بأي آلاء ربكما تكذبان
في السلك
بأي آلاء ربكما تكذبان
*للمريخ والهلال
*يصعدان لدوري المجموعات
*هو طبعا في حقيقتو دور الستة عشر
*وبس
*الدنيا قامت
*اسوأ عرض قدمه المريخ كان بليبيا
*نعم انتصر المريخ علي جمهور اهوج ومتهور وحكم غريب شديد ومشاكله الداخلية
*لكنه نصر من عند الله
*تلاتة اهداف يدخلن مرمانا من برة الخط
*وحارس مرمانا ينقذنا من هدف من ضربة جزاء
*اها ده حق الله ذاتو
*فنيا لا افتي لان الغرايري اعلم مني في تخصصه
*وقد تكون امكانيات نجومنا هي التي اجبرت الغرايري علي اللعب بتلك الطريقة التي قربت تودي المريخ الخور وتودينا نحنا المقابر
*وقد تكون ظروف اللاعبين هي التي فرضت تلك الطريقة
*ولكن المحصلة في فترة الغرايري تصب في صالحه
*وقصة نغير المدرب زي مابنغير التروس اثناء قيادة اي بوكس ماحبابها
*ولكنه نصر يحمد الله عليه
*اخوتنا في الهلال
*علي نفس النهج والمنوال
*صعدوا نعمة من الله ده *ماقدموا مايشفع لهم ويحلل صعودهم للمجموعات
*من سانت جورج وأنت جاي
*ولكنه نصر من عند الله
*الغريبة الاتنين نفس المستوي والمحتوي
*اي واحد فيهم لعب أربعة مباريات
*فاز في اتنين وتعادل في واحدة وخسر واحدة
*حتي صافي اهداف اي واحد فيهما منذ البداية وحتي دخول المجموعات هو هدف موجب
*في ذلك المشوار اي واحد فيهما عندو ضربة جزاء(حلال حرام المهم اتحسبت وجات قون)
*واحد فيهم افضل من التاني مافي
*نفس الخرمجة والخندقة
*في كورة الهلال
*مريخابي قال ان شاء الله الشباب يطير عشان نسجل لاعبهم بتاع النص ده
*قالوا ليهو ياتو؟
*اشر علي الشاشة
*ده…باص غلط ماطلع من رجلو ومالي النص براهو
*قالوا ليهو ده حارس الشباب يازول
*تخيلوا حارسهم قاعد في نص الميدان وما اتأهلوا
*وده كلو كوم
*احتفالات التاهل اختلفت
*وده الاختلاف الوحيد
*ناس المريخ زي الناس العرسهم في صالة
*بعد الحفلة كلو زول شتت علي جهة
*وناس الهلال زي الناس العرسهم في بيتهم
*بعد الحفلة ربوها دكاكيني
*الله يرد غربة الاستاد
*اها
*ماقلت ليكم صعود نعمة من الله بس؟
*المريخ والهلال بعد ده بأي آلاء ربكما تكذبان!!!!
*المهم
*تهنئة للاعبي الفريقين
*ففي ظل غياب ادارة للرياضة رشيدة وشديدة ولضيضة
*التأهل اعجاز
*اخواننا في الجنوب انفصلوا
*في كورة السلة وصلوا نهائيات كأس العالم
*في القدم صغارهم وصلوا نهائيات امم افريقيا
*اتفكفكوا مننا بي جاي
*تألقوا بي جاي
*اختلاف الادارة واضح
*كنا محطمنهم
*ان شاء الله دارفور تنفصل
*وجنوب كردفان تنفصل
*والنيل الازرق تتفصل
*وحلفا تنفصل
*والشرق ينفصل
*وكوستي تنفصل
*والجزيرة تنفصل
*عطبرة وشندي تنفصل
*الشمالية تنفصل
*امدرمان تنفصل
*الخرطوم وبحري اصلن منفصلات بالنيل الازرق
*حلايب وشلاتين والفشقة فاصلات
*عشان اي دولة من الدول الانفصلت مننا تجيب ليها انجاز رياضي دولي
*وبعد داك نتلمة تاني
*وعلنا ما اتلمينا
*ايها الناس
*ان تنصروا الله ينصركم
*اها
*نجي لي شمارات والي الخرتوم
*والينا ماتفصلها لينا
سلك كهربا
ننساك كيف والكلب قال افصل يامعلم خلينا نعيش
والي لقاء
سلك
هههه اتفق معاك يا وصيييف المجموعات غريبه علي اولاد الخرتوم اللاوطني 14 سنه بتطير تمهيدي زمن العارف عزو لكن سيد البلد ياهو مكانو واخدك مهاه صحبه راكب لو لا نقاط كبير البلد كنت الان بتصارع في تمهيدي الكنفدراليه اما الهلال بالارقام حصل علي 4 نقاط من سته نقاط امام الشباب وانت يا وصفه لو قابلت كلالا كان بقت عليك قصه زعلان جنوب السودان صحي صعدت دافوري حتي محللي القنوات الليبيه قالوا ده فريق بلعب كزره عشوائيه الفرقه كبيره علي اولاد الخرتوم من الخرتوم للوصيف ومن ثم للمنتخب الوطني مش كفاءه لكن لان في المنتخب مدربين وصايفه برهان وعلامات ثم اللعب مع الكبار دي نقلات كبيره علي اولاد الخرتوم الا وطني
محمد المصطفي انقذ ضربة جزاء ودخلت فيه اهداف من خارج المنطقة فذكرنا ادروب في قصته حقك تخلي حق الناس تشيل
ههههههههههخخخخخاااااي .. و الله صراحة ما بعدها صراحة … و كل حرف حقيقة .. الله يستر من فضائح قدام يا أستاذ بابكر .. كل نتائج الفرق المتأهلة من ستة أهداف لأربعة .. إلا الهلال و المريخ و حوريا الغيني ههههههه
يامعلم المرىخرخ والهايل كلهم محصلة المجموعات
طالما تطرقت للآية الكريمة فالحقيقة ان الهلال تأهل بجدارة ويجب عليك توخي الصدق في ذلك. الفريق التنزاني لم يشكل خطورة بالمطلق على الهلال ولو استمرت المباراة ساعة اخرى ما كان له ان يسجل هدف. اما المريخ فصحيح انه لم يلعب بمستواه المعهود لكنه واجه ظروف بشعة اقلها حكم متحيز وقذر. كويس انك في النهاية قدمت التهنئة للفريقين. يعني انت احسن من غيرك.
اعود واقول في مقال لك قبل مباراة الهلال لوحت لنا بأن الشباب التنزاني يلعب افضل خارج معلبه وهددتنا بكلالا وهاهو كلالا طلع من الملعب كما دخل بعد ان وضعه الطيب عبدالرازق وفيكتور في جيوبهم ولم يشكل اى خطورة بل حتى الفريق التنزاني لم يشكل خطورة تذكر ولو استمرت المباراة ساعة كاملة اخرى لما احرز هدف بعد ان اغلق عليهم المدرب الداهلية فلوران كل المسافات وجعل ثلاثي الوسط التنزاني يلفون ويدورن في الفاضي حتى انتهت المبارة. انه التعامل الذكي. ولو كنت صادق يا استاذ لقلت ان المباراة المفروض تنتهي ثلاثة للهلال من الشوط الاول.