(7) في (كوبر) ..بعد كدا إلّا تلعبوهم في سجن (الهدى)

صابنها

محمد عبد الماجد

(7) في (كوبر) ..بعد كدا إلّا تلعبوهم في سجن (الهدى)

· غاتيو تاني الواحد لو طقتو عقرب ما تودوه المستشفى ودوه لمباراة الهلال. في دكتور في الهلال ظهر جديد اسمو عبدالرؤوف (روفا).. قالوا ليك (سم العقرب) بشيلو بي (تمريرة).

· تمريرة عبدالرؤوف مقدمة موسيقية للهدف.

· تمريرة عبدالرؤوف شعار للهدف..هي مثل (التتر) في الاعمال الدرامية.

· قولوا ما شاءالله – تاني ما بكرر ليكم الكلام دا.

· وكان لي فيري جيرالد – اول مرة تعجبني القهوة (سكر زيادة) اكتر من القهوة (المظبوطة).

· لو استمرينا بالطريقة دي (الجاكومي) بنزل درجة تالتة.

· ناس كشفهم فيه (41) لاعبا وبتكلموا عن نجيلة استاد الهلال.

· حاسدين الهلال في نجيلته.

· انا حسادة زي دي عمري ما لاقتني. زي حسادة (الكديسة) وقت ما تلقي (اللحمة) بتقول عفنة.

· الجاكومي قال عاوز تعويض من ناس الهلال 500 الف دولار.

· الزول دا نصيح ..وإلّا الموضوع مرق من ايدو.

· اقصد مرق من رأسو.

· يا الجاكومي خلي ناس (الدعم السريع) يدفعوا ليكم الـ 500 الف دولار.

· ناس الدعم السريع الذين بصينوا في استاد المريخ الآن جايبنهم من (الصين).

· مزمل ابوالقاسم زمان وقت الهلال تعاقد مع شركة صينية لصيانة وتأهيل استاد الهلال ..مزمل قال الهلال تعاقد مع شركة (بزازات) و (مرايل) اطفال صينية لتأهيل الجوهرة الزرقاء.

· الغريبة مزمل ما قال أي حاجة عن صيانة قوات الدعم السريع لاستاد المريخ.

· ما جاب سيرة.

· عمل رايح.

· اها بعد كدا رأيكم شنو؟

· لعب الهلال في ملعبه امام الشرطة القضارف وفاز بخمسة اهداف نظيفة قالوا ملعب الهلال هو السبب.

· وقالوا وين عدالة المنافسة والهلال يلعب في ملعبه؟

· حسدونا في نجيلتنا.

· قالوا كيف الهلال يلعب مساء والمريخ يلعب عصرا في السخانة دي.

· جاءت مباراة الامل عطبرة.

· لعبنا في ملعب كوبر.

· وفي درجة حرارة 50.

· وفاز الهلال 7 / صفر.

· تاني قولكم شنو؟

· السبعة معروفة اكتر من الخمسة.

· بعد كدا إلّا تلعبوا الهلال في سجن (الهدى) بعد ما لعب في (كوبر).

· في كوبر نغلب سبعة.

· كدا الرسالة وصلت للكيزان.

· اصلو قالوا ناس البشير وعلي عثمان محمد طه في (كوبر) شكوا من البعوض ودرجة الحرارة وقطوعات الكهرباء.

· الهلال جاء بوظ ليهم أي شيء…غلب سبعة في كوبر.

· سبعة بي فيصل العجب وامير دامر.

· تاني عاوزين (اثبات) اكتر من كدا شنو؟

· الله يسألني انا هدف اجاجون ساعة كاملة فاكرو في (الكامب نو) ..تتخيلوا في النهاية طلع في (كوبر).

· كوبر الهنا والسرور.

· الهلال اعتقل الامل في كوبر مع الكيزان والمريخاب.

· زمان عندنا واحد قريبنا طقاهو (لوري) ..لفحو ليك من شارع الظلط زي جدول تلاتة!!

· لملمناه ومشينا بيه على المستشفى .. الدكتور اول ما شافو قال ليه افتح خشمك.

· قريبنا قال للدكتور يا دكتور انا طقاني (لوري) ما (كورونا).

· نفس الشيء دا حصل للمريخاب بعد هدف فيري جيرالد.

· لا اقول ليكم كورونا.

· لا اقول ليكم لوري.

· المهم في صاقعة وقعت.

· الجاكومي اكيد هسع بحفظ في جدول تلاتة ..عشان يطلع ليه في (لايف) جديد.

· نحن كنا فاكرين التوم هجو نسخة واحدة.

· التوم هجو طلعت ليه نسخة تانية في الرياضة.

· بس ان شاءالله التوم هجو ما يقرأ كلامي ودا ويزعل وقت يعرف اننا شبهناه بالتوم هجو.

· ما عارف اكتب ليكم عن شنو؟

· عن محمد وردي؟ وإلّا عثمان حسين؟ وإلّا صلاح بن البادية؟

· الحمدلله التلاتة هلالاب.

· لو عاوزين وردي بنزل ليكم تطبيق اهداف الغربال الثلاثة في الامل.

· جميلة ومستحيلة.

· وبعد ايه.

· والمستحيل.

· دا اهداف الغربال الثلاثة.

· لو عاوزين عثمان حسين شوفوا هدف فيري جيرالد ..ِ شوف عيني دي وقت الكرة لامست الشباك ..مدافع الامل عطبرة عاين تحتو لقى حارس الامل واقع تحت اقدامه متل الصرفة الاخيرة في الصندوق.

· هدف متل الزول المشي يخطب قاموا عقدو ليه طوالي.

· هدف عقد عديل ..دي حاجة الله بيسألني منها.

· هدف جيرالد زي اغنية (عشرة الايام)..او زي اغنية مصطفى سيد احمد (لمحتك).

· انا ما شفت الكورة إلّا في الشبكة.

· اللهم اديم علينا نعمة الهلال ..وما تحرمنا من فرحتنا بيه.

· وكان عاوزني اتكلم عن صلاح بن البادية بتكلم ليكم عن هدف اجاجون متل شارع المدرسة .. الواحد بدون ما يشعر يلقى نفسو واقف فيه.

· هدف اجاجون لا اقول ليكم (كلمة) ولا اقول ليكم (فات الآوان).

· ما عارف.

· مرة كتبت ليكم عن لاعب في الهلال تحت عنوان (الحان وكلمات) مهند الطاهر.

· هسع عاوز اقول ليكم نفس الشيء عن الغربال (الحان وكلمات).

· المعني شنو؟

· المعني الغربال (ما شاءالله عليه) بيسجل ويصنع.

· والله الصناعة في الهلال زي القيادة فن وذوق وأدب.

· يعني وقت تشوف روفا بيصنع للغربال تقول قناة النيلين بقت تنقل الدوري الانجليزي.

· وقت الغربال بيصنع للغربال تحس بانك عملت ليك خلطة للزبادي بالطحنية.

· ولمن ياسر مويس كمان يصنع للغربال .. تشعر بي انك زي القلبت الشريط.

· البيصنع والبيسجل في الهلال ما عندهم وفرق.

· واحد.

· فيري جيرالد زي الفتح ليه مكتب هندسي في السوق العربي.

· جيرالد يوزع ليك في الكورة زي كراس الرسم البياني زمان ..وقت اشتريناه ..فصلنا بينه وبين الكراسات التانية.

· الفرحة عاوزة تكتلني.

· عشان الكلام ما يروح منّا..مباراة امس النجم الاول فيه كان عبدالرؤوف يعقوب …وبعده مباشرة يأتي الطيب عبدالرازق.

· بقول ذلك حتى لا نمسك فقط في الذين يسجلوا في الاهداف.

· تتخيلوا روفا شريك في الاهداف السبعة.

· أي هدف سجله الهلال امس روفا عندو فيه النص.

· بالمناسبة دي.

· يا ربي الحملة ضد جواو موتا وصلت وين؟

· الكانوا بهاجموا في موتا …وقت الدوري كان ما منقول في التلفزيون هسع يا ربي بقولوا في شنو؟

· اكيد هسع بتكلموا عن موضوع تاني خالص.

· عن الكهرباء.

· عن الجاكومي.

· أي شيء إلّا المدرب.

· جماعتكم بنسوا روحهم.

· الزول دا في النجيل الطبيعي فاز بالخمسة.

· في النجيل الصناعي فاز بالسبعة.

· خمسة اهداف في المساء.

· وخمسة اهداف في العصر.

· تاني شنو؟

· خمسة بالزي الابيض.

· وسبعة بالزي الازرق.

· ما شاءالله …وتبارك الله.

· اللهم ادم علينا نعمة الهلال.

· اللجنة المنظمة للدوري بتفكر تجعل الهلال يلعب الساعة اتنين.

· الساعة اربعة ما نافعة.

· الجميل في مباراة الهلال والأمل عطبرة ان فريق الامل ظل صامد لغاية الدقيقة 40 في الشوط الاول.

· كملوا ليهم فهم في الشوط الاول.

· في الشوط التاني الهلال سجل ستة اهداف.

· اول مباراة في الدوري دخل (الشباك) اعلى من دخل (الشباك).

· تاني شنو؟

· عليكم الله مباراة الهلال القادمة عاوزنها في كوبر.

· استاد الهلال اقفلوه للبطولة الافريقية.

· بس مهم نقول ان الملعب ودرجة الحرارة تسببت في عدد كبير من الاصابات.

· اصيب لاعب الامر وخرج في اول عشرة دقائق.

· وتعرض ارنق للإصابة في نهاية المباراة.

· تتخيلوا الطاقم الطبي للهلال والأمل في اول عشرة دقائق من عمر المباراة دخل للملعب 6 مرات.

· الله يحفظ الجميع ..ويغطي عليهم.

· ……………

متاريس

· مع توقف الدوري الهلال في حاجة للراحة.

· راحة من السبعات دي.

· المستوي البدني في الهلال ارتفع بصورة ممتازة.

· يبدو ان الاضافات الجديدة في الجهاز لفني للهلال عملت طفرة كبيرة في الهلال.

· حتى مستوى ابوعشرين ارتفع.

· الهلال ثلاث مباريات تواليا لم يستقبل هدف.

· في مباراتين سجل 12 هدف.

· قولوا ما شاءالله.

· طبيعي.

· وصناعي.

· عصر .

· ومساء.

· ابيض.

· وازرق.

· اصلو ما عندنا مشكلة.

· اجمل ما في موتا انه بيشرك كل العناصر.

· في هذه الاجواء وتلك الملاعب والبرمجة الضاغطة والإصابات والكروت الملونة لا بد من تدوير جميع لاعبي الهلال.

· الحمدلله ان مستوى كل لاعبي الهلال بقى واحد.

· عشان كدا ما في واحد بقى يتكلم عن ثبات التشكيلة.

· ثبات تشكيلة في دوري بتلعب فيه كل 72 ساعة.

· وفي درجة حرارة تصل الى 50 درجة.

· الاهلي مروي الله شافو ..مباراته مع الهلال تأجلت.

· يا جماعة عاوز ارسل طوالي.

· ما ح انتظر أي حاجة.

· بكرة برجع ليكم.

· خايف من الكهربة تقطع.

· الجماعة ديل ما عندهم ضمان.

· حتى يوم الجمعة.

· وما شاءالله على الهلال.

· الله يديم الافراح.

· بكرة بنتلاقي في (فسحة) تانية.

· عشان لسه في كلام عن المستوى المتطور الذي قدمه حسين النور.

· وعن اللاعب الممتاز محمد المنذر.

· تقول بيلعب في الهلال من سنة 2000.

· …

· ترس اخير : الله يحقق الاماني.