الضيق واليابه صديق

0
50

في السلك

بابكر سلك
الضيق واليابه صديق

*سمعنا من حبوباتنا عبارة الضيق واليابه صديق
*لكن ماشفناها الا في الزمن ده
*زمن شكرا حمدوك
*نعلم بان الحاصل افرازات العهد البائد
*لكن البعالج جرح السكري يادكتور حمدوك هو نظافته من تقيحات الماضي
*والنظافة دايرة حك شديد
*عشان يتشال كل الصديد
*لذا قطنتكم الناعمة دي ورقة احساسكم اثناء النظافة
*مابتساعد الجرح ليبري
*بل بتقود للتعفن والاضطرار للبتر
*وحايكون البتر نتيجة الخطأ الطبي واهمال الطبيب يادكتور حمدوك
*فما ممكن نعاني من انعدام الوقود اياما بلياليها واسابيعها وشهورها وماشة علي دهورها
*قصة توفير المحروقات ماقصة صعبة عشان علاجها ياخد كل الوقت ده
*ومتطلبات المواطن المسكين بسيييطة
*داير ياكل فول وسليقة
*ويوصل ولو شماعة
*ويتكامل اولادو بدري دون الحوجة لحظر الكورونا
*فمأساة المواطن كرونك تهون امامها الكورونا
*نعلم ياحمدوك ان العهد البائد شربك الخيط شربكة الكديسة
*ونعلم ان حلحلة الشربكة تحتاج زمن
*بس في عقد كدة بترها بالمقص بساعد علي حلحيل الشربيك
*اولها انتظام توفر الوقود
*وثانيها اشعال روح الثورة التي تم ردم جمهرها رمادا وعطلة وطولة روح
*وثالثها استصحاب دماء الشهداء مع عرق شباب الثورة واعلان نجاح الثورة
*ياحمدوك
*اكبر الاستفزازات للشعب كان عند استقبال جثمان الراحل وزير الدفاع
*رأينا وجوها كيزانية مألوفه ومعروفه
*كأنها تسخر من الشباب بقولها
*نحنا يانا وينا ثورتكم
*وكانت الطامة الكبري في نقل تلفزيون السودان للحدث
*تقطيع واعادة لاحداث علي شاشة مكتوب عليها مباشر
*وموش كده وبس
*المراسل يدي الكاميرا عنقرتو
*والكاميرا تدي المراسل قفاها
*وفجاة تطل علينا مؤخرات بعض الحضور علي الشاشة
*تحس بانو يا الكاميرا وقعت
*يا المصور كان بتفرج بره العدسة
*لازال تلفزيون الكيزان اقصد السودان مخجلا ومتواضعا ومحرجا
*ايها الناس
*نسمع عن ثورة سرقت
*نستبعد ذلك
*ولكن تقريب بعض الوجوه واستمرار البعض الآخر يقرب احتمال انها سرقت
*اخاف ان تتكون لجنة لتفكيك الثورة
*فبهذه المهادنة كل شئ جائز
*ولكن
*هل فعلا احترق قمح المناقل؟؟؟
*مين حرقو؟؟؟
*وليه حرقو؟؟؟
*هل حرقو عشان قرار الحكومة حرقو؟؟؟
*ام حرقو لان نجاح الموسم حرقو؟؟؟..؟
*انه التهاون
*ويقول قدورة المجنون
*لاتهاون بل بالهاون
*بالهلون لييييييه؟
*او كما قال
*المهم
*معالجة عقد الاستثمار افيد لناد طالما سكن جيوب الافراد زيو وزي اي منديل
*معالجة عيوب عقد الاستثمار افيد لناد تفرقت جماهيره بين الافراد ونسوا النادي
*معالجة عيوب عقد الاستثمار افيد لناد يرتع اصحاب المصالح فيه علي حدائق اصحاب الجيوب كالانعام
*فتوجهت قلوبهم نحو اصحاب الحدائق ومالت عن الكيان
*حب الشيخ لما يفوت حب الدين تبطل العقيدة
*تلك الانعام بالطبع لاصالح لها الا مرتع اصحاب الجيوب
*لذا يحاربون كل اشكال زراعة سهول الكيان واخضرارها
*وتتناطح عنزاتهم متسابقة للدفاع عن مراتع اصحاب الجيوب
*لذا صار معظم اصحاب الجيوب المالية اصحاب جيوب انفيه
*بقوا يشموا ناس قول الحقيقة ونقد الحديقة الخاصة ومرتع البعض البغيض
*ايها الناس
*الاستثمار ولا النار
*المهم
*تم تغيير سياج المريخ الغير قانوني بسياج قانوني فاخر وجميل
*وسماحة الزول في الطول والعلا
*منوت بول لو وقف خلف السياج يعاين بي تحت بس
*وتمت تغطية خور الصرف حول الملعب
*والملعب زاتو ماشي مخدر
*يبقي لاخوف علي الفرق والمنتخبات السودانية من الحرمان من اللعب علي الارض السودانية لرداءة الملاعب وعدم قانونيتها بحسب تقرير اللجنة
*لان استاد المريخ صالح للعب الدولي اي زمان اي مكان
*تحية للبصري مدير الاستاد
*وتحية للتركي قدري علي المجهود الكبير
*وتحية لكل من اعجبه العمل
*مع الاعتذار لرواد المراتع
*ايها الناس
*ان تنصروا الله ينصركم
*اها
*نجي لي شمارات والي الخرتوم
*والينا
*بعد نعزيك وتعزينا
*دايرين نقول كلام يا والينا
*الناس فاقدة رغيفها و بنزينا
*كهربا تقطع وتجينا
*موية بي طينها
*باعوضة الف وطنينا
*ضبانا مكفينا
*الحال مابسر صديق ولا عدوا لينا
*كمان جابت ليها حظر كورونا يا والينا؟؟؟؟
*اسي كورونا الكورونا ولا كورونا حالنا الفينا؟؟؟؟
سلك كهربا
ننساك كيف والكلب قال طالما التانكر هو سيد الموقف يبقي مافي جديد
والي لقاء
سلك

المشاركة

أكتب رد

أدخل تعليقك من فضلك!
أدخل إسمك هنا من فضلك