في الصمت كلام
محمد عثمان بلل
طايرين تحننوا .. ومغلوبين تجننوا !!
• دا حال الوصيف عامل كدا.
• اتغلبوا وطاروا من تمهيدي البطولة الافريقية حالتهم كانت (تحنن) الكافر.
• رجعوا البلد دي لا حس ولا خبر.
• ركشة ساكت عشان تستقبلهم في المطار ما جاتهم.
• سافروا الجزائر على الوضع (الصامت).
• التصريحات بعد مباراة الرباعية الاولى اختفت.
• (نحن ونحن ونحن .. وهناك في الجزائر ح نعمل ووووووووووووووو).
• وقبل مباراة امس الجماعة مشوا ناموا من بدري.
• كانوا متوقعين النتيجة.
• ما عايزين نتكلم عن الحصل والمباراة شغالة.
• عشان الكورة كلها كانت في اتجاه واحد.
• عشان في ناس كدا (عملوا عمايل في الدنيا دي)
• أحسن أسكت.
• بس تعال شوف الجن على اصولو.
• بعد مباراة اتحاد العاصمة.
• فرح هستيري .. ومعاه دموع عديل كدا
• ياااااخ لا.
• دي حالتهم كانوا مغلوبين.
• وطايرين من الافريقي.
• الخروج ما تم اسبوع.
• دي زي الزول كان عنده بكاء وبعد يومين قلب غناء وهجيج.
• خلاص نسيتو مرارة هزيمة الاوغندي.
• و(أم فتفت) الوداع الافريقي.
• لكن نعمل شنو.
• الحرمان بعمل اكتر من كدا.
• وآخر صيحة الوصيفاب شوفو قالو شنو.
• الجوائز في البطولة العربية اكتر من الافريقية.
• والسفر لافريقيا كله مشاكل وحرب اعصاب.
• دا آخر ما اتوصلتو ليهو.
• سبحان الله.
• بالجد يا وصيفاب (طايرين تحننوا .. ومغلوبين تجننوا).
