عندما تكون (النجيلة) معارضة!!

قزاز ورذاذ

محمد الطيب الأمين

عندما تكون (النجيلة) معارضة!!

* عندما كانت الدنيا (رخية) كان الضيف بجيك زيارة و(شايل حاجة في يدو).
* زمان ما في ضيف بيجي (يدو فاضية).
* يا جاك شايل معاهو (كيس موز) أو (رطل سكر).
* برتقال أو بن .
* تتمنى يومياً يجيكم ضيف.
* ضيف ظريف ولطيف زي أبو عشرين.
* أبو عشرين الشهير ب(لون الدم) سجل أمس زيارة لفريقه الأسبق النسور.
* أبو عشرين مشى ليهم و(يدو ما فاضية).
* مشي وشايل حاجة في يدو.
* وصراحة كانت لفتة بارعة.
* قدم أبو عشرين عدد ٤ قفازات هدية بسيطة كده لحراس فريق النسور.
* وهي قفازات ذات مواصفات رفيعة.
* والهدية ليس في القيمة المادية بقدر ما هي في هذا التقدير والأدب.
* لو اكتفى أبو عشرين بالزيارة ساكت لكان لذلك أثر وتأثير أكثر من رائع.
* ولكنه شال معاهو هدية.
* راجل عاقل وبعرف الأصول.
* أنا حقيقة كنت بتمنى أبو عشرين يعمل نفس الزيارة دي لناس المريخ.
* باعتبارو النادي السابق.
* يمشي ليهم ويشيل معاهو (بذور نجيلة) هدية.
* يا (بذور القلعة وجوهرها).
* بذور النجيلة ممكن تكون أغلى هدية.
* النجيلة نقطة ضعف المريخ.
* في زول بصدق إنو المريخ تلاتة سنين ما قادر يلعب في استادو بسبب النجيلة؟
* نقعة ساكت.
* في لاعبين سجلوا في كشوفات المريخ ولعبوا وتم شطبهم ولم يلعب ولا مباراة في استاد المريخ.
* دخلوا الكشف لكن ما دخلوا الإستاد.
* والله صحي.
* شكلو النجيلة دي (قاصدة سوداكال).
* نجيلة (معارضة).
* بمناسبة المعارضة.
* ربما يكون مجلس الهلال الحالي هو المجلس الوحيد الما عندو معارضة.
* ما عندهم معارض بالشكل الواضح.
* في ناس حاسدنهم وديل بحسدوا اي مجلس.
* الغريب أن لجنة التطبيع (المعارضين ليهم هم أعضاء في اللجنة).
* وي فعلاً حاجة غريبة جداً.
* صحيح أن اللجنة في بيانها الأخير نفت أن تكون هنالك خلافات.
* وهذا ما نتمناه نحن.
* ولكن الحقيقة أن الخلافات موجودة ولكن نرجو أن يتجاوزها الجميع.
* إنتو كلكم ٩ أشخاص.
* الخلاف في شنو؟
* نحن ما صدقنا لقينا مجلس بهذه الإمكانيات الأخلاقية قبل المالية.
* ما تخذلونا.
* نتوحد عشان الوحدة سر أي نجاح.
* الهلال هو أكثر نادي على مستوى العالم تضرر من الخلافات.
* الخلافات (الهلالية الهلالية).
* الآن أمام الهلال مباراة مهمة أمام المريخ.
* وبعدها تنطلق الدورة الثانية.
* نرجو التكاتف حتى يعود اللقب للهلال.
* الجميل أن الهلال الآن يملك فريق محترم جداً.
* ويملك جهاز فني أكثر من محترم.
* وأحسب أن مجلس الإدارة كذلك محترم.
* يبقى نفوت الفرصة وما نسمع كلام أهل الفتنة عشان الهلال.
* ونركب صافنات ونجيبة (هلالابية) واصلو الزول بيموت والذكرى تفضل حية.
* و.. و..
* والله في.