ابوعشرين ..الحارس مالنا و(دمنا)!!!

صابنها

محمد عبد الماجد

ابوعشرين ..الحارس مالنا و(دمنا)!!!

· زمان كنت بسمع اغنية (الحارس مالنا ودمنا)…وبتمشي الاغنية عادي فيها.

· هسع عرفتهم قاصدين شنو؟

· ابوعشرين اثبت عمليا ان (الحارس مالنا ودمنا)….الدم والمال في زول واحد.

· في نفس الحارس.

· ابوعشرين.

· الزول دا طبق الكلام دا عملي – خاصة بعد ان كتب على صفحته في الفيس بوك لون الدم (احمر).

· اما عن المال فقد عرض المريخ (مليارات) ما ليها عدد من اجل ان يستمر ابوعشرين معهم.

· دم ومال.

· الهلال جاب الاتنين – عشان يحرسوا مرمى الهلال وعشان تبقى (الحارس مالنا ودمنا) حقيقة وواقع في الهلال.

· اصلو نحن ناس الحركة الوطنية.

· نادي الخريجين الاوائل.

· اظن ان الكوميديان جمال حسن سعيد في احدى (الاسكتشات) قال وهو يتحدث عن احد الحرّاس و هو يصف خطورته انه كان حارسا كبيرا وقد كان يتدرب على (قبيض) القمري.

· قبيض القمري دي ما عرفتها – يعني بعمل شنو؟

· حارس بقيض القمري دي ما سعمنا بيها قبل كدا.

· زمان كان عندنا حارس مرمي (القمرية) من سماها بجيبها ليك (مشوية).

· جاهزة.

· اتذكرت الكلام دا وأنا اشاهد حارس المنتخب الوطني والهلال بإذن الله وتوفيقه علي عبدالله ابوعشرين.

· حارس طول وعرض ما شاءالله.

· قبيض (القمري) عند ابوعشرين زي ارسال الرسالة بالتلفون.

· ولا عاوز مجهود.

· بمنتهى السهولة.

· اتذكرت الحارس الذي يمكن ان يقبض القمري عندما شاهدت البنية الجسمانية التى يتمتع بها ابوعشرين.

· ناس محمد موسى ووليد الشعلة ليهم حق ما يعرفو يجيبو قون في المريخ.

· يا زول ابوعشرين (ما شاءالله) القون وراه زي خرم الابرة.

· الشبكة ما بتشوفها من الاساس.

· ابوعشرين القمرية يجيبها ليك بي شوربتها.

· عليكم الله يا ناس المريخ دا حارس بفكوه.

· الصور التى نشرت لهذا الحارس على مواقع التواصل الاجتماعي وهو بشعار الهلال تؤكد ان ابوعشرين ما حارس واحد.

· ابوعشرين (ما شاء الله عليه) عشرين حارس في حارس واحد.

· فعلا هو حارس بي عشرين حارس.

· دا ابو عشرين ذاتو.

· اول مرة افهم الحتة البتقول الحارس الممتاز نصف الفريق.

· ابوعشرين كل الفريق.

· ابوعشرين ذهب ابعد ذلك فهو فريقه كله والفريق الذي يلعب ضده …عشرة من فريقه وعشرة من الفريق الاخر يبقوا عشرين.

· عشان كدا سموه ابوعشرين.

· مع هذه الامكانيات البدنية والمميزات الجسمانية الفريدة – ابوعشرين عندو اخلاق وعندو كلمة.

· وهلاليته ما بتغالط فيها.

· والله دي ضربة مع البرد دا زي الخمسين في اخر اللعب.

· ابوعشرين كورة واخلاق.

· مريخابي ضربت ليه وقلت ليه مبروك الكاس.

· قال لي مبروك شنو؟ قول لي كفارة قول لي هاردلك قول لي البركة في منجد النيل.

· قالوا ليك ابوعشرين لعب مباراة القمة وتسبب في فوز فريقه السابق باللقب وطلع من غير ما يحتفل باللقب.

· الولد (هلالابي) يكاتل.

· لكن في الواجب ما بيلعب.

· قدم مباراة كبيرة في قمة الممتاز ، وتسبب في خسارة الفريق الذي سوف ينتقل له.

· قمة الاحتراف.

· في تاريخ الكرة السودانية القريب هناك قصص في التسجيلات ، تصلح لأن تكون دروس وعبر للوصيف.

· اولاد الوصيف قدموا دروس لن تنسى.

· اتذكر علاءالدين يوسف والذي توج فريقه ببطولة كاس السودان وكان رجل المباراة ثم انتقل بعد ذلك مباشرة الى الهلال.

· الناس بتذكر قصة (البصمة) والموقف الذي قدمه علاءالدين يوسف من اجل ان ينتقل للهلال ليأتي ويقدم اجمل كورة مع الهلال.

· بصم ما بصم.

· بصم ما بصم.

· الكلام دا كان قبل (السيستم).

· علاءالدين يوسف متعنا في الهلال.

· والناس بتذكر الطريقة التى انتقل بها شيبوب للهلال.

· انتقال شيبوب للهلال يبقى اهم علامات الكاردينال.

· شيبوب قفز من الطابق الرابع في دولة جنوب السودان وطاف بين مطارات ثلاث دولة وذهب بعد ذلك ولعب في تونس وجاء ليلعب في الهلال بعد ذلك.

· انتقال يبقى (درس).

· يبقى علامة بارزة في تاريخ التسجيلات وفي عظمة الهلال.

· ابوعشرين الآن يقدم اجمل الدروس واعظمها.

· ابوعشرين رفض كل عروض المريخ وكل ضغوطه وشارك في مباراة القمة وتوج فريقه باللقب ثم رفض الاحتفال وجاء ليسلم نفسه للهلال.

· ابوعشرين عمل الحاجات دي براهو.

· ما في زول خطفو.

· وما في زول جاب ليه بودي قارد.

· لا دعم سريع.

· ولا قوات امنية.

· ابوعشرين مشى الحارات وجاء تاني يوم وسلم نفسه للهلال.

· كتب ليهم في صفحته (لون الدم احمر) المريخاب ناموا على كدا.

· تاني يوم شافوه في الهلال.

· كل عروضهم له رفضها.

· كل الضغوط تغلب عليها.

· كل الرجاءات ما وقف عندها.

· ترك كل هذه الاشياء وجاء الى الهلال.

· قالوا ليه يا ود الناس انت ما قلت لون الدم (احمر).

· قال ليهم انتوا عاوزني اقول ليكم شنو؟

· أنا لو بكذب ..ما كان انتقلت من المريخ.

· أنا كان بكذب كان وقعت ليكم.

· لكن انا زول واضح.

· وصريح.

· ودغري.

· وهلالابي.

· والحاجات دي طبيعي تكون في (الهلالابي).

· غايتو يا الهلال لجنة التطبيع جابت ليكم حارس ممكن تخلي مدرب الهلال الصريبي يلعب بـ 1 – 1 – 8.

· تاني بنلعب بي تمانية في الهجوم.

· ولا بنتلفت.

· بالمناسبة الكلام دا ما يقلل من جمال سالم.

· جمال سالم حارس كبير.

· وعشان ناس الهلال يعرفوا – ناس المريخ منتظرين الهلال يتخلي عن جمال سالم عشان يسجلوه.

· يا الطاهر يونس اوعكم تفرضو في جمال سالم.

· جمال حارس منضبط.

· وهو نموذج للاعب المحترف.

· ملتزم.

· وما بتسمع ليه صوت.

· جمال سالم لعب مع الهلال في ظروف صعبة.

· الهلال كان يعاني (فنيا) كثيرا – مع ذلك تحمل جمال سالم كل تلك الاتعاب.

· حافظوا على جمال سالم مع ابوعشرين.

· عاوزين موسم استثنائي للهلال ان شاءالله.

· الهلال مرة اتخصص في المريخ بالضرب في (الارتكاز).

· أي ارتكاز في المريخ جابو.

· الاستاذ حمودة بشير.

· الكبير علاءالدين يوسف.

· والمعلم نصرالدين الشغيل.

· وان شاءالله محمد الرشيد.

· هسع الضرب تحول في التمانيات.

· تحول في حرّاس المرمى.

· مرة جبنا جمال سالم وقالوا عقدو ما انتهى.

· ومرة جبنا ابوعشرين …وقالوا لون الدم احمر.

· ضرب زي الضرب.

· البلد ما فيها حراس.

· المريخ قد يعود الى اكرم الهادي سليم.

· حارس لعب في الهلال سنة 2006.

· رجعوا للتاريخ.

· للارشيف.

· زي ما جابوا كرنقو الذي وقع للمريخ في 4 ديسمبر 2011.

· انتوا عارفين كرنقو وقع منو في المريخ.

· وقع مع امير كمال.

· كرنقو وقع للمريخ في دار السلام.

· الخبر كان قد نشر في صحيفة قوون بقلم الزميل معاوية صابر الذي كان مرافقا للمنتخب الوطني المشارك في بطولة سيكافا.

· جاء في الخبر الذي نشر في يوم 4 ديسمبر 2011 م الآتي : (ضم المريخ امس الي صفوفه الثنائي امير كمال وعبد الرحمن كرنقو بعد ان وقعا امام الاستاذ طارق عطا صالح ممثل الاتحاد السوداني لكرة القدم داخل مقر اقامة بعثة المنتخب الوطني .. وجرت اولا مراسم توقيع اللاعب امير كمال عند الساعة الحادية عشر ليلا بعد عودة البعثة من منزل سفير السودان بتنزانيا الذي اقام حفل عشاء علي شرف البعثة بعد الفوز علي كينيا والصعود الي الدور الثاني .. وتأخر تسجيل اللاعب كرنقو لخروجه من الفندق وتمت مراسم التسجيل عند منتصف الليل ليصبح اللاعبان ضمن كشف المريخ رسميا ..).

· عشان ما تلخبطو يا جماعة أنا بتكلم ليكم عن عبدالرحمن كرنقو ما اسحاق كرنقو.

· كرنقو بعد المريخ لعب في الموردة ولعب في الاهلي الخرطوم ولعب في الخرطوم الوطني ولعب في هلال الابيض.

· وعاد من جديد ليلعب في المريخ.

· حالتكم صعبة يا ناس المريخ.

· وضعكم خطير.

· السنة القادمة بي وضعكم دا ما بتمثلوا السودان في بطولة خارجية.

· بي تسجيلاتكم دي بتلعبوا سنترليق.

· جمعة جيناروا.

· سيف الدمازين.

· مالكم انتوا؟

· الحاصل عليكم شنو؟

· …………

متاريس

· منتخب لا يختار افضل لاعب في هذا الموسم يقولوا عليه شنو؟

· معقولة عبدالرؤوف لا يختار للمنتخب.

· الظاهر الجهاز الفني للمنتخب الوطني تلاتين عشرة.

· برة الشبكة.

· خسران المنتخب.

· احسن الهلال عندما قرر صرف النظر عن بخيت خميس.

· بخيت خميس ايضا من قدامي اللاعبين.

· ادم الدالي صاروخ ارض شمال.

· بكرة التسجيلات.

· عاوزين الهلال ينتهي من أي شيء.

· الضربة الكبرى بكرة.

· احمسوا وخلصوا.

· وسافروا معسكركم.

· التمهيدي يوم 20 نوفمبر.

· ما في وقت.

· خلصوا.

· وناس افراحها زايدة وناس اتكرنقوا.

· ……….

· ترس اخير : الفرحة لي هنا.