صحيفة كورة سودانية الإلكترونية

المقامة الصفرية 2021

4٬298

كبد الحقيقة

د.مزمل ابوالقاسم

المقامة الصفرية 2021

 

* استجابة لرغبة عدد من أنصار الزعيم نعيد نشر المقال الشهير الذي حمل اسم (المقامة الصفرية) مع بعض التنقيح والتحديث من باب المواكبة (الصفرية) للمستجدات التي تلت كتابة المقال أول مرة، قبل عشر سنوات من الآن.
* الصفر الما بنقدر، أقدم ثابت في تاريخ السودان.
* الصفر العجيب.. الغلب الدوا والطبيب.
* عاصر التُرك والإنجليز، وواكب حريق المك، وزامل كتشنر وسلاطين، وعاشر المستر كلارك واللورد كرومر، وشهد لحظات رفع العلم وثورة أكتوبر واستشهاد القرشي والديمقراطيات الثلاث!
* الصفر العنيد، قاتل مع قوة دفاع السودان، وتطوع مع سلاح الهجانة، وحضر الأزهري وعبود والنميري والصادق وزروق.. وما راضي يروق!
* حضر استفتاء الوحدة أو الانفصال، وصوّت للوحدة.. مع الهلال!
* حتى الانقلابات ما فاتها، خالد الكد وهاشم العطا وحسن حسين ومحمد نور سعد!
* وفي زمن الإنقاذ.. رفض أي إنقاذ!
* الصفر الخطير، حضر سقوط البشير، ورفض يطير.
* وشهد طيران أبو عوف، بدون خوف.
* والآن.. قاعد مع البرهان، في أمنٍ وأمان.
* حضر التطبيع وشهد لقاء البرهان ونتنياهو وقال (شالوم.. مع فطومة وكلتوم).
* الصفر الباتع حضر انتفاضة اكتوبر، وشارك ثورة مارس أبريل، وزامل تجمع المهنيين!
* هتف (وكان القرشي شهيدنا الأول)، وردد (لن يحكمنا طيش حنتوب)، وصباها في القيادة مع (جردل مان)، وهتف لي ود اللباد قبل الميعاد.
* صفر المغارز.. هتف معانا: تسقط بس.. وردد (تسقط تاني)!
* الناس شافوهو مسطح في القطر مع سوار عطبرة الحجل بالرجل.
* ردد مع الدقير عبارة (مولاي الصفر الأعظم)، وشغال يهتف مع الثوار (شكراً حمدوك)!
* الصفر حضر قفلة خط الأنابيب وعارض رفع الدعم عن الخبز والوقود، وحرق اللساتك مع الثوار.
* الصفر أقدم من الكسرة، وقاعد من زمن (الزمام أب رشمة)!
* حضر زمن الكركار، ودق الشلوفة، والرحط.. وشهد زمن البوتكس والسيلكون والتاتو.
* الصفر متحكر من زمن البرش بي قرش.. والدُقّة بلاش.
* غنى مع زنقار.. وكمل حقيبة الفن مع كرومة وسرور وأولاد شمبات.. والصفر ما فات.
* عاصر زمن أم بلينة السنوسي وعشة الفلاتية ومهلة العبادية، وغنى مع ريماز ونانسي وشموس، وحضر زمن الكنداكات.. وما فات.
* حضر العبادي وود الرضي وود البنا وود القرشي والسر قدور، وغنى في (أغاني وأغاني) مع فرفور!
* كرومة لعب وفتر.. وسرور غنى وما قصر.. والصفر لسه محكّر!
* حضر زمن الأنادي والدلوكة والرايات.. وعاصر زمن الشريعة والكشات.
* عايش من زمن الناس بتضبط ساعاتها بالقطر.. وتركب المفتخر!
* حضر زمن اللحمة بالوقّة، والعيش بالملوة، وجوز الحمام 3 فردات!
* الصفر العنيد.. قدل في الطريق الشاقي الترام، وباع واشترى بالمليم والفريني والشلن والريال والطرادة، وحضر زمن اليورو والدينار والدولار الحار!
* اتعالج بحبوب السلفة في الشفخانة، وحكمة الله.. لي هسة قاعد معانا!
* حلق الكاري والخنفس، وشق شعرو مع إبراهيم عوض، وحضر المارينز والراستا، وأكل المديدة والباسطة!
* كتب عنه كوركين أسكندريان وعمر علي حسن وأبو آمنة حامد، وحضر زمن دسوقي وشجرابي وخالد.
* الصفر أمانة ما جامد!!
* الصفر حضر ولادة خالد عز الدين، وكان ما أخاف الكضب أقول قاعد معانا لي يوم الدين!
* في مصر.. الصفر عاصر الخديوي توفيق والملك فؤاد والملك فاروق ومحمد نجيب وعبد الناصر والسادات ومبارك وطنطاوي ومرسي وعدلي منصور.. وفي إعادة ترشيح السيسي برضو حضور!!
* في إفريقيا حضر زمن نيلسون مانديلا وهيلاسيلاسي وتمبلباي وحسين هبري وجكوني عويدي وعيدي أمين وموسفيني ووشهد خلافة محمد كاكا لإدريس ديبي.. ولي هسه (يدبي)!
* عاش مع الملك الحسن وشهد خلافة ابنه في المغرب، وحضر زمن الملك حسين وابنه الملك عبد الله، وعاصر عهود الملك عبد العزيز، والملك سعود، والملك فيصل، والملك خالد، والملك عبد الله، والملك سلمان.. وقاعد معانا للآن!
* الصفر الشبعان.. خالف كراعو ومنتظر تتويج محمد بن سلمان!
* في السودان عاصر زمن الناس بتسمي خشم الموس، والكجم وتور القوز واللدر والدود وعشا البايتات، وحضر زمن مهند وهيثم ورامي والراستات!!
* الصفر شاف سعدية الداية، وتخرج في كلية غردون التذكارية.. وبعد الاستقلال درس في الأهلية والنيلين والأحفاد.. وحضر زمن مأمون حميدة والمشرق والرباط!
* الصفر الخطير حضر زمن فاطنية وعشوشة والسُرة وأم ضيفان، وعاصر زمن نانسي وسوسو وناريمان!
* عاصر بوكاسا.. ولعب (الرمة وحراسها)!
* الصفر عايش من زمن الدوم بالطبق، وقراصة النبق!
* أكل البيتزا واللازانيا والهوت دوغ والكرانشي بيرغر!
* اتطبب بالجردقة والمحريب والقرض والحرجل، ومشى لي بت بتي الحجل بالرجل!
* اتعالج بالبنسلين والتتراسيكيلين والإمبسلين، وحضر زمن العلاج بالليزر!
* صفر الجن.. حضر الضلام والدمبعلو والبعاتي وحجى الحبوبات!
* شهد زمن الحمام الزاجل والجواب والتلغراف، وقعد لي زمن زمن الموبايل والنت واللاب توب والياهوو والهوت ميل والفيس بوك والواتساب!
* الصفر حضر زمن الخوسة والسيف والسفروق!
* وعاصر زمن الليزر والقنابل العنقودية والأسلحة النووية!
* شهد الحربين العالميتين، وحضر تشييد وسقوط حائط برلين، وشارك في بناء سور الصين!
* الصفر قاعد من زمن كتلة عدم الانحياز والاتحاد السوفيتي وحلف وارسو والحرب الباردة!
* الصفر الصداح.. غنى مع كابلي لناصر وجومو وسوكارنو ونهرو وتيتو، وشارك في حرب فيتنام، وتابع أزمة خليج الخنازير، وشهد مقتل كيندي، ونضال جيفارا، وثورة كاسترو، وعاصر ثورة ماو في الصين!
* شهد زمن الكلبة لايكا، وتابع صعود الأمريكان للقمر، ووثق انفجار تشيرنوبل وهيروشيما وناجازاكي!
* عاصر زمن الهمباتة، وغنى مع خلف الله حمد (الكنداكة سيدي سيد الأراكة)!
* الصفر ركب مع طه الضرير وود ضحوية في جمل واحد، وحضر زمن (بكرة الهمر جاية)!
* قاعد من زمن القراية أم لوح، وما بعيد يكون ركب سفينة نوح!
* الصفر نده سيدي الحسن أب قبة لبنية، وزار الشيخ حسن ود حسونة طباب المجنونة، وعاش معانا عهود ريماز وندى القلعة وستونة!
* هز مع الدلوكة والشتم، ورقص التويستي، ولبس الشارلستون، والساعة الرومر، والنضارة البيرسول!
* حضر زمن توب الزراق الجابوهو النقادة، والقنجة، وأب قجيجة، ورسالة لندن، وجكسا في خط ستة، وتحرمني منك،وعاش لي زمن الكارينا والبودي والسيستم!
* الصفر الجميل.. لعب الليدو في شارع النيل.
* 91 سنة.. والصفر الثقيل ما راضي يستقيل!
* الصفر الدولي أعرق من الطابية المقابلة النيل، وأقدم من بوابة عبد القيوم، وأشهر من دهليز صالح جبريل، وأقدم من سبيل خلف الله!
* وجلدو أتخن من سور سجن أم درمان!
* حضر زمن السحارة والدواليب.. وعاصر الديب فريزر والمشلعيب!
* الصفر قاعد من زمن دار الضلمة، وقهوة جورج مشرقي، وسان جيمس، والسينما المتجولة والعيادة المحولة!
* دخل سينما برمبل وكلوزيوم والوطنية!
* ويا زوووول، الصفر حضر افتتاح (عفراء مول)!
* الصفر مشى في سوق أم دفسو، وفرش في سوق أم سويقا، وباع في سوق خمسة دقايق، واشترى من (مليون صنف)!
* وعمرو طال لغاية ما شاف المول والأسواق الحرة والتجارة الإلكترونية!
* الصفر حضر زمن صفرجت وسكج مكج والسيجة وشليل وينو!
* ولعب بلاي ستيشن وأتاري، مع أولاد مكسيم وأوتارا وديمبا باري!
* عاصر زمن الهيلمان والهينو والكندة والهنتر وكومر الكشة.. وركب الأمجاد والركشة!!
* الصفر الدولي الخطير.. ركب الترماي واتحكر في باصات أبو رجيلة، وحضر زمن بيع التمر بالكيلة!
* قاعد من زمن (الشِّدة) و(تموت تخلي)، والهلال ما راضي يخلي!
* صفر معمر، لعب مع منزول وممي وقاقا والدحيش وجكسا وباكمبا، وزامل كاريكا والطاهر سادومبا!
* الصفر لعب ورا وقدام.. مع هاليفا وصدام.. وحضر زمن أندريا وجوليام وفارياس والعراقي الحمام!
* الصفر معنا من زمن فتح الله بشارة ولي زمن قناة كردنة وأكياس فطومة الطائرة.

قد يعجبك أيضا
22 تعليقات
  1. Hajjam يقول

    اللهم اني صائم. لقيت راحتك في رمضان والناس صايمين وبقيت تتجدع . واصل كتاباتك بعد رمضان عشان تعرف الطفا النور منو؟
    اليشوف الفصاحة يقول شلتو بطولة افريقيا والتي اعظم انجازاتكم فيها صعود يتيم لدور الاربعة الكبار وبصحبة راكب كمان. صدق المثل القائل الحيلة قليلة والخشم بليلة!!!

  2. Hajjam يقول

    رحم الله الصحافة والصحفيين والدرجات العلمية المضروبة المهداة من حكومة الكيزان لاتباعهم.

    1. تونجيلا يقول

      هههههه ردم تقيل للصفر المعاصر.. الصفر من زمن جدنا بعانخى.

      1. Aisha siddig يقول

        انا ليس لي في الكوره ولكني اعتبر أن الصفر هو ما يلازمنا من الفشل منذ نشأة السودان

  3. jumaa musa يقول

    من اسوا ما يمكن أن يقرأ عقلية مشجع لا يحترم المنافس…. ممارساتك في عهد الكيزان لو البلد دي فيها شجعان والله حتى كتاب المريخ كانوا سلخوك . انت من عادى اخلص رجال المريخ المرحوم صلاح سعيد حتى تصعد لتصبح كاتب المريخ الأوحد الذي يقود فرقة الكورال….. الهلال تاريخ عريض وشرف باذخ لن يطوله مثلك…. …. لقد افسدت الوسط الرياضي بعقليتك

  4. صالح ابراهيم محمد يقول

    في زمتك انت كنت قاعد تهتف تسقط بس

  5. majdi يقول

    البسمع كلامك يقول مريخك السجمان ده قبل كده جاب كاس الابطال ولا كأس الكونفدرالية . يا اخ انت قايلين نفسكم بتغشوا منو انتو لو ما الهلال وتصنيف الهلال ما بتركبوا ليكم طياره تسافروا تلعبوا بره .. وجوه السودان لو الهلال ما كان لقيتو ليكم استاد تلعبوا فيهو لانو أستادكم خرابه وآلله مفروض اداره الهلال ما تفتح ليكم الاستاد كلو كلو وتخليكم تلعبوا فى الشارع لانكم ما بتستاهلو

  6. ابوسنان يقول

    اه البليلة حرقتنى يا دكتور مزمل .صبرك جاب الحمى والكرونا.وربنا يستر مايجيب ود ابعلوا ذاتو

  7. اسامة يقول

    مايعرف ليكم الا سوداكال يدير النادي غصبا عنكم لانكم … الصحفي مزمل ورئيسه سودكال مزمز حاقد على الهلال ويرى في الدلقون ريال مدريد وهناك من يصفق له فريق في اخر بطولة خارجية انهزم أربعة مرات ودخل مرماه 15 هدف متزيلا كل المجموعات ماذا يكون وصفه

  8. محمد حسن يقول

    البطولة الافريقي التي خرج فيها المؤخره بخمسة عشر هدفا بالتمام و الكمال كاكبر حصيلة علي مستوي البطولة .

  9. اسامة يقول

    ابو القنابل يبيع الوهم للدلاقين موعدنا قريب ان شاء الله بعد العيد في الميدان رحم الله امريء عرف قدر نفسه لو كان هناك رقابة موضوعية على الصحف والمطبوعات لم ينشر هذا المقال مفروض ادارة نادي الهلال تقاضيك لانك تجاوزت الحدود المسموح بها عرفا في الكتابة في كل صحافة العالم يحترم الغرماء بعضهم بعضا الاخلاق تسبق الكتابة الا اذا كانت تجارة بأسلوب الغاية تبرر الوسيلة .

  10. Hajjam يقول

    مافائدة التعليقات المبتورة ياناس كورة سودانية. هل كلمة ابو الاحقاد وناشر الحقد والكراهية كلمات بذيئة حتي يتم حذفها؟

  11. Hajjam يقول

    حسبنا الله ونعم الوكيل اذا لاتريد التعبد في رمضان فاترك الناس ليتعبدوا في هذا الشهر الكريم.

  12. nasir يقول

    يا هجام ناس كورة سودانية ما ببتروا الكلام بس .. ديل أي كلمة بتمس مزمل ولو كانت حقيقية مابنشروها .. كتبت كثيرًا عنه ولم ينشروا تعليقاتي … فلا ندري الرابط بينهما شنو ؟؟؟؟؟؟؟؟؟؟؟؟؟؟؟؟.

  13. حمزة فضل يقول

    يا راجل انت دكتور عارف معني دكتور شنو اكيد مش عارف الان البروف شداد دكتور وانت دكتور ههههههههههههههههههههه

  14. صالح يقول

    ياخي لو بتكتب كدا … و تهظر و تعمل فيها دمك خفيف ….ح نقبلها منك ،،رغم عدم الموضوعية .

    المهم …طالما الليلة نسيت لينا حكاية شداد و سوداكال
    مافي مشكلة .

    كان تكتب عن الصفر في عهد بعانخي …و تخلي باقي تاريخ الصفر .. يواصلوا فيهو باقي الببغاوات الكهنة …لانو هسي بكون راسهم ضارب ،،ما عارفين يكتبوا عن شنو ؟

  15. احمد التجاني يقول

    نفس السؤال اللي سبق ووجهناه لعمك تنقو نوجه ليك يا مزمز وارجو ان تواتيك الشجاعة للرد عليه: الكاس الفالقين راسنا بيهو هل كسبتوه من الاهلي ولا الزمالك المصري؟ ولا الترجي او النجم الساحلي التونسي؟ ولا شباب بلوزداد والمولودية الجزائري؟ ولا الرجاء البيضاوي ولا الوداد المغربي؟ ولا من مازيمبي او من من صنداونز الجنوب افريقي؟ كما ارجو ان تواتيك الشجاعة لاطلاع كل الناس على تفاصيل البطولة الخارقة اللي فزتوا بيها والفرق اللي قابلتوها من البداية للنهاية وشكل البطولة؟
    بإمكانك يا مزم ان تضحك على الناس بعض الوقت لكنك لا تستطيع ان تضحك على الناس طول الوقت.

  16. يسين يقول

    قلت لي حضر سوار عطبرة (ثوار) يادكتور اللهم اني صائم

  17. القناص يقول

    الاخ الكوز خليك موضوعي ورينا دكتور في شنوا ولا عندك دكترة في التطبيل لي الرييس طوالي وفرحان كمان اعيد نشره ااكد ليك يااااا انوا مقالك الممل ده مافي زول قرا نصه

    1. القناص يقول

      انشا الله ما توافقوا اصله

  18. ابو عمار يقول

    اها والصفر ده ما حضر ( حول لي ياريس حق البوش ) ولا حضر المكرمات ولا حضر مرافقة المخلوع في سفرياته

  19. موسى بشرى موسى يقول

    الدرجات العلمية المضروبة , لم اصدق وانا اقراء مقال ابوالقنابل بالله انت دكتور صدقنى دكتوراة مضروبة , , الان عرف الناس جميعهم ان سوداكال على حق فى رئاسة المريخ والله البشوف كلامك قد يصدق ان المريخ هو بطل افريقيا الاوحد وصدقنى ان كاس الكنفدرالية الذى اعمى عينيك هو كاس صدفة والدليل حتى الان وبعد مضى عشرات السنين لم يحرزه مرة اخرى وشكرا يا عبدالواحد لوكان فعلا ما تتحدث عن كاس الكنفدرالية اين انت الان برهان يا برهان الذى يتحدث يكون بمثابة انة على الاقل احرز الكاس مرتين او ثلاثة انظر الى انجلترى مخترعة كرة القدم لم تحرز كاس العالم الا مرة واحدة اما الهلال الذى تتحدث عنه وصل نهائى افريقيا مرتان وانت حتى الان تصارع وتصارع وتقارع وتسق من اول الطريق درجات علمية مضروبة ,

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد