في السلك
بابكر سلك
اكل تورك
بسم الله الرحمن الرحيم
*قالوا في انتخابات قريبة في المريخ
*فتحت العضوية
*فظهر تجار العضوية
*زي كلاب الجزارة
*يتحاوموا قدام الجزارة وعينهم علي اي قطعة لحم او شحم او حتي جلفوط
*جهزوا حسابات بنكك للبيع
*ومن يريد الترشح من فاقدي الثقة في انفسهم
*فتحوا خطوط التواصل مع تجار العضوية مرافعين القطيع
*والغريبة بعد الوعي الذي بدأ ينتظم الوطن
*لسه في جهل القطيع الذي يساق خرافا للسلخانات بعد البيع
*وتجار العضوية بياعين خلاس
*ممكن يبيعوا قطيعهم ده لي جزار ضابح في سلخانة غناوة
*ويسوقوا قطيعهم نحو غناوة
*ولما يفضل مترين تلاته علي غناوة
*ويتصل عليهم جزار بضبح في الكدروا
*يزيدهم جنيه في الراس
*طوالي بهشوا بهائمهم نحو الكدرو ويبيعوا بتاع غناوة
*ثم يختفوا عن كوكب المريخ ليعاودوا الظهور قبل الضبحة القادمة
*اقصد قبل الأنتخابات القادمة
*عشان كدة ايها الناس
*لينا سنين بنقول العضوية ام راس هي المقصودة ليست العضوية بالراس التي تساق للسلخات
*وكلما كترت العضوية الواعية ام راس
*كلما ضاق الخناق علي تجار العضوية
*وممكن يمشوا الدهب
*اخير يكوسوا رزقهم بعرق جبينهم ان تبقي لهم جبين
*وجبين دي قريبة لي جيبين
*اعمل حسابك يا ايمن
*مايبيعوا ليك القطيع
*ده كلو سديس ورباع مابنفعك
*ايها الناس
*توجد فئة وسطي
*مابين العضوية ام راس والعضوية بالراس
*هي الفئة التي ترفع شعار
*اكل تورك وادي زولك
*يعني بتقنن للاستفادة من فساد بيع العضوية
*ثم الخيانة بعبارة ادي زولك
*ودي ذاتها فئة فاسدة يجب استئصالها
*ولايحارب الفساد
*الا العضوية ام راس الواعية
*وهي وحدها التي تأتي بالمجلس الافضل
*وهي وحدها التي تراقب الكل وتحافظ علي حقوق المريخ من خلال دورها الواعي بالجمعية العمومية
*موش زي ناس اقترح قفل باب النقاش واثني
*ديل ممكن يقترحوا قفل باب النقاش قبل الخطاب ذاتو
*جاريين يقبضوا وبس
*لكن في ظل العضوية ام راس
*ممكن الجمعية تستمر تلاتة ايام في مناقشة ومحاسبة وتقييم اداء المجلس
*ويمكنها من خلال مقترحاتها وتوصياتها ان تطرح برامج ملزمة للمجلس الذي تنتخبه
*اللهم باعد بيننا وبين القطيع
*وفهم اللهم القطيع بان الراعي واعي
*وماسايقهم الا للبيع والضبح
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*تجار البهائم بقوا يزاولوا لينا
*سوقهم قرب يا والينا
سلك كهربا
ننساك كيف والكلب قال والعجب السبابه..الله لاجاب عقابهم
والي لقاء
سلك