صحيفة كورة سودانية الإلكترونية

للأسف الهلال وافق على حل قضية (عجب والرشيد) ودياً !!

2٬254

بالعربي الكسيح

محمد الطيب الأمين

للأسف الهلال وافق على حل قضية (عجب والرشيد) ودياً !!

 

* كانت حسناء فاتنة الجمال وكثيرة الخُطاب .
* كل شئ فيها يُغري بالنظرة الحلال والنظرة الحرام والعياذ بالله.
* الله أداها كل حاجة ما عدا (الزوج) وهي تحبو بخفة نحو الأربعين من عمرها .
* الجماعة اقنعوها إنو في زول (عامل ليها عمل) .
* واتوهمت بعد ذلك .
* وزاد الوهم عندها أكثر عندما داهمها (صداع نصفي) لفترة تجاوزت العام ونصف العام .
* ودوها لشيخ بتاع (دجل) ما شيخ بتاع (قرآن) .
* (الدجال) ده قال ليها عندك عمل وعلاجك عندي .
* اها العلاج شنو ؟
* قال ليها : (جيبي لي نص وقية حِلبة) و(ضُفر من كراع كلب ميت ضربتو أمجاد) .
* يعني لو لقت كلب ميت ضربتو هايس ما ينفع .
* على شرط تكون ضربتو أمجاد.
* وكمان قال ليها جيبي لي : (رطل عسل نحل أصلي) و(فرخة مشوية) و(ديك ما بعوعي) .
* الزولة دي لقت الحاجات دي كلها ما عدا (الفرخة المشوية) .
* وبما أن ذلك كذلك فأن المريخ الشهير ب(الإصيفر) قد طلب حلاً ودياً لقضية الثنائي الهلالي (عجب والرشيد) .
* وأنا صراحة ما فهمت حل ودي كيف يعني؟
* حل ودي يعني محمد الرشيد يلعب لينا مباراة ويجي يلعب معاكم مباراة ولا كيف ؟
* ولا حل ودي رمضان عجب يلعب معاكم لكن ما يجب قون في الخصوم ؟
* قضية زي دي ما فيها (حل ودي) يا أولاد الحلال .
* ومع ذلك نحن بنستجيب لرغبتكم .
* وافقنا بالحل الودي .
* عشان خاطر الأخ غير الشقيق أبو عشرين الشهير ب(لون الدم) نحن موافقين على الحل الودي .
* لكن كمان عندنا شروط.
* قعدنا مع شيخ السوباط وورانا الشروط .
* اولاً : جيبوا لينا الزول الكتل الصحفي التنزاني بأم درمان .
* ثانياً : جيبوا لينا (خروف قرنو مكسور) وكان المفروض (ينضبح) في عيد الأضحى لكن ما (انضبح).
* يعني خروف سيدو جابو (يضحي) بيهو وفي آخر لحظة غير رأيو .
* وأهم حاجة نعرف ليه سيد الخروف غير رأيو.؟
* ثالثاً : ورونا السبب الحقيقي الخلاكم تخسروا بالسبعة أمام الوحدات الأردني
* واوع تقول لي البرد .
* ما حصل شفنا لينا فريق خسر بسبب البرد .
* ورونا السبب الحقيقي وبدون كضب.
* نحن السبب عارفنو لكن ما بنكتبو.
* رابعاً : جيبوا لينا عدد (١٦) نملة وعلى شرط تكون من الفاو.
* (نملة) ما من الفاو ما تجيبوها لينا .
* نحن دايرنها من الفاو تحديداً
* مزاج كده بس .
* ما تعملوا فيها مفتحين وتمشوا تجيبوا لينا (نمل) من القطينة .
* نحن نمل القطينة من نمل الفاو بنعرفو .
* خامساً : تورونا الزول (البصم) إنابة عن علاء الدين يوسف عندما ترك نار المريخ وجا إلي جنة الهلال .
* طبعا علاء الدين لحدي ما عقدو إنتهى مع المريخ ما رفع كأس.
* جا شاف الكاسات مع الهلال.
* سادساً : جيبوا لينا (بصل) ما فيهو ريحة بصل .
* بصل (كاتم ريحة) .
* سابعاً : رمضان عجب يلعب (حفيان) تلاتة مباريات في الدوري .
* ثامناً : تجيبوا الكورة الشالها زيكو .
* تاسعاً : محمد الرشيد يحلق صلعة في صالون الحرفاء في محلية كبكابية بولاية شمال دارفور .
* لازم يحلق في الصالون ده بالذات .
* عاشراً : ترجع لينا قروشنا على داير مليم ومعاها غرامة ودمعة دمعتين .
* دي الشروط العشرة .
* اي شرط ينقص من الشروط دي ما في تطبيع .
* وأهم شرط بتاع (النمل) الجاي من الفاو .
* لو وفرتوا الحاجات دي ولا تمشوا للسوباط تعالوا لي أنا بحلها ليكم .
* وبالمناسبة الشروط دي بسيطة شديد مقارنة بهذا الثنائي الهلالي المميز .
* أنا بفك ليك أفضل أتنين عندي (رمضان ومحمد الرشيد) يعني لازم انت تتعب .
* ما بنفرط في أولادنا بالساهل .
* المهم .. الكورة في ملعبكم .
* طبعاً اظرف حاجة قال ليك مجلس السيادة يتدخل في قضية (عجب والرشيد) .
* هو مجلس السيادة ده خلي يدخل يحل مشكلة الرغيف .
* ما تسمعوا الكلام الميت ده لا في مجلس سيادة أدخل ولا مجلس وزراء .
* وحتى لو أدخل ما بنخلي حقنا .
* يا تجوا زي اخوكم أبو عشرين (لون الدم) ويا كمان نقول ليكم (البقية في حياتكم) .
* وتبكوا بس .. عين قطرة وعين مس .
* و..و..
* ونواصل .

قد يعجبك أيضا
5 تعليقات
  1. نبيل يقول

    الظاهر انو مسمار الصاوي حار شديد … خلا الناس تهضرب ….الله يجازيك يالصاوي ……

  2. خالد يقول

    ح اتكلم بي لغتك الكسيحة الانت بتفهمها وبن الفصاحة ووين التحديات والعنترية وين اللسان الطويل قلنا ليكم طالما انتو ما فاهمين حاجة ما تتلامضو وتحلفو وتقسمو قال ودي قال خلاص دايرين تعملو رايحين لما لقيتو القصة أكبر منكم طظ فيكم وتاني طظ فيكم ونتحداكم واتعلمو انتو وادارتكم كيف تدار الأندية الكبيرة يا ناس سنة اولى إدارة ما دايرين معاكم ودي وابقو رجال طلعو أبو عشرين بره والله نعيد تسجيلو بعد ما سجلتوهو ونعيرو لي الشرطة القضارف ذي ماكنا بنعمل معاهو قبل سنه أوعه تجو تقولو تدخلات وكلام فاضي ده انتو طلعتو مواسير ذي لعيبتكم الشغله فهم وقانون يا ناس والله ما بخليكم وقال ايه تبكو بس عين قطرة وعين مس يااااخ ارتقي مرة واحدة واكتب بي فهم ,,,,أوووووف

  3. احمد التجاني يقول

    ههههههه منتهى الجمال والروعة كالعادة يا ابو حميد. الظاهر اخونا نبيل لما قرأ العنوان ارتاح وافتكر انو الموضوع فعلا تمت معالجته بالجودية ولكن لما قرأ مقالك الفخيم بقى يتحكى زي القرصته نمل من نمل الفاو. سيك سيك معلق فيك المريخ اتورط ورطة عدوك. طوال السنين الفاتت كانوا المريخات يتآمروا على الهلال وكمان يتبجحوا بعدما سجلوا بكري المدينة والغربال. يعني طولة لسان زي الكيزان. لحدما جاتهم الضربة في مقتل. احلى عشرة شروط ما دايرة اى اضافة.

  4. صالح يقول

    والله لم نسمع بمبادرة الحل الودي الا من اعلام فتحية، للتذكير انت أقسمت ان الثنائي ما حيلعبوا الا للهلال والايام بيننا،

  5. مصعب محمد يقول

    زي م عملوها مع كلتشي وفكري ومحمد عبد الرحمن لازم تسقوهم الكاس

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد