فى اخطر حوار مع (كورة سودانية ) كولينا :  الصراعات الادارية حرمت منتخب الشباب من تحقيق اغلى حلم للسودان

0
524

نجم اهلى مروى : كورونا اجلت انتقالى للدورى الرومانى 

خاص كورة سودانية : حوار : فيصل صيام

يعتبر  ابراهيم محمد سليمان محمد والشهير   بابراهيم كولينا نجم خط وسط الاهلى مروى واحد من اللاعبين المميزين فى الممتاز السودانى ، رغم صغر سنه الا انه نجم يحمل موهبة من طينة الكبار والذين ينتظرهم مستقبل مشرق مع كرة القدم بالبلاد ، يجيد اللعب فى وظيفة المحور وصناعة اللعب ، وفوق ذلك يعرف طريق الوصول للشباك ، واستطاع ان يحرز تسعة اهداف فى النسخة الحالية من الدورى والذى لم ينتهى بعد (  كورة سودانية) اجرت حوار مطول من نجم ملوك الشمال تحدث فيه مشواره مع الاهلى مروى ، وكشف من خلاله كيف ضاع حلم منتخب الشباب قبل عدة اعوام بسبب مشاكل وصراعات ادارية وابدى اسفه للذى واعتذر للشعب السودانى ، بجانب ذلك تحدث فى العديد من المواضيع ، وفى المساحة المقبلة نبقى مع ما دار من حوار مع نجم الاهلى مروى كونوا معنا.

 (فى البداية رمضان كريم وكل سنة وانت طيب وكيف كان رمضان السنة دى معاك فى وجود كورونا ؟

الله اكرم وكل سنة والجميع بخير يا رب ،
اما برنامجى خلال هذا الشهر الكريم انا بحب التقرب الي الله جدا من اي وقت مضي والشي التاني مساعدة البيت ،  واما  بعد صلاة العشاء بخصص ساعة الي ساعة ونص لتمارين فردية.

( هل فقدت الكورة ومتشوق لعودة الدورى ولا الاجازة جميلة ؟

بالضبط كدا حاليا اهم حاجة في حياتنا المنافسات والتحديات ولكن صحتنا  والناس اهم ومن هنا أناشد جميع المواطنين بضرورة الالتزام بالضوابط الصحية التي تصدرها وزارة الصحة من اجل ان ترجع لنا حياتنا الطبيعية فى  اسرع وقت لاننا متشوقين للكرة صراحة.

(  انت ملتزم بالضوابط ومطبق شعار خليك فى البيت؟

بالتاكيد ملتزم  لان المرض لو ليك انت  فقط ممكن ما تلتزم لكن الضرر حيمتد علي مستوي الجيران والاهل وناس البيت.


( كيف وجدت الاجواء الاهلى مروى وفى الشمالية ؟

يا سلام  الأهلي فريق عندو طموح كبير جدا والشمالية انسانها راقي وطيب وكريم ومحب جدا لكرة القدم وعبركم احب اهنيئهم بما تبقي من  رمضان وعيد الفطر المبارك ،  بنهاية الموسم دا بكون اكملت موسمين هى نهاية عقدى الذى يمتد لموسمين ووجدت طوال كل هذه الافتراء الاحترام من الجميع.

(  فى الدورة الاولى من ممتاز هذا الموسم  الاهلى كان متراجعا وفى النصف التاني الفريق انتفض ما هو سبب التراجع و السر الانتفاضة ؟

اولا اكد  الأهلي عاني شديد  في الدورة الاولي وهذا شئ طبيعى ممكن يحصل لاى  فريق والحمد لله استطعنا ان  نتجاوز هذا التراجع  في المرحلة الثانية،
بجانب ذلك انا افتكر ان الاستقرار الفني والإداري وروح اللعيبة الواحدة كروح  رجل واحد وراء الانتفاضة ، اضافت الي لذلك اولترس الفريق والجمهور ظل يقف خلف  الفريق بقوة.

( فى حال ذهاب الوباء وعاد النشاط انتم فى الاهلى عندكم طموح فى التمثيل الخارجى ؟

اكيد طبعا الحياة من غير طموحات لا تنفع وان شاء الله نقدر نعبر بالفريق للتمثيل الخارجى والأمل ما زال قائم ولم نفقده حتى اللحظة .


( هنالك اراء تنادى بالغاء هذا الموسم بعد ان توقف طويلا بسبب كورونا  انتم كلاعبين مع الالغاء ام عودة النشاط؟

في كل الأجواء اذا الجائحة وقفت انا ما عندي مشكلة يستنانف الدورى لكن الان كل الامنيات بان تنتهى كورونا بسلام وبعده كل شئ ممكن.

( كولينا يلعب وسط ويحرز اهداف السر شنو فى ذلك ؟

رد(ضاحكا ) والله مافي سر  فقط اولا :  توفيق من الله ،  وثانيا:  مجهود الكل اترجم عندي بس لاعبين وجهاز فني وإدارة وجمهور ، والحمدلله احرزت تسعة اهداف .

 ( انت تلعب فى وظيفة  لاعب المحور ومرات تتحول لصانع لعب بتفضل دائما تلعب فى خانة ؟

بفضل اللعب ارتكاز لكن في شكل صانع لعب ودى منطقة الاستحواز وتمرير ( بص القون ) واللعب الطويل.

(  انت واحد من اللاعبين المرشحين للانتقال للقمة فى التسجيلات المقبلة هل تلقيت اتصالات من الهلال والمريخ ؟

والله شي رسمي حتى الان مافى بكل صراحة وشفافية لكن بسمع هذا الحديث من الأصدقاء فقط.

( فى حال وصلتك العروض بالفعل مستعد للانتقال للقمة ؟

اول شئ ممكن اعمله بستخير والخير فيما اختاره الله ، ثم ثانيا :  مافي زول ما عايز يتقدم للامام باعتبار الفريقين قمة البلد.


( انا اعرف لديك عرض احتراف من خارج السودان صحيح ؟

صحيح والله  انا بشكر الناس الذين سعوا لجلب العرض وان شاء الله ربنا يوفقنا ونقدم اللاعب السوداني بي صورة مميزة والشي الثاني الامور كانت تسير  كويس لكن  بس جائحة كورونا اوقفت اي شي وانت عارف انو العالم واقف عن اي شي.

( حدثنا عن النادى الذى القدم لك العرض والتفاصيل التى حدثت ؟

العرض كان نادى من  رومانيا فريق اسمو بترولا درجة تانية ، اما بقيت التفاصيل هى انا ارسلت لي دعوة وكشف طبي وفترة تعايش وبديت في الاجراءات بس ما سافرت كما ذكرت بسبب كورونا ، و حاليا طبعا الدعوة بتكون زمنها فات الا تترسل دعوة جديدة وان شاء الله بتكون في اخبار جميلة لي قدام  سواء لي رومانيا او مكان تاني طالما الطموح موجود.

 ( فى السابق اللاعب السودانى كان كل تفكيره الوصول لهلال مريخ الان النظرة تغيرت وهنالك رغبة فى الاحتراف الخارجى توافقنى الراي ؟

صحيح لكن حاليا اللاعب السوداني غير الافكار السالبة القديمة  بنسبة 60 %  واصبح هنالك رغبة فى الاحتراف الخارجى والامثلة كثيرة الان محمد عبدالرحمن وشيبوب و خالد النعسان وصهيب الثعلب وحسن متوكل ، و ماشاء الله مستوياتهم راقية يقدموا فى اداء مميز.


( ماهو المدرب الذى عنده فضل كبير على كولينا؟
اي مدرب دربني فى اى فريق عليه فضل وتاثير على .

 (  انت لعبت لمنتخب الشباب وحققتوا نتائج طيبة وصلتوا نهائيات الامم الافريقية من قبل حدثنا عن تلك الفترة ؟

(يا سلام يا سلام)  اقول شنو ولا أذكر شنو اااااااه الحمد لله بس اعفيني من الكلام في المنتخب دا والله تعب ما بعدها تعب بس في النهاية  نحمد الله علي اننا وصلنا الي  جزء من أحلامنا ونصفها  تبخرت بأسباب اداراية.


( ماهى الاسباب الادارية التى تسببت فى ضياع الحلم ؟

وللأسف كان الضحية السودان واللاعبين  الصراعات الإدارية الحصلت في المنتخب اي زول عارفها ادت الي زعزعة أفكار الجهاز الفني واللاعبين وبصراحة ما كان نفس الروح بتاعة اللعب فى التصفيات ،  مفروض الناس كان تتحد عشان السودان ولكن بقت زي سرقة مجهود الآخرين ودا السبب الاشتباكات وعدم الاستقرار للكل والخسارة كان الوطن الغالي بسبب صراعات شخصية وعبركم  نعتذر الوطن الغالي علي الفرصة الكبيرة التى  ضاعت والكان ممكن نحقق بيها شئ عالمي ونعبر ببلدنا ،  الطموح عند الشباب كان عالي شديد والله والتقرير البجي من المباريات الودية البرا كلها كانت إيجابية.

( قبل الوصول لنهائيات زامبيا تتذكر نتائج التصفيات ؟

نعم الأولي كانت  مع ملاوي وانسحبت ، والتانية مع كينيا الذهاب 1\1  والإياب ما مشينا لاننا كسبنا بالشكوي اشركوا لاعبين فوق للعمر المسموح به ،  الثالثة مع نيجيريا الذهاب في الخرطوم باستاد المريخ مغلوبين 1|2
،  والاياب في لاغوس غلبنا 4\3 واتاهلنا علي بطل نسخة كأس العالم 2015 .


 ( بعد هذه النتائج وتاهل المنتخب الشاب للنهائيات بزامبيا عام ٢٠١٧ ما هو الشئ الذى تغير ؟

جات المشاكل الادارية بعد اتاهلنا وبصراحة الشغف بقي ما زي الاول والسبب الصراعات الإدارية التركيز بقي خارج الميدان عكس السابق وبذلك تعرضنا للهزيمة مرتين امام  الكاميرون وجنوب افريقيا  وتعادلنا مع السنغال ، وضاع حلم الوصول لكاس العالم للشباب.

 ( ماهى اجمل مبارياتك مع منتخب الشباب ؟

كانت امام منتخب نيجيريا فى لاغوس فى التصفيات وحققنا الفوز فيها باربعة اهداف مقابل ثلاثة هذه اجمل مباراة  لعبتها في حياتي رغم اننا تعرصنا فيها لظلم وطرد ومواقف صعبة قبل المباراة فى التمرين الختامى ، واتذكر الشوط الاول انتهى بالتعادل بهدفين لكل وفى بداية الشوط الثانى اتقدم النيجيرى بالهدف الثالث ثم ادركنا التعادل والفوز ، ومنذ وصولنا لنيجيريا كنت بقول لزملائى اللاعبين ( بس نخت ايمان جوانا بنغلب والله) ، وما نعاين ان دا البطل نعاين لينا انفسنا ونكتب تاريخ للوطن ولنا كلاعبين باسمائنا ، واتذكر عندما انتهى  الشوط الاول انتهي 2\2
وقفت و قلت ليهم (  انتو عارفين قون واحد بمثل لينا شنو قون واحد نحنا في أمم افريقيا وباقى لينا 45 دقيقة موت حياء الناس تموت وتبذل مجهود يا عبرنا بالبلد يا رجعنا ناس عاديين والعملنا دا راح ساي)
، وقلت ليهم  نيجيريا لو طارت ما خسرانة لانها كل عام بتشارك لكن نحنا لو اتاهلنا بمثل ليها شي كبير  ولو ( طرنا احتمال تاني في جبنة ما نتلاقي حنفترق)
ونحنا عايزين نحافظ علي بعض اطول مدة والحمدلله استطعنا بعد ذلك ان نحقق الهدف المنشود بتحقيق الفوز رغم الامطار التى كانت تهطل اثناء المباراة.


( تاهل المنتخب وحدثت المشاكل الادارية فى النهائيات ثم ( تفرتق ) المنتخب صاح ؟

نعم المنتخب السنة التانية تم تغيير  المدير الجهاز الفنى بمدرب اجنبى  ومعتصم خالد وعملوا قائمة ابعدوا فيها جزء كبير من اللاعبين الكانوا موجودين من قبل وبعد ذلك  اترفع الي منتخب اولمبي وايضا  استبعدوا لاعبين كثر  من القائمة ، انا جئت الشباب فى الفترة  التانية كان الخواجة وخالد بخيت ومعتصم خالد حضرت معاهم مباراة بورندي والمنتخب ودع  وتاني ما استدعوني لي منتخب الا المنتخب الأول الذى شارك فى  سيكافا بقيادة محمد موسى.

 ( بعيدا عن كرة القدم والرياضة ما هى هوايات ابراهيم ؟

انا بحب الرسم والقراءة.

( بتقرا جرائد وبتعرف هذا الموقع ( كورة سودانية ) ؟

ما بقرا صحف كتير لكن بقرا التى تاتينى عبر الفيس لو فى موضوع شيق بدخل اقرا يعنى ممكن تقول حسب الموضوع ، ونعم  بعرف كورة سودانية وبتابع منه الاخبار فى احيان كثيرة ، وصراحة ان اشكركم على الاستضافة اليوم.


( هل لديك علاقة بالسياسة ورايك فى التغيير الذى حدث مؤخرا فى البلاد ؟

ما عندي اي ميول سياسة والتغير  كان لابد منه وان شاء الله البلد تتغير للافضل ونشوف سودان جديد واجمل.

ترك الرد

من فضلك ادخل تعليقك
من فضلك ادخل اسمك هنا