صحيفة كورة سودانية الإلكترونية

العقرب (فات فات) لي ناسا ليها بطولات

0

ابوبكر عبد الله - بيكو - نفاج المداد

نفاج المداد

 ابوبكر عبدالله (بيكو)

العقرب (فات فات)  لي ناسا ليها بطولات ..

* قالو ليك (الزنطور) من يقوم من النوم اول كلمه يقولا (شكوي العقرب عملتو فيها شنو) !
قبل (يتسوك) زااااتو ..
لو فتح ليهو صحيفه (يفتش فيها خبر عن العقرب)
عمل ليهم فوبيا !

كباية الشاي ما بشربه تكون قاعده في مكانه ، اهم شي يشوف خبر العقرب شنو ؟

* جارنا في الحي (زنطور) كبيير ووقت يتعصر بقول انا مريخابي .. من قام صغيير الناس مسمياهو (كوجاك) ، لانو ما عندو شعر (طوالي حالق علي الزيرو) ،

ويحب ليك الافلام الهنديه ، من زمن (السينما) بي خيره ، والافلام اول باول تنزل هو بشاهد فيها ولي هسه ! لمن المسؤلين من السينما عرفوهو !

مرات بكون قاعد براهو في السينما وبحضر في الفلم ! عندو (عجله) قديمه من نوع (ابو حمامه) ، ما فيها (رفارف) ! (24 ساعه) بكون راكب فيها !

يوم تسجيل العقرب قال لي اصحابو (بعد ده نبل راسنا)
الجماعه قالو ليهو تبلو عشان شنو وانت اساسا حالق زيرو !
يحلقو ليك شنو مثلا !
( زناطير حكماء) شديييد ،،
عارفيين الحاصل ..

* (كوجاك) ده علي العليهو زول (لبطه وعكليته) !
مريخاب حلتنا كان ماشين رحله (بتعكلت فيهم) ! وبعمل فيها (مريخابي) وهو معرووف (زنطور) ، بس بعمل ليهم الحركات دي عشان يسوقوهو معاهم الرحله ..

* ناس حلتنا المريخاب (قلبهم طيب) يقومو يقولو (كوجاك خلاص خلوهو يمشي معانا ) وبحزروهو من لسانو (الفالت ده) !

* طبعا ما وريتكم اساسا (كوجاك) ده معروف مع حبو للسينما (ثرثار) وبيزيد الكلام ومرات يألف فوقو !

* كان الناس ضبحت في الرحله (تيس) للغداء ، ممكن عادي يقول ليهم جابو (خمسه خرفان) وضبحوهم ، المواضيع دي عندو عااادي …

* اها بعد مشو الرحله وساقو كوجاك وضبحو (التيس) للغداء !

* كوجاك مسك تلفونو (الربيكا) واشتغل مكالمات ، الناس قايلنو مبسوط من الرحله وبحكي لي ناس بيتم عنها!

* ناس حلتنا معروفين مريخاب وشيوخ وناس خاره ، لا بيعرفو (الخمج) لا بيدورو الكلام الما في محلو !

* ونستم كلها في (الدين) ولا يتناقشو في امور المريخ ! ومباراة وفاق اسطيف ، ناس عارفين (درب المطار) ومنظرين البطوله وحالفين اليوم داك ما بيخلو (تيس في السوق) الا يضبحوهو !
بقولو لحوم (التيوس) هشه ،
عندهم نظره في الحكاية دي !

* المهم عمنا عبد الجبار راجل هميم وحكيم ودغري ، اي مكان يمشي لازم يتصل علي ناس الحله يطمن عليهم (قلبو متعلق بي ناس الحي) !

* قام اتصل علي صحبو (الخبير) يسالو عن الخبر ويطمن علي الناس !
الخبير قال ليهو (خبركم عندنا ضابحين خمسه خرفان وكشاتينكم وضمنتكم شغاله في الرحله) كوجاك كلمنا بالاخبار كلها !

* عمنا عبد الجبار زعل (زعل) شديد اصلو ما بيدور (المساخر) ، قال كوجاك ده تاني ما بيقعد معاهم دقيقه (كذاب ونقال وما عنجو ضمير ولا ذمه) ..

وحلف تاني ما يباريهم في اي مكان …

* غاايتو يا (كوجاك) حيرتنا بي قصصك العحيبه دي …

الله يمرقك يا اخونا من زعل ولاد عبد الجبار ، ديل ولا بيتفاهمو في المواضيع دي وجنهم وجن الكذب ..

حاجه اخيره كده :

لابد من وقفه من الجميع ، علي ما يتعرض له الزعيم وهو خارج الوطن من مؤامرات قبيحه من نفوس مريضه ..

المريخ في مرحله حساسه وبعضهم يحاول ان يلهي مجتمع المريخ عن الاهتمام بمباراته القادمه بامور انصرافيه ..

وليعلم اصحاب النفوس المريضه ان صبر جماهير المريخ قد نفذ ، ولم تعد السيطره عليهم وارده !

وعليهم ان يتحملو ما جنتب به نفوسهم المريضه تجاه المريخ ..

ونتمني من الجميع ضبط النفس والتركيز علي ما هو قادم من لستخقاقات ، لرد كيد من يوجهون البطوله (مدفوعة القيمة) !
حتي ننتوعها بشرفنا وقدرتنا وكبريائنا …

نقطة اخيره :

زنطور البلاد دائما مكايدو غريبه

في اللعب النضيف بالجد امورو مريبه

حكاما هجين ، وواحدين عديل ترهيبه

ما زي الزعيم في افريقيا معروف هيبه ..

 
 
 
قد يعجبك أيضا

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبول قراءة المزيد