صحيفة كورة سودانية الإلكترونية

ابوعشرين (صمة) … فكة ما في!!

2٬897

صابنها

محمد عبد الماجد

ابوعشرين (صمة) … فكة ما في!!

 

· ابوعشرين ثلاث سنوات بيلعب في المريخ اول مرة اشوفه (ضاحك) عندما انتقل للهلال وهو برفقة نائب رئيس مجلس ادارة الهلال الطاهر يونس في سيارته قبل ادخاله لغرفة التسجيلات.

· طبعا الادخال في السيستم تم بنجاح تام لكل من رمضان عجب ومحمد الرشيد وابوعشرين.

· أنا كنت قائل ابوعشرين ما بعرف يبتسم…الزول طلع دمو خفيف …وكتب كمان ان دمه (ازرق).

· اتاريكم يا ناس المريخ كنتوا كاتلين الولد بالصبر.

· الولد كان ضائع في المريخ.

· ابوعشرين في مباراة القمة الاخيرة ينطط من الفرح المباراة كلها – مرة يقع يمين ومرة يقع شمال من الفرحة.

· وكل ذلك عشان انتقل للهلال.

· الفرحة بتظهر.

· الفرحة ما بتتمسك.

· ناس المريخ تهبشهم في أي شيء يعملوا ليك فيها حافظين اللوائح.

· مزمل ابوالقاسم (منقطها).

· أي حاجة عندهم يقول ليك (اللوائح) بتقول.

· الفيفا.

· والمحكمة الرياضية.

· وبنمشي (كاس).

· اللوائح خليها ..(العقود) بتقول شنو؟

· اها يا ناس المريخ ناس الهلال المرة دي جابوا ليكم الكلام.

· وقعتوا في شر اعمالكم.

· كدا يا مزمل ابوالقاسم خش (السيستم).

· بتلقى رمضان عجب.

· ومحمد الرشيد.

· وابوعشرين.

· قاعدين مع ناس ابوعاقلة ووليد الشعلة.

· شوف القوانين بتقول شنو في الحتة دي؟

· الفيفا حالتكم دي بتقطع فيها (الرقاب).

· نتمنى ان يبقى المريخ شجاع وينشر لينا عقد رمضان عجب زي ما فعل الهلال.

· يوم 1 نوفمبر ما بعيد.

· وبتشوفوا البحصل شنو؟

· خلوها الفيفا.

· واللوائح.

· والكلام الكبار داك.

· شوفوا لائحة التعاقدات في اتحاد الكرة السوداني بتقول شنو؟

· اذا كان الفيفا الموضوع دا بتصل فيه للإعدام فان الاتحاد السوداني في الحتة دي ممكن يصل معاكم للتأبيدة.

· ونحن في كل الاحوال ما خسرانين.

· كفاية علينا الجرسة الشفناها عندكم.

· والله (ادبة).

· ضربتين في الرأس بتوجع – ودي تلات ضربات.

· ثلاث لاعبين من افضل العناصر في المريخ وقعّت عقودا في كشوفات الهلال.

· كدا عديل.

· الهلال (عظمة).

· الهلال ما بتقدروا عليه.

· السنة كلها تتفاصحوا بلوائح الفيفا وقواعد الاتحاد الدولي وقت بقت عليكم عملتوا فيها ما عارفين أي شيء.

· نحن سعداء بالمدرسة التى ادخلكم فيها الهلال.

· والدرس لسه ما انتهى.

· اعود الى الحارس الدولي علي عبدالله ابوعشرين حارس المنتخب الوطني ولاعب الهلال الجديد.

· ابوعشرين في مباراة القمة قدم درس يجب ان ينتبه له الجميع وهو الروح والفدائية التى لعب بها اللاعب امام الهلال رغم انتقاله له.

· مثل الهلال وخلقه تمثلت في هذا الاخلاص الذي لعب به ابوعشرين ليتوج فريقه السابق ببطولة الممتاز على حساب فريق الهلال الذي انتقل له حديثا.

· اتذكر في هذا الموقف اللاعب كلتشي والذي كان المريخ قد اتفق معه وتعاقد قبل مباراة القمة وجاء اللاعب وقدم مستويا بعيدا عن مستواه وكان عالة على الهلال.

· ابوعشرين لم يفعل ذلك – لعب بقوة وكان من نجوم المباراة وقد ذكرنا هذا الموقف باللاعب علاءالدين يوسف الذي لعب مع المريخ اخر مبارياته مع الهلال وفاز معه ببطولة كاس السودان وانتقل بعد المباراة مباشرة الى غرفة الهلال.

· محمد الرشيد لاعب المريخ السابق ايضا لعب مباراة كبيرة رغم تعاقده مع الهلال وبدأ رمضان عجب شاردا بعض الشيء بسبب الزعزعة التى ادخله فيها المريخ بعد التعاقد مع الهلال.

· كان رمضان عجب واضح انه يخشى من مصيره القادم في حال اعلان المريخ مع التعاقد معه.

· المريخ لم يحترم لاعب قدم له الكثير ، وجعله في وضع لا يحسد عليه.

· ابوعشرين لعب في مركز حساس وكان أي هدف يسجله في مرماه الهلال سوف يحسب (تواطؤ) منه حتى لو كان الهدف من ضربة جزاء.

· لكن وفق ابوعشرين بصورة كبيرة ولعب بثبات ولم يتأثر بأجواء المباراة ليثبت ابوعشرين انه لاعبا كبيرا.

· ابوعشرين قدم انموذج الثبات الانفعالي الذي يحدثونا عنه فقد كان ابوعشرين بارد في المباراة لعب بهدوء وتركيز.

· الناس كانوا فالقننا بالثبات الانفعالي.

· يا دوب عرفنا الثبات الانفعالي الآن.

· ابوعشرين بهذا الثبات والإخلاص عرف في كل الاندية التى لعب لها ، وضع اللاعب بصمة كبيرة في نادي النسور الذي صعد به للممتاز وارتبط فريق النسور باسمه.

· انتقل اللاعب الى المريخ وتمت اعارته الى الشرطة القضارف ولعب مباراة الافتتاح امام فريقه المريخ في كسلا واستطاع الشرطة القضارف ان يفوز على المريخ بسبب تألق ابوعشرين.

· هذا اخلاص جدير بالاحترام والتقدير في زمن تباع فيه المباريات خاصة من حراس المرمى.

· ابوعشرين بسبب اخلاصه وفدائيته خلق شعبية كبيرة في القضارف وصنع مثلها مع الامل عطبرة.

· تجربة ابوعشرين في الشرطة القضارف والامل عطبرة زادت في خبراته وأوصلته لفورمة جعلته الحارس الاول في البلاد.

· في هذه النقطة اتذكر ان الكابتن محمد موسي يقول دائما في تحليلاته في قناة الملاعب ان ابوعشرين هو الحارس الاول في السودان وهو محق في ذلك.

· انتصارات المريخ في الدوري الممتاز وفي البطولة العربية يرجع الفضل فيها للاعب ابوعشرين.

· الهلال ضرب المريخ في مكمن قوته ، وهو قد احدث بتلك الضربة شلل ارتعاشي في كل خطوط المريخ.

· الجميل في تعاقدات الهلال مع رمضان عجب ومحمد الرشيد وابوعشرين ان المريخ كان يعلم بهذه التعاقدات مع ذلك اشركهم في المباراة ثقة في اللاعبين وقبل ذلك ثقة في الهلال الذي لا يتبع طرقا ملتوية لتحقيق الانتصارات.

· لهذا لم يكن هناك شيئا يمكن ان يخفي على المريخ وهذا ما سوف يوقع المريخ في المزيد من العقوبات.

· المريخ لن يستطيع الاعلان عن تعاقده مع رمضان عجب لأن هذا العقد اذا اعلن عنه او نشر يمكن ان يدخل المريخ في (فتيل).

· لهذا فان كل ما يثار الآن هو للاستهلاك وصرف الانظار تخفيف آثار الضربة.

· عقودات الهلال مع الثلاثي السابق للمريخ واضحة وممكن تجيب الخطر للمريخ.

· بالمناسبة أي لاعب وقع مع المريخ عقدا بعد تعاقده مع الهلال يمكن ان يقول ان تعاقده هذا تم تحت الضغط والإكراه.

· جماهير الهلال بعد هذا الثلاثي تترقب (مفاجآت) اخرى – لسه غرفة تسجيلات الهلال حبلى بالمفاجآت.

· القادم احلي ان شاءالله.

· …………..

متاريس

· مجلس ادارة نادي الهلال يجب ان يخاطب رمضان عجب للاستعداد للانخراط في معسكر الهلال الاعدادي الذي سوف يبدأ بعد الاسبوع الاول من شهر نوفمبر.

· المعسكر ينتظر ان يكون في جمهورية مصر العربية.

· كلموا رمضان عجب يجهّز جوازه.

· شوفوه يمكن جواز سفر رمضان عجب يكون منتهي.

· الزول دا ليه (3) سنوات ما سافر مع المريخ برة.

· المريخ (3) سنوات بطلع من (التمهيدي).

· ناس رمضان عجب نسوا (المطارات)…راح ليهم شكلها.

· ابوعشرين اثبت عمليا ما في (فكة).

· ناس المريخ (فكوا) ابوعشرين وهو نقطة قوة المريخ.

· صفقة رابحة وكبيرة للهلال.

· المريخ اعلن تعاقده مع ضياءالدين والتاج يعقوب والسماني الصاوي.

· هل يمكن ان يذهب الهلال ويتعاقد مع ضياءالدين والتاج يعقوب والسماني الصاوي؟

· المريخ وصل مرحلة بقى يخطف فيها (اولاده).

· دي ما حصلت.

· والله الهلال دخل المريخ في مدرسة.

· عشان تفهموا حاجة.

· تاني (الفيفا) دي لو جابوها ليكم (بطيخ) ما بتمشوا عليها.

· الجميل في صفقات الهلال وفي الظروف التى ساعدت على اكمال هذه الصفقات.

· ان السيستم فتح من يوم 21 اكتوبر …حسب اعلان الاتحاد العام عن فتح السيستم في 21 اكتوبر لتعقادات المحترفين الاجانب.

· طبعا السيستم ما بعرف (الاجنبي) من (السوداني).

· الكلام دا نظري ساكت في كلام الاتحاد.

· اجمل من هذا ان كشف الهلال فيه خانات خالية.

· يعني ناس رمضان عجب والرشيد وابوعشرين لقوا خانتهم (خالية).

· اول مرة الكاردينال يعمل ليه حاجة كويسة في الهلال.

· السيستم فاتح الآن – هل يستطيع المريخ ادخل اسم رمضان عجب في السيستم.

· ح يرفضوا ليكم طوالي.

· ………..

· ترس اخير / التكيح ود الطيب ..اتقدم عاوز يعرس بنت عمو – قالوا (السيستم) رفضو.

قد يعجبك أيضا
7 تعليقات
  1. بشير المقدم يقول

    هههههه والله ما عندك موضوع صحيج المسمار حار خاصة اذا كان سماني اسمر اللون ود الربرير اخي المفروض تكتبوا عن احوال مواسيركم ما تهربوا من حالكم ابو عشرين وغير ه نحن ما مهم لينا راحوا اكثر منهم والزعيم زعيم اثبنوا خلوا الجرسة

  2. مانديلا يقول

    اضغاث أحلام… الرصيد في القلعة ورمضان كريم وابواربعة وأربعين انت يا الدم تبقى أزرق لو في خلل او علة في الجسم وعمر الإبداع ما حايكون أزرق يا نهار أزرق…احلم واصلو الحلم مجان في سوق النخاسة وانت اكبر نخاس في تاريخ الصحافة هههه.

  3. صلاح يقول

    مقال ممتع كعادة المبدع محمد عبد الماجد، والأحلي إنو حا يخلي الكاهن الأعظم أليخماو يقعد في علبه ويبطل فصاحة وإدعاء المعرفة وتجهيل الآخرين، والأحلي من ده كلو إنو أبو المستعار المندلاوي حا يكون أغمي عليهو وما بعيد يكون ودوهوا الحوادث. 😁😁😁
    يا مرخرخين السبب في ضياع اللاعبين ديل لسه ما عرفتوهوا منو ولا ما بتقدروا تتخلصوا من سطوة المخدر؟

  4. مانديلا يقول

    اصلو محور واحد وجاكم من المريخ بعد إصابته ولليوم ما لقيتو ليهو بديل ودايرين محمد الرشيد بعد الشغيل..هههه ارحم يا رشيدي قلبي الما نساكا اسمخ لي بنظره لو الطيف اراكا وووووب. بدلك وتيهك مع تشديد قساك جوه القلعة ساكن صبحك ومساكا وووب…عسكر دعمي ابدع مع تشديد حماكا يا الملك المدلل ما أجمل بهاكا ووووب.

  5. احمد يقول

    ههههااااا
    بالصوت بالصورة طلعتوا ماسورة … خليكم في الاعمام الشغيل و حاج نزار
    ما تهبشوا ساي . ناس المريخ عايزين يفرحوكم ساااي و اهو انت الان فرحان . لاغبي المريخ الرشيد و العحب ادوا معلومات ناقصة و لا عقد موقع يا سيادتو .. بس اسماء و ناس مزمل تقدر تحادعهم ده ادارتكم و شداد ما قظروا عليهو و جاب الكاس من مدمن كاس . و الله تحزنوا بجد . يا زول احسن ليك السياسة بيمسك هارت زي ما مسك فوزي و لو كنا عايزين نجيب خبرو كان سحلنا زيادة لكن رأفة باولاده لم نفعل .

  6. Hajjam يقول

    لله درك ياود عبدالماجد. منتهي الابداع و باسلوب السهل الممتنع. ان شاء الله الكاهن اليخماو والكورال وبلطجية الضلال يقروا كلامك ده عشان يجلطوا كلهم. والله كلامك صاح سوي تعاقد الهلال مع الثلاثي ام لا الدخلت في اليخماو وكورال البلطجة والضلال تاني مابتمرق.

  7. جلابي الدوحة - قطر يقول

    بالجد حاره الخشم ملح ملح
    معذورين

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد