صحيفة كورة سودانية الإلكترونية

الكاردينال أطعم أسد جائع والسوباط فك الأسد من الحظيرة !!

1٬555
بالعربي الكسيح
محمد الطيب الأمين
الكاردينال أطعم أسد جائع والسوباط فك الأسد من الحظيرة !!
* قبل الرسالة الأولى من (كورونا) ضجت وسائل التواصل الإجتماعي بصورة (أسد جائع) بحديقة القرشي .
* أو في الحقيقة هي ثلاثة أسود ولبوة.
* أسود ضربها الجوع وأصبحت لا تقوى على (الوقفة) .
* الشعب السوداني تفاعل مع تلك الأسود بصورة حيرت أطفال الشوارع الذين هم أحوج للاهتمام والرعاية .
* خلينا الأطفال واتوجهنا لرعاية وتغذية أربعة أسود.
* والكاردينال يعجبك كمان .
* الكاردينال حتى في موضوع الأسود داير (شو) .
* اتبرع الكاردينال ب(خروفين) يومياً للاسود.
* خروف للفطور وخروف للعشاء .
* حدث ذلك بينما نصف الشعب السوداني بيأكل لحمة الضأن من العيد للعيد .
* خرفان الكاردينال كانت بتجي جاهزة (مضبُوحة ومسلوخة) .
* أول مرة في حياتي أشوف لي أسد (بضبحو ليهو الفريسة) .
* الكاردينال ما كان فاضل ليهو إلا يجيب للأسود الخروف مضبُوح ومعاهو (فلفلية وبصل أخضر وجرجير وشربوت) .
* الكاردينال ممكن يضبح للأسود لكن ما بيدي جمال سالم مرتباتو.
* والله صحي.
* تذكرت قصة هذه الأسود وأنا أشاهد أمس صورة جماعية لهلال (٢٠١٢) .
* صورة تطمنك والله العظيم .
* في الصورة الجماعية شفنا تلاتة (تشكيلات).
* وكل تشكيلة أخطر من التشكيلة التانية.
* ماشاء الله تبارك الله .
* تحس في هيبة وجمال .
* الهلال هو (أسد البلد) وقد عانى في السنوات الأخيرة معاناة كبيرة.
* وصل الهلال في السنوات الأخيرة مرحلة أشبه بالمرحلة التي وصلت إليها (أسود حديقة القرشي) .
* أسود حديقة القرشي الجائعة لم يبقى منها إلا إسم (أسود) .
* والهلال لم يبقى منه إلا إسم الهلال ولون الشعار .
* شبعت أسود حديقة القرشي بخرفان الكاردينال والآن شبع (أسد السودان) بتسجيلات السوباط .
* ولذلك كلنا وبشوق كبير ننتظر هلال ٢٠٢١ .
* الهلال الذي يقوده الغربال .
* الغربال وما أدراك ما الغربال .
* محمد عبد الرحمن هو (كرستيانو أفريقيا) .
* الغربال كرستيانو الغُبش والغلابة .
* كرستيانو السودان .
* هو المهاجم الأول في البلد ، المهاجم الأول والثاني والثالث .
* المسافة بين الغربال وباقي المهاجمين كبيرة .
* طبعاً لما نقول الغربال في ناس بتتألم جداً .
* طيب بلاش الغربال خلونا نقول جكسا .
* إسم جكسا ذاتو بيألم.
* طيب نقول ميدو.
* نقول (حمادة عبدو) .
* هو محمد عبد الرحمن الشهير ب(لو رجعت السودان ما بلعب إلا للمريخ) .
* هاك المريخ ده .
* قال ليكم ما بلعب إلا للمريخ ؟
* أي.
* وأنتو صدقتو؟
* أي .
* طيب وأبو عشرين قال ليكم شنو ؟
* المهم .
* سيختم الهلال معسكره غداً ليعود ويغادر مبكراً إلي يوغندا .
* سيلعب الأزرق أمام الجونة عصر الغد وهي آخر مباراة ودية قبل مواجهة بطل يوغندا.
* ومؤكد أن الفريق سيلعب مباراة الجونة بالتشكيلة التي ستلعب بيوغندا .
* الأكيد أن التشكيلة ستتألف من جميع نجوم المنتخب باعتبارهم الأكثر جاهزية وسيضاف لهم أربعة لاعبين من الذين كانوا في المعسكر.
* وهذا أمر من النواحي الفنية يعتبر واقعي جداً ولا غبار عليه .
* الهلال عندما يلعب التمهيدي هو بلا شك (يتواضع) .
* ده تواضع الكبار .
* التمهيدي لا يشبهنا.
* مقامنا أكبر من كده لكن معليش نعمل شنو مع (أسد حديقة القرشي) .
* التمهيدي عندو ناسو.
* أكتر نادي في أفريقيا لعب تمهيدي هو المريخ الشهير ب(الإصيفر) .
* فريق عندو خبرة في التمهيدي .
* لو البطولة الإفريقية بالرُتب العسكرية يبقى المريخ (لواء ركن تمهيدي) .
* المحيرني عندهم خبرة في التمهيدي وبيطيروا من التمهيدي .
* وغايتو جنس غايتو .
* ونركب صافنات ونجيبة (جزائرية) واصلو الزول بيموت والذكرى تفضل حية .
* و..و..
* والشوق والريد والحب البان من ……..(لمسة جيسي) .
قد يعجبك أيضا
3 تعليقات
  1. Badreldin Abdelgadir يقول

    إنت عليك الله.صحفي الله يرحم ناس عبدالمجيد عبدالرازق.صحافه آخر زمن للأسف للأسف . صحافه متخلفه.وغسيل أموال

  2. جلابي الدوحة - قطر يقول

    الاسد واجب اطعامه الناس تتفرج عليه ويجيب قروش
    اما الاطفال لازم يبقو جعانين علشان يتصورو ضاربهم الجوع وتنهال التبرعات
    كان شبعو البدفع منووووو
    يا حبيب باقي ايام باذن الله وينزل الهلال الي تحت الصفر بتكملة مائة عام مع الصفر
    مبروك الشرطه الودتكم تحت الصفر الف مليون مبروك
    تمنياتي لكم باقامه دائمه تحت الصفر
    بس المحيرني بعد 100 سنه في شنو التحت الصفر نوصفكم بيه

  3. احمد التجاني يقول

    هههههههه احلى مقال ولانك قلت الحقيقة وقلت “لو البطولة الإفريقية بالرُتب العسكرية يبقى المريخ (لواء ركن تمهيدي)” الكلام دة ما عجب اخونا بدرالدين عبدالقادر. حقيقة الهلال بقى عنده 3 فرق قوية ونسأل الله انو يغطي على اولادنا ويحميهم ويعود الهلال اقوى مما كان. ولك اجمل تحية استاذ محمد.

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد