صحيفة كورة سودانية الإلكترونية

كلامهم ياربي صحي!!!

653
في السلك
بابكر سلك
كلامهم ياربي صحي!!!

 

 

*يقولون الكثير عنا كسودانيين
*واحد قال الانجليز لما جوا يمرقوا خواجة كبير منهم اعلن عن جائزة ضخمة لمن يقوم بانزال كرتونة من شباك عالي جدا بمكتبه
*فتدافع الذين يعملون في تلك المؤسسة
*والكل يمني النفس بالجائزة
*جاءوا من كل فج عميق
*ولاحظ الخواجة ان تركيز الناس كان حول عرقلة من يحاول الوصول للكرتونة
*وانتهي الزمن دون ان يصل احد للكرتونة ومن ثمة للجائزة
*قالوا الخواجة قال ده شعب لايتعاون لانجاز عمل ولكنه يجتهد لاجل عرقلة الآخرين
*قالوا كدة
*ولما استنكرنا ذلك الوصف
*حكوا لنا قصة اتفاقية الميرغني قرنق للسلام
*وقالوا البلد دي وقتها زعمائها كانوا اربعة
*تلاته الميرغني واتنين سياسيين والمريخ
*فقام السياسيان الاتنين بعرقلة الاتفاقية التي كان سيعم خيرها الوطن والمواطن
*لاجل أنهما لم يكونا من اطرافها
*فضاع علي البلد استقرار وسلام
*وضاع الجنوب ذاتو
*هم قالوا كدة
*وكتير من قصص الحسادة نرويها حتي نحن
*زي قصة الاتنين الماشين في الخلا
*وقابلهما شيطان الجرة
*قال ليهم شبيك لبيك اي واحد فيكم يطلب طلب احققو ليهو
*الاول قال داير قطيع ضان
*فووووو
*الشيطان جاب القطيع
*الشيطان قال للتاني داير شنو انت
*التاني قال ليهو داير قطيع مرافعين ياكلن قطيع ضان صاحبي ده
*برانا بنحكي قصص زي دي ونضحك
*لان شر البلية مايضحك
*فهل نحنا فعلا كما يقولون؟؟؟؟؟؟
*نحاول نقيس ما يقولون بمجتمعنا الرياضي
*موش حقيقة تسيطر علينا رغبة قوية في هزيمة وتقهقر الفريق المابنشجعوا اكتر من رغبتنا في تطور وازدهار الفريق البنشجعوا؟؟؟
*ولو عذرنا في ذلك الاهلة لاحساس الدونية الذي يسببه لهم الصفر الدولي
*وخوفهم من تحقيق الزعيم لجويات جديدة وهم اباطهم والنجم
*الما هلالاب نعذرهم كيف؟؟؟
*وتعالوا شوفوا داخل الاندية
*طبعا الولاء ياولاء البوشي بقي للاشخاص اكتر من الكيانات
*هنا بنلقي انصار فلان يتمنون اخفاق الكيان في بطولة لانها لم تتحقق في عهد شيخهم الذي له ولاءهم
*يعني مثلا الارباباب مابتمنوا الهلال يطلع من الصفر الدولي في عهد البرير
*والبريراب كذلك لايتمنون توفيق دولي للهلال في عهد كردنة
*حتي لايعايرهم الكاردينالاب بنجاح الرجل
*وهنا صرح كردنة قائلا
*انا رئيس الهلال رقم ٤٤
*قالوا انا بغير مدربين كتير عشان كدة الهلال ماجاب كاس من بره
*التلاتة واربعين رئيس القبلي المابغيروا مدربين كتير جابوا شنو؟؟؟
*ماياهو الصفر الدولي؟؟؟؟
*ايها الناس
*هذا الحال برضو في المريخ
*بدليل مريخاب برسلوا للزولفاني عشان مايجي المريخ
*لانو المجلس ماتبعهم
*وحروبات تشن في اي وقت دون اعتبار للمرحلة
*وهم الذين كانوا يقولون في عهدهم ان الوقت غير مناسب
*ومصلحة الكيان هي العليا
*ايها الناس
*شفتوا كيف اصبح مجتمعنا الرياضي؟؟؟؟
*يقيني ان شيطان الجرة لو دخل الاستاد وقال لكل الجماهير واللاعبين والمدربين والاداريين والحكام
*شبيكم لبيكم دايرين شنو اعملو ليكم
*لقالوا بدون ترد وبصوت واحد
*دايرين قطيع مرافعين ياكلن قطيع انجازات اي زول في وسطنا الرياضي ده
*ايها الناس
*ان الله لايغير مابقوم حتي يغيرون ما بأنفسهم
*فهل تغيرنا وطلبنا كلنا من شيطان الجرة قطيع ضان
*ام تمسكنا بحالنا وطلبنا قطيع مرافعين!!!!!!
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*الصباح بدري صحينا
*لقينا
*شبكة طاشة وموية قاطعة وكهربا يسمنا يا اخينا
*مشينا علي العربات يا والينا
*لا جاز لابنزينا
*والرغيفة بس الجلد البكتب عليهو الفرس زي ماقالوا لينا
*ونايمين حلمانين وحلمانينا
*ربنا يحقق امانينا
سلك كهربا
ننساك كيف والكلب قال مبروك الافران المصرية..ياربي جاية بي دقيقها وغازها وجازها وكهربتها ورقابتها؟؟؟؟؟
والي لقاء
سلك
قد يعجبك أيضا
2 تعليقات
  1. Hajjam يقول

    لازلت في حالك القديم ياعمك تنقو!!!

  2. Hajjam يقول

    لازلت في ضلالك القديم ياعمنا تنقو.

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد