صحيفة كورة سودانية الإلكترونية

الغربال ..(البكا) مستمر

3٬097
صابنها
محمد عبد الماجد
الغربال ..(البكا) مستمر

 

 

• بعد هدف الغربال امس في المنتخب الغاني لقيت لي مريخابي قاعد يشكي ويبكي ويغني في (الليلة الصدمة علي شديدة فقدت تلاجتي الجديدة).
• انا ما عارف علاقة هدف الغربال بالتلاجة الجديدة شنو؟
• مشيت شوية كدا – لقيت لي مريخابي قاعد يغني في (نوم عينيا البقى لي سهر).
• تاني ما في نوم.
• خلاص زمن نومكم انتهى يا مريخاب.
• بعد هدف الغربال امس في المنتخب الغاني مزمل ح يقول للمريخاب هدف الغربال (تسلل) واضح.
• خدرهم.
• صبرهم.
• اشغلهم.
• قول ليهم العقد ما صاح.
• والوكيل ما عندو رخصة.
• والسيستم ما فتح.
• عليكم الله علاقة السيستم بي هدف الغربال في غانا شنو؟ – لو ما (بكا) منكم ساكت يا مريخاب.
• البكا بحرروه المريخاب.
• البكا بعد هذا الهدف ح يسخن.
• ح يطقوا الكواريك.
• وح تظهر حالات كورونا.
• الهلالاب ح يقولوا الكورة عكسها (الطاهر يونس).
• الهدف جابو (السوباط) ما (الغربال).
• بعد هدف الغربال امس ..مفروض المريخاب يمسكوا قوي في عدم صحة تسجيل الغربال في الهلال.
• الزول دا لو تسجيلو صاح …صلاح نمر ما بقعد ليكم في البلد دي.
• لا صلاح نمر تاني ما بنوم.
• لا صلاح نمر ولا مزمل ابوالقاسم.
• الاتنين بهاجروا ويطلعوا من البلد.
• الشاف المريخاب شايلين (بقجهم) فوق رؤوسهم على قول الطيب مصطفى بعد تسجيل الغربال في الهلال ما كضب.
• جهزوا (بقجكم) ساكت.
• صلاح نمر ذنبو شنو؟
• مزمل بي عذرو.
• الجرسة الشفناها عند مزمل ابوالقاسم – في صلاح نمر ما شفناها.
• هدف محمد عبدالرحمن (الغربال) امس في مرمي منتخب غانا (حلل) به كل الاموال التى حصل عليها من الهلال من اجل تسجيله في كشوفات الهلال.
• مفروض السوباط يزيد محمد عبدالرحمن تاني بعد هذا الهدف.
• يستاهل.
• يستحق.
• هذا الهدف لوحده يستحق مليون دولار – مفروض قيمة التعاقد مع الغربال يدفعها حسن برقو.
• هدف الغربال امس في منتخب غانا يمكن ان يكون سببا لوصول منتخب السودان الى نهائيات الكاميرون.
• بفضل هذا الهدف يمكن ان نلعب في نهائيات الامم.
• وممكن نعمل في النهائيات حاجة بعد انضمام بوجبا وياسر مزمل وعبدالرؤوف وغيرهم من نجوم الساحة للمنتخب في الفترة القادمة.
• مباراة السودان التالية سوف تكون في شهر مارس القادم – وهذا يعني عودة واضافة اسماء جديدة للمنتخب يمكن ان تحدث اضافة كبيرة للمنتخب في الجولات القادمة.
• هذا المنتخب الذي يتواجد فيه ابوعشرين والسمؤال وابوعاقلة والتش والغربال يمكن ان نعمل الكثير به في نهائيات الامم.
• قلت كثيرا (تاريخيا) عندما تكون تشكيلة المنتخب اغلبها من الهلال فان المنتخب يحقق الكثير.
• المنتخب بنتصر.
• كل المنتظر من المنتخب يتحقق عندما يغلب لاعبو الهلال على تشكيلة المنتخب.
• مباراة الامس امام منتخب غانا لعب من الهلال في التشكيلة الاساسية للمنتخب السوداني (8) عناصر.
• والمباراة في استاد الهلال.
• تاني اكتر من كدا نعمل ليكم شنو؟
• استاد الهلال ذاتو (بركة).
• وكله (خير).
• تتخيلوا (8) عناصر من فريق الهلال لعبوا امس للمنتخب السوداني الذي لعب امام غانا فحقق الانتصار على منتخب غانا.
• هذه عودة للهلال – الذي فقد اراضيه في المنتخب الوطني في الفترة الاخيرة فعادت له الغلبة من جديد في المنتخب.
• الهلال في السنوات الاخيرة كان لا يملك عناصر مؤهلة لتمثيل المنتخب السوداني.
• سبق ان قلت ان منتخب السودان الذي سوف يلعب امام المنتخب الغاني بعد فترة التسجيلات سوف يكون كله من الهلال.
• قلت للبعض ان المباراة سوف تكون بين الهلال والمنتخب الغاني.
• لجنة التطبيع الهلالية جعلت تشكيلة المنتخب السوداني هي تشكيلة الهلال.
• اللجنة ما خذلتنا.
• جعلت الهلال هو المنتخب السوداني.
• الحكاية بدأت من ابوعشرين.
• وانتهت بالغربال.
• امس في المباراة قعدت افتش عن عم شبشه.
• لعب من الهلال امس ابوعشرين ووضاح وسمؤال وفارس عبدالله وابوعاقلة والشغيل وبشه الصغير والغربال.
• 8 عناصر من الهلال غير اطهر الطاهر – ورمضان عجب ومحمد الرشيد الذي يملك الهلال عقودا معهما.
• مدافع الهلال الجديد (وضاح) قدم مباراة كبيرة امس امام المنتخب الغاني ..وكان يمكن ان يكون نجم المباراة الاول لولا خروجه في الشوط الاول مصابا.
• الزول دا ما شاء الله.
• المباراة اكدت ان الهلال كسب مدافعا كبيرا – سوف يكون له شأنا كبيرا في عالم كرة القدم.
• ايضا قدم الحارس علي عبدالله ابوعشرين مباراة كبيرة واستطاع ان ينقذ المرمى السوداني من اهداف مؤكدة ، خاصة المخالفات التى كانت امام مرمى المنتخب السوداني.
• عليكم الله حارس زي دا بفكوه.
• انتوا جنيتوا؟
• الشغيل اكد ان الايام تزيده بريقا ولمعان – لعب مباراة العمر وقاد المنتخب كلاعب ومدرب من داخل الملعب.
• السمؤال هذا اللاعب يجب ان ترفع له القبعات ، فهو يلعب في كل الخانات ويبدع في كل خانة يلعب فيها.
• لعب في الطرف اليمين فأحسن وتم تحويله الى قلب الدفاع بعد اصابة وضاح فأجاد.
• ابوعاقلة ..(جمل شيل) اخر…خفنا كثيرا على المنتخب السوداني بعد خروجه لكن بديله محمد الرشيد كان في الموعد.
• الغربال اعلن بصورة رسمية انه المهاجم السوداني الافضل في الساحة الآن – سجل هدف في مرمى منتخب غانا بمليون دولار.
• الزول دا مع ياسر مزمل وعيد مقدم بعملوا شلل للباكات.
• بشه الصغير لم يتفاجأ به المنتخب الغاني وحده ..بل تفاجآنا نحن ايضا بمشاركته مع ذلك تحرك بصورة جيدة خاصة في ربع الساعة الاخيرة من عمر مشاركته في المباراة.
• فارس عبدالله من اللاعبين المظلومين …ظل هذا اللاعب ينتقد ويهاجم من الاعلام ومن الجمهور وكان دائما يرد في الملعب.
• العناصر الاخرى التى شاركت مع المنتخب السوداني ايضا قدمت مباراة كبيرة.
• امير كمال لعب بوعى وذكاء وهو من نجوم المباراة ، تحمل الضغط الهجومي بثبات وقوة.
• التش مثل (الحلول) الخاصة والناجعة للمنتخب السوداني ، صال وجال بإبداع كبير.
• التش برضو 50 مليار ما كتيرة عليه.
• لكن رمضان عجب شيلو من قروشو 5 مليار.
• سيف تيري بعد دخوله بديلا اضاف الكثير للمنتخب السوداني وخفف الضغط والمسؤولية على محمد عبدالرحمن (الغربال) ليسجل الاخير هدفا جميلا بعد قلت الضغوط عليه من الدفاع الغاني.
• معاذ القوز استفاد من خبراته – وأحدث حراك في المقدمة الهجومية للمنتخب.
• رمضان عجب لم يكن في مستوى رمضان عجب الذي نعرفه – لكن وجوده ومشاركته مع المنتخب كانت ضرورية.
• محمد الرشيد بعد مشاركته ضخ دماء جديدة لوسط المنتخب.
• اطهر ايضا لعب بعقلية (احترافية).
• لاعب اخر كان له دور كبير في انتصار المنتخب بروحه وخبراته وقيادته رغم عدم مشاركته.
• ذلك اللاعب هو الكابتن اكرم الهادي سليم ..الذي بث الحماس والروح في لاعبي المنتخب السوداني.
• تبقى التحية لاتحاد الكرة وللدكتور حسن برقو وللجهاز الفني للمنتخب بقيادة الفرنسي فيلود الى جانب المعلم الكبير خالد بخيت.
• المنتخب اجتهد ..والاتحاد صرف عليه لذلك كان الانتصار.
• كان لا بد من انتصار المنتخب السوداني لأن الاتحاد قدم ما يجعل المنتخب السوداني ينتصر.
• مبروك للسودان.
• هلال ومريخ.
• واتحاد عام.
• ………..
متاريس
• المريخاب ديل عاوزين يرفعوا الفراش متين؟
• البكا مستمر.
• ما اظن البكا يقيف قريب.
• مجلس ادارة نادي الهلال بقيادة الطاهر يونس واسماعيل عثمان كان حاضرا في المباراة.
• كذلك كان حاضرا عزالدين الحاج ومهيار.
• لم يكن هناك وجود لمجلس المريخ.
• لا اسد ولا غير اسد.
• نسأل الله ان تكون اصابة وضاح خفيفة ليلحق بمباراة الهلال الافريقية القادمة في يوغندا.
• الهلال ما عندو مشكلة.
• عندنا خط دفاع بي كنبته كل واحد احسن من التاني.
• قالوا الطيب عبدالرازق حكاية.
• وقالوا اوتارا دا قصة.
• الله يحفظ الهلال.
• ويشيل الكورونا.
• ………
• ترس اخير : هدف الغربال دا لو ما شال صفوف البنزين والرغيف يبقى الحكومة ما شايفة شغلها.
قد يعجبك أيضا
10 تعليقات
  1. عبدالملك يقول

    هههههاي ما الغربال دا مبروك عليكم لكن حقيقة البكاء عندكم ودوما طول لسان وبوبار على الفاضي وباكر قريبة وبيننا الملعب ولا غربال سيلعب لوحده فالكرة لعبة تيم ورك والحمد لله المريخ اصبح يلعب كفريق متكامل وبعد الفشخرة والبوبار الفاضي باكر ان شاء الله تعرف المطرة صابه وين والغربال لا يملك عصا موسى وقبل كدا ٣ سنة المريخ لم يغادر محطة التمهيدي في وجود الكاميروني ابوعشرين والغربال وافرح وأصل الفرح المؤقت ديدن الهلال الذي لم يجلب كأس خارجي من ٩٠ سنة وطال انتظاركم وباكر نشهد فركشة تيم المتعافي المكشر والمقفل قدومو الذي لا يستطيع ولا يعرف الابتسامة شروم الكتمبوش الأزرق يصمصم في قدومو خجلان على منظر اسنانه…هههه وابتسمي غربلني وتفنن في خمش ال مليون دولار.

  2. Hajjam يقول

    مساكين التمهيداب. الغربال عمل ليهم حريق في الفشفاش وانفجار في الطوحال وخاصة كبير الكهنة. بعدين ليه عاوزين يمنعونا من الفرح ولدنا كان حردان ورجع لبيتو الكلام ده حارقهم وين؟ وبعدين ياخد مليون او مليونين دولار كتيرة عليه؟ ما قبل كده الرئيس طوالي دفع ٣ مليون دولار من تكية المؤتمر الغير وطني في وارقو الماسورة.
    بعدين ناس ابو المستعار المخدرين بمخدر اليخماو يفتخرون بكاساتهم المضروبة التي عفا عليها الزمن وصارت في عداد الماضي وسحبت من منافسات الكاف بس الكاهن اوحي لهم كأنهم فازوا بكاس الابطال!! انا ما عارف لو وصلوا نهائي الابطال زي سيد البلد حيقولوا شنو؟ اعلي ماوصلوا اليه في منافسات الابطال دوري الاربعة بصحبة راكب وهو سيد البلد خلت ناس سلك بهلوسوا بروائح المطار حتي افاقوا بثلاثية سامانا سيد الحيشان التلاتة . غايتو مخدر اليخماو فعل بهم الافاعيل. ناس الاتحاد الافريقي قالوا ليكم سيد البلد احسن فريق في السودان والترتيب رقم ١١ والوصيف الدائم ترتيبه ٢٥ وبعد ده كله فصاحة لسان وقلة احسان والبراميل الفارغة تحدث ضجيجا اكثر. والمثل الشعبي بقول الحيلة قليلة والخشم بليلة وشر البلية مايضحك.

  3. عبدالملك يقول

    يا هجام دا في خيالك وتكرار تخريمات محمد كامل سعيد دليل غبينة شديدة من شخص محدد انت علاقتك بيهو شنو…هههه براميل فارغة وضجيج هههههاااي ٩٠ سنين الضجيج لم ينقطع وبعدين البطولة التي احرزها زعيم اندية السودان وسيد اسياد البلد وعميد أندية السودان يحاول اعلام المدعوم أن يوهم المشجعين امثالكم بأنها ألغيت لكن هيهات والزعيم سطر اسمه بأحرف من نور عندما فاز ببطولة كأس الكوؤس الافريقية بالعرق والدم ولم تلغى الا في مخيلة الحاقدين ناس دفن الليل اب كراعا برا إعلام الفول والوصف الذي ذكره كردنة ولم يرد عليه أحد…فصاحة لسان وقلة حيلة مردودة عليكم… بالغربال وابوعشرين نتحداكم واصلا هي نفس الوجوه ما الذي تغير في الهلال غير اضافة نص دستة من اهلي شندي وبطيخة مقفولة من سازمبا وترماي الوداد… الغربال مباراتين لولا عجب والتش ما شاف كورة ونتحداكم في مقبل الدوري وتشوف حاتعملوا شنو بعد مرحلة الافاعي اليوغندية… مد رجلك على قدر لحافك ولا تكرر كل يوم اليخامو ودلاقين والكلام الباهت الذي لا معنى له.

  4. Hajjam يقول

    انا لست مخدرا مثلكم ولا انقل من مرشد ولا من كورال ولكن قطيع اليخماو ابو الاحقاد كله يكتب بنفس الوتيرة كوبي اند بيست بطيخة سادومبا دي تلقاها مكررة في جميع صفحات واعمدة كتاب الدلاقين وتعليقات المعلقين. بطيخة سادومبا دي لو رجعت لاعلام الكورال واتباع اليخماو في كتاباتهم الماضية وقبل التوقيع للهلال فقد امتدحوا هذه البطيخة وتمنوا ان تكون في وصيفنا المزمن بل ذهب بعضهم واطنب في مدح البطيخة المفتري عليها وقالوا هذه اللاعب لايشبه الهلال وانما يشبه الاهلي المصري وفرق شمال افريقيا. واول ما وقع للهلال اشتعل الحقد في النفوس و انقلب اللاعب الفلتة لبطيخة سادومبا البطاح الذي غض مضاجع الدلاقين عندما كان لاعبا. هذا هو ديدن الدلاقين اذا اوجعهم لاعب بخسوه بافظع الالفاظ حسدا من عند انفسهم. ماذا قلتم في هيثم مصطفين و المعز محجوب و بكري المدينة عندما كانوا في الهلال؟ ومن الذي سمي بكري بجري المدينة. وبعد ما وقع بجري في الوصيف المزمن انقلب لاحسن مهاجم في العالم. واكيد بطيخة سادومبا ده اذا شطبه الهلال سوف تهرولون عليه وانتم حفايا وكلامكم عنه كله نابع من الاحقاد الدفينة وتتمنون ان تاخدوا كل شيء في فم سيد البلد كما حصل ايام الرئيس طوالي عندما تحول فريقكم باكمله الي هلال احمر في ذلك الزمان . غايتو السوباط حرق قلوبكم وقلوب الكاهن والكورال الذي صرف لكم الاوامر للكتابة بنفس الوتيرة علي شاكلة بطيخة سادومبا وترماي الوداد وفريق اهلي شندي وراجع اعمدة الكورال في الايام الماضية غايتو ربنا يشفيكم من الارتجاجات التي حدثت لكم بفعل الضربات المتكررة من السوباط و من اثار هذا الصنف القوي الذي يلعب بالعقول ويعمي القلوب عن الحقائق. اخيرا كلمة الدلاقين الحارقاكم دي ليست من عندي بل من عند مرشدكم.

  5. ابو عمار يقول

    كفيت ووفيت اخوي هجام دوس الابنص للصاجه خلي الدلاقين ومرشدهم اليخماو يفهمو حاجه

  6. Hajjam يقول

    سعد الهلالاب كثيرا بتتويج فريقهم من قبل الكاف كأفضل فريق سوداني خلال الخمس سنوات الاخيرة والتى يصنف فيها فرقه حسب المستويات قبل اجراء القرعة الافريقية
    ▪︎واحتل الهلال المركز ١١ مباشرة بعد الفرق العشرة التى تم اعفاؤها من الدور التمهيدي
    ▪︎وكان الاهلى المصري قد تصدر الترتيب بينما جاء المريخ في المركز ال ٢٥ بحكم خروجه لثلاث مواسم متتالية من الدور التمهيدي ،،
    ▪︎وحقق الهلال نقاطه من خلال تواجده باستمرار في مراحل متقدمة للبطولة المجموعات وما بعد المجموعات من خلال السنوات الخمسة الاخيرة ،،
    منقوووول.
    وبعد ده بجيك واحد تمهيدابي ويقول ليك نحن احسن فريق في افريقيا او في العالم. غايتو مخدر اليخماو صنف عجيب.

  7. عبدالملك يقول

    دلاقين شنو الحارقانا ما انتو عندكم الجلافيط والزناطير والاصفار والرشاشات …هههه ٧ الوحدات دايرين تزوغو بيها من ستات وخمسات الترجي وعقدة شمال افريقيا وخمسة مازيمبي في المعبرة ولو رجعت لسادومبا بنرجعك لبمبان ابراهزمه ودحدوح وصابون وعجب والكثير المثير الخطر…ههههاااي.. وانت اكبر كورال كل تنتظر عمود محمد كامل وتكرر عبارة اليخامو والمخدر بالله في كورال اكثر منك هجام اخوي؟ المرشد والطبال والكورال كل يوم تنقل لينا تخريمات ود كامل الذي لا نعلم الذي بينه وبين احدهم هو ادرى ما علينا…. والهلال قبل فترة سجل مشاطيب المريخ جيسون واوكرا وابراهومه والشغيل وحمودة بشير.

  8. Hajjam يقول

    والله ياعزيزي لست بكورال ولاناقل من اي عمود سوي من الهلالاب او المريخاب كما تفعلون تنتظرون كل صباح مع الكورال عمود اليخماو ثم تنتشر مفرداته بينكم انتشار النار في الهشيم ويتم ترديدها كالببغاوات تماما في الاعمدة والتعليقات . محمد كامل كاتب قومي ينطق بالحقيقة المرة سوي كانت لنا او علينا و غير تابع لكورال اليخماو وغير مخدر وده طبعا لا ينفع مع من تعود علي جرعات اليخماو القوية. الشي الوحيد الذي تعلمته من الاستاذ محمد كامل حفظه الله هو اسم الكاهن اليخماو وقد اعجبني ذلك الاسم لانه ينطبق علي احقد من عرفه الوسط الرياضي والذي نشر ثقافة الحقد والكراهية لتسويق صحفه الصفراء ولذلك تجده في تعليقاتي ولولا احقاده وسمومه لما ساءت العلاقة بين الهلالاب وبينكم بهذه الطريقة المزرية.

  9. صلاح يقول

    أبو المستعار كل مرة يدخل يلقي عمود كاتب هلالي رادم المرخرخ أو خبر عن الهلال يجري يقطع ليهو كوز موية ويجي جاري يردم، المسكين السكري والضغط تاعبنه وود عبد الماجد يجي يتم ليهو الناقصة، والغريبة من يوم غربلة جاب قوون المنتخب ما ظهر إلا الليلة، الظاهر عليهو كان غمران 😂😂😂
    رشه يا ود عبد الماجد وماترفع منه الأبنص !!
    مخدر الكاهن الأعظم أليخماو يا هجام مامنه فكاك، ده شكلو بخش الدماغ جوه وبسكن فيهو، عشان كدة عينة أبو المستعار ده خليهو يهرج ويبكي لحدي ما ينعس ويسكت براهو، السن ليها أحكام طبعا 😝😝😝

  10. عبدالملك يقول

    ههههه بلوله؟ حبيبي تعال دنا مشتاق لك حاكم السن والعمر ما يسمحش بالمجاراة ههههه والله ممكن اكون من احفادك يا راجل يا عجوز والكلام باين من ثقافتك وعباراتك البلدي اوي…ههه انت بتجيب الكلام دا منين؟ !!!! عجبي… وبقى سلملي على شروم الكتمبوش…شروم يا راجل ولو ما عرفتو أسأل بروف محمد عبدالله الريح… يا فلته الرياضة أخلاق ومناكفات وليس بالهرج والمرج والفث من العبارات السوقية واصلا يا بلوله انا مش فاضيلك كما قال لك دكتور مانديلا انت فظيع فظيع يا بلبل…هههه هههه

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد