صحيفة كورة سودانية الإلكترونية

السوباط والطاهر يونس (١٢×٧=كم) ؟

1٬474
بالعربي الكسيح
محمد الطيب الأمين
السوباط والطاهر يونس (١٢×٧=كم) ؟

 

* لا أنكر أنني قد تعرضت للجلد والضرب أيام الدراسة بسبب (جدول ١٢) وسورة (الكافرون) .
* كان عندي مشكلة في جدول (١٢) وسورة الكافرون .
* وقد جرني ذلك للضرب كثيراً قبل أن أعود واحفظ عن ظهر قلب .
* كان عندنا (أستاذة رياضيات) جميلة ولطيفة وحنينة.
* الحِنية الكانت عندها لا تشبه أساتذة الرياضيات .
* الأستاذة دي كانت بِتسمع لينا (الجدول بالترتيب) .
* بتقول ليك : لو سمحت سمع لي جدول (٤) بالترتيب .
* أول مرة في حياتي أشوف أستاذ رياضيات بيقول للطالب (لو سمحت) .
* الأستاذة دي لو داير تقوم بتقول ليك : لا خليك قاعد يا شاطر .
* تقول ليها : (٤×١=٤ ، ٤×٢=٨ ، ٤×٣=١٢) وهكذا لحدي ما تكمل الجدول .
* الأستاذة دي قاموا ناس الوزارة نقلوها مدرسة تانية وجابوا لينا أستاذ راجل.
* الأستاذ الجابوهو لينا ده يوم ما شفناهو بضحك .
* زول قاسي جداً .
* ده شدة ما قاسي لما يجي يدقك بطلع (ساعة اليد) حقتو .
* والله صحي .
* وعندو طريقة بايخة في تسميع جداول الضرب .
* يقول ليك سمع لي جدول (١٢) عن طريق (سؤال وجواب) .
* كيف ؟
* يقول ليك (١٢×٦ ..؟ ١٢×٩ ..؟ ١٢×٣) وهكذا .
* بِسمع ليك الجدول بدون ترتيب عشان ما تركز .
* وكل ما تغلط بضربك لما رأسك يلف .
* أتذكرت الأستاذ ده وأنا أتابع باستمتاع ما يفعله السوباط والطاهر يونس وكل أركان حرب المجلس الهلالي .
* نستمتع الآن بما يفعله السوباط بالمريخ .
* ناس المريخ اتعودوا على الكاردينال الكان بِيسمع ليهم جدول (٤) على طريقة أستاذتنا الراقية والحنينة أيام المدرسة .
* افتكروا السوباط زي الكاردينال .
* لكن السوباط أول حاجة عملها (قلع ساعة اليد حقتو) وبدأ يُسمع ليهم جدول (١٢) بدون ترتيب .
*  ضرب زي الضرب .
* السوباط وأعضاء مجلسه قبل ما يكملوا الأسبوع التالت جابوا النجم جيسي .
* بدأت المفاوضات وانتهت بالتوقيع في الخرطوم وكل ذلك في ظرف أسبوع.
* أسبوع بس .
* في الأسبوع ده الطاهر يونس سافر وجاب اللاعب ومعه وكيله .
* جاهزية وسرعة وحسم .
* أنا لما قالوا الطاهر يونس سافر زيمبابوي قلت يمكن الزول ده عندو (شغل هناك) .
* قلت يمكن عندو زميل دراسة في البلد ديك مشى يزورو.
* الشغل الشغالة فيهو لجنة التطبيع لم ينجح فيه حتى صلاح إدريس.
* صلاح إدريس عشان يحسم ليك أمر محترف داير ليهو شهر .
* أما الكاردينال كان بغشنا يقول لينا جايب ليكم (ساماتا والأخطر من ساماتا) .
* وكلو كضب .
* هسه الجماعة ديل جابوا لينا (جيسي والأخطر من جيسي) .
* المهم.
* مجلس الهلال هبش ليك المريخ في أعز  ما يملك .
* هبشوهم في رمضان ومحمد وأبو عشرين .
* ودي ما في رئيس هلال عملها قبل كده.
* تلاتة دقة واحدة .
* أنت عارف المريخ عشان يعوض رحيل أبو عشرين عمل شنو ؟
* لما ظهر خبر إنو الهلال فاوض أبو عشرين قاموا ناس المريخ جابوا الحارس جمعة جينارو.
* ولما أبو عشرين رفض ينضم لغرفة المريخ عقب مباراة القمة الجماعة مشوا جابوا الحارس أحمد عبد العظيم.
* ولما ظهرت صورة أبو عشرين مع الطاهر يونس الجماعة جابوا أكرم الهادي .
* وطبعا أكرم الهادي في العمر قدر نزار عوض مالك وأكبر من عبد المهيمن .
* بكرة لو ظهرت صورة لأبو عشرين مع الفاضل التوم عادي ممكن ناس المريخ يجيبو المعز محجوب .
* بالطريقة دي ممكن يصلوا لحدي حامد بريمة.
* المريخ سجل ثلاثة حراس مرمى عشان يعوض غياب أبو عشرين.
* قاسي يا سوباط .
* شغل بتاع معلمين.
* وقضيتنا مع أولادنا محمد الرشيد ورمضان عجب بنوصلها (حد العدالة) .
* الموضوع ما زي موضوع بكري المدينة.
* أنت كمريخابي تمهيدابي لازم تعرف المجلس ده ما زي مجلس الكاردينال.
* أقول ليك ديل جابوا مهاجم منتخب الكنغو .
* مهاجم الكنغو وجيسي ومدرب عالمي وأبو عشرين ورمضان ورشا.
* والحمد لله أمبارح كوّنا وفد غير رسمي ، الوفد ده سجل زيارة لأسرة التش .
* الغرض من الزيارة هو تمليك أسرة التش سعر ابنهم في السوق الموازي.
* قلنا ليهم الزول ده المريخ لو داير يجدد ليهو يدفع (٦٠) مليار .
* غير كده يفتح الله .
* أسعار لعيبة المريخ بنحددها نحن في الهلال .
* المهم .
* التحية لمجلس الهلال وتحية خاصة جداً لعبد المهيمن .
* والتحية لكل أركان حرب المجلس .
* الناس ديل شغالين شغل محترم وبأدب كبير .
* ونحن نقدر لهم هذا الصرف الحار في هذا الزمن النار .
* ونلفت نظرهم بضرورة إتمام باقي الصفقات المنتظرة.
* و..و..
* ونواصل .
قد يعجبك أيضا
2 تعليقات
  1. ابو عمار يقول

    الله بجازي محنك يا استاذ محمد الطيب بتعرف للجماعه ديل عرفه جد قلت لي جدول 12 وبدون ترتيب ههههههه مع السوباط مش حتقدر تغمض عينيك

  2. كرياكوا يقول

    انكم تعرفون قدرنا
    ولاعبينا نجوم
    انتم احق من يقدرهم
    لانكم تتعطشون لامثالهم
    كما قال سلك المريخ عالم جميل
    فى اللخير كما يقول البرير
    التش ورفاقه فى المريخ
    والزناطير كفاية عليهم الجرى والجقلبة والبكاء

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد