صحيفة كورة سودانية الإلكترونية

تركي آل الشيخ جا (يكوي) عندنا قمنا قطعنا الكهربا !!

1٬129

قزاز ورزاز

محمد الطيب الأمين

تركي آل الشيخ جا (يكوي) عندنا قمنا قطعنا الكهربا !!

 

* تجدني في حالة استغراب شديد وأنا أتابع ردة فعل بعض جماهير الهلال فيما يتعلق بخطوة التعاقد مع المدرب العالمي ريكاردو.
* استغرب لاحاديث تقول أن الهلال يدار بالوكالة.
* طيب طالما الوكالة بتجيب زي ريكاردو وين المشكلة؟
* دي أجمل وكالة والله.
* نحن بنحب الوكالة.
* وكالة بتنقذك من حمادة صدقي وتجيب ليك العالمي ريكاردو .. دي وكالة محترمة.
* الجماعة دايرين يربطوا الموضوع بالسياسة.
* قالوا الهلال بقى زي الحكومة الإنتقالية يتلقى تعليماته من الخارج.
* وده علاقتو شنو بالهلال؟
* تركي آل الشيخ هو رئيس الهلال الفخري.
* رئيس فخري في (العلن) ما في (السر).
* يعني بقى مننا وفينا.
* يرشح لاعبين.
* ويتعاقد مع مدربين.
* ويقول وجهة نظرو.
* مش كلو في مصلحة الهلال؟
* زول جايب ليك مدرب عالمي هدية تقعد تقول وكالة وما وكالة.
* على بالقسم لو ما تركي آل الشيخ المدرب ده في نشرة الأخبار ما يشوف السودان.
* ما تتكلم ساي.
* دي نقلة حقيقة وسمعة كبيرة تخدم الوطن قبل الهلال.
* بدل ما تحمد الله وتشكر المستشار تجي تقول وكالة !
* لو بنلقي وكالة زي وكالة سعادة المستشار فنحن من أنصار أن تدار البلد كلها بالوكالة.
* والله صحي.
* بكرة لو تركي آل الشيخ جاب لينا كريم بنزيمة نقول لا ونرفض عشان معناها هو كده تتدخل؟
* ياخ زول بساعد فيك.
* زول بجيب ليك في السمح.
* ثم ثانياً.. مش هو رئيسنا الفخري؟
* طوالي يجيب الدايرو طالما فيهو مصلحة للهلال.
* ما تبقى زول جاحد ومفتري.
* كونو الأهلي المصري أختلف مع المستشار أو المستشار أختلف مع الأهلي ده ما بيعني إنو جماهير الهلال تتعامل معاهو بهذه الخلفية.
* لحدي الآن ما شفنا منو إلا كل خير.
* بعد تأهل الهلال علي حساب الأشانتي دفع سعادة المستشار مبلغ ٢١ مليار جنيه سوداني حافز للاعبين.
* مالك ما قلت الهلال يدار بالوكالة؟
* الافتراء ما حبابو.
* والافتراء ذاتو على شنو؟
* انت شايف إنو في مبرر بخليك تفتري على زول جاي يساعدك؟
* في سبب؟
* ٩٠ سنة شغال بدون وكالة الجديد شنو؟
* ياخ أفريقيا كلها حاسدة الهلال على تركي آل الشيخ تقوم انت داير تطمم للراجل بطنو؟
* التنظير بضيع الهلال.
* كل الشكر والله لسعادة المستشار تركي آل الشيخ والشكر أيضاً للسوباط رئيس النادي ولكل أعضاء مجلسه.
* نأمل أن تكتمل الخطوات ويصل المدرب بعقد طويل ويقدم ما لم يقدمه مدرب من قبل.
* نحن دايرين شنو غير إنو نشوف هلال يملأ العين؟
* وكالة ولا سفارة بيهمنا هلال عالمي.
* ونتمنى أن يوفق الهلال في مباراته اليوم بالجزائر.
* مباراة لن تكون سهلة.
* يحتاج الهلال لنقاط هذه المباراة حتى يدعم حظوظه بشكل أكبر في طريق الترشح.
* يجب أن لا ننظر لخسارة الجزائري بالخمسة في مباراته الأخيرة.
* لكل مباراة ظروفها.
* علينا أن نفرض ظروف فنية تجعل الجزائري يخسر بالخمسة أمامنا أيضا.
* اللاعبون مطالبون بالجدية والانضباط.
* نريد أن نرى هلال مختلف عن الهلال الذي لعب أمام مازيمبي.
* استثمار الفرص والتركيز أمام المرمى.
* الحسم والقوة في التعامل مع هجمات الخصم.
* بإذن الله يحقق الهلال المطلوب.
* و.. و..
* والله في.

قد يعجبك أيضا
8 تعليقات
  1. علي الطاهر يقول

    الاخ محمد
    نعم مرحب بدعم ابو ناصر جزاه الله خير الجزاء ونشكره على ذلك المدرب مافيهو شق ولا طق ولكن هل هذا ضمان لنجاحه لا عوامل النجاح كثيرة اهمها تاقلم المدرب مع جو السودان اولا في ظل الظروف الحالية السودان يعتبر من أسوأ دول العالم في كل مناحي الحياة والبني التحتية فكيف سيعيش هذا المدرب بيننا كهربا قاطعة بعوضة ملاريا جو يعني باختصار مدرب لم يعش ولم يدرب في افريقيا القارة العجوز المريض
    وكمان جايب معاهو اخصائي تغذية وما عارف انو لاعبينا عايشين علي البوش والفول والعدس والكسرة والقراصة والعصيدة و هلم حرا
    اخشى أن يصطدم المدرب بواقعنا الاليم ويقول يافكيك
    الله يكذب الشينة ونتمنى له التأقلم السريع مع واقعنا المرير الغير مشرف ونتمنى له التوفيق
    نحب ونعشق الهلال ولكن واقع الحال يغني عن السؤال

  2. علي الطاهر يقول

    اذا تاقلم المدرب وكل شيء على مايرام هل سيصبر جمهور الهلال واعلامه على اي اخفاق لا قدر الله وهنا مربط الفرس
    اعتقد ان الهلال لو كان في مستوى برشلونة ومعه المدرب وحدث له ماحدث لبرشلونة أمام بايرن ميونيخ ٨ لا شيءٍ ناهيك عن هذه لو انهزم الهلال امام نده ١ لا شي ستقوم الدنيا ولن تعد حتى يطير كيس المدرب مع اكياس القمامة الطائرة في سماء اوسخ مدينة في العالم
    للاسف نحن غير مؤهلين لاستقبال حتى باتريك كارتيرون كلنا مدربين وصحفيين وناقدين وليس مشجعين قد يكون دافع المدرب خوض تجربة وتحدي في القارة الافريقية ليضيفها الى سيرته الزاتية ولكن سنعينه عليها ونصبر عليه في كل الظروف؟
    هاهي لجنة التطبيع تنحني لاول عاصفة جماهيرية اعلامية ضد زوران كما كان يفعل سي الذكر الكاردينال
    نتمنى ان يصبر الاعلام اولا لانه محرك الجماهير ومن بعده الجماهير شخصياً لو انهزم الهلال امام المريخ هزيمة برشلونة امام البايرن تحت قيادة هذا المدرب ساصبر

  3. علي الطاهر يقول

    شخصياً لا يهمني حتى لو تراس ابو ناصر رئاسة مجلس ادارة نادي الهلال طالما سيظل الاسم الهلال السوداني وليس هلال ابو ناصر طالما ان الهلال يمضي نحو العالمية واي انجاز سيسجل باسم النادي والبلد وليس اشخاص لانه لو كان كذلك لسني بنادي الطيب عبد الله طيب الله ثراه ولكن مازال الهلالاب يذكرونه بصالح الدعوات ومراسيم تابينه تقام كل عام
    الاشخاص زائلون ويبقى الكيان

  4. الباقر احمد يقول

    العربي المسيخ ماذا تقول عن قرار لجنة التمييع في الإنفاق مع حمادة صدقي الذي ترك داره واهله وبلده وجاء بناء على كلمة ادارة الهلال وانت بجرة قلم داير تمسح كرامة التمييع؟ دا اصلا اذا وجدت كرامة هههه كرامة شنو وابوعشرين والغربال سجلوهم عن طريق الكباري وعجب والرشيد وبخيت تم تعطيلهم تماما وتيري تم تحريضه وبعد دا مش صبي دورينو لو جبتو ميسي والدون او حتى مارادونا قام بعاتي لن ينصلح حالكم صدقني النتيجة حاتكون أسوأ ان شاء الله. لا يغير الله ما بقوم حتى يغيروا ما بأنفسهم. واسمع كلامي وافهم كويس وانتظر قادم المواعيد تعرف حاجة.

  5. حمزة فضل يقول

    استاذ/ محمد لك التحية وعاوز اقول لك في ناس لا يعجبهم العجب ولا الصيام في رجب ذي ما بيقول المثل ونحن كهلالاب عاوزين الهلال يمشي لي قدام ويكون علي احسن ما يكون لكن التنظير بتاع الخندقاوي وغيروا لايفيد الهلال بشئ ومن الان نحن ضد الخندقاوي والكوارتي وكل الناس البتتكلم كلام فارغ لا يودي ولا يجيب نحن عاوزين هلال يهز الارض وخلونا نكون واقعين لو جاء الكوارتي او الخندقاوي سوف يظل الهلال يلف ويدور في فلك المحلية لانهم ناس بيتكلموا وينظروا وكالة وما وكالة بالله انت لقيت لك حد يصرف علي الفريق في الوقت العصيب ده تقعد تنظر وتقول وكالة وما وكالة كفاية نفخ في الفاضي والله نحن راضين بالسوباط مادام وراءه ابو ناصر نرفض الشعارات الفارغة التي لا تودي ولا تجيب اللهم انصر الهلال دائما يا رب

    1. ابو ريم يقول

      اخي حمزة فضل
      ناس عاوزة تكبر كومها عشان الانتخابات وتعمل على وتر الكيان وووو………
      ما قدمه السوباط للهلال لن قدمه لا الخندقاوي ولا الكوارتي
      ولو كان اي منهم على رئاسة النادي فلن يجد اي غضاضة بل لسعى للحصول على دعم المستشار. للاسف ما منع الهلال للوصول الى منصات التتويج هي المصالح الخاصة وليس مصلحة الهلال.
      ثم هل المستشار في حوجة للشهر التي تتم عن طريق الهلال، لنكن وقعيين، الرجل عمل كل ذلك حبا في السودانيين اولا ثم الهلال ثانيا…
      كثير من المعارضين تحركهم اجندتهم الخفية، فمنهم من يخاف ان ينال السوباط تاييد ومباركة جماهير الهلال والفوز برئاسة الهلال ومنهم من يحسدون الهلال على دعم الرجل.
      اما من ناحية تاقلم المدرب مع اجواء السودان تلك هي المعضلة التي على جماهير الهلال ان تساعد على حلها.
      الاهلي المصري باني مجده هو البرتغالي مانويل جوزيه، لو ارتفع جمهور الهلال وتجمل بالصبر على المدرب وافكار المستشار تركي الى الشيخ، فان الهلال سينتقل الى العالمية في 5 سنوات،
      ولكن من يصبر …….. ذلك هو السؤال

  6. نجومي يقول

    شكرا شكرا ابو ناصر (تركي آل الشيخ) وفي ميزان حسناتك

  7. نجومي يقول

    شكرا شكرا 0000 رئيسنا الفخري
    شكرا تركي 0000 آل الشيخ

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد