صحيفة كورة سودانية الإلكترونية

المريخ وسونا للإنباء .. الهضربة بدأت قبل توقيع (جيسي) في الهلال

1٬612
صابنها

محمد عبد الماجد

المريخ وسونا للإنباء .. الهضربة بدأت قبل توقيع (جيسي) في الهلال
·      عندنا زول في الحلة اسمو (التليح ود حسن) …زول رأسو متل (الصينية).
·        عشان رأسو زي (الصينية)…رأسو كان (بلف).
·      دائما راسو (لافي).
·      اهلو وقت يرسلوه عشان يجيب ليه (صابونة) غسيل .بجيب ليه (طحنية).
·      بقولوا ليه جايب ليك (طحنية) ليه؟.
·      بقول ليهم : رأسي لفه.
·      وهو عشان رأسو (لافي)…من (صابونة الغسيل) دخل في (الطحنية).
·      (التليح ود حسن) …مرات عادي في التلفزيون بتلقاه قاعد يحضر في (الو مرحب)…تقول ليه يا زول بتحضر في شنو؟.. بقول ليك بحضر في (الفيلم الاجنبي) دا.
·      وقتها رأسو بكون (لافي).
·      مرة مشى عشان يبارك لي ناس (التوم ود حرجل) العرس شال ليهم (الفاتحة).
·      عرفناهو طوالي رأسو (لافي).
·      في المناسبات المسكين يعاين في (الضلعة) وياكل في (البامية المفروكة).
·      رأسو لافي.
·      بكون عاوز ينزل رصيد في تلفونو ..بقوم ينزل الرصيد في تلفون الزول الجنبو.
·      رأسو لافي.
·      مرة مشي المستشفى – طلع عندو (ملاريا)..الدكتور كتب ليه (حقن)…الحقن اخذهم اخوه الصغير.
·      رأسو (لافي).
·      هو بشجع (برشلونة)…لكن وقت يقعد يحضر مباراة برشلونة وريال مدريد بيشجع (الريال) بسبب (لفة) الرأس.
·      لفة الرأس كعبة …مرات بكون ماشي لي عمتو في الكلاكلة ….تلقاه في دار الرياضة ام درمان بحضر في مباراة ابوروف والأحرار.
·      رأسو بلف.
·      هسع خلاصة الكلام دا – عاوز اقول ليكم ناس قناة الملاعب رأسهم (بلف).
·      ناس قناة الملاعب بيدوني احساس ان مباريات الدوري الممتاز لكرة القدم ناقلينها من (القمر) او (عطارد) وليس من استاد الخرطوم او نادي الاسرة الذي يبعد عن قناة الملاعب بضع كيلو مترات.
·      الموضوع ما صعب يا اساتذة.
·      ولا عاوز ليه (عبقرية).
·      والله موضوعكم دا (4) حجار بطارية كتيرة فيه.
·      الناس ديل شايفين نقل (4) مباريات في يوم واحد شيء صعب.
·      شايفين الموضوع فيه (اعجاز).
·      قناة قوون كانت لا تملك غير قناة واحدة  مع ذلك فعلتها قبل عدة سنوات.
·      4 مباريات نقلتها في قناة واحدة.
·      انتوا يا ناس الملاعب عندكم اكتر من (5) قنوات ..وشايفين الموضوع صعب.
·      بعدين ناس قناة الملاعب ديل عندهم (حركات) انا من الله خلقني ما شفتها.
·      مرة يجيبوا ليك الصوت قبل الصورة ومرة الصورة قبل الصوت.
·      ومرة المباراة قبل الاستديو
·      ومرة الهدف قبل ما يتسجل.
·      مباراة الهلال والاهلي مروي جابوا ليك نتيجة المباراة 1 / 1 قبل ما تبدأ المباراة.
·      لفة رأس.
·      وقت كانوا عاوزين يصلحوها جعلوا الهلال مهزوم  0 / 1.
·      فجأة كدا تلقاهم كتبوا ليك النتيجة 20 / صفر.
·      يا جماعة انتوا بتنقلوا ليكم في مباراة كرة قدم وليس كرة سلة.
·      الشيء الغريب عندما لعب المريخ امام الرابطة كوستي في ملعب نادي الاسرة (ملعب الخرطوم الوطني)…ناس قناة الملاعب عملوا ليهم (عملية)…الموساد ما بعملها.
·      أنا كنت قايل نفسي بحضر في (فضيل).
·      قناة الملاعب  كتبت اعلى الشاشة المريخ وسونا للإنباء…المعني ان المريخ يلعب مباراة امام سونا للإنباء…وسونا للإنباء والمريخ ما في حاجة بتلمهم.
·      الهمزة ذاتها ما كتبوها عملوها المريخ وسونا للانبا.
·      يعني بقت على (الهمزة).
·      لفة رأس.
·      دي ناس قناة الملاعب عملوها كيف ؟…والله ما عارف.
·      اعملوها المريخ والموردة.
·      معقولة.
·      المريخ والعباسية.
·      مقبولة.
·      المريخ والاحرار.
·      مبلوعة.
·      لكن المريخ وسونا للانباء دي ما بتبقى – إلّا اذا كنتم عاوزين تنزلوا المريخ (درجة ثانية).
·      دي الحالة الوحيدة التى يمكن ان يأتي فيها المريخ في (سونا للانباء).
·      الغريبة ناس الملاعب وقت يقعوا في هذه الكوارث ..ما بعتذروا لي زول ولا بوضحوا  (الصورة) ولا بقولوا شيء ..بخلوا الموضوع ماشي عادي.
·      بعملوا فيها (رايحين).
·      لسه بتعاملوا بعقلية سنة رابعة ابتدائي.
·      المعني احسن نسكت ..وما نكبر الموضوع …ما في زول بكون جايب خبر.
·      والعالم كله بضحك في هذه (الكوارث).
·      ناس الملاعب ديل يمكن ظروف الامطار والسيول والفيضانات اثرت معاهم.
·      ويمكن وصول (جيسي) خلاهم يلخبطوا شوية.
·      فقدوا التركيز.
·      خاصة ان الهلال مع (جيسي) عاوز يسجل (….) و(….).
·      الصورة بطش عديل.
·      الطبق بيجلي.
·      الحاجات دي ممكن تخلي ليك قناة الملاعب تجيب ليك المريخ عندو مباراة مع البوسنة والهرسك.
·      اصلو ما بعيد عليهم.
·      ناس الملاعب اعادة الهدف يجيبوها ليك تاني يوم.
·      تقول عاوزين يعيدوا الحلقة الاخيرة من مسلسل (نور) او (العشق الممنوع).
·      الهلال امام الاهلي مروي ما لعب مباراة.
·      الهلال امام حي الوادي برضو ما قدم شيء.
·      ما عارف المشكلة وين؟.
·      من الهلال ولّا من القناة.
·      في مباراة الهلال والاهلي مروي (ارضية) ملعب الهلال ظهرت زي رأس الزول البتعملو فيه الحلاقة.
·      والاضاءة ضعيفة.
·      تقول شغالين بي (لمبة) بتاعة حمام.
·      الغريبة لمبة الحمام دائما بتكون ضعيفة.
·      فرق بين المباريات التى تنقل من استاد الخرطوم او استاد الخرطوم الوطني واستاد الهلال.
·      استاد الهلال لا ارضية ولا سماء.
·      لا نجيلة ولا اضاءة.
·      لجنة تطبيع الهلال مفروض تلحق الاستاد.
·      تشوف (الارضية).
·      المستوى الفني للهلال (ضعيف) وهذا ما يجعلنا نؤكد حاجة الهلال الشديدة للتسجيلات.
·      الهلال عاوز ليه على الاقل 10 لاعبين او 9 على الاقل.
·      تنتظر موسم تسجيلات ساخن في الهلال.
·      ما عاوزين مجاملات.
·      ولا عاوزين نصبر تاني.
·      جيسي خطوة مباركة.
·      المهاجم سيرجي لا اعتقد يمكن يفيد الهلال.
·      لكن في النهاية الجهاز الفني للهلال قادر على تقييم اللاعب.
·      قبل جيسي.
·      وقبل سيرجي.
·      وقبل كل شيء.
·      سجلوا لينا عناصر (محلية) قوية.
·      عاوزين الناس ترجع تاني تتابع مباريات الهلال.
·      مباريات الهلال فقدت المتعة.
·      وبقت عاوزة ليها (صبر) عشان تقعد تتباعها.
·      الكاردينال افرغ الهلال (فنيا).
·      المريخ فيه عناصر (خبرة) يمكن تفيد الهلال كثيرا في البطولة الخارجية.
·      الاهلي شندي يجمع بين الخبرة والمواهب.
·      الخرطوم الوطني فيه عناصر صغيرة تتمتع بمهارات عالية.
·      الامل عطبرة …الروح والقوة.
·      ركزوا لينا في هذه الاندية – المريخ والاهلي شندي والخرطوم الوطني والامل عطبرة.
·      سجلوا لينا (….) و(…..).
·      ما في مهاجم في البلد افضل من ياسر مزمل.
·      ما في لاعب وسط افضل من والي الدين خضر.
·      ما في لاعب حركة وحيوية افضل من كابتن بشير.
·      في الخرطوم الوطني هناك عزام عادل (ود البيه) و(يوسف فداسي).
·      هذه الاسماء ابقوا عليها عشرة.
·      الهلال عاوز تسجيلات.
·      صوتنا (اتقرش).
·      تاني ما بنكرر ليكم الكلام.
·      أي زول يقول ليك الهلال ما محتاج ..وعاوزين تسجيلات (نوعية)..وكلام زي دا ..ببقى بغش فيكم ساكت.
·      بكون ما عاوز ليكم المصلحة…ولا الفائدة.
·      عاوزين مدافع (محترف) بمعني الكلمة.
·      مدافع …مدافع.
·      دفاع الهلال شغال باليومية.
·      كل مباراة يلعب مدافع.
·      مرة عمار الدمازين.
·      ومرة بويا.
·      ومرة سمؤال.
·      ولا بويا ولا سمؤال بيلبعوا في قلب الدفاع.
·      شغالين (توليف) ساكت.
·      كاديو عندو ثقة شديدة.
·      ونحن ما عندنا (حيل) لهذه الثقة.
·      الزول دا مرة بقطع ليه قلب مشجع.
·      وليد الشعلة ممكن يمشي لو لقى العرض الكويس.
·      اطهر الطاهر ممكن يمشي.
·      موفق وسليم وعبدالرؤوف واسكندر جاءت حوبتهم.
·      ونحن لغاية الآن في انتظار الشيخ.
·      ما تتأخر اكتر من كدا يا الشيخ.
·      الزمن ما في مصلحتك.
·      كورة الهلال بقت تشبه (نجيلتو).
·      يمكن ان تفقدوا الدوري بهذه الطريقة.
·      الدوري ياهلال.
·      السنة دي لا كأس ..ولا يحزنون.
·      لا لجنة التحكيم ولا المجلس الوطني يمكن ان يجعل الهلال يفقد بطولته المحببة.
·      الدوري يا هلال.
·      …………..
متاريس
·      في مباراة المريخ وسونا للانباء في ضربة جزاء في الشوط الاول اوضح من الضربة التانية لم يحتسبها الحكم.
·      الحكم شغال علي كيفو.
·      شغال موازنات.
·      ولولا فضيحة الضربة الاولى الحكم ما كان سوف يحسب الضربة الثانية.
·      عشان يحسبوا ليك ضربة جزاء امام المريخ …لازم يكون عندك ضربة جزاء سابقة لم يحسبها الحكم.
·      يا كدا …يا ما بحسبوها ليك.
·      الشيخ يجب ان يعطي الفرصة في المباريات القادمة.
·      اسكندر …(اسامة الثغر) جديد في الهلال.
·      بس ركز امام المرمي يا اسكندر.
·      انت اسرع زول يمكن تصل المرمى.
·      عبدالرؤوف بعد الكورونا مستواه اتراجع.
·      لكن حتما سوف يعود عبدالرؤوف في المباريات المقبلة لأنه كان اخر لاعب يلتحق بفترة الاعداد القصيرة.
·      لا خوف على الهلال في وجود الفاتح النقر.
·      في انتظار جمال سالم ومعاذ هراوي واحمد العابد.
·      العابد مكسب كبير للهلال.
·      وعبدالمهيمن اضافة حقيقية للهلال.
·      لجنة التطبيع في الهلال بتعرف تشتغل كورة صاح.
·      شغلكم مية المية.
·      كفاية انهم حابوا جيسي من وقت بدري والمطارات مقفولة.
·      جيسي يجب ان يدخل في مرحلة الاعداد طوالي.
·      الموسم الجديد سوف يبدأ افريقيا بعد اقل من شهرين.
·      أي عناصر رصدتوها …احسن تخلوها معاكم.
·      عشان يحصل الاعداد الجيد …ويتم التجانس والتفاهم والتجانس.
·      حتى العناصر المحلية ..يا ريت تلموها عليكم من بدري ..بدري.
·      او تضعوها تحت الرقابة والوصايا.
·      باتريس كارتيرون المدير الفني السابق للزمالك هرب من الفريق قبل اكثر من شهر من مواجهة الزمالك الافريقية امام الرجاء المغربي.
·      مصر مقلوبة بسبب ذلك.
·      طيب نحن نقول شنو بعد هروب حمادة صدقي من الهلال قبل (10) يوم من مواجهة الاهلي المصري الذي كان يلعب له حمادة صدقي.
·      اذا كان باتريس كارتيرون الذي هرب الى المغرب (خائن)…حمادة صدقي يبقى شنو؟.
·      خلوها مستورة احسن.
·      وحقنا في الاهلي المصري بيظهر ان شاءالله.
·      مؤامرة ابعدت الهلال من البطولة الافريقية.
·      خلونا هسع في الدوري الممتاز.
·      الدوري يا هلال.
·      مواجهة الهلال القادمة امام هلال كادوقلي بعد عودة المنتخب.
·      وبعد هلال كادوقلي سوف يلعب الهلال امام الخرطوم الوطني.
·      بعد هذه الجولات سوف يتبقى فقط للدوري الممتاز 6 مباريات.
·      يجب ان يحافظ الهلال على فارق النقاط.
·      يجب ان يبقى الهلال في الصدارة.
·      تعثر المريخ اكيد.
·      …………
·      ترس اخير : جيسي داع اوز ليه (نجيلة) براهو.
قد يعجبك أيضا
5 تعليقات
  1. ابو حسام يقول

    هههههه اي المريخ فيهو لاعبين خبرة تقصد العسكري الفي الحي تشتش قليبي وكي…حساس بحبو الناس فنان ومنو احييبي… رمضان كريم…هههه يا سقاة الكأس من عهد الرشيد…ليتني لو ذقتها في العمر مرة….. احلام الجوعان عيش المريخ هو من يسجل لاعبي الهلال والدليل اصحاب السعادة كلتشي..طمبل…عقرب…غربااااال..ترااااورييي قلعناهم قلع نجوم من ذهب هههه اي التش قال للكوارتيك تك انا ما بلعب في السودان لغير الزعيم لملم قريشاتك عليك… وعجب والرشيد ما لعب عيال وباقي العقد الفريد … شوف محمد عباس ومدافع هلال هارون وكردمان اما ياسر مزمل وبوغبا وولاء الغالي محجوزين بامر الصفوة..احلم اصلو الحلم مجان زمان حلمت بالتش في المعبرة لقيتو يتنطط في القلعة الحمراء جوار بيبو.. ليل النكت دا وين تلقو زي دا تيري العسل دا …هههههاااااي

  2. هضربة يقول

    محمد عبد الماجد دة لو شاف حاجة غير الكوورة دى احسن دة زول بتاع مهاترات او احسن يتعلم من د. مزمل كيف يكتب ويتعلم فن التحرير قبل كدة كتب قال الفرق بين جمال الوالى والسوباط انه جمال الوالى كوز فى زمن النظام السابق والسوباط كوز فى زمن الديمقراطية اسع المضرب منو فى فرق بين كوز قديم وجديد

  3. Hajjam يقول

    صدقت في تسمية نفسك هضربة. فعلا هضربة. شن جاب اليخماو كبير الكهنة للكاتب الراقي ود عبد الماجد؟. فعلا القرد في عين امو غزال. ليك حق تهضرب لان ود عبدالماجد حارق فشفاش الطيشاب.

  4. صلاح يقول

    طبعا كالعادة، أبو المستعار راجي عمود محمد عبد الماجد وشايل شتيمته جاهزة، ولو ما أخاف الكضب الشتيمة بتاعة محمد كامل ذاتها جاهزة بس راجي العمود ينزل !!!
    ياما حاتتعب يا أبو المستعار لمن صلعتك تضرب تخ، راجياك أيام سودة مع فلس ونشاف سوداكال الخازوق وردم أولاد الهلال الصغار الحلوين هههههههه
    إتعلم يا أبو المستعار من أعمدة الأستاذ محمد عبد الماجد عشان ترتقي بأسلوب الكتابة بتاعك بدل ما شغال تشف من عمود أليخماو، دي مدرسة مجانية ومحاضرات قيمة بعيدة من الشتم والتعريض بالكلام وسلخ جلد خلق الله ( أسي عليك الله التعريض بالكلام دي ما إستفدت منها؟)، بس الشي البحيرني لمن مجنني إنو الناس الزمان الحضروا الكتاب كانوا عباقرة، إنت كنت بتعمل في شنو؟
    أديلو يا ود عبد الماجد وماترفع منه الأبنص !

  5. خالد يقول

    رغم انو محمد عبدالماجد هلالابي بيس صحفي محنرم وصاحب قلم ومدرسة ينتقد ويناكف ويكتب بكل احترام لا يسئ ابدا بعبارات غير لائقة ولايكتب خارج النص وفوق ذلك حقاني يشجع الهلال ولا يسئي للمريخ ذي ناس قريعتي راحت …

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد