صحيفة كورة سودانية الإلكترونية

بقي فوق مع ناس الشعيرية !!

38

بالعربي الكسيح

محمد الطيب الأمين

بقي فوق مع ناس الشعيرية !!

مثل (شاي اللبتون) طلب الرجل من زجته أن تربط (البصلة) بخيط رفيع ثم تضعها في الحلة لفترة زمنية لا تتجاوز الدقيقة ثم تخرجها وتحتفظ بها في التلاجة
شاي اللبتون مع الموية الحارة (بيحل) في أقل من دقيقة ويمكن تحتفظ به بعد ذلك
والبصل الذي هو دون البصائر أصبح أغلي من التفاح الذي هو أصلا معدوم
البصل شدة ما بقي عزيز أصبح يوجد في (رف الدكان)
مثله ومثل الساردين والمربي وباقي الطيبات
زمان البصل تلقاهو مفروش في الأرض (مع ناس) الطماطم والتبش والشطة الخضراء
وهسة البصل بقي من أصحاب المقام الرفيع فتجده أعلي الرفوف (مع ناس )صابون لوكس والشعيرية
قريبا جدا سيصبح البصل بالجرام والسكر بالحبة والزيت بالنقطة
وحكمة الله النسوان في البيت لما يقطعن البصل ببكن بدموهن والرجال في السوق لما يشتروا البصل برضو ببكوا
البصل لما تشتري بتبكي من غلاتو ولما تقطعو بتبكي من حرارتو
في الحالتين البصل يستدعي دموعنا
ولا أعرف لماذا اتذكرت البصل وأنا أكتب عن الوصيف
ربما العلاقة تبدو في أن الوصيف بكي في يوغندا وسيبكي في الجزائر
في الحالتين الوصيف باكي
كلما أحس برهج وضيق تجدني أبحث عن فيديو ملخص مباراة الوصيف والوحدات الأردني
هذا الفيديو يحقق لي كثيرا من السعادة والتوازن
نفسيا كده برتاح
أصلا في( سبع .) حاجات بتريحنا نفسيا(خمس) هي:
مباراة الوحدات الأردني والمرتبات والرغيف المافيهو صف
الواحد فينا بقي لما يلقي فرن مافيهو صف بتلفت براهو
والله صحي
بتحس إنو ما حلال
الصف أهم من الرغيف
المهم
الأجواء في الجزائر باردة جدا
البرد تاريخيا ما بنفع مع الوصيف
الوصيف في الجزائر سيواجه البرد كخصم أول
وأي برد يعني خسارة الوصيف برقم كبير
الوصيف في الشتاء ما بلعب
ولذلك ننصح أخونا أيمن عدار بأن يجهز شكوي مضمونها (البرد)
بس أهم حاجة الشكوي تكون صحيحة
صحيحة وواضحة
وأنا عندي ليكم إقتراح زمان في المدرسة لما يكون في (تسميع) بندبل الملابس
خوفا من (الدق)
بنلبس ملابس كتيرة وبنسميها (كركاسة) عشان تخفف الم السوط

وبما أن ذلك كذلك نقترح للأخوة في نادي الوصيف الشهير ب (المدفور) أن يدبلو (الملابس)
ألبسو شعاركم ا(لأصيفر ) داك وألبسو بفوق عليهو شعاركم الليموني وبي فوق عليهو ألبسو شعاركم الأحمر
الفيهو صورة شيخ زايد
أصلا الشعار الفيهو صورة شيخ زايد ده كرهتونا ليهو
أنتو قايلين يعني لو لبستو صورة زايد دي كتير ح يدوكم قروش ولاشنو
حركات كسير التلج دي ما بتنفع
ما خلاص لبستو الشعار ده في كأس السوبر وأدوكم (١٠٠)ألف دولار والموضوع إنتهي
تاني شنو
ما تبقوا للأماراتيين في حلقهم لحدي هنا والموضوع إنتهي
لبستوا الشعار وقبضتو الدولار مع إنكم ماشلتو الكأس
طلعوا شعاركم (الأصيفر) داك وأطبعوا فيهو صورة جمال الوالي وأبقو مارقين
وبعد تطيروا من البطولة العربية راجيكم الدوري الممتاز وأنا عندي إحساس كبير إنو الوصيف السنة دي ما بتأهل لدوري النخبة
حدكم دوري المجموعتين بس
عندي إحساس كده
وأي زول حر طبعا في (محاسيسو)
وغايتو السنة دي بالذات يا متنا من الضحك ويا كمان الضحك كلتنا
بال رايق ومرتاحين غلبنا رايح جاي واليوم نغلب هلال كادقلي ونمشي تونس بإذن الله غالبين ونجي الجوهرة
وبحول الله غالبين
وكان أنتو اتاهلتو لدوري النخبة وما طرتوا من دوري بنتقابل وبرضو غالبين
وحقيقة عندي طلب صغير
بطلب من الأخ محمد جعفر قريش أن يتمسك بحقه الشرعي ويواصل في المجلس
قريش أقوي من الحملان الإعلامية
جا بالصندوق ويجب أن يكمل فترته. قروبات نبض الأسياد
أصلا كده كده الوصيف قاعد يطير من التمهيدي
وغايتو الله يكفينا شر . (المصدي) اللمعتو الأيام
ونركب صافنات ونجيبة (جزائرية) واصلوا بيموت والذكري تفضل حية
والجاب لي أخبارو وقال (شلباية أخد الجنسية الجزائرية )

قد يعجبك أيضا
اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد