صحيفة كورة سودانية الإلكترونية

امة قوس قزح

994

صابنها
محمد عبد الماجد
امة قوس قزح

الزول وقت يكون مسافر بكون ملخبط وبرة الشبكة ، لهذا الكتابة في مثل هذه الظروف صعبة.
مع ذلك فان للكتابة متعة لا يمكن ان تتجاهلها ..اجمل الكتابات تلك التى تأتي في ظروف استثنائية.
لمن تكون في حالة ضغط اكتب.
بتحرر من أي شيء.
بتتخلص من كل حاجة.
لكن برضو ما قادر اركز …وغير قادر على السيطرة على الكلمات. خشيت في (القهوة) لمن انتهيت منها فاكرها (شاي).
مشيت على (الدكان) فاكرو (المطبخ).
فتحت التلفزيون ..اشتغلت (المروحة) في البرد دا.
لكن مع ذلك ح اكتب والسلام.
الكتابة في الظروف الصعبة شيء يخفف من (الصعوبة) ويقلل من حدة الاوجاع والأحزان.
لمن تكون ملخبط اكتب.
ولمن تكون بتفكر امشي اطول مسافة.
علاقتي مع (السفر) علاقة محبة – اعشق (السفر) و (الترحال).. لأن السفر فيه يمكن ان تتشبع بثقافات ورؤى لن تتوفر لك في المقام والاستقرار ولن تجدها في الكتب او المسرح او التلفزيون او الاذاعة.
ليس هناك اغني من (السفر) في الحقن بالثقافات والشوف.
خليك دائما مع الطيور الما بتعرف ليها خرطة.
دي اسلم طريقة.
للإسفار اقدار وهي خارج الارادة البشرية – السفر امر لا نملك القدرة على تحديده لذلك قيل القدم ليها رافع ..وقال ايضا (السفر مكتوب مقدر) لذلك اتعامل مع السفر بهذا الفهم.
ما في زول عارف نفسو بكرة بكون وين؟
خليك جاهز.
ممكن تفوت في أي لحظة.
رتب شنطتك..وجهز زادك. وخير الزاد التقوى.
خليها على الله.
محل ما تودي ودي.
موش صلاح بن البادية من كلمات الصادق الياس غني (بس تشيل فيني وتودي).
لا ارتب شيئا في السفر ولا اجهز حقائبي إلّا في اللحظات الاخيرة وبعد الحصول على التأشيرة والتذكرة وبعد ان تتحدد ساعة الاقلاع.
يمكن هروب من الاسئلة الكتيرة.
ويمكن عشان ما عارف الظروف.
خليها تمشي بس.
ما بحب اقول لي زول مسافر ..وبكرة يلقاني حايم في الحلة، الزول البعمل كدا دائما الناس بتهاجمو وبتقول ليه : يا زول انت ما قلت مسافر.
وفي البلد دي ما في حاجة مضمونة.
والسفر عندو ارتباط بي اطراف اخرى لا تستطيع ان تجزم به.
لهذا دائما لا اعلن سفري إلّا في اللحظات الاخيرة وبعد تجهيز الشنطة ..حتى ناس البيت يعرفوا عن ذلك.
ممكن فجأة اقول ليهم انا مسافر بكرة.
او مسافر العصر.
بعد ما تكتمل أي حاجة.
حتى على المستوى الداخلي – ممكن اسافر فجأة من مدينة الى مدينة…(السفر) فيه ذلك المساح.
فيه تغيير.
وخروج.
اقلب الشريط لو شعرت بالملل.
عندما تتطالعوا هذا العمود يفترض ان اكون برة البلد.
يمكن اكون في اثيوبيا في الطريق الى جنوب افريقيا (كيب تاون) ويمكن نكون وصلنا اذا شاء الكريم.
الاقدار ما معروفة.
لكن المهم نكتب على ضوء (النوايا).
تعرف جنوب افريقيا بـ (امة قوس قزح) وذلك بسبب التعدد الاعراق فيها – وهي بتلك الخصائص لا بد من انها بلد ثقافات مختلفة.
كفي انها اخرجت نيلسون مانديلا.
انتوا على موعد مع مانديلا.
خلوا نومكم خفيف.
التعدد في الاجناس والأعراق يفرز الوان مختلفة – ليس في مجال (البشرة) فقط وإنما في مجال الاعراف والتقاليد والثقافات. فهي فعلا امة قوس قزح.
نحن قوس قزح دا في (الافق) عندنا حاجة غريبة.
جنوب افريقيا الدولة (الاوربية) التى توجد في القارة الافريقية – تجاوزت الكثير من الصعاب والمطبات ووصلت الى مكانة عالية ورفيعة.
لا بد ان انسان جنوب افريقيا يمتلك قدرات خاصة جعلته يصل ببلاده الى هذا المستوى.
نحن في السودان ماذا ينقصنا؟
عندنا كل شيء.
كل الخيرات وكل ما يتواجد عن الاخرين يتواجد عندنا (مجتمعا).
حتى الانسان السوداني انسان بمواصفات خاصة وإمكانيات عجيبة.
لا نقول نحن ما عندنا عيوب… بل عندنا الكثير من العيوب …كفي اننا بكل هذه الامكانيات والقدرات لم نصل ببلادنا الى بر الامان.
سوف نصل ان شاءالله جنوب افريقيا.
نشوف الناس ديل كيف؟
وان شاءالله ننجح في نقل صورة (شاملة) عن جنوب افريقيا …الرحلة سوف تكون من اجل تغطية معسكر الهلال ومباراة الهلال امام صن دوانز ..لكن ان شاءالله ننقل ليكم الصورة كلها.
كل التفاصيل.
وما تشيلوا هم.
ما بنخلي حاجة.
نسأل الله التوفيق والسداد.
ان شاءالله على اسوأ الفروض نجيب لينا نقطة من صن دوانز.
دي حاجة اسألوني منها.
انا ما بسافر ليكم ساكت.
قولوا ان شاءالله.
طبعا في ناس كتيرة بخلوا الجهاز الفني ..ومجلس الادارة ..وحارس المرمى والمهاجم. بخلوا أي شيء وبمسكوا في (الصحفي) المرافق للبعثة.
هو المفروض يجيب القون.
وهو المفروض يدافع عن مرمى الفريق.
اقول ليكم ما في مشكلة.
ان شاءالله الهلال يرجع بنتيجة ايجابية من جنوب افريقيا.
يعني ماشين نقعد اسبوعين في جنوب افريقيا ونرجع ساكت.
ناس المريخ قعدوا في القاهرة 45 يوم …واتهزموا (5) مرات.
مرة من فريق درجة ثانية.
ومرة من ناشئين الزمالك.
الهلال ان شاءالله ينتصر.
وان شاءالله الهلال يبدأ صاح من جنوب افريقيا …ونفتتح مرحلة المجموعات بثلاث نقاط.
اسألوني من الكلام د اتاني.
في السفر بتعرف حاجات كتيرة.
بتتعلم وتشوف.
وبتنقل الصورة.
الموضوع فيه مجازفة يمكن نخش في مواجهة مع (اميكرون).
ربنا يحفظ الجميع ويغطي على بعثة الهلال التى سوف تخوض ثلاث تجارب في جنوب افريقيا.
فريق صن دوانز يمكن ان يراقب الهلال من خلال الوديات التى سوف يلعبها الهلال هناك.
ويمكن يشوف مستوى الفريق وصل وين؟
لهذا يجب من البعثة والجهاز الفني للهلال ان يعملوا حسابهم ..وان يضللوا صن دوانز وما يكشفوا اوراقهم.
طبعا في ناس بقولوا ليك أي حاجة بقت مكشوفة..واي فريق اصبح بيلعب على المكشوف.
لكن برضو بنقول في سلاح (المباغتة) وهو سلاح له اثره ..وعندو مفعوله.
المهم يا ناس ..بنتصرف ان شاءالله.
ونشوف الحاصل شنو؟
معسكر لمدة اسبوعين في جنوب افريقيا قبل مباراة صن دوانز سوف يكسر من لاعبي الهلال الرهبة. وسوف يجعلهم يخوضوا المباراة بثقة.
أي لاعب بكون بعد هذا المعسكر عندو احساس بالانتصار ..واي واحد بقول لازم نغلب.
المعسكر ما بروح ساكت.
نحن على سفر.
انتوا قلوبكم سوف تكون مع الهلال في جنوب افريقيا …ونحن عيونا سوف تكون في ام درمان مع الجوهرة الزرقاء.
ومع (المدنية).
ربنا ينصركم ..هنا وهناك.
ان شاءالله نرجع ونلقى الجماعة في (كوبر).
والبلد آمنة ومستقرة.
…..
متاريس
اها طالع على المطار.
كرت الحمى الصفراء وين؟
الله.
ما سألتوني من فحص الكورونا.
انا لي اسبوع بفحص والنتيجة تطلع سلبية والسفر يتأجل.
قلت ليكم احسن تسافر فجأة كدا.

ترس اخير : الله يسهل بس.

قد يعجبك أيضا
اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد