انا ومجلس عمي علي غرزه

0
119

في السلك

بابكر سلك

*انا واخويا علي ابن عمي
*وانا وابن عمي علي الغريب
*هكذا يقول المثل القديم
*حديثا يجب ان تصبح المقولة انا والمجلس والمجلس الفات علي غرزه
*لانو غرزه الحبيب اشتكي المريخ
*والحبيب لما يشتكي المريخ بصبح عدو
*صحيح القال حقي غلب
*وغرزه قال حقي
*يبقي غلب
*لكن واحد صفر هزيمة بشرف
*وستة صفر بالطبع هزيمة كبيرة لاتشرف
*وعشان غرزة مايغلبنا ستة صفر
*حقو نتعاون جميعنا في الدفاع عن المريخ
*ايها الناس
*غرزه يطالبنا امام الفيفا بحقو كلو البالغ تلتمية الف دولار حسب العقد
*براتب شهري خمسطاشر الف دولار
*ومقدم عقد مقسط يبلغ مية وعشرين الف دولار
*تدفع خمسين الف عند توقيع العقد وخمسين اخري تلحق بها وعشرين كقسط اخير
*المعروف ان غرزه استلم الخمسين الاولي من المقدم المقسط
*واستلم خمسطاشر الف دولار مايعادل حافز شهر عند الصعود الافريقي
*برغم انه مكتوب بالعقد راتب شهرين
*لكن الرجل بعد احتجاج الوالي واعتراضه قبل بالحافز راتب شهر
*ووقع انو تسلم الحافز كاملا
*ويقيني ان الرجل استلم مبالغ اخري
*وبما ان البينة امام الفيفا مستندية
*ولغة الاثبات بالمستندات
*حقو اي زول من اعضاء المجلس الفات عندو مستند يثبت اي مبالغ علي غرزه
*حقو يسلمو للمكتب التنفيذي اليوم لاستعماله كمستند دفاع يقلل المبلغ الذي يطالب به غرزه
*وماتقولوا لي حصل تسليم وتسلم
*التقارير لاتخدم القضية امام الفيفا
*ولكن الحديث للمستندات
*وعلي المجلس ان يعطي الموضوع حقه من الاهتمام اللازم
*سيما وان مهلة الرد تخنقنا بشدة
*ولو كان المجلس يتعامل مع القصة بانها نتيجة عدم سداد المجلس القبلو
*فان ذلك لن يدفع المسؤليه عنه
*لان من واجباته القتال دفاعا عن المريخ ايا كانت اسباب المعركة
*وعلي الذين في نيتهم الرد علي الفيفا من ناس مجلسنا
*عليهم استصحاب المستند الذي دقس فيه غرزه ووقع
*وعليهم التمسك بالحق في خصم ماكسبه غرزه من مكسب من الاتحاد الليبي في الفترة التي كان يفترض ان يكون فيها مع المريخ
*عقد غرزه يمتد حتي ديسمبر
*وهو ذهب في اغسطس
*اشتغل مع اتحاد ليبيا تسعه وعشرة وحداشر واطناشر
*شهرو مع ليبيا اربعين الف دولار
*في اربعه شهور تطلع مية وستين الف دولار
*نخصمها من قيمة عقدو معانا
*تبقي تلتمية الف منها مية وستين الف الباقي مية واربعين الف
*استلم منها الخمسين الف القبيل فوق ديك دون حافز الصعود الافريقي
*الباقي تسعين الف
*اي مستند استلام بنقص مبلغ التسعين الف ده زاتو
*واذا مالقينا المستندات التسعين الف محمدانا
*وهنا تظهر اهمية المستندات
*اي زول عندو مستند بدون مايسألوهو حقو الليلة يكلف نفسو ويسلمو للمكتب التنفيذي
*ايها الناس
*خسرنا قضية مارسيال بسبب المستندات
*حقو مانخسر قضية غرزة لنفس السبب
*المهم
*ناس الجزائر قالوا كانوا قايلين الفرنسيين هم الكتلوا المليون شهيد
*لكنهم اخيرا اكتشفوا ان المريخ هو من قتل المليون شهيد
*الشهيد وفاق سطيف
*الشهيد اتحاد العاصمة
*الشهيد العلمه ابو خمسة وخمسين باص
*والآن الشهيد مولودية شايل كفنو في كتفو وماشي علي القبر
*اولادنا رفعوا راسنا
*ولم نفتقد جمال سالم الي اليوم
*بركة الجات منو
*ابو عشرين ابو كفين الشفت
*تاني جزائري الحارة السادسة مابدخلها خليهو خط ستة
*تمرق من نطحة نمر تجيك كفوف ابو عشرين
*ايوه كده
*مريخ يخوف
*لكن
*الاشانتي زاتو بخوف
*قال ليك حارسهم عادي بقزقز بي ككو علي بال مايختوا العشا
*ياخ ثيرباكم واستوبرهم قال ليك يضبحوا القرنتية ويختوا جردلهم ده
*لما مواعيد التمرين تجي يكونوا قاموا بالقرنتية والجردل
*والغريبة راس الحربه
*ابو القنفت ده عندو زي التسالي
*غايتو ياروشا الا تمرقكم الدواع الامنية
*تشردوا بس
*ايها الناس
*موضوع غرزه
*مستندات ورد
*ايها الناس
*ان تنصروا الله ينصركم
*اها
*نجي لي شمارات والي الخرتوم
*لو بي تمن التاتشرات
*جبنا تركترات
*ماكان قامت مظاهرات
*ولو وفرنا وظيفات
*ماكان احتجنا نوفر تاتشرات
*ولو منعنا السرقة وحاربنا الفساد
*ماكان احتجنا تاتشرات
سلك كهربا
ننساك كيف والكلب قال لو اعترفنا بالاولاد والبنات ماكان بنسكهم بالتاتشرات..دي حقوق عباد
والي لقاء
سلك

المشاركة

أكتب رد

أدخل تعليقك من فضلك!
أدخل إسمك هنا من فضلك