حسرة وطن

مذاق الحروف

عماد الدين عمر الحسن

حسرة وطن

أرضاً وطن ..غالي وأصيل..مجدك وتاريخك قديم..
أرضاً وطن ..عالي وجميل..في الماضي كنت وجد عظيم ..
أرضاً وطن ..طرحوك غير متأسّفين..
نهبوك غير متورّعين..
ما راعوا قامتك وهيبتك..
ما عرفوا قيمة عزّتك..
ما حفظوا ليك ..خيرك عليهم ومنحتك..
ما عرفوا إنك جد كبير ..قاموا الرجال في حضرتك..
ما عرفوا حقك يا وطن..ما صانوا أرضك ووحدتك..
قسموك وشوّهوا خرطتك..
شالوا الجمال من طلّتك..
كْل الخِصال السمحة منك..وعِفّتك..
نهبوك في عزّ النهار..خيرات سماك وتُربتك..
غلّة أرضنا ..وثروتك..
حتي الزمن ..فيك إختلف ..
وساعاتو فيك اتغيّرت..
لا ضُل عصاريك القبيل..ولا المغارب تشبهك ..
أرضاً وطن..طرحوك في عزّ النهار..
سلبوك أمنك..باقتدار..
هدموا البيوت الواقفة فيك..ساقوهوا شعبك للودار ..
أرضاً وطن ..أصبحت لعبة في يد صغار..
وصبحت في إيد الهوان..لا حِكمة عندو.. ولا قرار..
وحالفين عليك قسما صريح ..
يا يحكموك..أو بيهدوك الدمار..
أرضاً وطن ..مجروح وغارق في النزيف..
أرضاً وطن..حرموهو خيرات الخريف..
أرضاً وطن..حُكّامو بين طاغوت وزِيف..
ربطوهو جنب ضُل الصباح…
خايفينو غضبك يوم تقيف..
تسأل عن الحق الِ راح ..عن الشهيد..
كتلوهو كيف ..
تسأل .. عن العدل المباح…
حرية كاملة .. قصاص وسيف..
تسأل عن السرق الأمان ..هتك العرض..دسّ الرغيف..
وساعة حسابو وقت دنت..قالوا السرق..ما زول ضعيف..
ما بيحكموهو عشان شريف..
وياما كم من حق بيضيع.. لمّا يسرقنا الشريف..
وياما كم من حق بيضيع لمّن حكم فينا الضعيف..
أرضاً وطن…اصبح ضعيف
وارضاً وطن ..مليان نزيف..