*المتتبع للوسط المريخي هذه الايام
*يجد ان لغة الخطاب كلها تنحصر في مناقشة بنود النظام الاساسي وقانونية الجمعية التي اجازته
*وهذه تعتبر مرحلة متقدمة جدا في الوسط الرياضي بصرف النظر عن اهداف بعضنا من المجادلة وتكوين الرأي
*تغيرت لغة الخطاب عند شعب المريخ من احقية الوزير في التعيين
*ومناشدة الوزير للتدخل
*والانبراش للمفوضية حتي بعد ان اطلقت تصريحها الشهير (الموضوع طلع من يدنا)
*وقبول تدخلات مفوضية الشباب و قبول اختياراتها لمن يقود المريخ
*تغير خطابنا من كل ذلك الاذعان والاستسلام
*لخطاب يناقش بموضوعية بنود النظام الاساسي
*ويتناول بعمق قانونية اجراءات الجمعية
*هذا العمق يبشر بموت الدولة العميقة التي اجبرت بعضنا علي الاستسلام لموجهاتها بكل اذعان
*وهذا لعمري هو خلاصة العهد الجديد وزبد ثورة الخلاص التي تهدف لارساء قواعد دولة القانون
*وكل شى بالقانون
*فلقد انتهي زمن الدسديس والغتغتة
*وشكرا كثيرا لعهد اولي اشراقاتة حطت ضياءها علي المريخ
*GAME OVER
*المهم
*قد يجد بعضنا العذر للاعبينا بنيالا
*وقد تكون مرتكزات ذلك العذر ترتكز علي الحرب علي مجلس الادارة
* زي قصة الزوج القال لي زوجتو ادينا الشاي عشان امشي الشغل
*قالت ليهو شاي بي شنو ما الموية القاطعة دي
*قال ليها خليناهو
*وهو مارق الزوجة قالت ليهو ماشة ناس ابوي قالوا امي عيانة
*زوجها قال ليها ارجيني اجي من الشغل نمشي سوا
*قالت ليهو يعني استني للعصر ما اسأل من امي مع الموية القاطعة دي؟
*اداها عشرين جنيه قال ليها حولي رصيد اطمئني عليها لمن ارجع نمشي سوا
*ومشي الشغل
*لما رجع قال ليها امك كيف؟
*قالت ليهو اعرف من وين؟
*قال ليها موش حولتي رصيد؟
*قالت ليهو مع الموية القاطعة دي اتصل بيها كيف بس؟!
*استغلت الزوجة قطعت الموية واستعملتها عذر لاي شئ
*ايها الناس
*لسنا مجبرين علي تأييد المجلس
*وفي معارضة المجلس استعمال لحق ديمقراطي مشروع
*ولكن عدم الاتصال عشان الموية قاطعة ليس بالعذر المقنع
*والتفرقة بين المريخ(الوطن)والحكومة (المجلس) امر لابد منه
*وزي ما التفكير في هزيمة وادي نيالا امر مشروع للمريخاب
*برضو تفكير (الوادياب) في هزيمة المريخ حق مشروع ومطلوب كمان
*والقصة بتعتمد علي الاصرار داخل نفس اللاعب
*بالذات اللاعب البضرب عشان تأخر راتب وحقوق
*مفروض يشتغل صاح لما يقبض
*لكن يقبض ويلبد
*دي دايره تفسير
*المهم
*نشوف الحاصل في الفاشر
*ايها الناس
*الكلام ده سر بيني وبين حمدوك
*ياحمدووووووووك
*هل تسمعني؟
*النقل الميكانيكي وين؟
*حايرجع عشان نضبط الصرف الحكومي علي عربات الحكومة
*ولا حايواصل غياب عشان اي وزير يجيب عربات وزارتو بالكباري اياها؟؟
*الاشغال حاتعود؟
*ولا اي وزير يبني علي كيفو ويعمل كبري في راس الوزارة زي الكباري الهدت الوزارات؟؟؟
*ياحمدوووووك
*الطيران المدني الحقوهوا قوااااام
*فلولا زيادة سن المعاش لغادر آخر الشرفاء الذين تم تعيينهم قبل تسعة وتمنين
*اللبن ياحمدوك
*العندو مصنع يجيب بقرو ويخلي للناس لبن بقرها
*ولو ماداير يجيب بقرو يقفل مصنعو
*الزبادي بدون الوان في بيوتنا برانا بنعملوا
*بس سيد اللبن مايبيع اللبن لمصانع منتجات اللبن علي حسابنا
*حمدوك
*هل تسمعني!!!!
*ايها الناس
*ان تنصروا الله ينصركم
*اها
*نجي لي شمارات والي الخرتوم
*والينا
*اضبطوا الاسواق لينا
*الموضوع مابتحمل تأخير يا والينا
*ففوضي الاسواق رفعت الاسعار تلاتة اضعاف علينا
*استعجلوا يا والينا
*ولا زحوا لينا
سلك كهربا
ننساك كيف والكلب قال لو خليتونا بنعضي اي زول داير يغني علي حسابنا
والي لقاء
سلك