صحيفة كورة سودانية الإلكترونية

السوباط والكاردينال وقصة مرتبات أصحابا ماتوا !!

922

بالعربي الكسيح

محمد الطيب الأمين

السوباط والكاردينال وقصة مرتبات أصحابا ماتوا !!

* بعد سقوط البشير اكتشفت حكومة الثورة إنو في ناس (ماتوا) ومرتباتهم بتمشي لناس (أحياء يُرزقون) .
* ودي سيئة تتقاصر دونها كل سيئات حكومة الإنقاذ.
* الزول يكون (مات) لكن مرتبو (حي) .
* وياريت المرتب (العايش) ده لو كان بمشي لأسرة سيد المرتب (المات) .
* ياريت والله .
* كثير من الأشياء القبيحة تكشفت للشعب السوداني بعد سقوط نظام البشير .
* بلاوي وتجاوزات وفساد وقصص لا أول لها ولا آخر.
* ورثة متلتلة .
* في حكومات بتخلي ورثة تفتح نفس الحاكم الجديد .
* وفي حكومات بتخلي ورثة بسببها يسقط حتى الحاكم الجديد .
* وأخشى أن تتسبب الإنقاذ (الساقطة) في سقوط (البعدها) أيضاً .
* الورثة لما تكون ما جايبة حقها بتعمل مشاكل كتيرة فيما بعد .
* وبما أن ذلك كذلك فأن مجلس السوباط وجد ورثة من مجلس الكاردينال يمكن أن تجره لمشاكل كتيرة .
* وأكثر ورثة (مُشوهة) تركها الكاردينال هي فريق الكرة .
* لحدي الآن الهلال البيلعب ده (هلال الكاردينال) .
* السوباط غير الخوافز والموز وموية الصحة ما عمل حاجة في الفريق ده .
* لجنة التطبيع ما عندها في الفريق ده ولا شئ .
* تأخر الإعداد .. ورثة .
* جلطات يونس الطيب .. ورثة .
* غياب جمال سالم كل هذه الشهور وبخلاف كورونا .. ورثة .
* الفاتح النقر .. ورثة .
* كندورة .. ورثة .
* النجيلة .. ورثة .
* الشعلة والضي .. ورثة .
* الإضاءة .. ورثة .
* كلو ورثة .
* ما في جديد .
* هلال العهد الجديد ببدأ الموسم القادم .
* لو شال الهلال الدوري سيكون ذلك ورثة تسجل بإسم مجلس الكاردينال .
* الهلال شال الدوري طوالي بنكتب (عمود شكر) للكاردينال .
* ولو فشل الهلال في تحقيق الدوري لا قدر الله يبقى ذلك ورثة أيضا تسجل بإسم الكاردينال .
* بل السوباط يُشكر على ما قدم وهو قد تدارك (الورثة) التي يمكن تداركها .
* في ورثة الراجل ده حلاها وقتي .
* حل مشكلة جمال سالم والزعفوري ومدرب اللياقة وولد غارزيتو وديديه وعماد محسن وبن فرج وبلعويدات والشركة الصينية واللاعبين المحليين .
* دي المشاكل الحلاها لأنو حلها ما مرتبط بزمن .
* أما ورثة (فريق الكرة) السوباط حاليا ما بقدر يحلها.
* بعد التسجيلات والمعسكر الإعدادي بعد داك نشوف (هلال التطبيع) .
* والحمد لله (الجواب عنوان) .. لحدي الآن تم التوقيع مع جيسي وبعد أيام سيتم التوقيع مع المدرب الصربي زوران الذي وصل الخرطوم بالفعل.
* نحن بنقول الكلام ده عشان الناس تكون (حقانية) .
* لا بنظلم السوباط ولا بنظلم الكاردينال .
* للكاردينال إشراقات طيبة ليس من بينها فريق الكرة .
* الكاردينال عندو حاجات سمحة لا يمكن أن ننكرها.
* لكن الحاجات السمحة دي فريق الكرة ما تبعها .
* في فريق الكرة الكاردينال عندو عبد الرؤوف وأبو عاقلة .
* وعشان ما نظلم الكاردينال من هسه نتفق .. الهلال شال الدوري يبقى الفضل لله وجهد اللاعبين والكاردينال .
* الهلال ما شال الدوري (لا قدر الله) يبقى الكاردينال لازم يعرف إنو دي زراعتو وده حصادو.
* ما بنظلم زول نهائي .
* عشان بعدين ما تجوا تقول لينا :(وليد الشعلة يُهدي اللقب للكاردينال واطهر الطاهر يُهدي الانجاز للرئيس السابق .
* لازم نتفق .
* والأولو شرط اخرو نور .
* شلنا كأس الدوري .. ورثة .
* ما شلنا كأس الدوري .. ورثة .
* اتفقنا ؟؟
* طيب تمام .
* على المستوى الشخصي تجدني غير منزعج من نتائج الهلال ومستواه الباهت .
* ممكن أكون حزين لكن ما منزعج .
* أسباب كتيرة جدا خلت الهلال يصل المرحلة .
* أسباب منها (جودة العناصر) وتواضع خط الهجوم وثغرات الدفاع والارهاق وكورونا وتأخر الإعداد.
* إعداد الهلال ما زي إعداد باقي الفرق .
* مش عمك داك قال :(الخميس ده ما زي الخمايس الفاتت) ؟
* برضو اعدادنا ما زي إعداد الفرق التانية .
* لازم جماهير الهلال تتحمل وتصبر .
* كلها تلاتة مباريات وبعدها (نصفر العداد) .
* قلتها قبل أيام واكررها تاني (الشال نقطة من الهلال شال والما شال اعتبارا من الموسم الجاي يشمها قدحة) .
* من الموسم الجاي كل (قرد بيطلع شجرتو) .
* سيظهر هلال مليان مهابة وحضور وجمال .
* أراهن على ذلك من واقع معرفتي بما تم إنجازه فيما يتعلق بملف التسجيلات المحلية والأجنبية.
* عشان كده ما عندنا مشكلة نضحي بالسنة دي لكن من السنة الجاية (ضحايانا كتاااار) .
* نقول إن شاء الله .
* وما تشيلوا هم .
* بكرة جاي بي فرحتو.
* ونركب صافنات ونجيبة (كسلاوية) واصلو الزول بيموت والذكرى تفضل حية .
* و..و..
* ويا يوم بكرة ما تسرع تخفف لي نار ….. (أ، ر، م) .

قد يعجبك أيضا
تعليق 1
  1. خالد يقول

    عيش وأحلم بي (أ ر م) لو قاصد أبوعشرين ورمضان ومحمد الرشيد …خليك مع كوامركم التعبانه دي… حتى الرئيس غيرتو جبتو مريخابي هههه ما أصلكم حته مننا وحققننا زعلتو وانفصلتو ومازلتو تحت الوصاية والانتداب

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد