صحيفة كورة سودانية الإلكترونية

امتحان جديد للجنة الإستئنافات

1٬187
وكفى
إسماعيل حسن
امتحان جديد للجنة الإستئنافات
▪️تدخل لجنة الاستئنافات امتحانا جديدا حين تنظر في اجتماعها اليوم؛ الإستئناف المقدم من نادي حي الوادي نيالا ضد قرار اللجنة المنظمة بشأن مباراته ضد الهلال في الدورة الأولى..
▪️قبل انطلاقة تلك المباراة منعت جماهير الهلال عربة البث التلفزيوني من دخول حظيرة إستاد الهلال، لتلعب المباراة بدون بث..
▪️وحسب لائحة المنافسة؛ النادي الذي يتسبب منسوبوه بأي شكل من الأشكال، في حرمان القناة الناقلة من بث المباراة، يعتبر مهزوماً صفر/2..
▪️أمس راج في بعض الأسافير خبر يؤكد أن لجنة الاستئنافات اجتمعت وقررت إعادة المباراة..
▪️ولأن اللجنة لم تجتمع أصلاً… وأن الاجتماع محدد له نهار اليوم؛ أخشى أن يكون القصد من وراء هذا الترويج، جس النبض.. وتشكيل أرضية للقرار الذي يصدر اليوم… بمعنى أن اللجنة أو بعض أعضائها يبيتون النية لتوجيه القرار نحو إعادة المباراة.. وبهذا الترويج يهيؤون الشارع المريخي لتقبله، رغم مخالفته لنص اللائحة الذي يستوجب اعتبار الهلال مهزوماً..
▪️عموماً بعد تجربة كاس الأخيرة، لا نظن لجنة الاستئنافات تقبل على نفسها أن تقع في خطأ جديد، يرغم المريخ على تصعيد القضية..
▪️بحوزتي تفاصيل دقيقة لكواليس الشكوى.. وما ورد في تقرير مراقب المباراة عن عربة البث.. والاتصال الذي تلقاه من ممثل القناة الناقلة..
▪️وبإذن الله بعد إعلان قرار لجنة الاستئنافات اليوم، أذكرها بالتفصيل..
2
▪️أتفق تمام الاتفاق مع الزميلين الكبيرين مزمل أبو القاسم وجعفر سليمان، على أن اللجنة الثلاثية المكلفة من الاتحاد العام بالجلوس مع أهل المريخ للوصول إلى قائمة وفاقية ترضي كل الأطراف، يجب أن تضع في حساباتها أن القائمة التي طرحتها اللجنة الخماسية، هي القائمة التي رحب بها معظم أهل المريخ، وبالتالي هي التي يجب اعتمادها..
▪️محاولة الحذف أو الإضافة بحجة الوفاق، قد تفتح الباب لخلافات جديدة، تعيدنا إلى المربع صفر.. ونحن ما ناقصين..
▪️لو رجعنا إلى الانتخابات الأخيرة، فإن مجلس سوداكال دخلها بقائمة يحسب أنها وفاقية…
▪️فيها من التحالف شخصيات.. ومن مجموعة سوداكال شخصيات.. ومن المحايدين شخصيات، فماذا كانت النتيجة غير أن كل مجموعة ظلت تلعب صالح ورقها.. وتحاول فرض رؤيتها.. ليفتقد المجلس الانسجام المطلوب، ويتحزب أعضاؤه، وتتضارب قراراته.. وتتوالى الاستقالات تلو الاستقالات.. ويفشل في إدارة نادينا كما ينبغي..
▪️القائمة المرشحة للجنة التطبيع من قبل اللجنة الخماسية، ما فيها الكلام ده…
▪️فهي تضم شخصيات محايدة.. ومتوافقة مع نفسها.. ومقبولة من أهل المريخ.. وبالتالي هي الأقرب لأن تعمل بانسجام، وتكمل مهامها المحددة على أحسن ما يكون..
▪️بإختصار إخوتي في اللجنة الثلاثية…. القائمة المرشحة من اللجنة الخماسية هي القائمة الأنسب للجنة التطبيع، فاكسبوا زمنكم.. ووفروا زمننا.. وعجلوا بإعلانها اليوم قبل الغد، حتى تبدأ أعمالها مبكراً..
3
▪️عقب مباراة المريخ الأخيرة أمام حي الوادي.. كانت لي أحاديث وأحاديث مع بعض الفرسان، بدأتها في المدرجات مع التش قبل انطلاقة المباراة، ومع أمير الحسن وصلاح تايجر ورمضان عجب بعد نهاية المباراة داخل الملعب.. ودارت كلها حول مباراة القمة..
▪️التش لم يصرف عربي كتير… قلت ليهو إن شاء الله جاهزين.. قال لي مويه ونور..
▪️أمير الحسن قال لي بالحرف: اطمئن يا أستاذ الكورة دي كورتنا نحن ما كورتكم إنتوا.. وبإذن الله نكسبها.. طمن الجماهير تخت في بطنها بطيخة صيفي..!!
▪️صلاح نمر وعدني خيراً…
▪️رمضان قلت ليهو دايرين قونين زي قونين الليلة في كورة القمة الجايه… فضحك وأشار بعلامة النصر…..
▪️طبعا رمضان صاحب الهدفين اللذين حسمنا بهما مباراة القمة الأخيرة في الدورة الأولى..
▪️لله دركم فرسان المريخ..
▪️يمين الله ثقتنا فيكم لا تحدها حدود..
▪️وبإذن الله الواحد الأحد، يكون النصر حليفكم.. وكأس البطولة من نصيبكم..
▪️ختوا الرحمن في قلوبكم.. وصلوا ركعتين لله قبل المباراة، فما النصر في النهاية إلا من عنده تعالى..
*سطور خاصة*
▪️أكتب هذا المقال من سرير المرض بعد أن تجددت التهابات الأذنين المزمنة بشكل مؤلم.. حاد.. فظيع..
▪️وأرجو دعواتكم الصادقة بأن يمن الله علي بنعمة الشفاء..
▪️وكفى.
قد يعجبك أيضا
6 تعليقات
  1. Hajjam يقول

    اولا ندعو الله لك بعاجل الشفاء شفاء لايغادر سقما.
    ندخل في الموضوع.
    لقد ادمنتم اكل الفطايس وكاسات المكاتب. عاوزين النقاط تجيكم باللفة من حي الوادي؟؟. انتو قبل كدة لمن معطتوا اسلاك التلفزيون اعادوا ليكم المباراة ولا اعتبروهم مهزومين؟؟بقي عليكم ادمان من جهتين. مخدر اليخماو وكاسات الفطايس. الظاهر الليلة كبير الكهنة صرف ليكم اوامر للضغط علي لجنة الاستئنافات. ربنا يشفيكم من الادمان المزدوج.

  2. صلاح يقول

    الخوف والرعب الركبوكم يمرقهن الله بس، وبكدة يا ناس أبو المستعار المندلاوي مفروض يكون المخدر مرق من راسكم وعرفتوا منو المبطبط وبروج لتأجيل المباراة؟
    بعدين يا عمك سمعة وين الكلام ده لمن كان أمين خزينتكم متوكل ماعط الأسلاك بمعط السلك من عربة التلفزة ويكشهم برة الحفرة، ووين كان الكلام ده لمن كانوا بطردوا ليكم الشرطة بجلالة قدرها من الحفرة؟ إنتوا عاوزين برضو البطولة دي تشيلوها ملح، ولا حا يكون ده برنامج كل موسم؟
    عموما تباشير إنتصار الهلال المؤزر بإذن الله بدأت تلوح في الأفق، والرعب الدخلكم ده وبحثكم عن الفوز على الهلال من خلال المكاتب وبواسطة شكوي من فريق آخر دليل على كلامنا ده، والشغلانة دي ما غريبة عليكم لأنو كتر خير صاج اللقيمات زمان ماقصر معاكم وياما شبعكم بطولات مكاتب بواسطة أكل عرق الفرق الأخري المسكينة، بس مع الهلال أبزر سيد البلد وسيد الكل الأمر بختلف وتلقوها عند الغافل، تعالوا أستاد الخرطوم وشيلوا الحبتين وأبقوا مارقين، وبعد داك إستنوا شكوي كاهنكم الأعظم أليخماو !!
    أها الزول العزمك شية ضان مع العجب ومحمد الرشيد ما قال حاجة ولا كشكر إن شاء الله؟ 😆😆

  3. Hajjam يقول

    والله ياابوصلاح الكاهن اليخماو واتباعه حيرونا. الناس ديل ما بيشبعوا من اكل الحرام والفطايس وكاسات المكاتب. هسه دايرين النقاط تجيهم باللفة عن طريق حي الوادي زي ماجاتهم باللفة السنة الفاتت من مريخ الفاشر عن طريق طبخة جنية والمرة دي عن طريق طبخة المريخابي اسامة عطا المنان راعي حي الوادي. وبعدين زي ماقلت نسوا المعط العملوا متوكل لاسلاك التلفزيون وهسه عاوزين نقاط بحجة ان جمهور الهلال منع القناة من الدخول ونسوا ان المباراة بدون جمهور ولا استبعد ان يكونوا سلطوا بلطجيتهم لمنع التلفزة حتي تاتيهم النقاط غنيمة باردة اصلهم بتاعين مؤمرات ولعبات خارج الميدان. وفعلا الاختشوا ماتوا وشبعوا موت. بعدين ياابو صلاح قلنا ليك موضوع الشية ده تاني ماتجيب سيرتو. تاجر سوق ليبيا ده شعرا ماعنده ليهو رقبة والبركة في شية قندهار🤣🤣🤣

  4. ابو عمار يقول

    يا عمك سمعه بطل الرجفه و الكبكبه وباين عليكم اتعودتو علي اكل الجيفه الله يتوب عليكم بعدين لو انتو جاهزين مويه ونور زي ما فال ليك ولدنا التش مالك خايف وتتراجف وتفتش للمكاتب بصراحه سيد البلد.بيخوف ههههههه

  5. Mohamed يقول

    ليه َما تكون المنعت التلفزة جماهير المريخ هي صاحبة المصلحة ومتعودة .. تخصم النقاط من المريخ دا القرار العادل

  6. صلاح يقول

    يا هجام أسامة عطا المنان لسه ما قادر ينسي الزردة الزرده ليهو خالد عز الدين مع حكايات الدولارات واليوروهات بتاعة الفيفا وخلاهو يكره الحياة، ولولا سمكرة كيزان أمانة الشباب بالمؤتمر البطني كان زمانه مشرف التخشيبة ولابس دمورية، عشان كدة لازم يتحالف مع أزيال المؤتمر الوطني المنفعحية من أمثال الكاهن الأعظم أليخماو عشان ينتقم من كل ماهو هلالابي، لكن ربنا يمهل ولا يهمل، أكل مال الحرام ونهش أعراض الناس ما حكاية بتمشي ساي، وربنا حا يورينا فيهم جلائل قدرته بإذن الله عز وجل !!
    حكاية شية الضان دي للحول ما بنسيبها 😂😂😂

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد