صحيفة كورة سودانية الإلكترونية

الباكات التى سوف تواجه هجوم الهلال امهاتهم داعية عليهم

3٬231
صابنها
محمد عبد الماجد
الباكات التى سوف تواجه هجوم الهلال امهاتهم داعية عليهم
• تشكيلة الهلال الايامات دي لو خاض بيها ترامب الانتخابات الامريكية يفوز بيها.
• تشكيلة الهلال الايامات دي اقوى من مجلس السيادة واقوى من مجلس الوزراء.
• تشكيلة (دبلوماسية).
• ما عاوزين نقول عن هلال الموسم الجديد – هلال الاحلام – عشان العبارة مستهلكة …وما قاعدين نشوف منها شيء.
• نحن عاوزين نمشي خطوة …خطوة.
• ما عاوزين الاحلام تبقى اكبر من الواقع.
• الفريق في مرحلة الاعداد ضم 18 عنصر جديد لكشوفاته.
• يعني الموضوع عاوز صبر.
• نحن بنتكلم بآمال كبيرة – يجب عليكم ان تعلموا ان كرة القدم ما مضمونة.
• يكفي انهم يقولون عنها (المجنونة).
• ما عاوزين نعشم الجمهور ببطولات قادمة – لأن كرة القدم ما عندها كبيرة – يمكن ان تملك افضل فريق ولا تحقق نتائج جيدة.
• ويمكن ان تملك فريق (متهالك) وتحقق نتائج جيدة.
• لكن عاوزين نتعامل مع واقع الارقام الحالية.
• عاوزين نقول ان الهلال وبعد ان اصبح في كشفه 30 لاعبا ، نتمنى ان يرفع الكشف الى 35 لاعبا اصبح فيه (3) تشكيلات.
• كل تشكيلة يمكن ان تكون اخطر من التشكيلة التانية.
• الواقع بقول كدا.
• الكلام دا ما في الاحلام.
• الله يبعد الاصابات والعوارض من الهلال.
• الله يحفظ الهلال.
• ويجعل (التوفيق) حليفه.
• اذا غاب (التوفيق) فلن نحقق شيئا.
• فريق زي دا اذا حالفو (التوفيق) ممكن يحقق ما لا يخطر حتى في الاحلام.
• مباريات الهلال التى لعبها في مصر في معسكره الاعدادي – بقيت ما بسأل عن التشكيلة.
• بقت ما فارقة معاي.
• أي تشكيلة بتلعب ..انت ما بتخاف عليها.
• يلعب من يلعب.
• ما عندنا مشكلة.
• كلهم عندنا واحد.
• لاول مرة يذهب الهلال الى معسكر خارجي وهو يفقد عناصره (الدولية) – العناصر الجديدة والعناصر القديمة.
• مع ذلك حقق الهلال نتائج جيدة وقدم عروض ممتازة حسب النقل (الوصفي) للمباريات التى لعبها الهلال في مصر.
• زمان لو غاب لاعب من الهلال تضع ايدك في قلبك ..حتى وان كان الهلال يلعب امام احد اندية الدرجة الثانية.
• نحن كان عندما يغيب عمار الدمازين ندخل بويا ليلعب في العمق.
• وعندما يغيب بويا يدخل بدلا عنه السمؤال.
• تتخيلوا وصلنا في الحتة دي لدرجة ان يلعب الشغيل في مركز قلب الدفاع.
• الآن ما عندنا المشكلة دي.
• أي خانة فيها 3 او 4 عناصر جاهزة.
• والله العظيم أنا لغاية الآن ما عارف الاساسي من البديل.
• واظن ان الجهاز الفني للهلال لغاية الآن ما قدر يحدد من يكون اساسيا ومن يكون بديلا.
• الهلال يلعب في مصر وهو يفقد (10) لاعبين ، انضموا اخيرا لمعسكر الهلال في القاهرة – يعني تشكيلة كاملة بسبب مشاركاتهم مع منتخبات بلادهم لا تشارك مع الهلال.
• هل تعلم ان الهلال تشكيلته (الدولية) لم تظهر حتى الآن في مباريات الهلال التى خاضها في مصر.
• هناك تشكيلة (دولية) كاملة خارج قوام تشكيلة الهلال التى يلعب بها.
• لم يشارك مع الهلال الحارس الدولي – الاسد الافريقي ابوعشرين حارس منتخب الوطني.
• لون الدم.
• ولم يشارك مع الهلال الليث جمال سالم حارس مرمى المنتخب اليوغندي.
• يعني حارسين (دولين) لم يشاركا مع الهلال حتى الآن.
• ولا في زول شعر بي حاجة.
• دفاع الهلال (الدولي) والذي لم يظهر حتى الآن في مباريات الهلال الاعدادية يتكون من السمؤال وفارس عبدالله ووضاح.
• وضاح قدم مستوى امام منتخب غانا …جعلنا نقول ان كشافات الهلال تاني لو ما ولعت في وجود (وضاح) يبقى ما عندنا مشكلة.
• وسط الهلال (الدولي) يتكون من الشغيل وابوعاقلة وبشه الصغير.
• كذلك لم يشارك بعد مع الهلال المهاجم القناص الغربال محمد عبدالرحمن الى جانب المهاجم المصاب ياسر مزمل.
• تتخيلوا هجوم فيه الغربال وياسر مزمل لم يشارك بعد مع الهلال في مبارياته الاعدادية.
• والله ديل في الكلام ساكت يقطعوا النفس.
• نفس خيل القصائد ذاتو ممكن يتقطع.
• مويس والغربال.
• يا ناس في شنو؟
• 10 لاعبين خارج نطاق الهلال في الوقت الحالي.
• كيف سوف يكون الحال عندما تشارك هذه العناصر مع الهلال مع اوتارا وجيسي وكومبي وبوجبا وعبدالرؤوف ونزار حامد وعيد مقدم ويونس وصلاح عادل ومجاهد فارق ومؤيد عابدين.
• يا زول اقيف.
• اكيد انتوا بعد هذه الاسماء تقولوا لي يا زول انت جنيت.
• يا زول مالك عاوز تقطع قلب صلاح نمر ومزمل ابوالقاسم.
• نحن نتحدث عن هلال (خرافي) وعن اداء عجيب …وابداع كبير في مباريات الهلال الاعدادية في مصر من غير (10) عناصر دولية لم تشارك مع الهلال حتى الآن.
• يكفي ان فيهم محمد عبدالرحمن (الغربال).
• وياسر مزمل.
• ووضاح.
• وابوعشرين.
• والله الواحد من الكلام ساكت جاتو (دوشة).
• الرجفة حصلت.
• نحن كدا – المريخاب كيف؟
• نصيحة لباكات الدوري الممتاز.
• وباكات الحكومة.
• وباكات البطولة الافريقية.
• وباكات الدول المجاورة.
• احسن ليكم كلكم شوفوا ليكم (رباط صليبي)…اتخارجوا من بدري.
• الاسماء التى احدثكم عنها الآن ما بتتقابل.
• شوفوا ليكم بلد.
• البشتنة ما في داعي ليها.
• البهدلة ما حلوه.
• انتوا راجيكم واقع مر امام الهلال.
• راجكيم (الجحيم) ذاتو.
• احسن ليكم شيلوا (دفتر العيادة) من الآن.
• شوفوا ليكم (رباط صليبي) اتخارجوا بيه.
• منو الدفاع العاقل الذي يمكن ان يواجه هجوم فيه الغربال وياسر مزمل.
• انتوا مجانين؟
• يا جماعة انتوا ما عندكم رأس؟
• شيلوا بقجكم فوق رأسكم …واتخارجوا.
• دفاع فيه ابوعشرين ووضاح …العاوز يواجهوا ليكم منو؟
• والله ديل احسن منهم السيل.
• احسن الفيضانات.
• ديل لا بنقدروا.
• ولا حاجة.
• ديل لو سمعت بيهم في الراديو يجيبوا ليكم وجع الضهر.
• يصدروا ليكم وجع الرأس.
• شيلوا شيلتكم يا مريخاب.
• الجهاز الفني للهلال يجب ان يعمل في الموسم الجديد بنظام المداورة.
• أي زول في كشف الهلال لازم يلعب.
• ما عاوزين تشكيلة ثابتة.
• عاوزين نتمتع.
• التشكيلة المثالية – لا تلعب إلّا في بعض المباريات.
• يعني الغربال وبوجبا ووضاح وعبدالرؤوف وجيسي واوتارا وكومبي ما تستهلكوهم لينا في المباريات الساهلة.
• أي لاعب في الهلال لازم يرتاح.
• ما في لاعب يسك الموسم كله.
• والله كمان قالوا صلاح عادل (ارتكاز) زي ما بقول الكتاب.
• زي ما الفيفا بتقول.
• بجيبها ليك باللائحة.
• وكان لمجاهد فاروق فهو لوحده (فريق).
• مجاهد فاروق دا ممكن يشيل الوسط كله براه.
• ما عاوز ليه زول معاه.
• ومنير ود نوباوي …بكفت ليك الكورة من أي حتة.
• شمال ويمين.
• وعيد مقدم – اسرع من الضو.
• والله انا شايل هم لدفاعات الاندية التى سوف تواجه الهلال.
• الباكات التى سوف تواجه هجوم الهلال ..امهاتهم ما راضيانا عليهم.
• امهاتهم داعية عليهم.
• والله ديل ح يشوفوا جنس (بهدلة).
• ح يشوفوا (بشتنة) من امها.
• ……….
متاريس
• بكرة الهلال يلعب امام الجونة.
• هل يمكن ان نشاهد الظهور الاول للغربال.
• نفسي ياسر مزمل يرجع سريع.
• عشان الموت بالسكتة القلبية يكون عادي تاني.
• طبيعي.
• ما فيه أي حاجة.
• ناس المريخ نصيحة ليهم من هسع …شوفوا ليكم لجنة حكام من بدري.
• ناس صلاح نمر ديل ما بركزوا.
• ما بثبتوا.
• ………
• ترس اخير : الما حافظ جدول سبعة احسن يحفظو قبل الدوري ما يبدأ.
قد يعجبك أيضا
13 تعليقات
  1. علي الطاهر يقول

    ياود عبد الماجد
    كرة القدم لآتعرف ألأسماء بل تعرف البزل والعطاء بلآش تضخيم اللعيبة حتى لآينامو في العسل

  2. Hajjam يقول

    ياعلي الطاهر ابو عبد الماجد عمل مقدمة كويسة وقال مافي حاجة مضمونة في كرة القدم وممكن الفريق يكون ممتاز ويخسر من اهون فريق. وبعد داك عرج علي مدح اللاعبين ربنا يحفظهم من عين اليخماو ورهطه عشان يقطع قلوب جماعتنا اتباع اليخماو مع باكاتهم. غايتو يجازي محنك ياود عبد الماجد. بتعرف لغيظ الجماعة وهسه ناس ابو المستعار بجوك طايرين للردم لانهم بيكون اخدوا جرعة صباحية من مخدر كبير الكهنة الباتع سرو وسوف يستخدمون جزءا من مفرداته لردمك.

  3. صلاح يقول

    والعجب ناس أبو المستعار المندلاوي، ديل كل خمسة دقايق بودوهم الحوادث 😝😝😝
    غايتو يا ود عبد الماجد المرخرخين ديل جننتهم جن وما خليت ليهم جنبه ينوموا عليها، أعصر علي الأبنص ووصله الصاجات وما ترفع منهم أبدا !!
    الدلاقين حا يسابقوا الزمن عشان يتخلصوا من بروف شداد عشان يكونوا ليهم إتحاد لقيمات علي نار صاج هادئة تحسبا لأي متواليات هلالية، وأكتر حاجة بخافوا منها إتساع الفارق في بطولات الممتاز، الموضوع ده معقدهم عدييييل كدة، بالذات الكاهن الأعظم أليخماو، وبوجود شداد صاج لقيمات بولع مافي !!
    لكن مكرهم حا يرتد ليهم بإذن الله ويرجعوا لوصافتهم البتحبهم وبحبوها عما قريب !!

  4. عبدالملك يقول

    السيدة يا راجعة من رجفة وفتر…خدرتي بالنفخة القرود اتساقط الزيف والفاشر…ههه ياخي عنوانك لا يتناسب مع الخوف الذي يسكنك تزبد وترعد وفي نص المشوار تقول الكورة ما مضمونة…انت فاكر باكات الدوري الممتاز في نومة اهل الكهف حيلك الفرق تطورت ويجب أن تشكر ناس الفاشر وعطبرة ونيالا وبورتسودان وشيكان وناس النفيدي الذين يعملون في صمت…ههه كلامك دا كان زمان لكن حاليا اي فريق من الممتاز يمكن أن يكتم أنفاس كل الذبن تهدد بهم الناس وبعدين ابوعشرين لا فرق بينه وبين الكاميروني ايو دخل ٢ من سقط لقط وبعدين الغربال الحقيقي فهو التش ..محمد عبدالرحمن هو ميدو وممو ههههى نفسي أقرأ مقالك بعد لقاء اليوغندي ومعرفة مستوى نص دستة النمور …طبعا محمد عبدالرحمن مهاجم معروف.

  5. Hajjam يقول

    شر البلية مايضحك. مخدر اليخماو سول لكم سرقة لقب الغربال كمان؟كفاية سرقات من سيد البلد. حتي شعار الهلال تامرتم عليه وسرقتوه. القاب الهلال الزعيم سيد البلد تغولتم عليها الجزائريين سموكم زناطير نكرتوها حطب وعمكم تنقو رماها في الهلال وانسل. غايتو عالم مابتختشيش زي ماقالوا اولاد بمبة.

  6. Badreldin يقول

    سبحان الله العظيم حسبي الله ونعم الوكيل

  7. Badreldin Abdelgadir يقول

    إنت ماعندكم شقله يا الاسمو خجام إلا صلاح تعليقاتكم زي وشكم عشان كده هلالكم عمرو مايتقدم الحقد الدفين ماليكم

  8. جلابي الدوحة - قطر يقول

    كلام زي العسل مبروووووك
    بس للضمان حضر مقال اقالة المدرب وابعاد المواسير
    والارض السبب
    والحكم ضيع لينا الكاس من التمهيدي
    ويا فوزي وينك الله يستر
    والفراش والبكيات
    ويا سوباط اتخارج دمرت الهلال
    ارجع ياكردنه
    يا شماتة ابله ظاظه فينا

  9. Hajjam يقول

    المدعو بدر الدين. سلامة الاسم. انت وشنا شفتو وين يادلقون ؟ كل اناء بما فيه ينضح ولاداعي للاساءات الشخصية. نحن نتكلم عن اشياء عامة وليست فردية او شخصية. الظاهر عليك من المخدرين لدرجة الجنون

  10. Badreldin يقول

    إنت اي مقال حاشر نفسك مالك بي المريخ تكلم في صفرك زي ماعايز..والله المريخ تمليك عمايل…أمشى شوف سوباطك بتاع غسيل الاموال

  11. خالد محمد أحمد عبدالله يقول

    البتتكلم عنهم ديل ياهم لاعبين أهلي شندي القرب يهبط ويلعب سنترليق ولا ناس تانين حكمة والله وحكاية هههه هاك يبت الضعر ده :-
    ( صحي الطشاش في بلد العمي شوف .. وصحي الما عندو التش بتخلع من عبدالرؤوف )

  12. زاهر يقول

    الكل يعلم حجم الفرق التي قابلها الهلال في مصر ومدى تواضع مستواها،،،
    والكل يعلم أن المحك الحقيقي للكرة السودانية هي البطولات الإفريقية ولك أن تتخيل أيها الصحفي المطبلاتي بأن آخر كأس افريقي دخل السودان منذ 21 سنة ومازلتم انتم تمارسون نفس الأكاذيب سنويا ولا تشعرون حتى بالخجل ولو لمرة واحدة،،،،،
    كوارث الكرة السودانية كثيرة جدا جدا وهذا ما يمنعها حتى من تحقيق بطولة ضعيفة او ودية وأول تلك الكوارث هي الصحفيين امثالك الذين يروجون للاعب الفلاني بأنه ميسي زمانه وعند اول اختبار حقيقي تتكشف الحقيقة ويأتي الموسم الثاني وتمارسون نفس الأكاذيب والكلام البراق وفي النهاية المحصلة صفر،،،
    اصغر مشجع يعلم تمام العلم بأن تحقيق أي فريق سوداني لبطولة كبيرة كبطولة دوري ابطال افريقيا في المستقبل القريب هو عبارة عن وهم ليس إلا

    الكل يعلم عدا انتم

  13. السماني بتاع .... يقول

    اخر الفلم ده يجي السماني يشطبن ليكم 😲

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد