صحيفة كورة سودانية الإلكترونية

بالنهار جا شايل طبنجة وبالليل مشى نام على المخدة !!

1٬248

قزاز ورذاذ
محمد الطيب الأمين
بالنهار جا شايل طبنجة وبالليل مشى نام على المخدة !!

* طبعاً ما صعب إني أخش في دور الزول الوطني.
* وأعمل فيها ناصح و(مرشد رياضي) وكده.
* و(أنافق) وأقول البيحصل في المريخ ده ما عاجبني.
* ممكن من باب (النفاق الإعلامي) أقول إن ما يحدث في المريخ لا يعجبني.
* لكن لا.
* والله عاجبني جداً.
* ومبسوط كمان.
* لا بغشك ولا تغشني.
* أنا من يوم المريخ أستقبل مازيمبي في المطار ، علماً بأن مازيمبي جاء لمواجهة الهلال ، من اليوم داك قررت أكون واضح في أي حاجة بتخص المريخ.
* من يوم المريخ جاب الفواكه لبعثة الأهلي المصري ، علماً بأن الأهلي جاء لمواجهة الهلال.
* جابوا للأهلي موز وبرتقال واناناس.
* والزعلني أكتر الأناناس ده.
* أناناس نحن أولاد البلد ما أكلنا هم جابوا للأهلي.
* من يوم مزمل أبو القاسم قطع تذكرة وسافر (الكاف) عشان يعرقل مشوار الهلال الخارجي ويرفع شكوى (ضدنا) انابة عن الخصوم.
* من اليوم داك قررت ما تكون عندي وطنية في الرياضة.
* الوطنية عندي هي (القوات المسلحة والمنتخب الوطني).
* المريخ ده بالنسبة لينا زي (الأمن الشعبي).
* عشان ما تجي تشبكني وطنية وإعلام ورسالة الإعلام.
* قوم على حيلك.
* البحصل في المريخ ده أنا بيهمني فيهو حاجة واحدة بس.
* الحكومة ما تتدخل نهائياً.
* لا مدنيين ولا عساكر ما في زول يدخل.
* دي سفاسف أمور والبلد فيها الأهم من المريخ.
* أي زول داير يلفت نظر يعمل لينا فيها مُخرب.
* في الشرق (ترك) يهدد بقطع الطريق القومي.
* وفي أم درمان المريخ داير يعمل شغب.
* ما دايرين أي تدخل حكومي في قضية المريخ.
* خلوهم كده .. بعد يزهجوا بمشوا.
* وهم اصلاً شوية.
* الجاكومي قصد يعمل (بلبلة) عشان يلفت الأنظار ويعمل الموضوع (رأي عام).
* وما بعيد يكون بخدم في أجندة تانية.
* حازم (كوز) و رئاسته للمريخ عودة للمؤتمر الوطني عبر بوابة الرياضة.
* وخيانة لدم الشهداء.
* الجاكومي بعد الثورة حاول (يجعجع) مع السياسين لكن ما قدر.
* قال أحسن يعمل ليهو وجود بالمريخ.
* وللأسف الجاكومي لسه هو بالجهل القديم.
* فاكر الموضوع عنتريات ورجاله وطبنجة .
* داير الحكومة تشيل ليهو سوداكال (كسر رقبة).
* عملوا مظاهرات واقتحموا الاستاد والنادي.
* قال ليك جماهير المريخ تحرر النادي وتستلم المقرات.
* البيسمع (تستلم) يقول الملعب فيهو حاجة.
* مش ياها النجيلة المحروقة دي ولا حاجة تانية؟
* والنادي فيهو شنو؟
* أي ورقة بتخص المريخ موجودة في (خزنة سوداكال).
* والخزنة أطول من يوم الحزن.
* خزنة (4 في 4).
* قدر الغرفة.
* كل عقودات اللاعبين بطرف سوداكال.
* كل حاجة بتخص المريخ بطرف سوداكال وهي خارج أسوار النادي .
* يعني النادي الاستلمتو ده إلا تلعبوا فيهو (ليدو) .
* وأنا والله شخصياً داير سوداكال يشتغل معارضة .
* سوداكال في المعارضة عندو مهارات عالية.
* نجاح سوداكال في المعارضة مضمون جداً .
* عادي ممكن ينزلكم دوري الثانية .
* يعني يا مولانا (شيخ سوداكال) في الحالتين ما بريحك.
* في المجلس ما بريحك وفي المعارضة ما بريحك.
* والمريخ ما حق زول.
* الجماعة بالنهار دخلوا الاستاد وشايلين طبنجات.
* وأول ما الواطة (مغربت) رجعوا بيتهم.
* مشوا ناموا.
* هو في ثوار برجعوا البيوت؟
* الساعة عشرة سوداكال استعاد الإستاد.
* الإستاد بالنهار مع الجاكومي وبالليل مع سوداكال.
* زي الوردية.
* بتصارعو ليهم في نجيلة هي في الحقيقة عبارة عن (قش خلاء).
* والله صحي.
* رسالتنا للحكومة تركز جهدها مع عصابات تسعة طويلة وضبط الأسواق وغيرها من مهددات الوطن.
* شوفوا البيحصل في (حي العزبة) وأطراف العاصمة وبقية الولايات.
* ما عندكم شغلة في البيحصل في المريخ ده.
* شوفوا لينا مشاكل الوطن.
* ورسالتنا لسوداكال بنقول ليهو : المريخ ما حق زول وأنت عندك فيهو حق زي جمال الوالي وأبو العائلة وود الياس.
* واصل شغلك بالقانون والقوة وما تسمع الجعجعة دي.
* الجاكومي من زمن صلاح إدريس بجعجع والله ما قتل ليهو ذبابة.
* وتبكو بس .. عين قطرة وعين مس.
* و.. و..
* والقلوب الحايمة حولك يا حلو بتتمني ليك ……. (٢٥ سنة تاني).

قد يعجبك أيضا
5 تعليقات
  1. نادر بلوله الطيب يقول

    انت ما بتخجل ؟ وهل انت قدر الكلام البتقول فيهو؟ لهذه الدرجة انت حاقد على المريخ علنا؟ لقد أعلنتها حربا على نفسك وانتظر ولا أظن اهل المريخ يبلعوا كلام وفتنة واضحة من واحد مثلك. سبحان الله معقولة في ناس بهذا الحقد والبجاحة الغريبة دي؟

  2. محمد الوسيلة محمد يقول

    أمثال هؤلاء يوزعون الجهل على الملأ وينشرون التعصب

  3. جلابي الدوحة - قطر يقول

    يا روميو زمانك بمناسبة دم الشهداء انت كتبت شنو عن دمهم ولا وقفتك كانت شنو انت وكثيرين من السخفين ادسيتو اثناء موت الشهداء ولما تاكدتو من انه الامور انتهت ظهرتو ..وطنية شنو وكلام فارغ شنو انت خليك بس في بت الجيران وكيف تقلعها من صاحبك لكن وطنيه وبطيخ خليك بعيد عنه ثم اصلا انحن ما معتبرنك صحفي بنقضي بيك وقت بس لانك مضحكة الصحافه انت وكثيرين من المنتفعين اصحاب الاقلام الماجورة …المريخ مهما كان بي حقو انت حقك شنو بس طولة لسان وفصاحه وحب وطحنيه
    شوف ليك شغله ياخ تربحك بدل الساخر البتكتب فيها دي
    افتح كشك جراي ..ياخ افتح كشك تلج اصلا انت خبرة في كسير التلج ..ياخ شد قدرة فول برضه مربح … اقول ليك بكلم ليك حازم تعال اشتغل حارس امن في استاد المريخ اهو اكل عيش … بس انت انوي وشغلك مضمون .. وتاني ما بنجيب سيرة بت الجيران
    قال وطنية قال

  4. جمال الدين عمر الخليفة يقول

    والله اثبت انك زنطوري بالجد اذا كان عذا مستوي فهمك فعلي الصحافة السلام

  5. ابونصر يقول

    ده مستوي صحفافه رياضي . أتق الله في عملك . لك الله يا وطني

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد