ليهم حق القعدة في البلد تغلبهم (المقبرة غير آمنة)

صابنها
محمد عبد الماجد
ليهم حق القعدة في البلد تغلبهم (المقبرة غير آمنة)

· في اوائل السبعينات ومن سجن كوبر غني محمد وردي للتجاني سعيد (قلت ارحل).
· شغل زول قنعان.
· عاوز يرحل.
· الاغنية دي طبعا زي (شنطة) السفر.
· وقت تعمل فيها مسافر.
· ما بتكلم زول.
· الفرقة بتخليك زي الزعلان – وانت ما زعلان.
· هدومك بتكون معلقة في السلك في حالة يرثى اليها…(المفارق عينو قوية).
· الوقت داك وردي كان كل شيء في البلد..هو الحكومة وهو المعارضة …وهو الشعب.
· هو المدرسة وهو الجامعة وهو المسرح وهو النادي.
· هو الفطور والغداء والعشاء.
· هو القهوة والشاي.
· وكانت ساعة النصر في اكتمال الهلال.
· وردي وضع لحن هذه الاغنية (قلت ارحل) وهو معتقل في سجن كوبر من غير ان يستعمل آلة موسيقية …لحنها بالخشم..رغم ان موسيقي (قلت ارحل) موسيقي مركبة ..وصعبة.
· لحن زي (الحلاقة).
· تخليك من غير ما تشعر تمشي تقيف قدام المرايا.
· غني وردي للوطن وهو في السجن (رحلت وجيت وفي بعدك لقيت كل الارض منفي).
· زول فضل السجن في الوطن من نعيم الخارج ..واعتبر كل الارض (منفي).
· ناس المريخ اكيد ما بحسوا بالحتة دي.
· ولا بيشعروا.
· حازم مصطفى الوطن عندهم (عطاء) و (سماد) و (تقاوي).
· والسماني الصاوي.
· ومحمود الخطيب.
· ما ابعد من كدا.
· أي قناة مصرية تحدث فيها حازم مصطفى اشار الى ان والدته (مصرية).
· الزول دا ما فاضل ليه إلّا يشارك في مسلسل (ليالي الحلمية).
· اذا كانت والدة حازم مصرية هل يعني ذلك ان يلعب المريخ مبارياته في القاهرة؟
· ناس محمد الرشيد ذنبهم شنو يلعبوا في مصر؟
· لو والدة حازم مصطفى من (اوكرانيا)…هل يعني ذلك ان المريخ كان سوف يلعب في اوكرانيا؟
· ولا فارقة معاهم في شيء.
· ولا عندهم قضية بشروط الاتحاد الافريقي.
· لو دفعت ليهم على استعداد يلعبوا في الهند ذاتها.
· نحن عرفنا ليه الجماعة ديل طلعوا من البلد.
· هجوا.
· مرقوا.
· اتغربوا.
· طفشوا.
· الله يجازي ياسر مزمل …غربهم من بلدهم.
· قالوا للاتحاد الافريقي (البلد غير آمنة)…اها ياسر مزمل ليه اسبوع شغال ليكم في (المقبرة غير آمنة).
· وانتوا ما عاوزين تفهموا.
· ما قلتوا غير آمنة…مالها بقت ليكم حارة وقت شفتوا (الجحيم) في المقبرة.
· البلد غير آمنة ياسر مزمل (خطف) ليه هدف في الدقيقة 84.
· بالطريقة دي ناس المريخ الدوري الممتاز تاني ما ح يلعبوه في السودان.
· جبل اولياء قالوا الايامات دي فيها سخانة شديدة.
· احسن امشوا مصر.
· اتخارجوا.
· قبل ما تنزلوا التانية.
· ناس حازم ديل اكيد ما بعرفوا ( وزي وطناً وكت اشتاقلو برحل ليهو من غير زاد..بدون عينيك بصبح زول بدون ذكرى وبدون ميلاد).
· وبدون ملعب ذاتو.
· خلو الاهلي ينفعكم!!
· الصحفي معاوية جمال الدين كان قد سأل وردي عن الاغنية التى يرددها بكامل خلجاته …للدرجة التى يصل فيه حد التلاشي؟
· قال وردي : (معروف انني انسجم في الاداء مع نفسي اولا اغني لنفسي لكن الاغنية التى اغنيها بكامل وجداني وكامل صوتي هي اغنية (قلت ارحل) وعندما اصل الى المقطع الذي يقول : (زي وطنا وكت اشتاقلو برحل ليه من غير زاد) عندما اصل لهذا الجزء ، لا بد ان تعترض حلقي غصة او (عبرة) كما نقول، بالرغم من اني غنيت هذه الاغنية في العام 1972م. يحدث لي هذا داخل الوطن او خارجه).
· وردي قال انه بكى في اكتوبر 1995 في حفل لندن عندما غني (قلت ارحل) وقال انه كذلك يبكي عندما يغني لمحجوب شريف (وطنا) ولا يستطيع ان يتمالك نفسه في المقطع الذي يقول (في حضرة جلالك يطيب الجلوس).
· طبعا جماعتنا ديل فاكرين في حضرة جلالك دي اتقالت في (محمود الخطيب).
· الناس ديل يا ربي سمعوا عثمان حسين بغني لحسين بازرعة فارس الرومانسية اغينة (ارضنا الطيبة).
· عثمان حسين الاغنية زي (العروس).
· زمان نحن الكيمياء والفيزياء والإحياء والرياضيات والتربية الوطنية كلها كان بندرسها (عثمان حسين).
· (قصتنا) دي كانت زي الفيلم الهندي كل ما نسمعها بنمشي نقيف في صف السينما.
· ومرات بندردق في النجيلة.
· انتوا ما قاعدين تقيفوا في (ﺃﻓﺪﻳﻚ ﺑﺎﻟﺮﻭﺡ ﻳﺎ ﻣﻮﻃﻨﻲ..ﺃﻓﺪﻳﻚ ﺑﺎﻟﺮﻭﺡ ﻳﺎ ﻣﻮﻃﻨﻲ..ﻓﺄﻧﺖ ﺩﻣﻲ وكل ما ﺃعتني..بلادي انا .. بلاﺩﻱ ﺃﻧﺎ).
· الجماعة ديل باعوا القضية بالفاتورة بتاعة الفندق.
· حسبوها بالإقامة والترحيل.
· اكيد ياسر مويس وقف في الحتة دي : (ﺗﺮﺍﺙ الكرام .. ﻭﻣﺠﺪ ﺍﻟﻌﺮﺏ..ﻭﺳﻔﺮ ﻛﻔﺎﺡ .. ﺭﻭﺗﻪ ﺍﻟﺤﻘﺐ..ﻧﺴﻤﺖ ﺷﺬﺍﻫﺎ .. ﻭﻃﻴﺐ ﺛﺮﺍﻫﺎ..ﻭﺫﻭﺏ ﻫﻮﺍﻫﺎ ﺟﺮﻯ ﻓﻲ ﺩﻣﻲ..ﻳ ﻌﺰﺯ ﻓﻲ ﺍﻟﺴﻴﺮ ﻣﻦ ﻣﻘﺪﻣﻲ..ﻭﺃﺭﺿﻲ ﻫﻨﺎ .. وارضي هنا).
· نعم وارضي هنا ..وارضي هنا.
· ناس المريخ ديل لو قعدوا اسبوع في مصر تاني ..بيرجعوا يقولوا لينا حلايب مصرية.
· اسألوني منهم..انا عارفهم.
· احتمال (شندي) التى حرق فيها اسماعيل باشا يعملوها (مصرية).
· الشيء الغريب ناس المريخ زعلانين من الغربال عشان سجل في المريخ في مباراة القاهرة واحتفل بذلك.
· زعلانين من الغربال وما زعلانين من (كرشوم) الذي سجل في مرماه امام الاهلي هدف النيران (الكفيلة).
· زعلانين ليه؟
· يزعلوا من هدف منافسهم في شباكهم ولا يزعلوا من الهدف الذي سجله ولدهم في مرمامهم.
· هسع الهدف البيزعل ياتو؟
· هدف كرشوم في المريخ ام هدف الغربال ؟
· اذا كان الاهلي (كفيلكم) في مصر …نحن هنا (كفيلين) بيكم في مصر.
· كفيلكم في السودان الهلال (سيد البلد).
· قالوا الهلال اضعف حظوظ المريخ في التأهل.
· انتوا كان عندكم حظوظ بتلعبوا في مصر.
· اكبر دليل على ان المريخ بعد الثورة اوضاعه تراجعت وحالتو بقت صعبة ..ان عماد الصيني تم طرده وهو في بلده.
· بالكرت الاحمر.
· لو الكيزان قاعدين ..الكلام دا ما بحصل.
· فقدوا صلاح قوش.
· زول يطرد من بلدو.
· الكيزان طلعوا برة البلد.
· البلد مسخت ليهم بعد ثورة ديسمبر المجيدة.
· المريخ ذاتو بقى يلعب برة السودان.
· عسكروا في مصر (90) يوما.
· هسع فرقكم شنو من مصر المقاصة وفاركو؟
· ديل بقوا قاعدين في مصر اكتر من الاهلي المصري.
· صلاح قوش في مصر.
· والمريخ في مصر.
· مدرب المريخ الانجليزي قالوا شكى من (الطقس).
· وعماد الصيني قالوا (الغبار) طلعو من طوره.
· والسماني الصاوي بيشكو من الغربة وهو في السودان.
· البلد دا تاني ما بتقعدوا فيها.
· البلد دي بقت صعبة عليكم.
· اخر مباراة بين الهلال والمريخ قبل مباراة الامس سجل فيها اللاعب ياسر مزمل.
· المقبرة غير آمنة.
· مباراة الامس سجل فيها ياسر مزمل.
· المقبرة غير آمنة.
· ياسر مزمل بقى اخطر من لجنة ازالة التمكين.
· شغال (تفكيك) في نادي المريخ.
· كرشوم في حتة.
· وحمزة داؤود في حتة.
· محيرني محمد مصطفى …تقول في (استديو).
· يا زول مالك؟
· سؤال محرج.
· وين محمد موسي الضي.
· ياسر مزمل حالتو دي عندو رباط صليبي.
· في قمة الدوري الممتاز سجل ياسر مويس من عكسية فارس عبدالله.
· وفي القمة الافريقية سجل ياسر مزمل من عكسية اجاجون.
· نفس الشيء.
· نفس الزول.
· احسن تشوفوا ليكم بلد.
· البلد دي بقت ضيقة عليكم.
· بقت صعبة.
· غير أمنة.
· الهلال دا محل ما يلاقيكم في البلد دي بغلبكم.
· إلّا تمرقوا برة البلد.
· مباراة القمة في الممتاز قالوا في عطبرة.
· عطبرة بلد الثورة.
· هي محطة الوطن الكبير.
· يعني في عطبرة ياسر مزمل دا لا بعرف الجيش ولا بعرف الدعم السريع.
· جهزوا من الآن صلاح نمر.
· صلاح نمر ارتاح من النقة الكتيرة.
· مشاوير ياسر مزمل تقطع النفس.
· انتوا عارفين دائما في حاجات بتكون لي خير.
· ونحن ما عارفين.
· معظم الهلالاب كانوا زعلانين عشان عماد الصيني مفروض يأخذ كرت اصفر امام الاهلي المصري عشان يقيف امام الهلال.
· الصيني ما اخذ كرت اصفر امام الاهلي المصري …وبقت لي خير للهلال.
· الصيني طرد امام الهلال.
· ودي اكبر خدمة قدمها الصيني للهلال.
· هاجموا ابوعشرين.
· هاجموا صلاح عادل.
· هاجموا عيد مقدم.
· سكتوا عن كرشوم الذي سجل في مرماهم امام الاهلي المصري.
· سكتوا عن الصيني الذي كان سببا في هزيمة المريخ بعد ان تم طرده.
· توني ذاتو …البلد فرقت معاه.
· توني واضح انه استعمال مصر.
· هنا ما قدر يعمل أي شيء.
· البلد غير آمنة.
· والمقبرة منفلتة.
· …..
متاريس
· سعدت بهذا الانتصار بشكل خاص من اجل المدير الفني للهلال جواو موتا ..الذي اجتهد وعمل طوال الفترة الماضية من اجل ان يصل بالهلال الى المستوى الذي يخطط له.
· بدأنا خطوة الى الامام بهذا الانتصار.
· ارقام المباريات في مرحلة المجموعات كلها في صالح الهلال وهذا امر يحسب للجهاز الفني للهلال.
· نسبة الاستحواذ امس وصلت الى 60% لصالح الهلال…مقابل 40 % للمريخ.
· فرق كبير.
· دقة التمرير 76 % للهلال مقابل 62% للمريخ.
· الضربات الركنية 10 للهلال وضربة ركنية وحيدة للمريخ.
· وفي ناس بعد كل هذه الارقام بتكلموا عن المدرب.
· حتى التغييرات التى اجراها المدرب كان لها اثرها في المباراة وجاءت في وقتها.
· عكس تغييرات المريخ التى خصمت منه.
· عبدالرؤوف وياسر مزمل شاركوا في الوقت المناسب.
· هذا المدرب نشهد له باجتهاده ومثابرته وقيامه بعمل كبير في الفترة الماضية.
· تحية خاصة للمترجم خالد ام بدة … وللجهاز الطبي للهلال بقيادة عوض الجعلي واحمد العابد ومهند ومحمد الضو.
· تحية خاصة جدا لمدير المكتب الاعلامي للهلال انس محمد احمد الذي احدث نقلة كبيرة في السويشل ميديا.
· ويبق كل الود للمبدع محمد دفع الله والرائع محمد اسماعيل.
· ما قصرتوا.
· بعد كدا خلونا نقول الهلال في حاجة الى اضافات في التسجيلات القادمة.
· لسه ..فريق البطولات يبني خطوة خطوة.
· الصبر طيب.
· …..
· ترس اخير : اجمل صورة معبرة فرحة صلاح عادل بهدف ياسر مويس …صورة تقول في مسلسل تاريخي …في معركة حربية.