلك كذلك أنا ما داير أقول الأهلي المصري لو نايم (كورتو) أفضل من المريخ.
* ما داير أقول كده لأسباب وطنية.
* والمريخ يلعب بإسم الوطن.
* لكن كمان الوطنية ما بتمنعنا إنو نتكلم عن الأهلي المصري من باب التحذير.
* أول حاجة الأهلي المصري ما بخسر يوم التلاتاء.
* وما بصبح الواطة.
* وضبيحتو بالقمرة.
* وسكينو حمرا.
* يعني (سيد التلاتاء).
* بمناسبة التلاتاء.
* امبارح يوم الاتنين انطلقت مراسم زواج الأخ غير الشقيق رمضان عجب.
* بنقول لرمضان عجب إن شاء الله بيت مال وعيال.
* تغلبك بالعيال وتغلبها بالمال.
* أتخيل .. المريخ يواجه الأهلي بالقاهرة ورمضان عجب (محنن) في أم درمان.
* يمرق حنة ويخت حنة.
* قاسي يا السوباط.
* حارة والله.
* شلنا أبو عشرين الشهير ب(لون الدم).
* وقفنا محمد الرشيد وخلينا رمضان عجب يعرس في وقت ما وقت عرس.
* لجنة تطبيع الهلال لو لم تفعل غير أنها جمعت رأسين بالحلال لكفاها ذلك.
* رمضان عجب لو ما وقع عقد مع الهلال ما كان بعرس في الأيام دي.
* ودي حاجة يشكر عليها الهلال.
* أي لاعب في المريخ داير يعرس خليهو يوقع مع الهلال.
* بنوقفك ٦ شهور جرجرة ساكت وبعد داك بنوقفك ٦ شهور بالقانون.
* دي سنة وحالتو لسه الفيفا ما طلعت قرارها.
* قايل الشغلانية هظار يا عجب صاح؟
* عرس وأمشي شهر العسل وتعال صوم رمضان والعيد والاضحي ولسه الستة شهور ما بتكون كملت.
* وبعد تكمل للوقت داك قرار الفيفا بيطلع.
* يعني تاني الكورة دي يا رمضان تلعبها في أحلامك السعيدة.
* وكذلك الأخ محمد الرشيد.
* محمد الرشيد وزير العريس.
* يا محمد (حنن) يدك الشمال.
* والله يا جماعة الهلال ده قاسي.
* سجل تسجيلاتو كاملة وضرب المريخ في تلاته من أفضل نجومه.
* تلاتة ورابعهم بخيت.
* ضر كده بس.
* وأنا ما فارقة معاي.
* فريقي مكتمل واموري واضحة.
* وخسارة جنوب أفريقيا دي أنا واحد من الناس ما شغال بيها الشغلة.
* في النهاية الهلال بتأهل.
* قناعتي الهلال ما فيهو مشكلة عناصر لأن الموجودين هم الأفضل في السودان.
* الهلال عندو مشكلة مدرب ما عرف يوظف جيش المواهب العندو.
* عشان كده أنا والله ما خايف على الهلال.
* ولا مستعجل.
* من مازيمبي ح نشيل أربعة نقاط.
* وح تشوف كلامي ده.
* لكن أنت يا اللخو.
* جاهز للأهلي المصري ولا ح تقضيها لينا برد وكلام من النوع ده؟
* الكويس في الموضوع إنو الاهلي ما شغال بالمباراة دي الشغلة.
* والله صحي.
* فريق جاي من كأس العالم للأندية.
* انت جاي من وين؟
* قوم على حيلك.
* عموما ومن باب الوطنية نحن بنشجع المريخ لحدي قبل بداية المباراة بدقيقة.
* أول ما المباراة تبدأ أنا واحد من الناس بشجع (البرد).
* هاك الجرسلين ده.
* ونركب صافنات ونجيبة (صعيدية) واصلو الزول بيموت والذكرى تفضل حية.
* و.. و..
* ومبروووك يا عريس.
ضر كدا يعني السوباط يقنن أمواله والمتعافي يقنن أمواله والمريخ ضحية والهلال فاكر تعطيل المريخ بساعد في نيل كأس أبطال أفريقيا؟ المريخ امام الأهلي المصري بفقع مرارتكم ان شاء الله انت خليك مع ماما اميرة وبلوزداد ومازيمبي وبعد تصعد للدور التالي تعال ردد عبارات العربي المسيخ…ههه قلت لي ستة شهور قبل العقوبة و٦ شهور بعد العقوبة يعني النية مبيتة والديناصور ما متذكر الموت خالدين فيها أبدا ولجان الاتخاد ناسيين الموت وشغالين نهش في لحم المريخ لكن نقول لهم يمهل ولا يهمل وصبرا جميلا والله المستعان.
وصفوك سيظل باقي مثل حقدك هذا
المريخ بمن حضر…
وصفرك سيظل باقي مثل حقدك دا
هذا زمانك يا مهازل فامرحي
المشكلة شنو انو المريخ يكون لاعب في القاهرة ورمضان عريس
مستوي منحدر وسطحي في التفكير والكتابة
رحم الله هاشم ضيف الله وعمر عبدالتام
الحبيب محمد الطيب الامين نحن ما عاوزين نقلل من قدر الهلال ولا شي لكن انت شكلك بتحلم انو الهلال بيتاهل بالطريقة التي لعب بها امام صن داونز الفروقات شاسعة بين الهلال وباقي فرق المجموعة خطوطها كلها متقاربة وبلعبو كورة جماعية عكس الهلال الذي يفتقر الي لعب الكرة الجماعية والتمرير الصحيح وعدم التمركز داخل المعلب بدءا من دفاع الهلال الذي اتضح من خلال سير المباراة لايوجد انسجام بينهم يعني بالعربي دفاع الهلال شوارع
الف مبروك لكبتن رمضان عجب اللاعب الخلوق.
بالتوفيق للتمهيداب في خطف تقطة ثمينة من القاهرة.
نحن مجموعه من الهلالاب هنا في امريكا بنكره نشجع المريخ لكن…اي شي ولا بعض المصريييت المتعنصريين
الليله نحن مع المريخ (صدق ولا تصدق)..
شوف واسمع المعلق في ال بين سبورت وكلامه عن المريخ والفرق السودانيه دا بيخليك بدون ما تشعر تشجع المريخ اليوم
اشمتوا يادلاقين علي سيد بلدكم حتي تلقوها في انفسكم. تلاتة كفاية القون صفاية. تستاهلوا والله ومن يشمت اخيرا يشمت كثيرا. 😹😹😹
والله دا فعلا مستواك في الكتابه زي خطك في المدرسه لانو واااااضح انك ما اتعلمته من استاذاتك اي شئ ركيك حتي في تفكيرك قال ضر كدا هههههه والله واااضح انو راسك فااااااااضي زي دولاب الهلال من البطولات انا من ما شفتك رابط راسك زي التقول مفلوق عرفته قرعه ساااااااااكت والدليل برنامج في التلفزيون سجل اضعف نقااااط في البرامج قوم يا اتعلم الخط والاملاء