صحيفة كورة سودانية الإلكترونية

كنا عارفين الحصل ده بحصل !!

782
بالعربي الكسيح
محمد الطيب الأمين
كنا عارفين الحصل ده بحصل !!
* في دنيا المحبة (الهدايا) المعنوية و(الحسية) يفوق تأثيرها الهدايا (العينية) .
* الكلمة الحلوة (أغلى هدية) .
* والحب يزدهر بالثقة والاهتمام.
* وكلاهما (هدية) .
*  قبل سنوات بعيدة قابلت عمنا الشاعر الراحل سيف الدسوقي في احدي منتديات أم درمان .
* وسألته عن قوله :(كنت تمنحني السعادة وليا تتفجر عطايا) .
* قلت له : لماذا قلت عطايا ولم تقل هدايا ؟
* فكانت إجابته : (العطايا ممكن تكون مواقف وممكن تكون مشاعر وممكن تكون قمصان) فهي أشمل وأكمل.
* ومن يتعود (عطايا الحب) يكون دوما في حالة إنتظار المزيد .
* ينتظر هذه العطايا في كل الظروف ويغضب إن توقفت .
* وأظن وليس كل الظن إثم أن سيف الدسوقي قد بكى في أغنية (المصير) عبر حنجرة  إبراهيم عوض لمجرد أن (عطايا المحبوب قد توقفت) .
* مع إنو العطايا ممكن تقيف بسبب ظرف يخص المحبوب فقط.
* وبما أن ذلك كذلك فإن الهلال الآن يمر بظرف يمنعه تقديم عطايا .
* كل جماهير الهلال عندما شاهدت الفريق أمام أهلى مروي وحي الوادي رددت : (كنت تمنحني السعادة وليا تتفجر عطايا) .
* والهلال في الوقت الراهن وبالمنطق لا بيمنحكم السعادة ولا بتفجر عطايا .
* وهذا منطقي جدا .
* اللهم إلا لو زول ما بيعرف كورة .
* لكن أي زول بيعرف كورة حقو يحمد الله على الستة نقاط .
* يقول ليك الهلال كعب .
* وانت دايرو يبقى كويس كسر رقبة ولا كيف ؟
* الطبيعي الهلال ما يكون كويس .
* وتعال اناقشك.
* الهلال أخر فريق في السودان بدأ إعداده.
* بعد توقف ٦ شهور تدرب الهلال ٩ أيام ودخل في الدوري .
* ستة شهور الجماعة نايمين وما صحوا إلا بعد ما استلم السوباط .
* كل الأندية بدأت إعدادها منتصف شهر سبعة وكان مقررا للدوري أن ينطلق منتصف شهر ثمانية .
* في الفترة ديك الهلال بدأ مع الجماعة وعمل تمرينين أتنين يوم (٧/٢٢) وفض المعسكر .
* ليه ؟
* قالوا عشان شداد قال (بيصفر عداد النقاط لكل الأندية وده ظلم للهلال) .
* يومها نصحنا الكاردينال وأتباعه (مدير الكرة والنقر أخوان) وقلنا ليهم الدوري منتصف ثمانية وفض المعسكر قرار غبي .
* قلنا ليهم اتجادلوا مع الإتحاد في موضوع تصفير النقاط لكن خلوا الهلال يواصل تدريباته حتى إذا وافق شداد على المجموعتين يكون الهلال جاهز .
* لكن النقر عمل لينا فيها مورينيهو.
* وقف التمارين بأمر من الإدارة السابقة .
* وربك رب الخير جاب الوزيرة البوشي وبتصريح من اللجنة العليا للطوارئ الصحية علقت الدوري .
* والأندية رغم التعليق واصلت إعدادها ومبارياتها الودية بينما الهلال نايم نوم .
* في أندية أجرت حوالي ٨٦ تمرين واربع مباريات ودية .
* ومن ضمن هذه الأندية حي الوادي نيالا .
* الهلال عمل ليهو (١٤) تمرين والناس دايراهو (يتفجر عطايا).
* الشغلانية ما رجالة يا أولاد الحلال .
* ولا عضلات .
* دي كرة قدم .. يعني لياقة وفورمة مباريات وإعداد ممرحل .
* لازم حي الوادي يكون الطرف الأفضل في اللقاء .
* فريق عمل ليهو ٨٦ تدريب داير انت تجي بتمارينك الما تامة عشرين تمرين تتفاصح ؟
* ما منطقي.
* لازم الهلال يكون كعب .
* وعشان ازيدكم من الشعر بيت : الهلال ح يواصل كعب كده لنهاية الدوري .
* ما تعشموا في كورة جميلة بعد توقف ٦ شهور .
* لو كل الأندية كانت واقفة معليش ممكن نلوم الهلال .
* لكن كل الأندية مدورة إعداد ما عدا الهلال .
* انت داير بعد توقف نصف عام داير تجي تلقى الهلال زي برشلونة مش؟
* بتحلم والله .
* ركزوا في النقاط احسن ليكم .
* وأنا خوفي من الإصابات وليس المستوى الضعيف .
* وبالفعل من أول مباراة بعد العودة تعرض عمار الدمازين للإصابة وده بسبب الإعداد الناقص وعدم الجاهزية .
* الفترة الحالية ما فترة تقييم لاعبين .
* ما في لاعب في الهلال جاهز.
* في الوزنو زاد وفي الطاشي شبكة وفي القرب ينسى الكورة .
* ما تقول لي كانوا بيلعبوا في الحواري .
* لو اللجنة الفنية دايرة تحدد المشاطيب بناء على تقارير الأداء  بعد كورونا ح تظلم اللاعبين وح تظلم الهلال.
* أطهر قبل كورونا كان زي الطلقة هسه بعد كورونا قرب ينسى الكورة .
* هل ده بيعني إنو أطهر ماسورة ؟
* وهل لو اللاعب (دراج) دخل التشكيلة القادمة وقدم مردود جيد هل ده بيعفيهو من الإعارة؟
* القصة ما كده .
* الهلال (سيفتح في اللعب بعد المباراة السادسة).
* ووقتها الدوري بكون إنتهى.
* الدوري ح نحسمو بالخبرة فقط .
* لو منتظرين أداء مدهش وكورة ممتعة والله العظيم ما ح تلقوها السنة دي .
* وحتى لو حصلت بتكون مجرد حماس لا يتكرر في مباراتين.
* لازم تعرفوا الهلال معذور ولو لعب كورة جيدة كتر خيرو ولو ما لعب برضو كتر خيرو .
* لما كنا بنقول الهلال ما يوقف التمارين رغم قرار البوشي كنا عارفين ده بيحصل .
* و..و..
* والله في .
قد يعجبك أيضا

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد